މޯލްޑިވްސް ނޭޝަނަލް ޕާޓީ (އެމްއެންޕީ)ން ލ.އަަތޮޅުގެ ހުރިހައި ރަށަކަށް ކުރައްވާ ވަރަށް ޚާއްޞަ ދަތުރެއް އެ އަތޮޅު ތެރެއަށް ފައްޓަވައިފި އެވެ.
އެމްއެންޕީ އިން ލ.އަތޮޅަށް ކުރައްވާ މިދަތުރުގައި އިސްކޮށް ހަރަކާތްތެރިވެ ވަޑައިގަންވަނީ އެމްއެންޕީ އުފެއްދުމުގައި އިސްކޮށް ހަރަކާތްތެރިވެ ވަޑައިގަންނަވާ ކުރީގެ ސީޕީ އަދި ތިމަރަފުށީ ދާއިރާގެ މެމްބަރު އަބްދުﷲ ރިޔާޒު އެވެ. އެމްއެންޕީގެ މިދަތުރުފުޅުގައި ލ.އަތޮޅުގެ މީހުން ދިރިއުޅޭ ހުރިހައި ރަށަށް ދަތުރުކުރުމަށް ވަނީ ހަމަޖެހިފައެވެ.
ކޮންމެ ހަފްތާ ބަންދަކުވެސް އަތޮޅު ތެރޭގެ އެކި ރަށްތަކަށް ޒިޔާރަތްކޮށް މެމްބަރުން އިތުރު ކުރުމުގެ ޚާއްސަ ހަރަކާތްތަކެއް ހިންގުމަށްވެސް އެމްއެންޕީ އިން ވަނީ ނިންމަވާފަ އެވެ.
އެމްއެންޕީން ރާއްޖޭގެ އެންމެ ދެކުނުގައާއި، އުތުރު އަދި މެދުރާއްޖެ ތެރޭގައި ޕާޓީގެ ހަރަކާތްތައް ހިންގުމަށް ފޯކަލް ޕޮއިންޓްތަކެއް ކަނޑައަޅުއްވާފައިވާއިރު، އައްޑޫ ސިޓީގައި އެމްއެންޕީގެ އޮފީހެއް މިހާރުވަނީ ޤާއިމް ކުރައްވައި ހުޅުވާފަ އެވެ.
އެމްއެންޕީ އުފެއްދުމަށް ބޭނުންވާ 3،000 މީހުންގެ ސޮއި މިހާރު ލިބިފައިވާއިރު، އެޕާޓީން މަސައްކަތް ކުރަނީ ޕާޓީ އުފެއްދުމަށް އިލެކްޝަނަށް ވައްދާއިރުވެސް 5،000 މެމްބަރުންނަށްވުރެ ގިނަ މީހުންގެ ސޮޔާއިއެކު އިލެކްޝަނަށް ހުށަހެޅުމެވެެ. އެމްއެންޕީ، ސިޔާސީ ޕާޓީއެއްގެ ގޮތުގައި އުފެއްދުމަށް އިލެކްޝަންސް ކޮމިޝަނުން މިދިޔަ މަހުގެ 15 ވަނަ ދުވަހު ހުއްދަ ދީފައިވަނީ ވިލިމާލެ ދާއިރާގެ މެންބަރު އަޙްމަދު އުޝާމަށެވެ.
އެމްއެންޕީ ވުޖޫދުވި ފަހުން ރާއްޖޭގެ ސިޔާސީ މަސްރަޙުގެ އިސް ސަފުގައި ޙަރަކާތްތެރިވާ ގިނަ އަދަދެއްގެ ބޭފުޅުންނާއި ޒުވާނުންގެ ތެރެއިން ގިނަބަޔަކު އެމްއެންޕީއާއި ގުޅިވަޑައިގަންނަވަމުން ގެންދަވާކަން ފާހަގަ ކުރެވެއެވެ.
އެމްއެންޕީ އުފެއްދުމުގައި އިސްކޮށް ޙަރަކާތްތެރިވެ ވަޑައިގަންވާ ރައްޔިތުންގެ މަޖިލީހުގެ ދަނގެތީދާއިރާ ތަމްސީލް ކުރައްވާ ކުރީގެ ޑިފެންސް މިނިސްޓަރ ކާނަލް މުޙައްމަދު ނާޒިމް މީގެ ކުރިން ވިދާޅުވެފައިވަނީ އެމްއެންޕީއަކީ މުސްތަޤްބަލު އޮތް ޕާޓީއެއް ކަމުގައެވެ. އަދި ޒުވާނުން ބޭނުންވާ ދާއިރާތަކުން ކުރިޔަށް ދިއުމުގެ ފުރުޞަތުތަކާއި ޕާޓީގެ އިސް މަޤާމުތަކަށް ވަޑައިގަތުމުގެ ފުރުޞަތު ވެސް އެމްއެންޕީއިން ޒުވާނުންނަށް ހުޅުވާލައްވާފައި ވާކަމުގައި ނާޒިމް ވިދާޅުވި އެވެ.
ރާއްޖޭގެ ކަންކޮޅުތަކުން ގިނަ ޒުވާނުން އަންނަނީ އެމްއެންޕީއާއި ބައިއަތު ހިފަމުންނެވެ.
