ޝައިންގެ- ވަފާތެރި މަވީމޭ- 12 ވަނަބައި
އެދުވަހަށްފަހު ޝާނީވެސް އާއްމުކޮށް ސަލްމާއާއެކީގައި ވަލަށްދާން ފެށިއެވެ. ގިނަ ދުވަސްތަކެއް ނުވެ ދަރުފަޅާށާއި ފަން ކިރިއްސަންވެސް އޭނާ ދަސްކުރިއެވެ. އަދި ފަންގިވިންނަންވެސް އޭނާ ދަސްކުރިއެވެ. ބޮނބިތަޅާ ރޯނުވަށަން ދަސްކުރަންވެސް އޭނާ ބޭނުމެވެ. އެހެންކަމުން މިއަދު ސަލްމާއާއި އޭނާގެ އަވަށްޓެރި ރަމްޝާ އޮޅުން ބޮނބިނަގަން ދާ ވާހަކަ ބުނުމުން އޭނާވެސް ދާން ބޭނުންވިއެވެ. އެމީހުނާއެކު ޖިނާހްވެސް ދާކަން ޝާނީއަށް އެނގެއެވެ. ޝާނީ އަށް ސަލްމާމެންގެ ގެއާއި ހަމައަށް ދެވުނުއިރު އެމީހުން ތިބީ ޝާނީގެ އިންތިޒާރުގައެވެ. ސަލްމާއާއި ރަމްޝާ އަދި ޖިނާހްގެ އިތުރުން ރަމްޝާގެ ކޮއްކޮ ރާއިދުވެސް ހުއްޓެވެ. ރާއިދުއަކީ އުމުރުން ތޭރަ އަހަރުގެ ކުޑަކުއްޖެކެވެ. ނަމަވެސް ބޮޑެތިމީހުން ފަދައިން ކަންކަން ކުރުމަށް ޝައުޤުވެރިވާ ހީވާގި ކުއްޖެކެވެ.
“ ރާއިދުވެސް ދޭތަ؟…“ ޝާނީ އަހާލިއެވެ.
“ އާނ…އޭރުން ޖިނާހްވެސް އެކަނި ނުވާނެއްނު….މިމީހުން ފައްކާވާނެ އޮޅަށް ފައިބަން…“ ސަލްމާ ޖަވާބުދިނެވެ.
“ ސަލްމާ! މަޖާ ހަދާ ސާމާނު ކޮބާ؟…“ ތަންކޮޅަކަށް ގޮސްފައި ރަމްޝާ އަހާލިއެވެ.
“ އެކަމާ ހާސްނުވޭ…މަޖާހަދަން ބޭނުންވާ ހުރިހާ ސާމާނެއް ހުންނާނެ ބަރޯގަ…“ ސަލްމާ ޖަވާބުދިނެވެ.
“ މަޖާ ހަދައިގެން މޫދަށްދާންތަ ތިއުޅެނީ؟…“ ޝާނީ އަހާލިއެވެ.
“ އާނ…މޫދަށް ގޮހެއްނު ބޮނބިތައް ދޮވެވޭނީ….“ ރަމްޝާ ޖަވާބުދިނެވެ.
”ބޮނބިތައް ދޮވެނިމިގެން ރަނގަޅު މަޖާގަނޑެއް ހަދާލަންވާނެ…މިހާރުވެސް ކުޅުދިޔާވެއްޖެ“ ފޯރީގައި ސަލްމާ ބުނެލިއެވެ. ޝާނީވެސް ހުރީ މަޖާކާހިތްވެފައެވެ. މަޖާގަނޑެއް ކާނުލާތާވެސް ދުވަސްތަކެއް ވެއްޖެއެވެ.
