ޖުމްހޫރީ ޕާޓީގެ ވެރިކަމެއްގައި މޫނު ބުރުގާއަޅާ ކަނބަލުންނަށް އެއްވެސް ހުރަހެއް ނެތް ކަމުގެ ޔަގީންކަން ޖުމްހޫރީ ޕާޓީގެ ރިޔާސީ ކެންޑިޑޭޓް އޮނަރަބަލް ގާސިމް އިބްރާހިމް ދެއްވައިފިއެވެ.
ގައުމީ ކެންޑިޑޭޓް ގާސިމް މިފަދަ ބޮޑު ޔަގީންކަމެއް ދެއްވީ އެމަނިކުފާނު ނ. ހެނބަދޫގައި ބޭއްވި ކެމްޕެއިން ޖަލްސާގައި ދެއްކެވި ވާހަކަފުޅުގެ ތެރެއިންނެވެ.
ޤާސިމް ވިދާޅުވީ އެމަނިކުފާނުގެ ސަރުކާރެއްގައި އަބަދުވެސް މަސައްކަތް ކުރައްވާނީ އިސްލާމީ އުސޫލުތަކުގައި ހިފަހައްޓައިގެން ކުރިއަށްދިއުމަށް ކަމަށާއި އެމަނިކުފާނުގެ ވެރިކަމެއްގައި އެއްވެސްތަނެއްގައި މޫނު ބުރުގާ އަޅުއްވައިގެން މަސައްކަތްކުރުމަކަށް ހުރަހެއްނެތްކަމަށެވެ.
އަދި ކިޔަވައިދެއްވުމަށް ނަމަވެސް. އޮފީސްތަކުގެ ވަޒީފާ ނަމަވެސް ހެޔޮކަމަށާއި އެބޭފުޅަކު ބޭނުންފުޅުވާ ގޮތަކަށް އެ އިންތިޒާމް ހަމަޖެހިގެން ދާނެކަމަށް ޤާސިމް ވިދާޅުވިއެވެ. އަދި މޫނު ބުރާ އެއީ އިސްލާމީ ނަމޫނާއެއް ކަމަށާއި އެކަމަށް އެއްވެސް ހުރަހެއް ނެތްކަމަށެވެ.
ގާސިމް ވިދާޅުވީ މޫނު ބުރުގާގެ މައްސަލައަކީ އިސްލާމްދީނުގައި އިހުތިލާފް އުފެދިފައިވާ މައްސައެއް ނަމަވެސް ދީނުގެ ބައެއް އުސޫލުތަކަށް ބަލާނަމަ އެއީ ވަރަށް އެދެވިގެންވާ ރިވެތި ސިފައެއްކަމަށެވެ. އަދި އިސްލާމްދީން ހިމާޔަތްކުރާނެކަމުގެ ފުރިހަމަ ޔަގީންކަން އެމަނިކުފާނު ވަނީ ތަކުރާރުކޮށް ދެއްވާފައެވެ.
“ އަޅުގަނޑުގެ ވެރިކަމެއްގައި އެއްވެސްތަނެއްގައި މޫނު ބުރުގާ އަޅުއްވައިގެން މަސައްކަތްކުރުމަކަށް ހުރަހެއްނެތޭ. ކިޔަވައިދެއްވުމަށް ނަމަވެސް. އޮފީސްތަކުގެ ވަޒީފާ ނަމަވެސް ހެވޭ. އެބޭފުޅަކު ބޭނުންފުޅުވާ ގޮތަކަށް އެ އިންތިޒާމް ހަމަޖެހިގެން ދާނެ. އެއީ އިސްލާމީ ނަމޫނާއެއް. “ ޤާސިމް ވިދާޅުވިއެވެ.
