ޝައިންގެ ވަފާތެރި މަވީމޭ- 05 ވަނަބައި
ގަހުގެ ފަލަގޮފިތަކުގެ ތެރެއިން ގޮތްޕެއްގައި ބުރަކަށި ޖައްސާލަމުން ރަނގަޅަށް އޭނާ ހަމަޖެހިލިއެވެ. އެތާނގައި އޮންނައިރު އުދަރެސް ފެންނަލެއް ނުހަނު ހިތްގައިމެވެ. ކަނޑުން އަންނަ ފިނިރޯޅިތައްވެސް އެއްވެސް ހުރަހެއްނެތި އޭނާގެ މޫނުގައި ބީހެމުންދިޔައެވެ. އެގޮތުގައި އޮންނަތާ އިރުކޮޅެއްފަހުން އޭނާގެ ގާތަށް ނިދިއަންނަ ގޮތްވިއެވެ.
ހަމަހިމޭންކަމާއެކު ލޯމަރައިގެން އޮތް ޝާނީއަށް ބަލަން ގަހުގެ ތަންކޮޅެއްމަތީގައިވާ ގޮތްޕެއްގައި އިން ޖިނާހްއަށް މަޑުމަޑުން ތިރިއަށް ފޭބުނީ ޝާނީގެ މޫނު ގާތުން ދެކިލާހިތުންނެވެ. ޝާނީ އެގަހަށް އެރީ ކުރިއްސުރެ އޭނާ އެގަހުގައި އިންދައެވެ. އެހެންނަމަވެސް އޭނާ އިނީ ގަހުގެ ކުރީގައިވާ ގޮތްޕެއްގައިކަމުން ޝާނީއަށް ނުފެނުނީއެވެ.
ޖިނާހް މަޑުމަޑުން ތިރިއަށް ފައިބާ ގޮފިގަނޑެއްގައި ހަމަޖެހިލިއެވެ. އަދި އޭނާގެ އަތުގައި އޮތް ކުރަހާފޮތްނަގައި އޭނާގެ ކަންފަތް ކައިރީގައިވާ ފަންސުރު ނެގުމަށްފަހު ޝާނީގެ ތަސްވީރުކުރަހަން ފެށިއެވެ. ޖެހެމުންދިޔަ މަޑު ރޯޅީގައި ޝާނީގެ އިސްތަށިގަނޑާއި ދޯފައްޓާ ވިހުރުވެމުންދާގޮތް ނުހަނު ހިތްގައިމެވެ. ޖިނާހް ހިނިތުންވެ އިނދެ ޝާނީގެ ތަސްވީރު ކުރަހަމުން ދަނިކޮށް، ކުއްލިއަކަށް ޝާނީއަށް ހޭލެވުނީ އެގަހަށް ޖެއްސި ކާޅެއް ގޮވާލި އަޑުންނެވެ.
ލޯހުޅުވާލުމާއެކީ އޭނާއަށް ހަޅޭއްލަވައިގަނެވުނީ ދިމާކުރިމަތީގައިވާ ގޮފިގަނޑުގައި އިން ޖިނާހްފެނިފައި ލިބުނު ސިހުމުންނެވެ. އެތަނުން ޖިނާހް ފެނިދާނެކަމަށް އޭނާ ހީކޮށްފައެއްނެތެވެ. ޝާނީ ސިހިފައި ގޮފިގަނޑުން ތެދުވި މަންޒަރު ފެނުމާއެކު ޖިނާހްވެސް ސިހޭގޮތްވިއެވެ. އޭނާ އަވަސް އަހަވަށް އޭނާގެ އަތުގައި އޮތް ކުރަހާފޮތް ފުރަގަހަށްލައި ފޮރުވިއެވެ. އަދި ޝާނީ ރުޅިއަތުވެދާނެތީ ޖެހިލުންވި ވަރުން އޭނާ އިސްޖަހާލިއެވެ. ޝާނީ އިރުކޮޅަކު ޖިނާހްގެ މޫނަށް ބަލަން އިނދެފައި ގަހުން ފޭބުމަށް އަވަސްވެގަތެވެ.
އަވަހަށް ގަހުން ފޭބުމަށްޓަކައި އޭނާ ފުންމާލުމާއެކު ކަރުގައި އޮތް ދޯޕައްޓާ ގޮފިގަނޑެގައި އަޅަގެންފައި ހަރުލިއެވެ. ވެލިގަނޑުމަތީގައި ދެފައި ޖެހުމާއެކު، ދޯޕައްޓާވެސް ދޫކޮށްލާފައި ދެފައިވާން އަތަށް ނަގައިގެން އެއްގަމާދިމާއަށް އޭނާ ދުއްވައިގަތެވެ. ޝާނީ ދިޔަ މަންޒަރުބަލަން ހައިރާންވެފައި އިން ޖިނާހް، ޝާނީގެ ދޯޕައްޓާ ގޮފިގަނޑުން ނައްޓާލުމަށްފަހު އަތުގައި އޮޅާލައިގެން ތިރިޔަށް ފޭބިއެވެ. އޭނާ ހަލުވި ފިޔަވަޅުތަކެއްގައި ގޮސް އެއްގަމަށް އެރިއިރު ޝާނީ ގޮސް އޮބާލަނީއެވެ. ޖިނާހް ހިނިތުންވެލަމުން ޝާނީގެ ދޯޕައްޓާ އޭނާ ލައިގެންހުރި ޓްރެކްސޫޓްގެ ޖީބަށްލައިގެން އެއްގަމަށް ހިނގައިގަތެވެ.