ރަށުގެ ދެކުނުކޮޅުން ވަލަށް ވަންނަން އޮންނަ ހަނި ހަނި މަގަކުން އެމީހުން ވަލަށް ވަނުމުން ޝާނީވެސް އެމީހުންގެ ފަހަތުން ދިޔައެވެ. އެއީ ތެދަށް އެއް މިސްރާބަކަށް އޮތް މަގެއް ނޫނެވެ. ގުދުގުދަށް އޮތް ދިގު މަގެކެވެ. ބޮޑެތި ރުއްތަކާއި ކަށިކެޔޮ ގަސްތައް ފަހަނައަޅައި ގޮސް ބޮނބިފަލަށް ވަދެވުމާއެކު ކަނޑޫފަލުން ދުވި ވަހަށްވުރެވެސް ނުބައި ފާވަހެއް ދުވަން ފެށިއެވެ. އެއީ ރުކާއި ގަސް މަދު ހާމަކަން ބޮޑު ހިސާބެކެވެ. ބިންގަނޑުގެ ވެލިގަނޑުގެ ކަޅުކަން ގަދަވެފައި ވެލިގަނޑު މަޑުވުމުން އެކީ ޗަކައުފެދޭ ބިމެއްކަން އެނގެއެވެ. ދިމަ ދިމާއިން ކޮނެފައިހުރި ފުން އޮޅުތައް ފެންނަން ފެށިއެވެ. ވަރަށް ގާތްގާތުގައިވެސް އޮޅު ހުއްޓެވެ. ކޮންމެ އޮޅެއްގައިވެސް ގާތްގަނޑަކަށް ހަފޫޓް ފަސްފޫޓު ހުންނާނެއެވެ. ވަގުތަކީ ދިޔަވަރު ބޮޑު ވަގުތެއްކަމުން އޮޅުތަކުގެ ފެންގަނޑުވެސް ހުރީ ނުހަނު ފުންކޮށެވެ. ފާވެފައިވާ ބޮނތްބާއި ފަނުގެ ސަބަބުން ތަޣައްޔަރުވެފައިވާ އޮޅުތައް ފެނުމުން ޝާނީ ފަކުރުގަންނަ ގޮތްވިއެވެ.
“ ދޮންތާ މިތަނުން ދޮންތަމެންގެ އޮޅު ކިހިނެއް އެނގެނީ؟ ހުރިހާ އޮޅެއްވެސް މިހުރީ އެއްގޮތަކަށްނު؟…“ ޝާނީ އަހާލިއެވެ.
“ ބަލަ ކޮންމެ މީހަކަށްވެސް އެމީހެއްގެ އޮޅު ފާހަގަކުރަން އެނގޭނެއްނު….އެމީހަކު އޮޅުކޮޅުނު ސަރަހައްދު ވަވިކުރަން އެނގޭނެއްނު….“ ސަލްމާ ޖަވާބުދިނެވެ. އަދި އިނގިލިން އިޝާރާތްކުރަމުން އޭނާގެ އޮޅުދައްކާލިއެވެ. އެއޮޅާއި މާދުރުނޫން ހިސާބެއްގައި ރަމްޝާގެ އޮޅު އޮތެވެ. ޖިނާހްއާއި ރާއިދު އެއްވެސް ޖެހިލުމެއްނެތި އޮޅުތެރެއަށް ފުންމާލި މަންޒަރު ފެނުމުން ޝާނީ ބިރުގަތެވެ.
“ އޭގެ ތެރޭގަ ދިރޭ އެއްޗެއް ނޫޅޭނެތަ؟…“ ކަންބޮޑުވެގެން ޝާނީ އަހާލިއެވެ.
“ ނޫޅޭނެ…ޝާނީވެސް އެރެބަލަ އޮޅަށް…“ ސަލްމާ ބުނެލިއެވެ.
“ ނޫން މަށަކަށް ނުކެރޭނެ…“ ޝާނީ އަވަސް އަވަހަށް ބުނެލިއެވެ.
ރާއިދުއާއި ޖިނާހް ބޮނބިތައް އޮޅުން ނެގިވަރަކަށް ސަލްމާއާއި ރަމްޝާ ބަރޯއަށް އަޅަމުން ދިޔައެވެ. ނަމަވެސް ޝާނީއަށް ފަކުރުން ބޮނބިގަނޑެއްގައި އަތްލަންވެސް ނުކެރުނެވެ.
“ ތިވަރަކުން ނުވާނެ ޝާނީ….“ ރަމްޝާއަށް އެމަންޒަރު ފެނުމުން ހިނިއައިސްފައި ބުންޏެވެ.
