ހުނަރުވެރި، ކުޅަދާނަ ބަތަލާ މަރިޔަމް މަޖްދާ މޯލްޑިވްސް ނޭޝަނަލް ޕާޓީ (އެމްއެންޕީ) އާއި ގުޅިވަޑައިގަތުމަށް ފަހު މަޖްދާގެ ފޯމް ދަނގެތީދާއިރާގެ މެމްބަރ ކުރީގެ ޑިފެންސް މިނިސްޓަރ ކާނަލް މުޙައްމަދު ނާޒިމްއާއި ހަވާލް ކުރައްވައިފިއެވެ. މަޖްދާ އެމްއެންޕީއާއި ގުޅިވަޑައިގަތުމުން އެޕާޓީން ވަނީ މަޖްދާއަށް ވަރަށް ހޫނު މަރުހަބާއެއް ދަންނަވާފައެވެ.
އެމްއެންޕީ ވުޖޫދުވި ފަހުން ރާއްޖޭގެ ސިޔާސީ މަސްރަޙުގެ އިސް ސަފުގައި ޙަރަކާތްތެރިވާ ގިނަ އަދަދެއްގެ ބޭފުޅުންނާއި ޒުވާނުންގެ ތެރެއިން ގިނަބަޔަކު އެމްއެންޕީއާއި ގުޅިވަޑައިގަންނަވަމުން ގެންދަވާކަން ފާހަގަ ކުރެވެއެވެ.
އެމްއެންޕީ އުފެއްދުމުގައި އިސްކޮށް ޙަރަކާތްތެރިވެ ވަޑާއިގަންވާ ރައްޔިތުންގެ މަޖިލީހުގެ ދަނގެތީދާއިރާ ތަމްސީލް ކުރައްވާ ކުރީގެ ޑިފެންސް މިނިސްޓަރ ކާނަލް ނާޒިމް މީގެ ކުރިން ވިދާޅުވެފައިވަނީ އެމްއެންޕީއަކީ މުސްތަޤްބަލު އޮތް ޕާޓީއެއް ކަމަށާއި، ޒުވާނުން ބޭނުންވާ ދާއިރާތަކުން ކުރިޔަށް ދިއުމުގެ ފުރުޞަތާއި ޕާޓީގެ އިސް މަޤާމުތަކަށް ވަޑާއިގަތުމުގެ ފުރުޞަތުވެސް ޒުވާނުންނަށް ހުޅުވާލައްވާފައި ވާކަމުގައެވެ.
އެމްއެންޕީއާއި ގުޅީވަޑައިގަންނަވަމުން ގެންދަވާ އިސް ލީޑަރުންގެ ތެރޭގައި ކުރީގެ ރައީސުލްޖުމްހޫރިއްޔާ ދަރިކަނބަލުން އަދި ކުރީގެ ފޮރިން މިނިސްޓަރ ކަންވެސް ކުރައްވާފއއިވާ ދުންޔާ މައުމޫން އާއި އަދާލަތު ޕާޓީގެ އިސް ސަފުގައި ހަރަކާތްތެރިވެވަޑައިގަންނަވާ ކަނބަލެއްކަމުގައިވާ ކުރީގެ ޖެންޑަރ މިނިސްޓަރ ކަންވެސް ކުރައްވާފައިވާ ސިދާތާ ޝަރީފު ވެސް ވަނީ އަދާލަތުޕާޓީ ދޫކުރައްވައި އެމްއެންޕީއާއި ގުޅިވަޑައިގެންފަ އެވެ. މީގެ އިތުރުން ރާއްޖޭގެ ފުންނާބު އުސް ފަންނާނުންނާއި އާއްމުންގެ ގިނަ ބަޔަކުވެސް އެމްއެންޕީއާއި ގުޅެމުން ދާކަން ފާހަގަ ކުރެވެއެވެ.
އިލެކްޝަންސް ކޮމިޝަނުން މޯލްޑިވްސް ނޭޝަނަލް ޕާޓީ (އެމްއެންޕީ) ސިޔާސީ ޕާޓީއެއްގެ ގޮތުގައި އުފެއްދުމުގެ ހުއްދަ ރައްޔިތުންގެ މަޖިލީހުގެ ވިލިމާލެ ދާއިރާ ތަމްސީލްކުރައްވާ އަޙްމަދު އުސާމް އަށް ދެއްވާފައިވަނީ މިދިޔަ އޯގަސްޓު މަހުގެ 15 ވަނަ ދުވަހު އެވެ.
އެމްއެންޕީ އުފެއްދުމުގައި އުޝާމްގެ އިތުރުން ކުރީގެ ޑިފެންސް މިނިސްޓަރ އަދި ރައްޔިތުންގެ މަޖިލީހުގެ ދަނގެތީދާއިރާ ތަމްސީލްކުރައްވާ މުޙައްމަދު ނާޒިމް( ކާނަލް ނާޒިމް)އާއި ރައްޔިތުންގެ މަޖިލީހުގެ ތިމަރަފުށި ދާއިރާގެ މެންބަރު ޢަބްދުﷲ ރިޔާޒާއި، ނިލަންދޫ ދާއިރާގެ މެންބަރު އަބްދުލްމުހުސިން އަބްދުލްހަމީދު (ޖޭ4)ގެ އިތުރުން ނޮޅިވަރަމް ދާއިރާގެ މެންބަރު މުހައްމަދު ނަޝީދު (މޮސްޓާ) ވެސް ގެންދަވަނީ އިސްދައުރެއް ފުރިހަމަކުރައްވަމުން ނެވެ.
އެމްއެންޕީން ހާމަކުރެއްވި ގޮތުގައި އެމްއެންޕީ އުފެއްދުމަށް ބޭނުންވާ 3،000 މީހުންގެ ސޮއި މިހާރުވަނީ ހަމަވެފައެވެ. ނަމަވެސް އެމްއެންޕީ އުފެއްދުމަށް އިލެކްޝަންސް ކޮމިޝަނަން ހުށަހަޅުއްވާއިރު 5،000 މެމްބަރުންނަށްވުރެ ގިނަ މީހުންގެ ސޮޔާއިއެކު އިލެކްޝަނަށް ހުށަހެޅުމަށް މަސައްކަތް ކުރައްވަމުން ގެންދަވާކަމަށްވެސް އެމްއެންޕީން ހާމަކުރައްވަ އެވެ.