ހަވީރުގެ ވަގުތެވެ. އީދުކުޅިވަރު ބެލުމަށްޓަކައި ޝާނީ އޭނާގެ އެކުވެރިންނާއެކު ކުޅޭ ފަސްގަނޑަށް ދިޔައެވެ. އޭރު ރަށުގެ އެންމެން ކަހަލަގޮތަށްވަނީ އެތަނަށް ޖަމާވެފައެވެ. ޒުވާންނާއި މުސްކުޅިންނާއި ކުޑަކުދިންނެވެ. މާބަނޑުމީހުންނާއި ޅަދަރިމައިންނެވެ. ޝާނީއާއި އޭނާގެ އެކުވެރިން ޒުވާން އަންހެންކުދިންގެ ބައިގަނޑެއް ކައިރީގައި މަޑުކޮށްލިއެވެ. އޭރު ޒުވާން ފިރިހެން ގުރޫޕެއް ދަފިނަގަން ތައްޔާރުވަނީއެވެ.
“ މިރޭ އެބައޮތް ޝޯއެއްވެސް….ވާނެދާން….“ އަންހެންކުދިންގެ ތެރެއިން އެކަކު ބުނާއަޑުއިވުނެވެ.
“ އާނ…ޔަގީނެއްނު….މާލޭންވެސް ބަޔަކު އައިސްގެން އުޅޭ ވާހަކަ އަޑުއެހިން….މިއަދު ފެންޖެހިއިރު ދުށިން ވަރަށް ސަޅި ސޮރެއް….ހީވަނީ އެގުރޫޕު ސޮރެއްހެން….“ އެހެން ކުއްޖަކު ބުންޏެވެ.
“ އޭތް ދާނަންތަ މިރޭ؟….“ ރީނާ ސިއްރު ސިއްރުން ޝާނީގެ ގާތުގައި އަހާލިއެވެ. ޝާނީ އާއެކޭ ބުނުމުގެ ގޮތުން ބޯޖަހާލިއެވެ.
ވަރަށް ފޯރީގައި ދަފިނަގާ ނިމުނުއިރު ހުރީ މަޣްރިބް ނަމާދު ވަގުތުވެފައެވެ. ކުޑަކުދިންތައް ގޮވައިގެން އަންހެންވެރިން ގެޔަށް ދިއުމަށްޓަކައި އަވަސްވެގަތެވެ. ޝާނީވެސް އޭނާގެ އެކުވެރިންނާއެކު ގެޔަށް ދިޔައީ މިރޭ ދިމާވާނެ ގަޑިއެއް ކަނޑައަޅާފައެވެ. އިޝާ ނަމާދުކޮށްގެން މިސްކިތުން މީހުން ނުފައިބަނީސް ރީނާއާއި ލީޒާތިބީ ޝާނީ ހޯދަން އެގެއަށް އައިހެވެ.
“ ދޮންތަވެސް ބުނި އަންނާނަމޭ….އޭނައަށް އާދެވޭނީ ހާރިޝް ބޭބެއަށް ކާންދީ ހަދާފަ…“ ރީނާމެން އެއްޗެއް ބުނުމުގެ ކުރިން ޝާނީ އޮޅުންފިލުވައިދިނެވެ.
“ އޯކޭ…ދެން މަޑުކުރާނީދޯ…“ ޝާނީގެ ގާތުގައި އެނދުގައި އޮށޯވެލަމުން ލީޒާ ބުންޏެވެ.
“ ތިއެއްނޫނޭ….މިއަދު މެންދުރުފަހު ކޮންތާކަށް ދިޔައީ….އަހަރެން މިގެޔަށްވެސް އައިން ހޯދަން….ގެޔަކުނެތް….ދޮންތަމެން ގެޔަށްވެސް ދިޔައިން…އެގެއަކުވެސް ނެތް….“ ތަހުޤީޤީ ނަޒަރަކުން ބަލާލަމުން ރީނާ އަހާލިއެވެ. އެވަގުތު ކުއްލިއަކަށް ޖިނާހްމަތިން ޝާނީ ހަނދާންވިއެވެ.
“ އަނެއްކާ ބިޓަކާ ބައްދަލުކުރަންތަ ދިޔައީ؟…“ މަޖާވެލާފައި ލީޒާ އަހާލިއެވެ.
“ ދެން ސާބަހޭ….މަގޭ ބިޓެއް ނުހުންނަކަން އެންމެ ރަނގަޅަށް އެނގޭނީ ތިދެމީހުންނަށް….މަ ތެމެން ބޭނުންނުވާތީ ފިލީ…“ އެންމެ ފަހުން ޝާނީ ބުންޏެވެ.
އެކުދިން އެކި އެކި ވާހަކައިގައި ތިއްބައި ސަލްމާ އައުމުން އުފަލުން ޝޯބަލަން ދާންނުކުތެވެ. ޝޯ އޮންނަނީ ރަށުގެ މަދަރުސާގައެވެ. އެއީ ތަންކޮޅެއް އަވަށާއި ދުރުގައިވާ ތަނެކެވެ. އާއްމުކޮށް ރޭގަނޑު އެސަރައްދު އޮންނަނީ އަނދިރިކޮށް ނަމަވެސް މިރޭ އޮތީ ދިއްލާ އަޅާފައެވެ. މާދުރުންވެސް މީހުން ބައިބަޔަށް ދާތީ ފެނެއެވެ. ޒުވާން ފިރިހެން ގުރޫޕްތަކާއި އަންހެން ގުރޫޕްތަކެވެ.