ބޮނބި ނަގާ ނިމުމުން، ހުޅަނގު ފަރާތު ގޮނޑުދޮށަށް ނުކުމެވެން އޮންނަ ހަނިމަގަކުން ގޮނޑުދޮށަށް ފޭބިއެވެ. ދުވަހަކީ އުޑުމަތި ސާފު ރީތި ދުވަހެކެވެ. ކަނޑުވެސް މަޑުދުވަހަށްވާތީ މޫދުވެސް އޮތީ ނުހަނު ސާފުކޮށެވެ. ރީތި ފަޅެއް ނެތުމުގެ ސަބަބުން މޫދަށް އެރެންޖެހެނީ ގާމަދު ދިމާއެއް ބަލައިގެންނެވެ. ހުޅަނގު ފަރާތުންނާއި އިރުމަތީ ފަރާތުން، އޮޑިދޯނި ފަހަރު ވަދެ ނުކުމެވާން، ފަޅުގޮއްވައި ފުންކޮށްފައިވާ ސަރަހައްދެއް އޮވެއެވެ. އެނޫން ހުރިހާ ދިމާއެއްގައިވެސް ގާހުރެއެވެ.
ސަލްމާއާއި ރަމްޝާ ބޮނބިތައް ހިފައިގެން މޫދަށް އެރެން ފެށުމުން ޝާނީވެސް ފަކުރުންހުރެވެސް ބަރޯއިން ދެތިން ބޮނބިގަނޑު ހިފައިގެން މޫދަށް އެރުނެވެ. ރާއިދުވެސް އެމީހުނާއި އެކީގައި އެކަމުގައި ބައިވެރި ވިއެވެ. ބޮނބިދޮވެ ނިމިގެން، މަޖާހަދަން ގެނައި ސާމާނުތައް އަޅާފައިވާ ކޮތަޅު ހިފައިގެން ސަލްމާ އައިސް ވެލިގަނޑު މަތީގައި އިށީނދެ މަޖާހަދަން ތައްޔާރުވިއެވެ. ރަމްޝާވެސް އެކަމުގައި ބައިވެރިވިއެވެ. އޭރު ޝާނީއާއި ރާއިދު ގޮނޑުދޮށުގައި ވެލިން ގެހަދަން ތިއްބެވެ. ޖިނާހްވެސް ޝާނީގެ ގާތަށް އައިސް ޝާނީހަދާ ގެޔަށްވުރެ ބޮޑު ގެޔެއް ހެދިއެވެ. އަދި އެއީ ޝާނީއަށް ހަދައިދިން ގެޔެއްކަމުގައިވެސް ބުންޏެވެ. ޖިނާހް ބުނި އެއްޗެއް ދޭހަވުމުން ޝާނީ ލަދުގަންނަ ގޮތްވީ ރާއިދުވެސް އެތާ އިނުމުންނެވެ. ނަމަވެސް ރާއިދުއަކަށް އެކަމެއް ރޭކާނުލައެވެ. އޭނާ އިންތަނުން ތެދުވެގެން ކުއްލިއަކަށް ދުއްވައިގަތީ ތަންކޮޅެއް ދުރުގައި ލައްވެފައިވާ އަކިރި ފުންޏަކުން އެއްޗެއް ވިދާތީ ފެނުމުންނެވެ. ރާއިދު ގޮސް ބެލިއިރު އެއީ ލައްގާފައިވާ ބިއްލޫރިކޮޅެކެވެ. މޫދުގައި އޮވެ ގޭނިގޭނި އޭގެ ތޫނުކަން ވަނީ ކެނޑިފައެވެ. ޝާނީ ޖިނާހްއާއި އެކީ އެކަނިވުމުން ޖިނާހް ޝާނީގެ މޫނަށް ފުންކޮށް ބަލާލިއެވެ. އޭނާގެ ހިތުގައި ޝާނީއަށްޓަކައި އުފެދެމުން އަންނަ ލޯބި ދަނީ ދުވަހެއް ދުވަހަކަށް އިތުރުވަމުންނެވެ. ހަމަ އެފަދައިން ޝާނީވެސް އޭނަދެކެ ލޯބިވާކަމާމެދުވެސް އޭނާގެ ހިތުގައި ޝައްކެއްނެތެވެ. ޖިނާހް މަޑުމަޑުން އޭނާގެ އަތްގެންގޮސް ޝާނީގެ އަތުގައި ހިފާލަން އުޅެނިކޮށް ރާއިދު ގޮވާލުމުން ޝާނީ ތެދުވެގެން ރާއިދުގެ ގާތަށް ދިޔައެވެ.
