އަހުމަދު އާއި ފާތިމަތަކީ ވަރަށް ލޯބިން އުޅުނު ދެމަފިރިއެކެވެ. ކައިވެނިކުރިތާ ގާތްގަނޑަކަށް ދެ އަހަރު ދުވަސް ވެފައިވާއިރުވެސް، އެދެމެދުގައި ހިތްހަމަނުޖެހުމެއް ފެނިފައެއް ނުވެއެވެ. އަހުމަދު ވަރަށް ގަޔާވެގެން ފާތިމަތު ގޮވައިގެން މަންމަގެ ގާތަށް ދިޔަ ދުވަހު، މަންމަ ޒުލޭޚާވެސް ބުނެފައިވަނީ ފާތިމަތަކީ ރީތި، މަޑުމައިތިރި ކުއްޖެއް ކަމުގައެވެ. ނަމަވެސް، ކަންތައްތައް ބަދަލުވާން ފެށީ މަޑުމަޑުންނެވެ.
ޒުލޭޚާ މައިންބަފައިންގެ ގެއިން އަހުމަދުމެން ދިރިއުޅޭ ކުޑަ އެޕާޓްމަންޓަށް ބަދަލުވީ، އޭނާގެ ހަށިގަނޑަށް ބަލިކަމުގެ އަސަރު ފެންނަން ފެށުމުން، އަހުމަދުގެ އެދުމުގެ މަތީންނެވެ. ފާތިމަތުވެސް ވަރަށް އުފަލުން އެކަމާ އެއްބަސްވިއެވެ. އޭނާ ބޭނުންވީ އަހުމަދުގެ މަންމައަށް ހެޔޮކޮށް ހިތާށެވެ.
ޒުލޭޚާ އައިފަހުން މަދު ދުވަސްކޮޅެއް ފަހުން، އޭނާ، ފާތިމަތާ ދޭތެރޭ ދައްކާ ވާހަކަ ބަދަލުވާން ފެށިއެވެ. ފުރަތަމަ އާދައިގެ ކުދިކުދި ޝަކުވާތަކެވެ. ހިތުގައި ޖެހޭފަދަ ބަސްތައް އަހުމަދު ދުލުން ބުނާނެއެވެ. ފާތިމަތު އެކަމަށް ސަމާލުކަންދީ، އިތުރަށް މަސައްކަތްކުރިއެވެ. ނަމަވެސް، މަންމަގެ ޝަކުވާތައް ދުވަހަކަށް ވުރެ ދުވަހަކު އިތުރުވެ، އެއީ ފާތިމަތުގެ ކޮންމެ ކަމަކަށް އަމާޒުވާ ފަދަ ޝަކުވާއަކަށް ބަދަލުވާން ފެށިއެވެ.
”ދަރިފުޅާ، ފާތިމަތު އެކަނި މޫދަށް ދާން އުޅުނު، ފިރިމީހާގެ ހުއްދަނެތި އެކަނި މޫދަށް ދިޔުން ހުއްދައެއް ނޫނޭ.“ މަންމަގެ އަޑު އަހުމަދުގެ ކަންފަތުގައި ގުގުމާލިއެވެ.
”މަންމާ، ފާތިމަތު އޭނަގެ ރައްޓެހިންނާއެކު ދިޔައީ. އަހަރެން ހުއްދަ ދިނީމާ ދިޔައީ.“ އަހުމަދު ދިފާއުވާން މަސައްކަތް ކުރިއެވެ.
”ސާބަސް ދަރިފުޅަށް، ބުނާހާ ކޮންމެ ކަމަކަށް ހުއްދަ ދެމުން ތިދަނީ ދެން ފެންނާނީ ދަރިފުޅާ މަންމައާ ޖައްސާ ދަރިފުޅު ކައިރީ މަންމަ ކުށްވެރިކޮށް ވާހަކަ ދައްކާތަން. އެދުވަހަކުން މަންމަ މިގެންވެސް ނޭރުކޮށް ދަރިފުޅާ މަންމަ ވަކިވާނީ.“ ޒުލޭޚާގެ ބަސްތައް އަހުމަދުގެ ސިކުނޑީގައި ބިންވަޅު ނެގިގެން ދިޔައެވެ.
