ޝައިންގެ ވަފާތެރި މަވީމޭ- 07 ވަނަބައި
އުމުރުން ތޭރައަހަރުވީއިރު ސުކޫލަށް ދިއުންވެސް ހުއްޓާލައިފިއެވެ. އޭގެފަހުން އޭނާ ގިނަ ވަގުތު ހޭދަކުރަނި ގޮނޑުދޮށުގައާއި ވަލުތެރޭގައެވެ. މޫދަށް ގޮސް ފީނުމާއި މަސްހިފުމަކީ އޭނާ ނުހަނު ކުރާހިތްވާ ކަމެކެވެ. ދޮންމަދު މޫސުމުގައި މަދުބިންނަން ގަސްގަހަށް އަރައެވެ. ވަލުތެރޭގެ ހުރިހާ ސަރަހައްދެއްވެސް އޭނާއަށް ހިތުދަހެވެ. ކުއްޅަވަށްފަލުން ކުއްޅަވަށް ބިނުމާއި ދަނބުގަހުން ދަނބު ބިނުމާއި ނިކަ ގަސްގަހުން ނިކަބިނުމަކީ އެހެންކުދިންނަށް ނުހަނު އުދަގޫ ކަމަކަށް ވިޔަސް އޭނާއަށް ދާދި ފަސޭހަކަމެކެވެ.
ގިނަ ވަގުތު ވަލުތެރޭގައި ހޭދަކޮށް، ހަލުވިކަމާއެކު ގަސްގަހަށް އަރައި އުޅޭތީ އެހެންކުދިން އޭނާއަށް “ ޖަންގަލް ބޯއީ“ ގެ ނަމުންވެސް ނަންދިނެވެ. އޭނާގެ ފުރާވަރުގެ ކުރީކޮޅުގައިވެސް އެހެންކުދިންގެ ފަރާތުން ކުދި ކުދި ގޯނާތައް ލިބެމުންދިޔައެވެ. ނަމަވެސް މިހާރު ހާލަތު މުޅިންތަފާތެވެ. އެކަމުގެ އެންމެބޮޑު ސަބަބަކަށްވީ އޭނާގެ އެންމެގާތް އެކުވެރިޔާ އާދަމްއެވެ.
އާދަމްއަކީ އޭނާއާއި އެއްސުކޫލެއްގައި ކިޔެވި އަވަށްޓެރި ކުއްޖެކެވެ. އޭނާއަށްވުރެ ފަސްއަހަރު ދޮށީ ޒުވާނެކެވެ. އޭނާ ގްރޭޑް ފަހެއްގައި ކިޔެވިއިރު އާދަމްއަކީ ގްރޭޑް ދިހައެއްގެ ދަރިވަރެކެވެ. އާދަމްއަކީ މާލެއަށް ނިސްބަތްވާ ކުއްޖެއް ނަމަވެސް، އާއިލާގައި ކުދިން ގިނަކަމާއި ފޯރުންތެރިކަން ކުޑަކަމުން، އޭނާ އަމިއްލަ މަސައްކަތުން ލާރިހޯދަން މަޖުބޫރުވިއެވެ. އޭނާއަކީ ކިޔެވުމަށާއި އެހެނިހެން ކަންކަމުގައިވެސް ހުނަރުވެރި ކުއްޖެއްކަމުން އޭނާ އެހުނަރުތަކުގެ ބޭނުން ހިފިއެވެ.
އެހެންކަމުން ޖިނާހް މައިންބަފައިންގެ އެދުމުގެމަތިން އެގެއަށް އައިސް އާދަމް ޓިއުޝަންދޭން ފެށިއެވެ. ދެކުދިންގެ އެކުވެރިކަން އުފެދުނީ އެހިސާބުންނެވެ. ޖިނާހްއަށް ރީތިކޮށް ކުރަހަން ދަސްވީވެސް އާދަމްގެ ފަރާތުންނެވެ. އާދަމްގެ އެހީތެރިކަމާއެކު ޖިނާހް އެއްވަނަ ދަރަޖައިގައި ފާސްވަމުން ދިޔައެވެ. ޖިނާހްގެ މައިންބަފައިން މިކަމާ ނުހުނު އުފާކުރިއެވެ. ޓިއުޝަން ދިނުމުގެ ބަދަލެއްގެ ގޮތުން މުސާރައިގެ އިތުރުންވެސް ތަފާތު ގިނަ ހަދިޔާތައް އާދަމްއަށް އެމީހުންދިނެވެ.
