ސަތާރަވަނަ ރައްޔިތުންގެ މަޖިލީހަށް އުނގޫފާރު ދާއިރާއިން އިންތިޚާބުކުރީ އެ ދުވަސްވަރު ރާއްޖޭގައި ތިއްބެވި އެންމެ ބޮޑެތި އިލްމުވެރިންގެ ތެރެއިން އިލްމުވެރިއެކެވެ. ރާއްޖޭގެ ދީނީ އެއްބައިވަންތަކަމާއި އިސްލާމީ ޝަރީއަތާ އެއްގޮތަށް ރާއްޖޭގެ ޤާނޫނުލް އުގޫބާތު ބަދަލުކުރަން އެމަނިކުފާނު ބިލުތަކެއް ވެސް ހުށަހެޅުއްވި އެވެ. 
އުނގޫފާރު ދާއިރާގެ މެމްބަރެއްގެގޮތުގައި މަސައްކަތް ކުރައްވަމުން ގެންދަވަނިކޮށް އެއް ރެއެއްގެ މެންދަމުގައި ދާއިރާގެ ރައްޔިތުން ރޮއްވައިލީ އުނގޫފާރު ދާއިރާގެ މެމްބަރު ޑރ.އަފްރާޝީމް ޢަލީ އަވަހާރަކޮށްލި ހިތާމަވެރި ޚަބަރުންނެވެ.
ރާއްޖޭގެ މިޒަމާނުގެ ތަރައްޤީގެ ބާނީކަމަށް ގިނަ ބަޔަކު ދެކޭ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ފުރިހަމަ ތާއީދާއެކު އުނގޫފާރު ދާއިރާއަށް މިފަހަރު ވާދަކުރައްވާ އަލީ ފާރޫގު ކެންޑިޑޭޓު ނަމްބަރު 4 ސިޔާސީ ދާއިރާއަށް ނުކުތީ މި ދެންނެވި ހާދިސާއާ ގުޅިގެންނެވެ. އެފަހަރު ބޭއްވި ބައިއިލެކްޝަންގައި ކުރި ވަރުގަދަ ކެމްޕޭނުގައި އިސްކޮށް އުޅުއްވީ ޢަލީ ފާރޫޤު އެވެ. މި ދެންނެވި ކެމްޕެއިން ނިންމައިލީ އަފްރަޝީމްގެ ކޮއްކޮ އިބްރާހީމް އަމީން އުނގޫފާރު ދާއިރާއަށް އިންތިޚާބުކޮށް ދެއްވާފަ އެވެ.
”އޭގެ ފަހުން މިއަދާ ހަމައަށް ދެގޮތެއް ނުވެ މިހިރީ މިޕާޓީ [ޕީޕީއެމް] ގައި. އަޅުގަނޑގެ ކުލައެއް ވެސް ބަދަލެއް ނުވޭ. މި ފިކުރެއްވެސް ބަދަލެއް ނުވޭ، ހަގީގަތުގައި ޕާޓީއެއް ވެސް ބަދަލެއް ނުވޭ،“ ޔާމީނު ބައިވެރިވެވަޑައިގެންނެވި ޕީއެންއެފް ޖަލްސާއެއެގައި ފާރޫގު ވިދާޅުވި އެވެ.
ފާރޫގު އެގޮތުގައި ހުންނެވި ނަމަވެސް އޭރުގެ ޕާޓީ މިހާރު އޮތީ ވާގިނެތިފަ އެވެ. ރިޔާސީ އިންތިޚާބުގައި ރައީސް ޔާމީނަށް ވާދަނުކުރެއްވޭ ގޮތް މެދުވެރިވުމާއެކު ޕީޕީއެމްގެ ބެކަޕް ޕާޓީ ޕީއެންސީން ނެރުނު ކެންޑިޑޭޓް ޑރ.މުޙައްމަދު މުޢިއްޒު ރިޔާސީ ވެރިކަަމަށް ވަޑައިގެންނެވުމާ އެކު ޕީޕީއެމް އަކީ ނެތް ޕާޓީއަކަށް ޢަމަލީ ގޮތުން ހައްދަވައިފި އެވެ. އެއާ އެކުު ސަރުކާރުގެ މަޤާމުތަކަށް ވަޑައިގެންނެވީ ވައިކުޑައިގައި މާ ފަހުން ފޭބި ބައެކެވެ.