ކުދި ޅަދަރިންނާއި މުސްކުޅި ކާފައާއި މާމަ މެންވެސް ޝޯބަލާލުމަށްޓަކައި އެދިމާއަށް ދެއެވެ. ޝާނީމެން ގޮސް ވަތްއިރު، ބައިބޯކަމުން އެމީހުންނަށް ޖާގަ ލިބޭވަރުވީ އެންމެ ފަހަތު ބަރިއަކުންނެވެ. ޝާނީމެން އެތާ އިށީނުމާއެކު ޒުވާން ފިރިހެން ގުރޫޕެއްވެސް އައިސް އެމީހުންގެ ފަހަތުގައި މަޑުކޮށްލިއެވެ. ޝޯފެށުމާއެކު ތަނުގެ ހަލަބޮލިކަން ދެގުނައަށް އިތުރުވެގެން ދިޔައެވެ. މިއުޒިކާއި ލަވައާއި އެއްވަރަށް އަތްޖަހާއި ފޯރިދެމުންދިޔައެވެ. ޝާނީމެންގެ ފަހަތުގައި ތިބި ޒުވާނުންގެ ފޯރި އަދިވަކީން ގަދަހެން ހީވެއެވެ.
މިއުޒިކްގެ ޖާދޫގައި ޖެހިފައި އިންދައި ޝާނީގެ ދޯޕައްޓާއަށް މީހަކު ދަމާލިހެން ހީވެގެން އޭނާ ފަހަތް ބަލާލިއެވެ. އޭރު އެތަނުން ޒުވާނަކު ހެވިދިލިފައި ހުއްޓެވެ. ޝާނީ ބަލާލުމުން އޭނާއަށް އެއްލޯމަރާލިއެވެ. ޝާނީ ތުން އޫކޮށްލަމުން އޭނާގެ ދޯޕައްޓާ ކުރިމައްޗަށް ގެނެސް އަތުތެރޭގައި ބޮނޑިކޮށްލިއެވެ. އޭގެފަހުންވެސް އިރު އިރުކޮޅުން އެޒުވާނާ ގޯނާކޮށްލައެވެ. އެއްފަހަރު އޭނާގެ ބުރަކަށީގައި ކޮށްޓާލަފާނެއެވެ. އަނެއްފަހަރު އޭނާގެ އިސްތަށިގަނޑުން އިސްތައްޓަކަށް ދަމާލަފާނެއެވެ. އެވަރުންވެސް އޭނާ ފަހަތް ބަލައިނުލައި ކެތްކޮށްގެން އިނެވެ.
“ އޭތް…އޭތް މިގޮލާ ކީއްކުރަން މިތަނަށް މިވަންނަނީ….އަޑެއްވެސް އިވޭނީކީ ނޫން ވިއްޔަ….“ އެއްކަލަ ޒުވާނާ ނުރުހިފައި ބުނެލުމާއެކު ޝާނީއަށް ފަހަތްބަލާލެވުނެވެ. އޭރު އެޒުވާނާގެ ކުރިމަތީގައި ހުއްޓިގެންހުރީ ޖިނާހްއެވެ. ޖިނާހްގެ ދިގުކަމުން އެޒުވާނާގެ މޫނުވެސް ނުފެނެއެވެ.
“ ކަލޯ ޖިނާ…ދުރަށްދެބަލަ…މަށަކަށް ނުފެނެޔޭ…. “ ޖިނާހްގެ ގައިގާ ކޮށްޓާލަމުން އަނެއްކާވެސް އެޒުވާނާ ބުނެލިއެވެ.
“ ތިހުރީ ހުޅުލޭ ބޮޑުމީހާ އަރާފަ…ދެން ކަލެއަކަށް ނުފެންނާނެ….އާދޭ މިކޮޅަށް…“ ތަންކޮޅެއް ދުރުގައިހުރި ޒުވާނަކު ބުނެލިއެވެ.
“ ހޫމް މިޖެހުނީ ކަންތަކާއޭ….މި މަންމަނުގަނޑުވެސް އަންނަންޖެހޭތަ ޝޯބަލަން….އަދި އައިގޮތަށް އައިސް މަގޭ މިއޮއް ކުރުމީހާގެ ކުރިމަތީ ހުއްޓިޖެއެއްނު…“ އެޒުވާނާ ކުދިކިޔަމުން އެތަނުން ދުރަށްދިޔައެވެ.
ޝާނީ ސިއްރު ސިއްރުން ޖިނާހްއަށް ބަލާލިއިރު، ޖިނާހްގެ ނަޒަރުހުރީ ސްޓޭޖަށެވެ. ޖިނާހް ކުއްލިއަކަށް އެތަނަށް އެއައީ ކީއްވެބާއެވެ؟ ކުރިން އޭނާހުރީ ކޮންތާކުބާއެވެ؟ ޝާނީގެ ހިތުގައި ސުވާލުތައް އުތުރި އަރަންފެށިއެވެ.
“ އޭތް ކިހިނެއްވެފަ ތިއިނީ؟…“ އެންމެން އަތްޖަހަ ޖަހާފައި ފޯރި ނެގިއިރުވެސް ޝާނީ މަޑުމަޑުން އިނުމުން ރީނާ އަހާލިއެވެ.
“ ކަމެއްނުވޭ…“ ހިނިތުންވެލަމުން ޝާނީ ބުންޏެވެ.
ޝާނީއަށް އިރުއިރުކޮޅުން ޖިނާހް ހުރިތޯ ބަލާލެވެއެވެ. ޖިނާހް އެހުރިތާނގައި ޝޯ ނިމޭންދެން ހުއްޓެވެ. ނަމަވެސް ޝާނީ ބަލާލާއިރު ޖިނާހްގެ ނަޒަރު ހުންނަނީ ސްޓޭޖަށެވެ. އެހެންކަމުން ޖިނާހް އެތަނަށް އެއައީ ޝޯބަލަން ކަމުގައި އޭނާ ޔަޤީންކުރިއެވެ. ނަމަވެސް، ޝާނީ ނުބަލާ ވަގުތުގައި ޖިނާހް ޝާނީއަށް ބަލައެވެ.