“ ބަލާބަލަ! ކިހާ ރީތި ބޮއްޔެއް؟…“ ރާއިދު އޭނާގެ އަތުގައި އޮތް ބޮލި ދައްކާލަމުން ބުނެލިއެވެ.
“ ވާއު..ވަރަށް ރީތި….ބޭނުން…“ ޝާނީއަށް އެބޮލި ފެނުމާއެކު ދަހިގޮތަކަށް ބުނެލުމުން ރާއިދު ހިނިތުންވެލަމުން ޝާނީއަށް ބޮލިދިނެވެ.
“ އަދިވެސް މިއަކިރި ގަނޑުގަ ހުންނާނެ ވަރަށް ރީތި ބޮލި….ކުރިން ދުވަހު ހޮވި ބޮލިތަކެއްވެސް ހުންނާނެ ގޭގަ…“ އަކިރިގަނޑަށް ނަޒަރު ހުއްޓާލައިގެން ހުރެ ރާއިދު ބުންޏެވެ. ރާއިދު އެހެން ބުނުމުން ޝާނީވެސް ގަޔާވެގެން ބޮލިހޯދަން ފެށިއެވެ. އެމަންޒަރު ބަލަން ދުރުގައި އިނުމަށްފަހު ޖިނާހްވެސް އައިސް ބޮލިހޯދަން ފެށިއެވެ. ޝާނީއަށް ކިތަންމެ ކުޑަކުޑަ ބޮއްޔެއް ލިބުނަސް އޭނާ އުފާވެއެވެ. ޖިނާހް އަކިރިގަނޑު ހޯދަމުން ދަނިކޮށް ނުހަނު ރީތި އަދި އެހާމެ ބޮޑު ބޮއްޔެއް ފެނިއްޖެއެވެ. އޭނާ ބޮލި ނަގައި ޖީބަށް ލިއެވެ. އެމީހުން އެމަސައްކަތުގައި އުޅެނިކޮށް ސަލްމާއާއި ރަމްޝާ މަޖާހަދައި ނިމިގެން ގޮވުމުން އައިސް، ޝާނީ އޭނާގެ މުށަށް އަޅައިގެންހުރި ބޮލިތައް ބޮޑުފަތަކަށް އަޅާފައި މަޖާކަން ފެށިއެވެ. ޖިނާހްއާއި ރާއިދުވެސް ސަމްސަލެއް ނަގައިގެން ކާންފެށިއެވެ. ދެތިން ސަމްސާ މަޖާ ކާލުމާއެކު ޝާނީއާއި ރާއިދުއަށް ކުޅިވެގެން ފެންބޯން އުޅެގަތެވެ.
“ އަޅެ ފެންގެންނާކަށް ހަނދާނެއްވެސް ނުވި…“ ސަލްމާ ދެރަވެލާފައި ބުންޏެވެ.