ނަމަވެސް ޖިނާހްއަށް ދިމާވި ހިތާމަވެރި ހާދިސާގެ ސަބަބުން އެކުދިންގެ ގުޅުމަށް ބުރޫއެރިއެވެ. ޖިނާހްގެ މިޒާޖަށް އައި ކުއްލި ބަދަލުގެ ސަބަބުން ޓިއުޝަން ދިނުން ކުރިޔަށް ނުގެންދެވި ހުއްޓާލަން މަޖުބޫރުވިއެވެ. އާދަމް ބަރާބަރަށް ޖިނާހްގެ ހާލުބަލަމުން ދިޔަނަމަވެސް ޖިނާހް، އާދަމްއާވެސް ވާހަކަދައްކާކަށް ބޭނުމެއްނުވިއެވެ. އެންމެފަހުން ޖިނާހް ރަށަށް ބަދަލުވި ހިސާބުން ދެކުދިންގެ ގުޅުމަށް ނިމުން އައީއެވެ.
އޭގެ އެތައް ދުވަހެއްފަހުން އަނެއްކާވެސް އާދަމްއާއި ޖިނާހް ބައްދަލުވީ މީގެ އެއްއަހަރުކުރިން އަތޮޅު ޒޯން މުބާރާތުގައި ރަށުޓީމަށް ފުޓުބޯޅަ ކުޅުމަށްޓަކައި އާދަމް އެރަށަށް އައި ހިސާބުންނެވެ. ޖިނާހް އެރަށުން ފެނުމުން ފުރަތަމަ އާދަމްއަށް ދެނެގަންނާކަށް ނޭނގުނެވެ. ނަމަވެސް ޖިނާހްގެ ނަމާއި އޭނާއަކީ މަންމަން ކުއްޖެއްކަމަށް މީހުންގެ ފަރާތުން އަޑުއިވުމުން ޖިނާހްގެ ހަޤީޤަތް އޭނާ ބަލަން ބޭނުންވީއެވެ. އެގޮތުން ޖިނާހްގެ މަންމައަކީ ކާކުކަން އެނގުމާއެކު އެއީ ޖިނާހްކަން އޭނާއަށް ޔަޤީންވިއެވެ.
އޭނާ އަމިއްލައަށް ޖިނާހްގެ ގެޔަށްގޮސް ޖިނާހް އަދި އޭނާގެ މަންމައާއިވެސް ބައްދަލުކުރިއެވެ. އާދަމް ފެނުމުން ޖިނާހް އޭނާއާއި ވާހަކަދައްކަން ފުރަތަމަކޮޅު ޖެހިލުންވިއެވެ. ނަމަވެސް ދުވަސްކޮޅެއްގެ ތެރޭގައި ދެކުދިންގެ މެދުގައި އަނެއްކާވެސް އެކުވެރިކަން އުފެދުނެވެ. އާދަމް ވަރަށް އުނދަގުލުން ޖިނާހްއާއި އިޝާރާތުން ވާހަކަދައްކަން ދަސްކުރިއެވެ. ޒޯން ނިމުމުންވެސް ޖިނާހްއާއެކު ދުވަސްކޮޅެއް ހޭދަކޮށްލުމަށްޓަކައި އޭނާ އެރަށުގައި މަޑުކުރިއެވެ. ދެކުދިން އެތައްގިނަ ވަގުތުތަކެއް ހޭދަކޮށް ދިރިއުޅުމުގެ ކަންކަން ހިއްސާކުރިއެވެ.
އާދަމްއަކީ މިހާރު ސަރުކާރުގެ ކުންފުންޏެއްގައި އިސްމަޤާމެއް އަދާކުރަމުންދާ ހަރުދަނާ ޒުވާނެކެވެ. އޭނާގެ އާއިލާއަކީވެސް މިހާރު ފޯރާ އާއިލާއެކެވެ. އެހެންކަމުން ޖިނާހް އެނބުރި މާލެއައުމަށް އޭނާ ދައުވަތުދިނެވެ. ނަމަވެސް ޖިނާހް އެކަމާ އިންކާރުކުރިއެވެ. އޭނާގެ މަންމަ އެކަނި ދޫކޮށްފައި ދާން ބޭނުންނުވާކަމަށް ބުންޏެވެ. މަންމައާއެކު އައުމަށް އެދުމުން، އޭނާގެ އަމިއްލަ ރަށް މާ ހިތްފަސޭހަ ކަމުގައި ބުނެ އިންކާރުކުރިއެވެ. ޖިނާހް އެނބުރި މާލެ ނުދާނެކަން ޔަޤީންވުމުން، ކޮންމެ އަހަރަކުވެސް އެއްފަހަރު އާދަމް އެރަށަށް އައުމަށް އެއްބަސްވިއެވެ. އެގޮތުންވެސް އެދެމީހުންގެ އެކުވެރިކަން އެގޮތުގައި ދެމިއޮންނަން އޭނާ ބޭނުންވިއެވެ.