ފުރަތަމަ އަހުމަދު އޭނާގެ މަންމަގެ ވާހަކަތަކަށް މާބޮޑު ސަމާލުކަމެއް ނުދިނަސް، ދުވަސް ފާއިތުވާ ވަރަކަށް އޭނާގެ މަންމަ ދައްކާ ވާހަކަތައް އިތުރުވެ، ފާތިމަތާ ދޭތެރޭ އޭނާގެ ހިތުގައި ޝައްކުގެ ބޮޑު ކޮޅިގަނޑެއް އުފެދިއްޖެއެވެ. އަހުމަދުގެ އޯގާތެރިކަން މަޑުމަޑުން ފާތިމަތާ ދުރަށް ދާންފެށިއެވެ. ލޯބި ބަސްތައް މަދުވެ، ހަރުކަށި ހިތުގައިޖެހޭ ފަދަ ބަސްތަކުން ވާހަކަދައްކަން ފެށިއެވެ. ފާތިމަތު ހައިރާންވެ، ހިތްދަތިވިއެވެ.
”އަހުމަދު، ކިހިނެއް ވެފައި ތިހިރީ؟ ކުރިން އަހަރެންނަށް މިހެނެއް ނުހަދަމެއްނު؟“ ފާތިމަތު ޝަކުވާކުރިއެވެ.
”ތިހެން ހަދަން ޖެހެންޏާ މިހެންވެސް ހަދާނަން. ތިހާވަރަށް އަހަރެންގެ ކަންތައްތަކާ ބެހެން ނުޖެހޭ،“ އަހުމަދު އޭނާގެ މޫނު އަނބުރާލަމުން ބުންޏެވެ.
”އަހަރެން ކޮން ކަމެއްކޮށްގެންތޯ އަހުމަދު އަހަންނާ ދޭތެރޭ ތިގޮތަށް ކަންތައް ކުރަނީ؟“ ފާތިމަތުގެ ލޮލުން ކަރުނަ ފައިބަން ފެށިއެވެ.
”ތި ހިލޭ ކަމެއްގައި އުޅޭނެ ވަގުތު ހުސްކުރުމުގެ ބަދަލުގައި ގެއަށް ސަމާލުކަން ދިނިއްޔާ މާރަނގަޅުވާނެ.“ އަހުމަދުގެ ބަސްތައް ހޫނުވެގެން ދިޔައެވެ.
މިފަދަ ހާލަތްތައް ދިމާވާންފެށުމުން ފާތިމަތު އޭނާގެ ކަންތައްތައް ކުރިއަށްވުރެ ރަނގަޅަށް ކުރުމަށް އިތުރަށް މަސައްކަތްކުރިއެވެ. ނަމަވެސް، އެއްވެސް ކަމެއް ރަނގަޅުވާހެން ހީއެއް ނުވިއެވެ. ޒުލޭޚާ އަބަދުވެސް ފާތިމަތުގެ ކުށެއް ހޯދާފައި އަހުމަދުގެ ކަންފަތަށް ވައްދައެވެ. އެއްދުވަހަކު ފާތިމަތު އޭނާގެ ރައްޓެހި އަންހެން ކުދިންނާއެކު ސައިބޯން ދިޔުމުން، އަހުމަދުގެ މަންމަ އޭނައަށް ގުޅައި ދޭތެރެ ޖައްސާލިއެވެ.
”ދަރިފުޅަށް ހެޔުވާނެ ކޮންމެ ގޮތެއްވެސް، އަނެއްކާވެސް ފިރިހެން ގުރޫޕަކާ އެކީ ހެމުން ގޮއްސި އެމީހުންގެ ސައިކަލު ފަހަތަށް އަރައިގެން. މަންމަ އަށް ހަމަ ކެތްނުވެގެން ދަރިފުޅު ކައިރީ ބުނެލީ ހަމަ.“ ޒުޅޭހާ ފޯނު ބާއްވަމުން ނުބައި ގޮތަކަށް ހީލިއެވެ.
ފާތިމަތު ގެއަށް އައިސް އަހުމަދުއަށް ޝަކުވާކުރިއެވެ.