”އަަޅުގަނޑުމެން މި ޕޯޑިއަމަށް ހުއްޓެން ޖެހުނު ސަބަބަކީ މިއީ ނޫންތޯ؟“ ފާރޫގު ވިދާޅުވި އެވެ.
ޚިދުމަތުގެ މާޒީއެއް އޮތް ބޭފުޅެއް ކުރީގެ ރައީސް މައޫމޫނު ޢަބްދުލް ޤައްޔޫމްގެ ވެރިކަމުގައި ރާއްޖޭގެ ކޮންމެ ރަށެއްގައި ފެމިލީ ހެލްތު ވޯކަރެއް ނުވަތަ ކޮމިއުނިޓީ ހެލްތުވޯކަރެއް ބެހެއްޓުމަށް ޓަކައި މީހުން ތަމްރީނުކުރި އެވެ. މީގެ 30 އެތައް އަހަރެއް ކުރިން ޞިއްޙީ ޚިދުުމަތުގެ ދާއިއާއަށް ފާރޫގު ނުކުމެވަޑައިގެންނެވީ އެ މަސައްކަތުގެ ތެރެއިންނެވެ.
ފެމިލީ ހެލްތު ވޯކަރެއްގެ ގޮތުގައި ތަމްރީނުވެގެން ވަޑައިގެންނެވީ ސީދާ ދާއިރާއަށް، އަމިއްލަ ރަށަށް ޚިދުމަތްކުރުމުގެ ފޮނި އުންމީދުގަ އެވެ. އުމުރުން އެންމެ ވިއްސަކަށް އަހަރުގައި ފެށި މި ޚިދުމަތުގައި ދެގޮތެއް ނުވެ، 30 އަހަރު ފަހަނައަޅައި ދިޔަ އިރުވެސް ފާރޫޤު ހުންނެވީ މާބޮޑު އުޖޫރައެއް ލިބޭތީއެއް ނޫނެވެ. ކުރާނެ އަދި ކުރެވޭނެ އެހެން ކަމެއް ނެތިގެނެެއްވެސް ނޫނެވެ.
ތަމްރީނު ވެވަޑައިގެންނެވީ ޞިއްޙީ ދާއިރާއިން ރަށަށް ޚިދުމަތް ކުރައްވަން ކަމަށްވާތީ އެ ޚިދުމަތުގައި ދެމިހުންނެވީ އެވެ.
ޞިއްޙީ ދާއިރާއަށް އައި ބަދަލތަކާއެކު ފެމިލީ ހެލްތުވޯކަރުންގެ މަސައްކަތް ކުޑަކޮށް، ހެލްތު ސެންޓަރުގައި މަސައްކަތް ކުރައްވާ ގޮތަށް ބަދަލުވުމުންވެސް އެ ޚިދުމަތުގައި ދެމިހުންނެވި އެވެ.
ޞިއްޙީ ދާއިރާގެ ޚިދުމަތުގައި ހޭދަކުރެއްވި ދިގު މުއްދަތުގައި ރަށުގައި ހިންގި ޖަމްޢިއްޔާ ޖަމާއަތްތަކުގައި ވެސް އިސްކޮށް އުޅުއްވާފައިވާތީ ދާއިރާގެ ރައްޔިތުންގެ ޙާލަތާއި ވިންދު އެންމެ ރަނގަޅަށް އެނގިވަޑައިގަންނަވާނެ ކެންޑިޑޭޓަކަށް މިފަހަރު ފެންނަން ހުރީ ކެންޑިޑޭޓު ނަމްބަރު 4 ޢަލީ ފާރޫގެވެ.
ދާއިރާގައި ދެން ތިބި ކެންޑިޑޭޓުންނަށް ބަލާއިރު އެފަދަ ބޭފުޅެއް ފެންނަން ނެތް އިރު ފަސްބައި ވަރަށް ކިލަނބު ބޭފުޅުން ވެސް އެބަ ތިއްބެވި އެވެ.