އާދަމްއަކީ ރަށުގެ ހުރިހާ ޒުވާނުންގެ މެދުގައި ނުހަނު މަޤުބޫލު މީހަކަށްވީތީ، އާދަމްއާއި ޖިނާހްގެ އެކުވެރިކަން ފެނިފައި ރަށުގެ ޒުވާނުންވެސް ޖިނާހްއާއި ގާތްކަން ބާއްވަން ފެށިއެވެ. އެހެން ޒުވާނުންނާއި ތަފާތުކުރުމެއްނެތި ކަންކަމުގައި ބައިވެރިކުރަންފެށިއެވެ. އާދަމްގެ ފަރާތުން ޖިނާހްގެ ހުނަރުވެރިކަންވެސް ރަށުގެ ޒުވާނުންނަށް އެނގުނެވެ. އެހެންކަމުން ޖިނާހްއަކީވެސް ބާކީކޮށްލާފައި ބަހައްޓާވަރުގެ ނާޤާބިލު ކުއްޖެއްނޫންކަން އެމީހުންނަށްވެސް ގަބޫލުކުރެވުނެވެ.
ޖިނާހްއާމެދު ޒުވާނުން އަމަލުތައް ބަހައްޓަމުން އައިގޮތް ބަދަލުވުމުން ޚުދު ޖިނާހްގެ އުޅުމަށްވެސް ބޮޑު ބަދަލެއް އައެވެ. ޖިނާހްވެސް އޭނާގެ އަމިއްލަ ނަފްސަށް އޮންނަ އިތުބާރު ބޮޑުވެ، މީހުންނާއި ކުރިމަތިލާން ދަސްވިއެވެ. އޭނާގެ ހުނަރުވެރިކަން އެހެންމީހުންގެ ކުރިމަތީގައި ހާމަކުރަންފެށިއެވެ. އެހެންކަމާއެކު އޭނާވެސް ރަށުގެ މީހުންގެ ކުރިމަތީގައި މަޤުބޫލު މީހަކަށް ވެއްޖެއެވެ. މިހާރު ޒުވާނުން ކުރާ ކޮންމެ ކަމެއްގެ ކުރީ ސަފުގައި އޭނާވެސް ހުރެއެވެ. ނަމަވެސް، ޗުއްޓީނިމި ޒުވާނުންތައް ރަށުން ފުރައިގެން ދިއުމުން އޭނާ އަނެއްކާވެސް އެކަނިވެރިކަމުގެ ދުނިޔެއަށް އެނބުރިދިޔަވެ. އެކަނިމާއެކަނި ހަމަހިމޭން މާހައުލުތަކުން އެލިބޭ ހިތްހަމަޖެހުން އަދިވެސް މާބޮޑުކަމުގައި އޭނާއަށް ގަބޫލުކުރެވެއެވެ.
ރަށުގެ ޒުވާނުންގެ ވިސްނުން ބަދަލުވީނަމަވެސް އޭނާގެ އާއިލާގެ މީހުންގެ ވިސްނުން އަދިވެސްހުރީ އެގޮތުގައެވެ. އޭނާއާމެދު އަމަލުކުރަނީވެސް ކުރިންވެސް އަމަލުކުރަމުން އައި ގޮތަށެވެ. ޚާއްސަކޮށް ހަމްޒާ ފަރާތުން ފެންނަނީ ކުރިންވެސް ފެންނަ ނުރުހުމާއި ފޫހިކަމެވެ. ޒުވާނުންގެ މެދުގައި އޭނާ މަޤުބޫލުވީ ވަރަކަށް ހަމްޒާގެ ނުރުހުން އިތުރުވާހެންވެސް ހީވިއެވެ. ނަމަވެސް އޭނާ އެކަންކަމާ މާބޮޑަކަށް ނުވިސްނައެވެ. ހަމްޒާއަކީ އަބަދުވެސް ކުޑަ ދުވަސްކޮޅަކަށް ރަށަށް އަންނަ މީހެކެވެ.