”އަހުމަދު، އަހަރެން ސައިބޯން ދިޔައީމާ މަންމަ އަހަންނަށް ގުޅައިފައި ވަރަށް ހުތުރުކޮށް އެއްޗެހި ކިޔާލައިފި. އަހަރެން ވަރަށް ދެރަވެއްޖެ.“
”އެހެން ކަމަށްވަންޏާ ސައިބޯން ނުދާންވީއެއްނު! މަންމައަށް ބުނެވޭނެއެއްނު އެއްޗެހި، ތިހެން ހިލޭ ކަންކަމުގައި އުޅޭނެ ވަގުތު ހުސްކުރުމުގެ ބަދަލުގައި ގެއަށް ސަމާލުކަން ދިނިއްޔާ މާރަނގަޅުވާނެ.“ އަހުމަދު ހަރުކަށިކަމާއެކު ބުންޏެވެ.
”އަހުމަދު! އަހަރެން ބުނެފަ ހުއްދަ ހޯދައިގެން ދިޔައީ ސައިބޯން! އެއީ ބޭކާރު ކަމެއްތަ؟ ތި ބުނާ ބަސްތަކަށް ވިސްނާލިންތަ؟“ ފާތިމަތުގެ ލޮލުން ކަރުނަ އޮހޮރެން ފެށިއެވެ.
”ތިހާވަރަށް އަޑުގަދަކުރަން ނުޖެހެ. މަގޭ މަންމަ އެބުނަނީ ތެދު. ތީ ތާކުންތާކު ޖެހޭ މީހެއް ނޫން! ތީ އެކަކަށްވެސް ފައިދާހުރި މީހެއް ނޫން!“ އަހުމަދު އޭނަގެ އަޑު އުފުލާލަމުން، ފާތިމަތުގެ އަތުގައި ހިފާލާފައި ގަދަކަމުން ކޮޓަރިއަށް ވައްދާލިއެވެ.
”މިހާރު ދެން ތި ކުނި މޫނު ނުދައްކާ މަގޭ ކައިރީގައި.“
ފާތިމަތު އެނދުމައްޗަށް ވެއްޓި ރޮމުން ދިޔައެވެ. އަހުމަދު އޭނަގެ އަތުގައި ހިފާލާފައި ގަދަކަމުން އޭނަ ކޮޓަރިއަށް ވެއްދުމާއި އަހުމަދުގެ ބަސްތަކާއި އޭނަގެ އަމަލުތައް މީގެ ކުރިން ދުވަހަކުވެސް މިހާ ހިސާބަށް ނުދެއެވެ. ފާތިމަތުގެ ހިތް ފުނޑުފުނޑުވެގެން ދިޔައެވެ. އޭނާ ދެން މިގޭގައި ނޫޅޭނެކަމަށް އޭނާގެ ހިތް ބުންޏެވެ.
މުޅި ރޭ ފާތިމަތު ރޮމުން ދިޔައީ ލޮލުގައި ނިދީގެ ކަންފުޅެއްވެސް ނެތެވެ. ފަތިސްވުމާއެކު އޭނާ ކޮޓަރިން ނުކުމެ، އެހެން ކޮޓަރީގައި ހުރި އޭނާގެ ފޮށިގަނޑު ހުޅުވާލާފައި އޭނަގެ ހެދުންތައް އަޅަން ފެށިއެވެ. އަހުމަދު ހޭލައި އައިސް މި މަންޒަރު ފެނުމުން ހައިރާންވެގެން ދިޔައެވެ.
”ކީއްކުރަން ތިއުޅެނީ؟“ އަހުމަދުގެ އަޑުގައި ހައިރާންކަން ވިއެވެ.
”އަހަރެން މި ދަނީ. އަހަރެންނަށް އިތުރަކަށް މިކަންތައްތަކަށް ކެތް ނުކުރެވޭނެ.“ ފާތިމަތު ބުންޏެވެ.
”ތިހެން ގޮސްފިއްޔާ މަންމައަށް ކިހިނެއްވާނީ؟“ އަހުމަދުގެ މޫނުމަތިން ކަންބޮޑުވުން ފާޅުވާން ފެށިއެވެ.
”އަހަރެންނަށް މަންމައެއް ނެތް. އަހަރެންނަށް ހުރީ ފިރިމީހެއް. އެކަމަކު އަހަންނަށް ފިރިމީހެއްވެސް މިހާރު ނެތް! އަހަރެންނަށް ފެނިގެން މިދަނީ މަންމަގެ ބަހަށް ހެއްލިގެން އަހަރެންނަށް އަނިޔާކުރި މީހެއް! އަހަރެންނަށް ފެންނަނ މިދަނީ މަންމައަށް ބިރުން އޭނަގެ އަނބިމީހާއަށް އަނިޔާކުރި މީހެއް!“ ފާތިމަތުގެ އަޑު ތުރުތުރުލަމުން ދިޔައެވެ.
