ސެޕްޓެމްބަރ މަހު ބާއްވާ ރިޔާސީ އިންތިހާބުގައި ދަ ޑިމޮކްރެޓްސް ގެ ފަރާތުން ވާދަކުރާނެ ކެންޑިޑޭޓަކު ހޮވުމަށް އެ ޕާޓީގެ ޕްރައިމަރީއަށް ހުޅުވާލުމުން ކުރިމަތިލެއްވީ އެންމެ ފަރާތެއް ކަމަށް އެ ޕާޓީން ބުނެފިއެވެ.
އެ ޕާޓީން ބުނީ ކުރމަތިލައްވާފައިވަނީ ހުޅުދޫ ދާއިރާގެ މަޖިލިސް މެމްބަރު އިލްޔާސް ލަބީބު އެކަނި ކަމަށެވެ.
އެ ޕާޓީގެ އަސާސީ ގަވާއިދު ބުނެފައިވާ ގޮތުން ޕްރައިމަރީގައި ވާދަކުރަން އެއް ކެނޑިޑޭޓަށް ވުރެ އިތުރަށް ކުރިމަތި ލާފައި ނުވާނަމަ، އެމީހަކު ހޮވާނީ ޕާޓީގެ އާންމު މެންބަރުންގެ މެދުގައި ނަގާ ފެންނަ ނުފެންނަ ވޯޓަކުންނެވެ. އަދި ރިޔާސީ ޓިކެޓު ކަށަވަރު ކުރުމަށްޓަކައި އިލްޔާސް އަށް ބޭނުންވާނީ މަދުވެގެން 10 އިންސައްތަ ވޯޓެވެ.
ފެންނަ ނުފެންނަ ވޯޓު ނެގުން ހަމަޖެހިފައި ވަނީ މިމަހުގެ 28 ވާ ހުކުރު ދުވަހުއެވެ.
ދަ ޑިމޮކްރެޓްސް އިން ރިޔާސީ ޕްރައިމަރީ އަށް ކުރިމަތިލުމުގެ ފުރުސަތު ހުޅުވާލާފައި މިމަހު 20 ވަނަ ދުވަހު ހުޅުވާލިއިރު، މުއްދަތު ހަމަވެފައިވަނީ ޖުލައި 22 ވަނަ ދުވަހުގެ ހަވީރު 4 ޖެހިއިރުއެވެ.