ޒުވާނުންގެ މެދުގައިވެސް އޭނާގެ ނަން ހިނގަނީ ހަމައެކަނި ފައިސާވެރި ކަމުގެ ސަބަބުންނެވެ. އިތުރު އެއްވެސް ގޮތަކުން ހަމްޒާއާއި ގަޔާވާ މީހަކު ނޫޅެއެވެ. ހަމްޒާގެ ރުޅިގަދަކަމާއި ހަރުކަށި ބަސްމަގުގެ ސަބަބުން ގިނަ ޒުވާނުންވެސް އޭނާދެކެ ފޫހިވެއެވެ. ނަމަވެސް ހަމްޒާގެ ފަރާތުން ލިބޭ މަންފާގެ ސަބަބުން އޭނާގެ ފޮނިކަމާއި ބޮޑާކަމަށްވެސް އެމީހުން ކެތްކުރަނީއެވެ.
ފުން ވިސްނުމަކަށް ގެއްލިފައި އޮތް ޖިނާހްއަށް ހޭވެރިކަންވީ ފަތިހުގެ ބަންގީގެ އަޑަށެވެ. އޭނާ މޯޅިއަކަށް ދެމިލަމުން އެނދުން ތެދުވިއެވެ. މިސްކިތަށް ދިއުމުގެކުރިން ފާޚާނާއަށް ވަދެލުމަށް އޭނާ ގަސްތުކުރިއެވެ. ގިފިލި ހުންނަނީ ގެއާއި ވަކިންކަމުން، އޭނާ ބޭރަށް ނުކުމެ ގިފިއްޔަށް މިސްރާބު ޖެހިއެވެ. މުޅިރަށުގައިވެސް އެނޫނީ ގޭގައި ފާޚާނާތަށި ބަހައްޓައި ފާޚާނާ ކުރެވޭގޮތަކަށް ނުހުރެއެވެ.
އެއީވެސް އޭނާގެ ބައްޕަ އޭނާއަށްޓަކައި ކޮށްދިން ކަމެކެވެ. އެއީ އޭނާ ވަރަށްކުޑައިރު ރަށަށް އައިސް ފާޚާނާ ނެތިގެން ބޮޑާހޭކުމުން އެކަން ހައްލުކުރުމަށް ބައްޕަކުރިކަމެއް ކަމުގައި މަންމަ ބުނެއެވެ. ނަމަވެސް އޭނާ އެކަމުގެ ހަނދާނެއް ނުހުރެއެވެ. ގިފިއްޔަށް ވަންނަން ދިމާކޮށްލިވަގުތު، ކޮންމެވެސް މީހަކު އެތެރޭގައި އުޅޭއަޑު އިވުމުން އޭނާ ބޭރުގައި މަޑުކޮށްލިއެވެ.
އިރުކޮޅެއްފަހުން ގިފިލިން ނުކުތީ ހާރިޝްއެވެ. ޖިނާހް ފެނިފައި ކުޑަކޮށް ސިހިފައި ހާރިޝްއަށް ހުއްޓެވުނެވެ. ނަމަވެސް އެއީ ޖިނާހްކަން ޔަޤީންވުމުން އަނގައިންވެސް ނުބުނެ އެދިޔަގޮތަށް ގޮސް ގޭތެރެއަށްވަނެވެ. ހާރިޝް އެގަޑީގައި ހޭލާއުޅެނީ ކީއްކުރަންކަން ނޭނގުނު ނަމަވެސް ހާރިޝް ފަތިސްނަމާދަށް ދާން ނުތެދުވާނެކަން އޭނާއަށް ޔަޤީނެވެ. ހާރިޝް ދިއުމުން ޖިނާހް ގިފިއްޔަށްވަދެ އަވަސްކޮށްލައިގެން އޭނާ ނުކުތީ ފަތިސްނަމާދުގެ ޖަމާއަތް އޭނާއަށް ނުލިބިދާނެތީއެވެ.
