ފަތްކެޔޮ ނުވަތަ އާންމު ނަމުންނަމަ ދޮންކޭލަކީ ރާއްޖޭގައި އާއްމުކޮށް ލިބެންހުންނަ މޭވާގެ ބާވަތެކެވެ. އަދި ވަރަށް ގިނައިން ހައްދާ އަދި ހެދޭ ބާވަތެކެވެ. ދުނިޔޭގައި ތަފާތު ވައްތަރުގެ ބާވަތްތަކުގެ ދޮންކެޔޮ ހުންނައިރު، މީގެން ހަމަ ކޮންމެ ބާވަތަކީ ވެސް ހަށިގަނޑަށް އެތައް ފައިދާތަކެއް ލިއްބައިދޭ ބާވަތެކެވެ.
އެގޮތުން ދޮންކޭލަކީ އިންސާނާއަށް ކުރިމަތިވާ ގިނަ ބަލިތަކަކަށް ވެސް ހުރި ފަރުވާއެއްވެސް މެއެވެ. އޭގެ ތެރެއިން އެއް ކަމެއް ފާހަގަކޮށްލަމާ ހިނގާށެވެ. ބަނޑު ހިކި ފާޚާނާ ކުރަން އުނދަގޫ ވުމަކީ މިއަދު އަޅުގަނޑުމެންގެ ތެރޭގައި ވަރަށް އާންމުކޮސް ދިމާވާ ކަމެކެވެ. ކޮންމެ 100 އަކުން 50 މީހުންނަށް މި މައްސަލައާއި ކުރިމަތިލާންޖެހެއެވެ.
ބައެއް ސިއްޚީ މާހިރުން ވިދާޅުވާ ގޮތުގައި ދޮންކޭލަކީ ބަނޑު ހިކުމާއި ބޭރަށް ހިންގުމުން ސަލާމަތްވުމަށް އޮތް ރަނގަޅު ފަރުވާއެކެވެ. އެގޮތުން ދޮންކޭލަކީ ހަޖަމުކުރުމަށް ފަސޭހަކޮށްދޭ މާއްދާއެއް ކަމަށްފާ ފައިބާ ހިމެނޭ މޭވާގެ ބާވަތެކެވެ. އެހެންކަމުން ބަނޑު ހަރުވާނަމަ ދޮންވެފައިވާ ދޮންކެޔޮ ކެއުމުން މިކަން ލުއިވެގެންދާނެއެވެ. އަދި ޢެއްކޮށް ދޮންނުވާ ކޭލުގައި ރެސިސްޓެންޓް ސްޓާޗް ހިމެނޭ މިންވަރު ގިނަވުމުން ބަނޑު ހަރުކޮށްލައެވެ. ބޭރަށް ހިންގާނަމަ އެއްކޮށް ދޮންނުވާ ދޮންކެޔޮ ކެއުމުން މިކަމަށްވެސް ހައްލެއް ލިބިގެންދާނެއެވެ.
މީގެ އިތުރަށްވެސް ދޮންކޭލަކީ ވަރަށް ގިނަގުނަ ސިއްޚީ ފައިދާތަކެއް އެކުލެވޭ މޭވާއެކެވެ. އެގޮތުން ސިކުނޑީގެ މަސައްކަތްތައް ހަލުވިކޮށްދިނުމަށް ވެސް ދޮންކެޔޮ އެހީވެދޭކަމަށް ސިއްޚީ މާހިރުން ވިދާޅުވެއެވެ. އެގޮތުން ދޮންކޭލުގައި ހިމެނޭ ޕޮޓޭސިއަމް މާއްދާއަކީ ސިކުނޑި ޑިވެލޮޕްކޮށް ސިކުނޑީގެ މަސައްކަތްތައް ހަލުވިކުރުވައި މީހާގެ ސަމާލުކަން އިތުރުކޮށްދެއެވެ.
