ދިވެހިރާއްޖޭގެ ރީތި މަންޒަރުތައް ދައްކުވައިދޭ މަލަޔާޅަމް ފިލްމް ”ކްރިސްޓީ“ގައި ދަނގެތީގެ ރީތި މަންޒަރުތައް ހިމެނޭ ލަވައެއް ޝޯޝަލް މީޑީއާގައި ދައުރުވާން ފަށައިފި އެވެ.
ދަނގެތީގެ ރީތި މަންޒަރުތައް ހިމެނޭ މަލަޔާޅަމް ފިލްމް ސިނަމާތަކަށް ނެރެފައިވަނީ މި އަހަރުގެ ފެބްރުއަރީ މަހުގެ ތެރޭގަ އެވެ. ދަނގެތީގެ ހިތްގައިމުކަމާއި ހިތްފަސޭހަކަން ހިމެނޭ ޤުދުރަތީ ރީތި މަންޒަރުތައް ދައްކުވައިދޭ މި ފިލްމަކީ ދަރިވަރަކު އޭނާގެ ޓިއުޝަން މުދައްރިސް ކަމުގައިވާ ކްރިސްޓީ ދެކެ ލޯބިވެގެން ހިނގާ ކަންތަައްތަކެއްގެ މައްޗަށް ބިނާކޮށް ލިޔެފައިވާ ވާހަކައަކަށް ކުޅެފައިވާ ފިލްމެކެވެ.
ފުރާވަރަށް އަރައިގެން އަންނަ ފިރިހެން ދަރިވަރު ރޯއީ (މެތިއު ތޯމަސް) އޭނާގެ ޓިއުޝަން ޓީޗަރު ކްރިސްޓީ (މަލާވިކާ މޯހަނަން) ދެކެ ލޯބިވެވިގެން ދުވަސްތައް ގުނަމުން ދިޔައިރު‘ މި ދެންނެވި ފިރިހެން ދަރިވަރަށް ކްރިސްޓީ ގެއްލެނީ ޓީޗަރެއްގެ ގޮތުގައި ކްރިސްޓީ ރާއްޖޭގެ ރަށަކަށް ދާންޖެހުމާއިގުޅިގެންނެވެ.
މަލަޔާޅަމް ފިލްމް ”ކްރިސްޓީ“އާއިމެދު ތަފާތު އެކިއެކި ވާހަކަތައް ސޯޝަލް މީޑިޔާގައި އަންނަނީ ދައުރުވަމުންނެވެ.
މި ފިލްމުގެ ކޮންސެޕްޓަކީ އާންމު ކަމަކަށްވިޔަސް ނުރަނގަޅު ކަންތައްތަކެއް ފަތުރާފަދަ ކޮންސެޕްޓެއްކަމަށް ގިނަ ފަރާތްތަކުން އަންނަނީ ވާހަކަ ދައްކަމުންނެވެ.
ނަމަވެސް މި ފިލްމުގެ އެންމެ މަޝްހޫރު ވެގެން ދިޔަ އެއް ލަވަ ”މާލިޕައްޓޫ“ގައި ހިމެނޭ ރާއްޖޭގެ ޤުދުރަތީ ރީތި މަންޒަރުތަކާއި ދަނގެތީގެ ހިތްގައިމު މަންޒަރުތައް ވަނީ އެތައް ބައެއްގެ މަޤްބޫލުކަން ހޯދާފައެވެ.
މި ފިލްމްގައި ރޯއީ އޭނާގެ ލޯބިވެރިޔާކަމަށް ދެކޭ ކްރިސްޓީނާ ކޮބައިތޯ ބަލައިލާ މަންޒަރު ފެނިގެންދަނީ ”މާލިޕައްޓު“ ލަވައިން ނެވެ. މި ލަވައިގަ ދުނިޔޭގެ ޗާޓުން ރޯއީ ދިވެހި ރާއްޖެ ހޯދަ އެވެ. މިލަވައިން ކްރިސްޓީއާއެކު ރާއްޖޭގެ މިރީތިކަން ކަމުދިޔަ ފަރާތްތައްވެސް މަދެއް ނޫނެވެ.