******
ހެނދުނުގެ ވަގުތެވެ. ގޯތިތެރެ ކުނިކެހުމަށްޓަކައި ޝާނީ ނުކުތެވެ. ކުނިކަހަމުން ދަނިކޮށް ކުއްލިއަކަށް އޭނާގެ ލޮލުގައި އަޅައިގަތީ ބަނބުކެޔޮ ގަސްދޮށުގައިވާ ޖޯލިފަތީގެ ތަންދޮށުގައިހުރި އޭނާގެ ފައިވާނެވެ. އެއީ އިއްޔެ މަދުގޮސްދޮށުގައި ބަހައްޓާފައި އައި ފައިވާނެވެ. އޭނާ ޖޯލިފަތި ކައިރިއަށް އައިސް ބަލާލިއިރު، ފައިވާންމަތީގައި ފަތުންހަދާފައިވާ ގޮށްޓެއްވެސް އޮތެވެ. އޭނަ ޖޯލިދޮށަށް އަތްކޮށްޕާލަމުން އެގޮށިނަގާ ބަލާލިއެވެ.
“ ދޮންމަދު…“ ހިނިތުންވެލަމުން އޭނާއަށް ބުނެވުނެވެ. ޖިނާހް އޭނާގެ ފައިވާނާއެކު ދޮންމަދުވެސް ގެނެސްދިނީއެވެ. ޝާނީ ކުނިކެހުން ހުއްޓާލާފައި ޖޯލިފަތީގައި އިށީނދެ މަދުކާންފެށިއެވެ.
“ އެކަމު ކޮންއިރަކުބާ އޭނަ މިގެނައީ…“ މަދުކާން އިނދެގެން ހިތާހިތާ ޝާނީ ސުވާލުކޮށްލިއެވެ.
“ ދަރިފުޅާ ޝާނީ މިހާރު ކުނިކަހާ ނިމުނީތަ؟..“ ޝާނީ ސިހުނީ ގޭތެރެއިން ނުކުތް އޭނާގެ މަންމަގެ އަޑުންނެވެ.
“ ނޫން މަންމާ….މިހާރު މިނިންމާލަނީ…“ ކާންއިން މަދު އެއްލާލަމުން އަވަސް އަވަހަށް އޭނާ ޖޯލިން ތެދުވެ ކުނިކަހަން ފެށިއެވެ.
“ އަވަސްކޮށްލައިގެން އާދެބަލަ! މިއަދު މިއުޅެނީ ފަތްކޮޅެއް ތެލުލަންވެގެން…އަދި ފަންތޮށިކޮޅަކާ ފުޅޮފިކޮޅެއްވެސް ހޯދައިގެންވާނީ….ދަރިފުޅު ސައިހަދާ މަންމަ ދާނަން ވަލަށް ގޮސްއަންނަން…“ އާބިދާ އެދުނެވެ.
“ ނޫން މަންމަ ސައިހަދާ….އަހަރެންދާނަން ވަލަށް….“ ޝާނީ އަވަސް އަވަހަށް އެދުނެވެ. ރޮށިފިހުމަކީ އޭނާއަށް ނުހަނު ބުރަކަމެކެވެ. އެހެންކަމުން އޭނާ ބޭނުންވީ އެކަމުން ސަލާމަތްވާށެވެ.
“ ދަރިފުޅަށް އެނގޭނެތެ ވަލުގަ ހިނގަން…ދުވަހަކުވެސް ވަލަށްދިޔަ ކުއްޖެއްނޫން ވިއްޔަތީ…“ ހައިރާންވެފައި ބުނެލިއެވެ.
“ އާނ…މަންމާ އެނގޭނެޔޭ…އެހެންނޫނަސް އެހާދުރަކަށް ނުދާނަމޭ….ދޮންތަމެންގެ ގެޔާދިމާލަށްދާނީ…“ ޝާނީ ޖަވާބުދިނެވެ.
“ އެންމެ ރަނގަޅު…ކުޑަކަތިވަޅި ހިފައިގެންދާތި…އޭރުން ފަސޭހަވާނީ…މަންމަވެސް ދާނަން ސައިހަދާފަ…“ އާބިދާ ބުނެލިއެވެ.
ޝާނީ ކުނިކަހާ ނިންމާލުމަށްފަހު މަންމަ ބުނިގޮތަކަށް ކުޑަކަތިވަޅި ހިފައިގެން ވަލަށް ދިޔައެވެ. އޭނާއަކީ ދުވަހަކުވެސް ވަލުގައި ހިނގައި ދަރުފަޅާހެދި ކުއްޖެއްވެސް ނޫނެވެ. ނަމަވެސް މިހާރުދެން މިކަންވެސް ދަސްކުރަން ޖެހުނީތާއެވެ. އަވަށުގެ މީހުން އުޅޭ ސަރަހައްދުން ނެއްޓި، ވަލުތެރެއަށް ވަންނަން އޮންނަ މައިމަގުން އޭނާ ކުރިޔަށްދިޔައެވެ. ޚިޔާލެއް ފިކުރެއްނެތި މަގުތެ ދެފަރާތަށް ބަލަމުން އޭނާދިޔައީ ހިކި ފަންތޮއްޓާއި ފުޅަފި ފެނޭތޯއެވެ.
