ފުވައްމުލައް ސިޓީގައި އެންމެ ބޮޑު އިގްތިސާދީ ނަފާއެއް ލިބޭ ކަމަކީ ޑައިވްކުރުން ކަމަށާއި އެ ސިޓީގައި ފުރިހަމަ ޑައިވިންގ ސެންޓަރެއް ގާއިމުކޮށް ދެއްވާނެ ކަމަށް މޯލްޑިވްސް ނެޝަނަލް ޕާޓީ (އެމްއެންޕީ) ގެ ރިޔާސީ ކެންޑިޑޭޓު މުހައްމަދު ނާޒިމް ވިދާޅުވެއްޖެއެވެ.
ކެމްޕެއިން ޖަލްސާގައި އެ ސިޓީގައި ވާހަކަ ދައްކަވަމުން އެ ސިޓީގައި ވަރަށް ގިނަ ޑައިވިންގ ސެންޓަރުތައް ހުރިކަން ފާހަގަކުރައްވާ ނާޒިމް ވިދާޅުވީ އެ ސިޓީއަށް މީހުން ނާންނަ ނަމަ، ޑައިވިންގ ސެންޓަރުތަކުގައި ހަރަކާތްތައް ނުހިންގޭނެ ކަމަށެވެ.
ނާޒިމްގެ އިގްތިސާދީ ޕްލޭން ހާމަކުރައްވަމުން ވިދާޅުވީ އޭނާގެ އިގްތިސާދީ ޕްލޭނަކީ އެ ރަށަށް އެންމެ ފުރަތަމަ ވެސް ވަރުގަދަ ޑައިވިންގ ސެންޓަރެއް ހެދުން ކަމަށެވެ. އަދި އެ ސެންޓަރަކީ ތަފާތު ހިދުމަތްތައް ދެވޭނެ ތަނަކަށް ހައްދަވާނެ ކަމަށެވެ.
އެގޮތުން އެތަނުގައި މީހުންނަށް މުނިފޫހި ފިލުވުމާއި ޑައިވްކޮށްލައިގެން އަރާފަހުން ދޭނެ ހަރަކާތްތައް ލިބެން ހުންނަންޖެހޭ ކަމަށް ވެސް ވިދާޅުވިއެވެ.
އެމްއެންޕީގެ ސަރުކާރެއްގައި ފުވައްމުލައް ސިޓީގައި ފުރިހަމަ ޑައިވް ސެންޓަރެއް އަޅާ، ޑައިވްކުރަން އަންނަ މީހުންނަށް އެ މީހުން ބޭނުންވާ ހުރިހާ ވަސީލަތްތަކެއް ގާއިމްކޮށްދެއްވާނެ ކަމަށް ވެސް ވިދާޅުވިއެވެ.