ޖެހިގެން އައި ދުވަހުވެސް އީދުކުޅިވަރު ކުޅުން އޮތެވެ. ދެޖިންސްގެ ޒުވާނުންގެ މެދުގައި ތަފާތު ގިނަ ކުޅިވަރުތައް ކުޅެވުނެވެ. ދަނޑިޖެހުމާއި ދަފިނެގުމެވެ. ކޯޑިކެނޑުމާއި ބޮޑުމަސް ބޭނުމެވެ. މިހުރިހާ ކުޅިވަރެއް ކުޅެންވެސް ރަށުގެ ކުދިބޮޑު އެންމެން ފެންވަރައި ނަލަހެދިގެން އައިސް ތިއްބެވެ. ކުޅިވަރުތައް ފެށުމުގެކުރިން ޝާނީވެސް އޭނާގެ އެކުވެރިންނާއެކު ދިޔައެވެ.
ފިރިހެނުންގެ ދަފިނެގުމާއި ދަނޑިޖެހުން ކުރިޔަށް ދިޔައިރު އަންހެންވެރިންގެ އަތްތިލަބަޑީގެ އަޑާއި ހޯބޯލަވާ އަޑު ކެނޑިގެން ނުދެއެވެ. ކޯޑިކެނޑުމާއި ބޮޑުމަސް ބޭނުންވެސް ހަމައެފަދައެވެ. ނުހަނު ފޯރީގައި އެދުވަހުގެ ކުޅިވަރުތައްވެސް ނިމުނީ އިރުއޮއްސުމަކާއި ގާތްވެފައި ވަނިކޮށެވެ. ގެޔަށް ދިއުމަށްޓަކައި ޝާނީއާއި އޭނާގެ އެކުވެރިން މިސްރާބު ޖެހީ ހެމުން ވާހަކަ ދައްކަމުންނެވެ. އެމީހުންނާއި ތަންކޮޅެއް ދުރުގައި ހުރެގެން ޖިނާހްވެސް އެމީހުންގެ ފަހަތުން އައެވެ.
އެކަން ޝާނީއަށް އެނގުނީ އެހެން އެކުވެރިންނާއި ވަކިވެގެން ގެޔަށް ދިއުމަށް ހިނގައިގެން ވަގުތު ފަހަތް ބަލާލެވުމުންނެވެ. ޖިނާހް އޭނާގެ ފަހަތުން ފާރަލަނީބާއޭވެސް އޭނާގެ ހިތަށްއެރިއެވެ. އޭނާގެ ގޯތިތެރެއަށް ވަދެވުމުން ބަނބުކެޔޮ ގަހާއި ނިވާވެގެން އިރުކޮޅަކުހުރީ އެކަން ޔަޤީންކޮށްލުމަށެވެ. ޝާނީ ފިލާހުއްޓައި ޖިނާހް އެމަގުން އައިސް މަޑުވެސް ކޮށްނުލައި އެހުރިގޮތަށް ހިނގައްޖެއެވެ.
“ އޭނަ މިމަގުން ގެޔަށްދާން އައީ ކަންނޭނގެ…މަވެސް މާވަރަށް މިވިސްނަނީ…“ ޝާނީ އޭނާގެ އަމިއްލަ ނަފްސާ މުޚާތަބު ކުރަމުން ގެޔަށްވަނެވެ. އޭރު އެމަންޒަރު ބަލަން ތަންކޮޅެއް ދުރުގައި ޖިނާހް ހުއްޓެވެ. ޝާނީ ބަނބުކެޔޮ ގަސްދޮށަށް ފިލަން ވަތް މަންޒަރު، ހަތަރުފޫޓުގެ ފާރުމަތިން ޖިނާހުއަށް ފެނުނެވެ. ޝާނީ ގޭތެރެއަށް ވަނުމުން ހިނިތުންވެލާފައި ޖިނާހުވެސް ގެޔަށް ދިއުމަށްޓަކައި ހިނގައިގަތެވެ.
އީދުގެ ތިންވަނަ ދުވަހެވެ. މިއަދުވެސް ހަވީރުގެ ކުޅިވަރުތައް ރޭވިފައި އޮތެވެ. މިއަދު އޮތީ ފިރިހެނުންގެ ބައިބަލާއާއި އަންހެނުންގެ ވާދެމުމެވެ. ޝާނީމެން ގާތުގައިވެސް ވާދެމުމުގައި ބައިވެރި ވުމަށް ވަރަށްގިނަ ކުދިން އެދުނެވެ. ރީނާ ބައިވެރިވިއެވެ. ނަމަވެސް ޝާނީއާއި ލީޒާ ތިބީ ކުޅިބަލާށެވެ. އެކުވެރިންނާއެކު ކުޅިވަރު ކުޅުނު ނަމަވެސް ރަށު ރަތްޔިތުންގެ ކުރިމަތީގައި ކުޅިވަރު ކުޅުމަކީ އޭނާއަށް ކުޅަދާނަކަމެއް ނޫނެވެ. މީހުން މާގިނައިން ބަލާނަމަ އޭނާ ލަދުގަނެވެ.
