ތަންދޮރު ނުދަންނަ ވެރިޔަކު ރާއްޖޭގެ ރައީސަކަށް ގެނައުމުން ނުކުތީ ގޯސް ނަތީޖާކަމަށް ކުރީގެ ރައީސް، މުހައްމަދު ވަހީދު ހަސަން މަނިކު ވިދާޅުވެއްޖެއެވެ.
ޖުމްހޫރީ ޕާޓީގެ ރިޔާސީ ކެންޑިޑޭޓު އޮނަރަބަލް ޤާސިމް އިބްރާހީމްގެ ރިޔާސީ ކެމްޕެއިނަށް، ހދ. ނައިވާދޫއަށް ވަޑައިގެން ވަހީދު ވިދާޅުވީ ދުނިޔޭގައި ކަން ހިނގާގޮތް ނޭނގޭ، ތަންދޮރު ނުދަންނަ މީހަކު ގައުމެއްގެ ވެރިކަމާ ހަވާލުވުމުން ޤައުމަށް ވާނެ އެއްވެސް ފައިދާއެއް ނޯންނާނެ ކަމަށާއި ނުކުންނާނީ ގޯސް ނަތީޖާ ކަމަށެވެ.
އެހެންކަމުން މިހާރު ރައްޔިތުންނަށް އޮތް ޗޮއިސްއަކީ ޤާސިމް ކަމަށާއި އިންތިހާބުގައި ޤާސިމް ހޮވައިދިނުމަށް ވަހީދު ވަނީ އެދިފައެވެ. މިއަދު ދިވެހިން ބޭނުންވަނީ، މިނިވަން ގައުމެއްގެ ގޮތުގައި ދެމިއޮތުމަށް ކުރިމަތިވެފައިވާ ގޮންޖެހުންތަކަށް ނައްތާލުމަށް ކަމަށާއި، މިއަދު އެކަމަށް އޮތް އެންމެބޮޑު ގޮންޖެހުމަކީ، އެކަންކަމާ ހަވާލުވެގެން ހުރި ވެރިމީހާ ހިޔާނާތްތެރިވުންކަމަށް ވެސް ރައީސް ވަހީދު ވިދާޅުވިއެވެ.
ރައީސް ސޯލިހުއަށް ފާޑު ވިދާޅުވަމުން ވަހީދު ވިދާޅުވީ އެމްޑީޕީގެ ކެނޑިޑޭޓަކީ މި ޤައުމަށް ޤައްދާރުވެފައިވާ ބޭފުޅެއް ކަމަށާއި، އެފަދަ ކެންޑިޑޭޓަކަށް ވޯޓުދޭންޖެހޭ އެއްވެސް ސަބަބެއް ނެތްކަމަށެވެ. ތަންދޮރު ނުދަންނަ މީހަކު ވެރިޔަކަށް އިސްކުރުމުން ނުކުންނާނެ ހުރިހާ ނުރަނގަޅު ނަތީޖާތަކެއް މިއަދު އަޅުގަނޑުމެން ތަޖުރިބާކުރަމުން އަންނަކަން ރައީސް ވަހީދު ފާހަގަކުރެއްވިއެވެ.
އެގޮތުން ފާއިތުވީ ފަސް އަހަރު ރާއްޖޭގެ ދަރަނި އެތައް ގުނައަކަށް އުފުލިފައިވާ ކަމަށާއި ގައުމު ދަރަނިވެރިކޮށްފި ކަމަށް އޭނާ ވިދާޅުވިއެވެ. އަދި ރާއްޖޭގައި ކުށް ގިނަވުމާއި، އިގްތިސާދީ ހާލަތު ދަށަށް ގޮސް، ރާއްޖޭގެ މައްޗަށް ވަކި ގައުމެއްގެ ނުފޫޒު މާ ބޮޑުކަމަށް ބުނެ ގިނަ ބަޔަކު ސަރުކާރަށް ފާޑު ކިޔަމުން އަންނަކަން އޭނާ ފާހަނގަކޮށްލިއެވެ.