އަހުމަދު އެނބުރި މަންމަގެ ކޮޓަރިއަށް ދިޔައެވެ. ފާތިމަތުގެ ވާހަކަތައް އޭނަގެ ސިކުނޑީގައި ގުގުމާލިއެވެ. މަންމަ ދޮރުމައްޗަށް ނުކުތްތަން ފެނުމުން އަހުމަދު ބުންޏެވެ.
”މަންމާ، ފާތިމަތު މިހިރީ ދާން ތައްޔާރުވެގެން. މަންމަ އަބަދުވެސް އޭނައަށް އަނިޔާކުރި. އަހަރެންވެސް މަންމަގެ ބަސްތަކަށް ހެއްލިގެން އޭނަގެ މައްޗަށް އަނިޔާވެރިވީ. މަންމަ އަބަދުވެސް އޭނަގެ ކުށެއް ހޯދާފައި އަހަރެންނާއި އޭނަ ދުރަށް ޖެއްސީ. އަހަރެންނަށް އެނގިގެން މިދިޔައީ މަންމަގެ ސަބަބުން އަހަރެންނަށް މަގޭ އުފާވެރި ދިރިއުޅުން ގެއްލިގެންދާކަން!“ އަހުމަދުގެ އަޑުގައި ހިތާމައާއި ރުޅިވެރިކަން އެކުލެވިފައިވިއެވެ.
ޒުލޭޚާގެ މޫނުމަތިން ފެނުނީ ހައިރާންކަމާއި، ޖެހިލުންވުމުގެ އަސަރެވެ. އޭނާ ބަލާލީ ފާތިމަތު ކޮޓަރީގެ ދޮރުމަތީގައި ހުރެ، އަޑުއަހަން ހުރި ތަނަށެވެ. ”ދަރިފުޅާ، ތިކަހަލަ ވާހަކަ ދައްކަންވީ ކީއްވެގެންތަ؟ މަންމަ ހެޔޮކޮށް ނޫނީ ދަރިފުޅަށް ގޯސްވާނެ ކަމެއް ނުކުރާނެއެއްނު! އޭނަ، އެ ފާތިމަތު، ތި ދަރިފުޅާ ދޭތެރޭ ކަންތައް ކުރާ ގޮތުގެ ވާހަކަ ދައްކަން ޖެހެނީ، ދަރިފުޅުގެ ރަނގަޅަށްޓަކައި!“ ޒުލޭޚާގެ އަޑު ތަންކޮޅެއް މަޑުވެގެން ދިޔައެވެ.
”ރަނގަޅަށްޓަކައޭ؟ މަންމަ ހެޔޮކޮށް ހިތީމާ ދޯ މިހާރު މިގޭގައި ފިރިއަކާއި އަންބަކު ނެތިގެން މިދަނީ؟ ދެމީހުންގެ ދެމެދުގައި ހަމަޖެހުމެއް ނެތިގެން މިދަނީ؟ އަހަރެންނާއި ފާތިމަތަކީ މީގެ ދެ އަހަރު ކުރިން ވަރަށް ލޯބިން އުޅުނު ދެމަފިރިއެއް. މަންމަ އައިސް މިތާ އުޅުނު ފަހުން ކޮންމެ ދުވަހަކު އަހަރެންނަށް ފާތިމަތުގެ ކުށެއް ފެންނަން ފެށީ. މަންމަގެ ވާހަކަތަކަށް އަހަރެން ހެއްލުނީ. އަހަރެންގެ ހިތުގައި އޭނައާ ދޭތެރޭ ޝައްކު އުފެއްދީ މަންމަ. މަންމަގެ ވާހަކަތަކުން އަހަރެން ފާތިމަތަށް އަނިޔާކުރީ.“ އަހުމަދުގެ އަޑު ބާރުވެ، ދެލޯ ރަތްވެފައި ހުއްޓެވެ.