އޭނާގެ ބައްޕަ އޮންނަނީވެސް އެފަދަ ކަންކަމުގައި ބައިވެރިވުން މަނާވެސް ކޮށްފައެވެ. ފުރަތަމަ އޮތީ އަންހެނުންގެ ވާދެމުމެވެ. ޝާނީއާއި ލީޒާ، ރީނާމެން ބަޔަށް ނުހަނު ތަރުހީބުދިނެވެ. ނަސީބަކުން މޮޅުވީވެސް ރީނާމެންގެ ބައެކެވެ. އެހެންކަމުން ދެއެކުވެރިން އުފަލުން ރީނާއަށް މަރުޙަބާކިޔެވެ. ފިރިހެނުންގެ ބައިބަލާ ކުޅެން ޓީމުތައް ތައްޔާރުވި ވަގުތު ޝާނީ ހައިރާންވީ އެތަނުން އެއްޓީމުގައި ޖިނާހްވެސް ހުއްޓައި ފެނުމުންނެވެ.
“ އެއީ ޖިނާހްތަ؟..“ ހައިރާންވެފައި ޝާނީއަށް އަހާލެވުނެވެ.
“ އާނ…މަވެސް މިހިތަށްއަރަނީ ހަމައެހެން….އެއީ ހަމަ އޭނަބާއޭ…“ ލީޒާވެސް ހަމަ އެރާގުގައި ބުނެލިއެވެ.
“ އާނ…އެއީ ހަމަ ޖިނާ….އޭނާ މިހާރު ވަރަށް ތަފާތު ވެއްޖެ…ދޮންބެ ބުނި އޭނާ މިހާރު ފުޓްބޯޅަކުޅެންވެސް ދެޔޯ….ވަރަށް މޮޅޭވެސް ބުނި….އަދި އިނގޭތަ ދޮންބެ ބުނެގެން އޭނާ ކުރަހާފަ އޮތް ވަރަށް ރީތި ފޮޓޯއެއްވެސް އަހަރެންދުށިން….ހާދަރީއްޗޭ…ހަމަހީވަނީ ދެލިކޮޕީއެއްހެން…މަންމަނެއް ކަމަކު ހާދަ ހުނަރުވެރިއޭ އެސޮރު…“ ރީނާ އޭނާއަށް އެނގޭ ހުރިހާ މައުލޫމާތެއް އެއްފަހަރާ އެކުވެރިންނާ ހިއްސާކޮށްލިއެވެ. އެވާހަކަތައް އަޑުއަހާފައި ޝާނީގެ ހައިރާންކަން އިތުރުވެގެން ދިޔައެވެ.
“ އެކަމު….އޭނައަށް ކިހާ އުނދަގޫވާނެ އެމީހުނާއެކު ކުޅެން….އެމީހުން ގޮވިޔަސް އަޑެއްނީވޭނެއްނު…އަދި އޭނަ ބޭނުންވިޔަސް ވާހަކަވެސް ނުދެއްކޭނެއްނު…“ ވިސްނަން ހުރެފައި ލީޒާ ބުނެލިއެވެ.
”ބަލަ އަޑުނީވުނަކަސް ލޮލަށް ފެންނާނެއްނު….މީހުން ބުނާތީ އަހަން…އެއްހިއްސު މަދިއްޔާ އެހެން ހިއްސުތައް ގަދަވާނެއޭ….އެހެންވީމަ ލޮލުގެ ބޭނުންކުރާލެއް ބޮޑުވާނެއްނު…“ ރީނާ އޭނާގެ ޚިޔާލު ފާޅުކުރިއެވެ. އެދެކުދިން ވާހަކަ ދެއްކިއިރުވެސް ޝާނީހުރީ ހިމޭނުންނެވެ.
ޖިނާހްއަކީ ކުރިން މީހުނާ އެކުލަވާ އުޅުނު ކުއްޖެއްނޫންކަން އޭނާއަށްވެސް އެނގެއެވެ. ސުކޫލުންނާއި މަގުމަތިންވެސް ޖިނާހް ފެންނަނީ އެކަހެރިކޮށް އުޅެނިކޮށެވެ. އެހެންކުދިން މަލާމަތްކޮށް ފުރައްސާރަކޮށް ހަދާތީ އަބަދުވެސް ބިރުގަނެ، ސިހިފައި ހުންނަ މަންޒަރު އޭނާ ދެކެއެވެ. އޭނާ އަބަދުވެސް ޖިނާހްއަށް ހަމްދަރުދީވެއެވެ. ޖިނާހްއާ ވާހަކަދައްކާނެ ގޮތެއް ނޭނގޭތީ ވާހަކަ ނުދެއްކި ނަމަވެސް އޭނާ ކުރިންވެސް ޖިނާހް ފެނުމުން ހީލާ ހަދައެވެ.
ނަމަވެސް މިހާރު އޭނާއަށް ފެންނަންހުރި ޖިނާހްއާއި ކުރިން އޭނާ ދުށް ޖިނާހް ވަރަށްވެސް ތަފާތެވެ. ޒުވާނުންގެ މެދުގައި ހެވިފައި ހުރިއިރު، އޭނާއަކީ އަޑުނީވޭ ވާހަކަ ނުދެއްކޭ މީހެކޭވެސް މީހަކު ނުބުނާނެއެވެ. އެހެން ޒުވާނުންވެސް ދާދި ފަސޭހައިން އޭނާއާ މުއާމަލާކުރާތީ ފެނެއެވެ.
“ ކާކުތަ ޖިނާހްއާ ވާހަކަދައްކަން އެހުރީ؟…އެއީ މިރަށުމީހެއްނޫން ދޯ…“ ރީނާގެ ގާތުގައި ލީޒާ އަހާލިއެވެ.
