ކަތިވަޅި ގެއްލި މަރިޔަބު ގެއްލި ކޮށި ދަނޑު ގެއްލުނީމާ މޮޔަގޮވުމަކީ މީގެ ކުރިންވެސް ހިނގާ ކަމެއްކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްޞަ އެޑްވައިޒަރު، ރައްޔިތުންގެ މަޖިލީހުގެ ލ.ފޮނަދޫ ދާއިރާގެ ކުރީގެ މެމްބަރު ޢަބްދުއްރަޙީމް ޢަބްދުﷲ ވިދާޅުވެއްޖެ އެވެ. 
އެމަނިކުފާނު ކުރެއްވި އެކްސް ޕޯސްޓެއްގައި މިފަދައިން ވިދާޅުވި ވަކި ސަބަބެއް ބަޔާންކުރައްވާފައެއް ނުވެ އެވެ.
ޢަބްދުއްރަޙީމް ވިދާޅުވެފައިވަނީ ކަތިވަޅި ގެއްލި މަރިޔަބު ގެއްލި ކޮށި ދަނޑު ގެއްލުނީމާ މޮޔަގޮވުމަކީ މީގެ ކުރިންވެސް ހިނގާ ކަމެއްކަމުގައެވެ. އަދި މޮޔައިންނާ އަޅާ މޮޔަވާނީ އަދި އެ އަށްވުރެ ބޮޑެތި މޮޔައިންކަމަށް ކާބަފައިން ބުނާތީ އަޑު އިވުނު ކަމުގައިވެސް އެމަނިކުފާނު ވިދާޅުވި އެވެ.
ބައެއް މީޑިއާ ރިޕޯޓްތައް ބުނާގޮތުގައި އެމަނިކުފާނު މިފަދައިން ވިދާޅުވިކަމަށް ބެލެވެނީ ޕީޕީއެމް އިން ދުރައްޖެހިވަޑައިގެން ޕީއެންއެފްގެ ނަމުގައި އަލަށް ޕާޓީއެއް އުފެއްދެވުމަށް މަސައްކަތްކުރައްވާ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ފެކްޝަނަށް ދެއްވި ބަހުގެ ހަމަލާއެއް ކަމުގަ އެވެ.
ރައީސް ޔާމީން ނިސްބަތްވެ ވަޑައިގަންނަވާ ޕީއެންއެފް އުފެއްދެވުމުގައި އިސްކޮށް އުޅުއްވާ ކުރީގެ ނާއިބު ރައީސް ޑރ. މުޙައްމަދު ޖަމީލު އަޙްމަދު ދާދި ފަހުން ވިދާޅުވެފައިވަނީ އަދުރޭ އަކީ އަބަދުވެސް މުސާރައަށާއި އަގަށް ސިޔާސީ މަސައްކަތް ކުރެއްވި ބޭފުޅެއް ކަމުގަ އެވެ.
ޑރ. މުޙައްމަދު މުޢިއްޒު ވެރިކަމަށް ވަޑައިގަތުމާއި ހަމައަށް ރައީސް ޔާމީނަށް ސަނާ ކިޔާ އުޅުއްވި ނަމަވެސް ރައީސް ޑރ. މުހައްމަދު މުއިއްޒުގެ ވެރިކަން ފެށި ރައީސް ޔާމީންއާ ރައީސް މުއިއްޒުގެ ގުޅުން ކެނޑުނު ފަހުން އަދުރޭ ވަނީ ރައީސް ޑރ. މުޙައްމަދު މުއިއްޒުގެ ކޮޅަށް އަރާވަޑައިގެންފަ އެވެ.
ޑރ. މުޢިއްޒުގެ ޚާއްޞަ އެޑްވައިޒަރު ޢަބްދުއްރަޙީމް ޢަބްދުﷲ އަކީ ރައީސް ޢަބްދުﷲ ޔާމީންގެ ރައީސުލްޖުމްހޫރިއްޔާކަމުގެ މަޤާމުގައި ހުންނެވި އިރު ރައީސް ޔާމީނާއި އެންމެ އަރިސްކޮށް އުޅުއްވި އެއް ބޭފުޅެކެވެ. އަދި ރައީސް ޔާމީންގެ ވެރިކަން ނިމުނުފަހުންވެސް އެމަނިކުފާނުގެ އެންމެ އަރިސް ބޭފުޅެއްގެ ގޮތުގައި ހުންނަވައި ރައީސް ޔާމީނަށް އެންމެ ބޮޑަށް ސަނާ ވިދާޅުވި އެއް ބޭފުޅަކީވެސް އަބްދުއްރަޙީމް އަބްދުﷲ އެވެ.