”މަންމަ އަކީ ހަމަ އެމީހާ، އަހަރެންނާއި ފާތިމަތު ދުރަށް ޖައްސަން މަސައްކަތްކުރި މީހާ. އަހަރެންނަށް މަންމަގެ ސަބަބުން މަގޭ އުފާވެރި ދިރިއުޅުން ގެއްލިގެން މިދަނީ.“
ޒުލޭޚާ ދެކޮޅަށް ބޯ ހޫރާލިއެވެ. ”ނޫނެކޭ ދަރިފުޅާ، އެހެނެއް ނުވާނެ. މަންމަ ބޭނުންވީ ހަމައެކަނި ދަރިފުޅު އުފަލުގައި ހުރުން.“
”އުފަލުގައި ހުރުމަށްޓަކައޭ؟ އުފަލުގައި ހުރެވޭނެ ގޮތެއް މަންމަ ހެދިހެން ހީވޭތަ؟ މަންމަގެ ސަބަބުން މިހާރު ފާތިމަތު މިގޭގައެއް ނޫޅޭނެއެއްނު! އަހަރެން ކިހިނެއް އުފަލުގައި އުޅެންވީ؟“ އަހުމަދު ރުޅިގަދަވެގެން ގޮސް މޭޒުމަތީ އޮތް ބިއްލޫރިގަނޑު ޖެހިޖެހީނުން ތަޅާލިއެވެ.
ފާތިމަތު، ކޮޓަރީގެ ދޮރުމަތީގައި ހުރެ އަޑުއަހަން ހުރެފައި، އޭނާގެ ފޮށިގަނޑު ދަމާފައި ދޮރުން ބޭރަށް ނުކުތެވެ.
”އަހަރެން މިދަނީ. އަހުމަދު، މަންމަގެ ބަސްތަކަށް ހެއްލިގެން އަހަރެންނަށް މި ކުރި އަނިޔާތަކަށް އަހަރެންނަށް މާފެއް ނުކުރެވޭނެ. ދެން ދުވަހަކުވެސް މިގޭގައެއް ނޫޅޭނަން.“ ފާތިމަތު މިހެން ބުނެ ހިނގައިގަތެވެ.
އަހުމަދު އަވަސްއަވަހަށް ފާތިމަތުގެ ފަހަތުން ގޮސް އޭނަގެ އަތުގައި ހިފާލިއެވެ.
”ފާތިމަތު، މިހާރު އަހަރެންނަށް މި އެނގުނީ. އަހަރެންނަށް މާފުކޮށްދީ! އަހަރެން މަންމަގެ ބަހަށް ހެއްލިގެން ކުރެވުނު ކަންތައްތަކަށް މާފުކޮށްދީ. ދެން މިކަހަލަ ކަމެއް ނުވާނެއޭ. އަހަރެންގެ ކައިރީގައި ހުރެދީ.“
”ދެން ވަގުތު ފާއިތުވެއްޖެ، އަހުމަދު. މިހާރު އަހަރެންގެ ހިތް ވަނީ ފުނޑުފުނޑުވެފަ. އަހަރެންނަށް އިތުރަކަށް ނުކެތްކުރެވޭނެ. މަންމައަށް ބިރުން އޭނަގެ އަނބިމީހާއަށް އަނިޔާކުރި މީހަކާ އެކު އަހަރެންނަކަށް ނޫޅެވޭނެ.“ ފާތިމަތު އަހުމަދުގެ އަތް ދުރުކޮށްލަމުން ބުންޏެވެ. އޭނަގެ ލޮލުން ކަރުނަ ފައިބަމުން ދިޔައިރުވެސް އޭނަ ހުރީ ވަރަށް ހަރުކަށިކަމާއެކުގައެވެ.
ފާތިމަތު ދިޔުމަށް ދޮރު ހުޅުވާލިއެވެ. ޒުލޭޚާ ހުރީ ހިމޭނުންނެވެ. އޭނާގެ ދަރިފުޅުގެ ހާލު ދެކެ، އޭނަ ކުރި ކަންތަކުގެ ނަތީޖާ އޭނަގެ ކަންފަތަށް އިވެމުން ދިޔައިރުވެސް، އޭނަގެ ހިތުގައި އިތުރު ޝަކުވާތަކެއް އެބަހުއްޓެވެ. ނަމަވެސް، އަހުމަދު އޭނައަށް ބަލާލި ގޮތުން އޭނަ އިތުރު ބަހެއް ބުނަން ނުކެރުނެވެ.