“ ހޫމް…އެއީ އެއްކަލަ އެޑަމްއެއްނު….މިދިޔަ އަހަރު ބޮޑުއީދުގަވެސް އޭނަ އައޭ…ލީ ނުދެކެންތަ؟..އޭނާ މިރަށަށް އައިފަހުން ޖިނާހް އެހާގިނައިން ނުކުމެ ޒުވާނުންގެ ތެރޭގަ އުޅެންފެށީ…“ ރީނާ އޮޅުން ފިލުވައިދިނެވެ.
“ ރީނާއަށް ހާދަ އެނގެޔޭދޯ….ކޮންތާކުން ތިހުރިހާ މައުލޫމާތެއް ހޯދީ…“ ލީޒާ ގަޔާވެލާފައި އަހާލިއެވެ.
“ ދޮންބެގެ ފަރާތުން….ދޮންބެވެސް ރައްޓެއްސޭ އޭނަޔާ….ދޮންބެބުނި އެޑަމް އެއީ ޖިނާއާ އެއް ސުކޫލެއްގާ ކިޔެވި މީހެކޯ….އޭރު ބެސްޓް ފުރެންޑޭބުނީ…“ ރީނާ އިތުރަށް އޮޅުން ފިލުވައިދިނެވެ.
ޝާނީއަށް ލިބެމުންދިޔަ ހުރިހާ މައުލޫމާތެއް އޭނާގެ ހިތުގައި ރައްކާކުރިއެވެ. ބައިބަލާމެޗް ފެށުމާއެކީ ތަރުހީބުގެ އަޑު ޖައްވުގައި ގުގުމައިގެން ދިޔައެވެ. ވަށްކޮށް އަޅާފައިވާ ކޮށީގެ ވަށައިގެން މީހުންތައް ފޯރީގައި ސާބަސްދެމުން ދިޔައިރު ކުޅުންތެރިންގެ ޖޯޝުވެސް އިތުރުވަމުން ދިޔައެވެ. ޖިނާހްއަށް ކޮށްޓަށް ވަންނަން ޖެހުނު ވަގުތު ޝާނީގެ ހިތްއަވަސްވެގެން ދިޔައެވެ. ޖިނާހްގެ ހަލުވިކަމުން މީހެއްގެ އަތުޖެހޭވަރެއްނޫނެވެ. ދެތިންމީހުން އެއްފަހަރާ އޭނާދިޔައީ ބޭރުކުރަމުންނެވެ.
އޭނާ ފޯރީގައި ކުޅެމުން ދަނިކޮށް، އެތެރޭގައި ތިބިކުޅުންތެރިން ރާވާލާފައި ޖިނާހް ބައްދާލައި ހިފަހައްޓާލިއެވެ. އެވަގުތު ޖިނާހް ފޮޅުވާލާފައި ދާންއުޅުމުގެ ތެރޭގައި ވެއްޓުނީ ޝާނީމެން ތިބި ދިމާލަށެވެ. އިދިކޮޅުބައިގެ އެންމެން ޖިނާހްގެ ގައިގާ އޮޅުލައިގަނެގެން ތިއްބައި، އޭނާ ކޮށިން ނުކުންނަށް މަސައްކަތްކުރަމުން އެއްލިކަޅިއަކުން ޝާނީ ފެނުނެވެ. ހިތް އަވަސްވެފައިވާ ޝާނީ އަތުގެ އިޝާރާތުން އޭނާއަށް އެނގުނުގޮތަކަށް ޖިނާހްއަށް ހިތްވަރުދިނެވެ. އެވަގުތު ބޭއިޚްތިޔާރުގައި ޖިނާހްއަށް ހިނިތުންވެވުނެވެ. އަދި ކުއްލިއަކަށް އޭނާގެ ހަށިގަނޑަށް އިތުރު ޖޯޝެއް ލިބުނުހެންވެސް ހީވިއެވެ. ހައެއްކަމީހުން ބާރަށް ހިފަހައްޓައިގެން ތިބުމާއެކުވެސް ފޮޅުވާލާފައި އޭނާ ކޮށީން ނުކުތެވެ. އެއާއެކު އިދިކޮޅުޓީމުގެ ބަލިވިއެވެ. ޝާނީއަށް އެމަންޒަރު ފެނިފައި އުފަލުން ފުންމަ ފުންމާފައި އަތްޖަހަންފެށުނީ އިޚްތިޔާރުން ބޭރުގައެވެ. އެމަންޒަރު ބަލަންހުރި ޖިނާހްގެ މޫނަށް އުފާވެރި ހިނިތުންވުމެއް ވެރިވެގެން ދިޔައެވެ. މޮޅުވުމުގެ އުފަލަށްވުރެ ބޮޑު އުފަލެއް އެކަމުގެ ސަބަބުން އޭނާއަށް ލިބުނެވެ.
“ އޭތް އޭތް…ކާކު އެތާހުރެގެން އެހާ އުފަލެއް ތިވީ؟…ދޮންބެމެން ބަލިވީނު އެ…ހަނދާންވޭތަ ދޮންބެމެން މޮޅުވެއްޖެނަމަ ދަޅުދޭނަމޭ ބުނި ހަނދާން….“ ކުއްލިއަކަށް ރީނާ ހަނދާންކޮށްދިނީ އެދުވަހު ހެނދުނު ރީނާމެންގެ ގެޔަށް ގޮސް އުޅެނިކޮށް ރީނާގެ ދޮންބެބުނި ވާހަކައެވެ.
“ ސޮރީ…މަހީކުރީ ދޮންބެމެން ބައިކަމަށް މޮޅުވީ…“ އަވަހަށް ޝާނީ އޮޅުވާލިއެވެ.