އެކަކީ ޞިއްޙީ ގޮތުން ރާއްޖެއާއާއި ދުނިޔެއަށްވެސް ކުރިމަތިވި އެންމެ ބޮޑު ކާރިސާ ކުރިމަތިވި އިރު މިނިސްޓަރަކަށް ހުންނަވައި، އެވަގުތަށް ގެންނަން ޖެހުނު މުހިއްމު އާލާތްތަކެއް ގެނައުމުގައި އޮޅުވައިލުންތަކެއް އޮޅުވައިލި ކަމުގެ ތުހުމަތު އޮތް ބޭފުޅެކެވެ.
ދެން ހުންނެވި އަނެއް ބޭފުޅަކީ ދާއިރާގެ ރަށެއްގައި ޒިންމާދާރު މަޤާމެއްގައި ހުންނެވުމާއެކުގައި ވެސް ނުކިއްސަރު ވިޔަފާރިއެއްގެ ތެރޭގައި އުޅުއްވާ ކަމުގެ އަޑުތައް އަރާފައިވާ ބޭފުޅެކެވެ.
މިފަދަ ކެންޑިޑޭޓުން ތިއްބެވިއިރު ވިހިވަނަ ރައްޔިތުންގެ މަޖިލީހަށް ފާރޫގު ނުކުމެވަޑައިނުގެންފި ނަމަ އުނގޫފާރު ދާއިރާގެ ގޮނޑި އިދިކޮޅު އެމްޑީޕީއަށް ދިއުމުގެ ފުރުޞަތު ބޮޑެވެ.
”އެހެންވީމާ ސަރުކާރު ގެނައި ބަޔަކު، ސަރުކާރު ދިފާއުކުރަން ނޫންތޯ އަޅުގަނޑުމެން މަސައްކަތް މިކުރަނީ؟ އަޅުގަނޑުމެންނަކީ މިއީ އިދިކޮޅު ބައެއް ނޫނޭ. މިއީ އެއްކޮޅު މީހުންނަކީ،“ އޭނާ ވިދާޅުވި އެވެ. 
ޕީއެންސީގެ ޓިކެޓްގައި ނުކުމެވަޑައިގަތުމުގެ ފުރުޞަތު އޭނާއަށް ލިބިވަޑައި ނުގެންނެވީ ޕީއެންސީން ބޭއްވި ޕްރައިމަރީ އޮޅުވައިލުމުގެ ސަބަބުންނެވެ. އެއީ އޭނާގެ އިތުރުން އެތައް ކެންޑިޑޭޓުންނަކަށް ދިމާވި ކަމެކެވެ.
އެ ޕާޓީން ވާދަ ނުކުރިކަން އެއީ ނަސީބެއް ކަމަށް ބުނެވޭ ހިސާބަށް މިހާރު އޮތީ ކަންތައް ގޮސްފަ އެވެ. ޕީއެންސީގެ ކެންޑިޑޭޓުން ތިއްބެވި ކިތަންމެ ދާއިރާއެއްގައި ސަރުކާރުގެ ތާއީދާއި މަދަދުު ދެމުން އެގެންދަނީ އެނޫން ކެންޑިޑޭޓުންނަށެވެ. މީގެ މާނައަކީ ޕްރައިމަރީ އޮޅުވައިލުމުގެ ސަބަބުން ޓިކެޓް ލިބެން ނުޖެހޭ އެތައް ބަޔަކަށް ޓިކެޓް ލިބި، ސަރުކާރަށް ވެސް އިތުބާރުގެ ބޮޑު މައްސަލައެއް ދިމާވެފައި އޮތުމެވެ.
އެގޮތުން ބަލާ އިރު ސަރުކާރަށްވެސް އިހުލާސްތެރި ވާނެ ހަމައެކަނި ކެންޑިޑޭޓަކީ ކެންޑިޑޭޓު ނަމްބަރު 4 ޢަލީ ފާރޫޤު ނޫންތޯއެވެ.
