މި ސަރުކާރުން ވެރިކަމަށް އައިސް ކުރަން ފެށި ކަމަކީ ކޮރަޕްޝަނާއި ވައްކަމުގެ ކަންކަން ހިންގޭނެ ގޮތްތައް ބެލުން ކަމަށް ދަ ޑިމޮކްރެޓްސް އިން ބުނެފިއެވެ.
އެ ޕާޓީން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ އިންތިގާލީ ޗެއާޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވިދާޅުވީ ރައީސް އިބްރާހިމް މުހައްމަދު ސޯލިހްގެ ސަރުކާރުން ކޮރަޕްޝަނާއި ވައްކަން ކުރަމުން ދަނީ ކުރީގެ ރައީސް އަބްދުﷲ ޔާމީންގެ ސަރުކާރާ ވާދައަށް ކަމަށެވެ.
”މި ސަރުކާރު ވެރިކަމަށް އައީ އިންސާފު ހޯދައިދޭން. ކޮރަޕްޝަނާއި ވައްކަން ހުއްޓުވުމަށް. ކޮރަޕްޝަނާއި ވައްކަން ހުއްޓުވައި ކުރީ ސަރުކާރުގައި ދައުލަތުން ކޮށްފައިވާ ވައްކަމުގެ ފައިސާތައް ހޯދުމަށް ވައުދުވަމުން.“ ހަސަން ވިދާޅުވިއެވެ.
އެހެންނަމަވެސް ހަސަން ލަތީފް ވިދާޅުވީ ކަމެއް ރަނގަޅު ކުރުމަށް ކަމަށް ބުނެ އަންނަ ބަޔަކަށް އެކަން ރަނގަޅު ނުކުރެވިދާނެ އެތައް ސަބަބުތަކެއް ދިމާވެދާނެ ކަމަށާއި އެކަމެއް ގޯސް ކުރުމަށްފަހު ވެރި ކަމަށް އައިސް އެކަމެއް ތަކުރާރު ކުރުމަކީ އަދި މާ ގޯސްކަމެއް ކަމަށެވެ.
އޭނާ ވިދާޅުވީ މި ސަރުކާރުން ވެރިކަމަށް އައިސް ކުރަން ފެށި ކަމަކީ ކޮރަޕްޝަނާއި ވައްކަމުގެ ކަންކަން ހިންގޭނެ ގޮތްތަކާއި ފުރުސަތުތައް ހުޅުވާލައިގެން އެ ކަންކަން އިންތިހާއަށް ކުރަން ފެއްޓުން ކަމަށެވެ.
ކުރީގެ ސަރުކާރުތަކުގައި ގެއްލުނު ފައިސާ ހޯދުމަކީ ވަރަށް ދަތި ކަމަކަށް ވާނެ ކަމަށާއި އެއީ އެ ކަންކަމުގެ ހެކި އަދި އެކަންކަން ހިނގާފައިވާގޮތް މިހާރު ފެންނަން ހުންނާނެ ކަމަކަށް ގަބޫލު ނުކުރެވޭތީ ކަމަށް ވެސް ދަ ޑިމޮކްރެޓްސް އުފައްދާފައިވާ ހަސަން ލަތީފް ވިދާޅުވިއެވެ.