ކުޅިވަރު ނިމުމާއެކު ޒުވާން ހުރިހާ ފިރިހެންކުދިން މޫދަށް ދިޔައެވެ. އެމީހުނާއެކު ޖިނާހްވެސް ގެންދަން މަސައްކަތްކުރިއެވެ. ނަމަވެސް އޭނާ އިންކާރުކުރީ އިރުއޮއްސެން ގާތްވެފައި ހުރުމުންނެވެ. ވަގުތަށް ނަމާދަށް ދިއުމަކީ ކުޑައިރުއްސުރެ އޭނާގެ އާދައެކެވެ. އޭނާދެކެ މުދިންބޭ އެހާ ލޯބިވާ ސަބަބަކީވެސް އެއީއެވެ. ގިނަރޭރޭގެ ފަތިސްނަމާދުގައިވެސް ސަފުގައި ތިބޭ ދެތިންމީހުގެ ތެރޭގައި އޭނާވެސް ހުންނާނެއެވެ.
އީދުގެ އެންމެ ފަހުދުވަހެވެ. މިއަދަކީވެސް ފޯރިކުޑަ ދުވަހެއްނޫނެވެ. މިއަދުގެ ކުޅިވަރުގެ ތެރޭގައި އޮތީ އަންހެނުންގެ ބަށިމެޗަކާއި ފިރިހެނުންގެ ފުޓްބޯޅަމެޗެކެވެ. ވަރަށް ފޯރީގައި އަންހެނުންގެ މެޗް ނިމިއްޖެއެވެ. ފިރިހެނުންގެ ފުޓްބޯޅަ މެޗް ފެށުމާއެކު ޖިނާހްވެސް ދަނޑަށް އަރާ މަންޒަރު ފެނުނެވެ.
މިއަދުގެ މެޗްކުޅެވެނީ ހުސްހަށިބައިމީހުންނާއި ކައިވެނިކޮށްގެން އުޅޭމީހުންގެ މެދުގައެވެ. އެންމެންގެ މެދުގައިވެސް އެންމެ ޒުވާން ކުއްޖެއްގެ ގޮތުގައިހުރީ ޖިނާހްއެވެ. އޭނާގެ އުމުރުން އެންމެ އަށާރަ އަހަރެވެ. ދެންތިބީ ވިހިއަހަރާއި ފަންސަވީސް އަހަރާއި ދެމެދުގެ ހުސްހަށިބައި ޒުވާނުންނެވެ. އެހެންކަމާއެކުވެސް އެންމެންނަށްވުރެ ޖިނާހް އިސްކޮޅުން ބޮޑުވެފައި ހަށިގަނޑުން ވަރުގަދައެވެ.
ތާއަބަދު އެކި އެކި މަސައްކަތުގައި އުޅުމާއި އާއްމުގޮތެއްގައި މޫދަށްގޮސް ފަތާހެދުމާއި ގަސްގަހަށް އަރާހެދުމުގެ ސަބަބުން އޭނާގެ ހަށިގަނޑުގެ މަސްތައް ވަރުގަދައެވެ. ބައިބަލާގައިވެސް އޭނާ ބަލިނުކުރެވުނު އެންމެބޮޑު ސަބަބަކީ އެއީއެވެ. ކުޅެންފެށުމާއެކު އޭނާގެ ހަލުވިކަންވެސް ޝާނީއަށް ފާހަގަކުރެވުނެވެ. އިދިކޮޅު ކުޅުންތެރިންގެ ކައިރިން ބޯޅަ ސަލާމަތްކުރަމުން ކުރިއަށް އަރައިގެން ގޮސް ލަނޑެއްވެސް ޖަހާލީ ހިނދުކޮޅެއްގެ ތެރޭގައެވެ.
އެންމެނާއި އެކުވެގެން ކުޅެމުން ދިޔައިރު، އޭނާއަކީ އަޑުނީވޭ މީހެއްކަމުގެ އިހުސާސް ބެލުންތެރިންނަށްވެސް ނުކުރެވެއެވެ. ޖިނާހްވެސް ކުޅެމުންދަނީ ޚުދު އޭނައަށް އަޑުނީވޭކަން ދަނެގެން ލައިސްމަނުންގެ ހަރަކާތްތަކަށް ބަލަމުންނެވެ. އެއްފަހަރު ރެފްރީ ކަށިގަނޑު ފުންމާލުމުންވެސް އޭނާއަށް އެކަން ނޭނގިދިޔައެވެ. ނަމަވެސް އޭނާގެ އެކުވެރިން ނުހަނު ހުޝިޔާރެވެ.
އެހެންކަމުން އޭނާއަށް މާބޮޑު މައްސަލެއް ދިމާނުވެ މެޗެ ނިމިގެން ދިޔައެވެ. ދެކޮޅުންވެސް ވަރުގަދަ ހަމަލާތަކެއް ދެމުންގޮސް، އެއްވަރުވެފައި ވަނިކޮށް މެޗްގެ އެންމެ ފަހު ވަގުތުކޮޅުގެ ތެރޭގައި ޖިނާހް ލަނޑެއްޖަހައި އޭނާގެ ޓީމް މޮޅުކޮށްދިނެވެ. މެޗްގެ މޭން އޮފް ދަ މެޗް މަގާމުވެސް ހާސިލްކުރީ އޭނާއެވެ. އޭނާގެ ހުނަރުވެރިކަން ނޭނގިތިބި އެތައް ބަޔަކު ހައިރާންކުރުވަމުން ހިނިތުންވެހުރެ އޭނާ ތަށި އުފުލާލިއެވެ.
“ މަ ހަމަ ހައިރާން ވެއްޖެ….އޭނާ ހަމަ ކުރިންވެސް އެހާމޮޅުތަ؟…“ ލީޒާހުރީ އަދިވެސް ގަބޫލުކުރަން ދަތިވެފައެވެ.