“ މިހެން ހިނގައިގެން އެއްޗެއް ނުފެންނާނެ…އެތެރެއަށް ވަންނަންވީ ކަންނޭނގެ…“ މަގުގެ މެދާހަމައަށް ދިޔައިރުވެސް އޭނާއަށް ކަމުދާ ފަންތޮށިކޮޅެއް ނުފެނުމުން ވަލުތެރެއަށްވަދެ ރުއްރުއްދޮށުން ފަންތޮށި ހޯދުމަށް އޭނާ ނިންމިއެވެ. އެހެންކަމުން، އެންމެ ފުރަތަމަ ޖެހުނު ހަނި ހަނިމަގުން އޭނާ އެތެރެއަށްވަނެވެ. ހިނގަމުން ތަންކޮޅަކަށް ދިޔަތަނާ، ހިކި ފަންތޮށްޓާއި ފުޅަފިވެސް ފެންނަންފެށިއެވެ.
އޭނާ އުފަލުންހުރެ ފަންތޮށިފަޅާ އެއްކުރަންފެށިއެވެ. ދަރުއެއްކުރަމުން ބިއްދޮށަށް ވަންނަނިކޮށް އޭނާއަށް ނުކުމެވުނީ ބިޔަ ބޯކޮށް ހެދިފައިވާ ކުދިލިބޯ ބަގީޗާއެއްގެ ތެރެއަށެވެ. ފެހިކަންގަދަ ކުދިލިބޯ ގަސްތަކުގައި ދޮންވެ ފައްކާވެފައިވާ ކަޅުރަތްކުލައިގެ ކުދިލިބޯތައް ފެނުމާއެކު އޭނާކުރަމުން ދިޔަ މަސައްކަތުގެމަތިންވެސް ހަނދާންނެތުނެވެ. ކައިރީގައިހުރި ކުޑަ އަހިގަހެއްގައި ކަތިވަޅު ހަރުކޮށްލުމަށްފަހު ކުދިލިބޯ ގަސްތަކާދިމާއަށް އޭނާދިޔައެވެ. “ ވާއު…ހާދަބައިވަރު ލުބޮއެކޭ…ހާދަމީރުވާނޭ…“ ކުދިލިބޯތައްފެނި ކުޅުދިޔާވެގެން އޭނާއަށް ބުނެވުނެވެ.
އެންމެގާތުން އަތުޖެހެންހުރި ލިބޯތައް ބިނުމަށްފަހު ދެތިންލިބޯ އެއްފަހަރާ ކާލިއެވެ. އޭގެފޮނިމީރު ރަހައިގެން އޭނާއަށް ދެލޯމަރާލެވުނެވެ. އޭނާ ލިބޯބިންނަމުން ގޮސް އަތްފުރުމުން ކައިރީގައިވާ އުނިގަހަކުން ފަތެއް ބިނދެލައިގެން އެއިން ގޮށްޓެއްހެދުމަށް ގަސްތުކުރިއެވެ. ނަމަވެސް އޭނާ އެތައްފަހަރު މަސައްކަތްކުރުމުންވެސް ގޮށްޓެއް ހެދޭގޮތެއްނުވިއެވެ. އެންމެފަހުން ރުޅިއައިސްގެން އޭނާ ފަތް އެއްލާލުމަށްފަހު ހެދުމުގެ ފަސްބަޔަށް ލިބޯތައް އަޅަންފެށިއެވެ. އޭނާ ފޯރީގައި ކުދިލިބޯ ބިންނަމުން ދިޔައިރު، އެމަންޒު ބަލަން ތަންކޮޅެއްދުރުގައި މީހަކުހުރިކަމެއް އޭނާއަކަށް ނޭނގެއެވެ.
ނުނިމޭ- ވާހަކަ ކަމުދިޔަ ނަމަ fenvaru.mv ގެ އެފްބީ ޕޭޖަށް ލައިކެއް ދެއްވާ. އަދި ވާހަކަ ޝެއަރ ކޮށްލަދެއްވާ.