ފާތިމަތު ގެއިން ނުކުމެގެން ދިޔައިރު އަހުމަދު ހުރީ ދޮރުކައިރީގައެވެ. އޭނަ އަތް ދިއްކޮށްލިނަމަވެސް ފާތިމަތު އެނބުރިވެސް ނުބަލައެވެ. އޭނަގެ ފިޔަވަޅުތައް އަވަސްކޮށްލާފައި އެނބުރި ނުބަލާ ދިޔައީއެވެ. އަހުމަދުގެ ދެލޮލުން ކަރުނަ ފައިބަން ފެށިއެވެ. އޭނަގެ ލޯބިވާ އަނބިމީހާ އޭނަ ދޫކޮށް ދިޔައީއެވެ. މަންމަގެ ބަސްތަކަށް ހެއްލިގެން އޭނަގެ ދިރިއުޅުން ފުނޑުފުނޑުކޮށްލީއެވެ.
އެ ދުވަހުން ފެށިގެން އަހުމަދު އުޅުނީ ހިތާމައިގައެވެ. އޭނަގެ ގޭތެރެ ހުސްވެފައި ހުއްޓެވެ. ފާތިމަތުގެ ހިނގާބިނގާ އުޅޭ އަޑެއް ނީވުނެވެ. އޭނަ ކައްކާ ކާނާގެ ވަހެއް ނުދުވިއެވެ. ކޮންމެ ދުވަހަކު ޒުލޭޚާ އޭނަގެ ގާތަށް އައިސް ވާހަކަ ދައްކަން މަސައްކަތްކުރިއަސް، އަހުމަދު އޭނަގެ މަންމައާ ދޭތެރޭ ހިތްބުރަވެފައި ހުންނާތީ ވާހަކަނުދައްކައެވެ.
”މަންމަގެ ސަބަބުން އަހަރެންގެ ދިރިއުޅުން ހަލާކުވީ. އަހަރެންގެ ހުރިހާ އުފަލެއް މަންމަ ނެގީ.“ އަހުމަދު އަބަދުވެސް އޭނަގެ ހިތާ ޝާކުވާކުރެއެވެ.
އަހުމަދު ފާތިމަތަށް ގުޅަން މަސައްކަތްކުރިއެވެ. މެސެޖުތައް ފޮނުވިއެވެ. ނަމަވެސް ފާތިމަތުގެ ފަރާތުން އެއްވެސް ޖަވާބެއް ނުލިބުނެވެ. އޭނަ ވަނީ އަހުމަދުގެ ނަންބަރު ބްލޮކްކޮށްފައެވެ. ފާތިމަތުގެ ހިތުގައި އޭނައަށް ޖާގައެއް ނެތްކަން އަހުމަދަށް ވިސްނުނެވެ. އަހުމަދުގެ އެންމެ ބޮޑު ކުށަކަށް ވެގެން ދިޔައީ މަންމަގެ ނުބައި ބަސްތަކަށް ހެއްލި، އޭނަގެ ލޯބިވާ އަނބިމީހާއަށް އަނިޔާކުރުމެވެ. އެކަމުގެ ނަތީޖާއަކަށް ވީ އޭނަގެ އުފާވެރި ދިރިއުޅުން ގެއްލި، އޭނަ އެކަނިވެރިވުމެވެ.
މި ވާހަކައިން ދަސްވެގެންދަނީ، އާއިލީ ގުޅުންތަކުގައި، ހާއްސަކޮށް ދެމަފިރިންގެ ގުޅުމުގައި، ތިންވަނަ ފަރާތެއްގެ ނުފޫޒަށް ހެއްލިގެން އަމަލުކުރުމަކީ ކިހާ ނުރައްކާތެރި ކަމެއްކަމެވެ. އެންމެ މުހިންމީ ދެމަފިރިންގެ މެދުގައި އޮންނަ އިތުބާރާއި، އެކަކު އަނެކަކަށް ދޭ ގަދަރެވެ. އެނޫން ގޮތަކަށް އަމަލުކުރުމުގެ ނަތީޖާއަކީ ހިތާމަޔާއި، އެކަނިވެރިކަމެވެ.