“ މިއޮއްހާ ދުވަހު އޭނާ އެހުނަރު ދައްކާނުލަން ހުރީހެން މަށަށް ހީވަނީ“ ރީނާވެސް ހުރީ ހައިރާންކަމެއްގެ ތެރޭގައެވެ. ޝާނީ ބަހަކުންކުރެ ބަހެއްވެސް ނުބުނެ ހުއްޓެވެ. ޖިނާހްގެ ކިބައިން އޭނާއަށް މުޅިންވެސް މިފެންނަނީ ހައިރާންކުރުވަނިވި ތަފާތު ކަންތައް ތަކެކެވެ. އެންމެ ފަސްއަހަރުގެ ތެރޭގައި އިންސާނަކު އެހާބޮޑަށް ބަދަލުވެދާނެ ހެއްޔެވެ؟
ރޭގަނޑުގެ ވަގުތެވެ. އީދުގެ ކުޅިވަރުގެ އެންމެ ފަހުރެއެވެ. ކުޅޭބިމުގައި ބޮޑުބެރު ޖެހުން އޮތީތީ، ޝާނީ އޭނާގެ އެކުވެރިންނާއެކު ބޮޑުބެރު ބަލަން ދިޔައެވެ. އެއީ އަދި އެހެން ހުރިހާ ކުޅިވަރަކަށްވުރެ ފޯރިގަދަ ކުޅިވަރެކެވެ. އެއީ ދިވެހީންގެ ލެޔާއި ގުޅިފައިވާ ކުޅިވަރެކެވެ. ރީތި ރާގު ރާގުގެ ލަވަތައް ކިޔައި އޭގަ ހަމައާއި އެއްގޮތަށް ބެރުޖަހަމުން ދިޔަ މީހުންގެ މޫނުމަތިންވެސް އެމީހުންގެ ޖޯޝް ފާޅުވަމުން ދިޔައެވެ.
ލަސްލަވަތަކުން ފެށިގެން ގޮސް އަވަސް ވަމުންގޮސް އޭގެ ފޯރި އެންމެ ގަދަވާ ހިސާބުން ބައެއްމީހުން ބެރުތައް ދޫކޮށްލާފައި ތެދުވެ ނަށަށްފަށައެވެ. ތަންކޮޅެއް ލަދުރަކިމީހުންވެސް މޫނުނިވާކޮށްގެން ތިބެވެސް ލަވަތަކުގެ ހަމަތަކާއި އެއްވަރަށް ފައިހަމަކުރަމުން ދިޔައެވެ. އަނެއް ބަޔަކު އަންހެން ހެދުން އަޅައިގެން އައިސް ނަށަމުން ދިޔައިރު، ބައެއް އަންހެންވެރިންވެސް އެކަމުގެ ފޯރީގެ ތެރެއަށް ވަދެ ފިރިހެނުންނާއި މަސްހުނިވެގެން ނަށައެވެ.
މިއުޅެވޭ ނޫޅެވޭއެއް ނޭނގި ވަޖިދުވާމީހުންވެސް ތިއްބެވެ. މިއުޒިކަކީ މީހާ މަސްތުކޮށް، ހިނދުކޮޅަކަށް ނަމަވެސް ބުއްދި ގޯސްކޮށްލާފަދަ ޝައިތޯނީ އެއްޗެއްކަން އޭރުވެސް ބުއްދިހުރި މީހަކަށް ވިއްޔާ އެނގޭހައިވެއެވެ. އެތަނުން މީހަކު ޒާތެއްގެ ވައްތަރެއް ޖައްސަމުން ޝާނީއާ ދިމާއަށް އައުމާއެކީ އޭނާ ބިރުންގޮސް ލީޒާގެ ފަހަތަށް ވަދެ ފިލިއެވެ. “ މޮޔަވެފަ ކަންނޭނގެ އެހުރީ…“ ބިރުންހުރެ ސިއްރު ސިއްރުން ލީޒާގެ ގާތުގައި ޝާނީ ބުންޏެވެ. ޝާނީ އުޅުނު ގޮތުން ލީޒާ ހޭންފެށިއެވެ.
އެއާއެކު ދިމާލަކުން ފްލޭޝްކެނޑިގެން ދިޔަ މަންޒަރު ފެނުމުން ޝާނީ ސިހިފައި ބަލާލިއިރު، ކެމެރާއެއް ކަރުގައި އަޅުވައިގެން ތަންކޮޅެއް ދުރުގައިހުރި ޖިނާހް ބޮޑުބެރު ޖަހާމީހުންގެ ފޮޓޯނަގަމުން ދިޔައެވެ. ފޮޓޯނަގާފައި ކޮންމެ ފަހަރަކު ޖިނާހްގެ ގާތުގައިހުރި އެޑަމްއަށް ދައްކާލައެވެ. އެޑަމް އަތުގެ އިޝާރާތުން ރަނގަޅޭބުނެ ހިނިތުންވެލައެވެ. އެރޭ ޖިނާހް ވަރަށް ގިނަ މީހުންގެ ފޮޓޯނެގިއެވެ. ޝާނީމެންނާއި ދިމާލަށްވެސް އެއްފަހަރު ފްލޭޝްކަނޑާލިއެވެ.
ނުނިމޭ- ވާހަކަ ކަމުދިޔަ ނަމަ fenvaru.mv ގެ އެފްބީ ޕޭޖަށް ލައިކެއް ދެއްވާ. އަދި ވާހަކަ ޝެއަރ ކޮށްލަދެއްވާ.
