ކުރީގެ ޑިފެންސް މިނިސްޓަރ އަދި ރައްޔިތުންގެ މަޖިލީހުގެ ދަނގެތީ ދާއިރާގެ މެންބަރު ކާނަލް މުޙައްމަދު ނާޒިމް އިސްވެ ހުންނަވައިގެން އުފެއްދެވުމަށް މަސައްކަތް ކުރައްވަމުން ގެންދަވާ ސިޔާސީ ޕާޓީ(މޯލްޑިވްސް ނޭޝަނަލް ޕާޓީ) އެމްއެންޕީގެ ލޯގޯ އާއްމުކޮށް ދައްކާލައިފި އެވެ.
މޯލްޑިވްސް ނެޝަނަލް ޕާޓީގެ ރަސްމީ ޓްވިޓަރ އެކައުންޓުން އާއްމުކުރެއްވި ޓްވީޓަކުން ވަނީ އެ ޕާޓީގެ ލޯގޯ އާއްމު ކުރައްވާފައެވެ. އެ ލޯގޯއިން ފެންނަނީ ގަދަ ނޫ ކުލައިގެ ބެކް ގުރައުންޑެއްގެ ތެރޭގައި ހުދު ކުލައިގެ ހަނދުފަޅިއަކާއި، ހަނދުފަޅީގެ އެތެރެއިން ހުދު ކުލައިގެ ތިން ސައިޒްގެ ތިން ތަރި އެވެ. އަދި ދިވެހިރުކެއްގެ ފަންތައް ރަންޒުކޮށްދޭ ފެހި ކުލައިގެ ހަ ފަންވެސް ލޯގޯއިން ފެނެއެވެ.
ކާނަލް ނާޒިމް އިސްވެ ހުންނަވައިގެން އުފެއްދެވުމަށް މަސައްކަތް ކުރައްވަނުން ގެންދަވާ މި ޕާޓީގެ މަސްއޫލުވެރިޔާއަކީ ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަޙްމަދު އުޝާމް އެވެ. މޯލްޑިްވސް ނެޝަނަލް ޕާޓީ އުފެއްދެވުމަށް އިލެކްޝަންސް ކޮމިޝަން (އީސީ) އަށް ހުށަހެޅުއްވީވެސް އުޝާމްގެ ނަމުގައެވެ.
މޯލްޑިވްސް ނެޝަނަލް ޕާޓީއަކީ ރައްޔިތުންގެ މަޖިލީހުގެ ފަސް މެންބަރަކު އިސްވެ ތިއްބަވައިގެން ވުޖޫދައް ގެނައުމަށް މަސައްކަތް ކުރާ ޕާޓީއެވެ. މި ޕާޓީ ވުޖޫދައް ގެނައުމަސް އިސްވެ މަސައްކަތް ކުރައްވައް ފަސް މެމްބަރުންގެ ތެރޭގައި ރައްޔިތުންގެ މަޖިލީހުގެ ދަނގެތީ ދާއިރާގެ މެންބަރު ކާނަލް މުޙައްމަދު ނާޒިމްއާއި، ތިމަރަފުށީ ދާއިރާގެ މެމްބަރު އަބްދުﷲ ރިޔާޟްއާއި، ނޮޅިވަރަމު ދާއިރާގެ މެމްބަރު މުހައްމަދު ނަޝީދު ޢަބުދުﷲ (މޮސްޓާ) އަދި ނިލަންދޫ ދާއިރާގެ މެމްބަރު އަބްދުލްމުހުސިން ހަމީދު (ޖޭފޯ) ގެ އިތުރުން ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަޙްމަދު އުޝާމް ހިމެނިވަޑައިގަންނަވައެވެ.
މި ޕާޓީ އުފެއްދުމުގެ މަސައްކަތް ފެށުމަށް އީސީން ހުއްދަ ދެއްވުމާއި ގުޅިގެން ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަޙްމަދު އުޝާމް ކުރެއްވި ޓްވީޓެއްގައި ވިދާޅުވެފައިވަނީ މި ޕާޓީއަލީ ރައްޔިތުންގެ މަޖިލީހުގެ ފަސް މެމްބަރަކު އިސްވެ ތިއްބަވައިގެން އުފެއްދެވުމަށް މަސައްކަތް ކުރައްވަމުން ގެންދަވާ ޕާޓީއެއް ކަމުގަ އެވެ.