“ ދެން ދޮންތާ….“ ޝާނީއަށް ކުޅިވެގެން ލޮލުން ފެންވެސް އައިސްފިއެވެ. ފެން ނެތްކަން އެނގުމުން ރާއިދު ދުވެގޮސް މޫދަށް އެރި އަނގަދޮންނަން ފެށުމުން ޝާނީވެސް މޫދަށް އެރުނެވެ. ރާއިދުއާއި ޝާނީ އަނެއްކާވެސް ގޮސް މަޖާކާން ފެށިއެވެ. ކުޅިވާ ކޮންމެ ފަހަރަކު ދުވެފައި އައިސް މޫދަށް އެރެއެވެ. އެމީހުން އުޅޭގޮތް ބަލަން މަޖާވެފައި ޖިނާހް އިނެވެ. ޖިނާހް ހަމަޖެހިލައިގެން މަޖާކާ މަންޒަރު ފެނިފައި ޝާނީ ހައިރާންވިއެވެ. ޖިނާހްއަކަށް ކުޅިއެއްވެސް ނުވޭ ބާއޭ ހިތަށްއެރިއެވެ. މަޖާކައި ކައި ނިމިގެން ސަލްމާއާއި ރަމްޝާވެސް މޫދަށް އެރުނެވެ. ޝާނީވެސް އެމީހުންގެ ފަހަތުން ހިނގައި ގަތުމުން ޖިނާހް އޭނާގެ އަތުގައި ހިފިއެވެ. ޝާނީ ކަންބޮޑުވެފައި ޖިނާހްއަށް ބަލާލިގޮތުން ޖިނާހް ޝާނީގެ އަތުން ދޫކޮށްލިއެވެ. އަދި އޭނާގެ ޖީބުން އެއްކަލަ ބޮލި ނަގާފައި ޝާނީއަށް ދައްކާލިއެވެ. ބޮލި ފެނުމާއެކު އުފަލުން ޝާނީގެ ދެލޯ ވިދައިގަތެވެ. ޝާނީ އަވަހަށް ބޮލީދޭށޭ ބުނެ އަތްދިއްކޮށްލުމާއެކު، ޝާނީގެ އަތަށް ކުޑަކުޑަ ބަރަވެއްޔެއް ލިއެވެ. ބަރަވެލި ފެނިފައި ޝާނީ ބިރުން ދެލޯބޮޑުކޮށްލަމުން ހަޅޭއްލަވައިގެންފައި ބަރަވެލި އެއްލާލުމާއެކީ ޖިނާހް ބާރަކަށް ހޭންފަށާފައި ބޮލި ހިފައިގެން ދުއްވައިގަތެވެ. ޝާނީވެސް ދަތްކުނޑި ވިކާލަމުން ޖިނާހްގެ ފަހަތުން ދުއްވައިގަތެވެ.
ޖިނާހް އޭނާއަށްވުރެ ހަލުވިވާނެކަން އެނގޭއިރުވެސް ޝާނީ ދެރަނުވާންވެގެން ޖިނާހްގެ ފަހަތުން ދުވިއެވެ. ޝާނީއާއި ޖިނާހް ދުވެ ދުވެދުވެ ހުއްޓައި ޖިނާހް ކަކުނިހޮރަކަށް ފައިވަދެފައި ކުއްލިއަކަށް ވެއްޓިއްޖެއެވެ. ޖިނާހްގެ ފަހަތުން ދުވެފައި އައި ޝާނީވެސް މަތަނުވެގެން އައިސް ޖިނާހްގެ ފައިގާ އަޅައިގެންފައި އޭނާގެ ގައިމައްޗަށް ވެއްޓިއްޖެއެވެ. އެވަގުތު ޖިނާހްއަށް ތަދުވީނަމަވެސް، ދެމީހުންގެ ހަތަރުކަޅި ހަމަވީ ވަގުތު ނުހަނު ގާތުން ޝާނީގެ މޫނު ފެނުމާއެކީ ވީތަދުވެސް ފިލައިގެން ހިނގައްޖެއެވެ. ޖިނާހްގެ ތޫނު ނަޒަރު އަމާޒުވުމާއެކީ ޝާނީގެ ހިތުގެ ވިންދުވެސް ދެގުނައަށް އަވަސްވެގެން ދިޔައެވެ. ޝާނީއާއި ޖިނާހް ހިނދުކޮޅަކަށް އެގޮތުގައި ގަނޑުވެފައި ތިއްބައި، ދާދިގާތުން މީހަކު ހޭންފެށި އަޑުއިވިފައި ސިހުނެވެ. ދެމީހުނަށް ހޭވެރިކަންވެގެން ބަލާލިއިރު ދާދިގާތުގައި ރާއިދު ހުއްޓެވެ. ޝާނީ ގަތްލަދުން އަވަސް އަވަހަށް ޖިނާހްގެ ގައިމަތިން ތެދުވެ ދުއްވައިގަތެވެ. ޖިނާހްވެސް ރަކިގޮތަކަށް ހީލަމުން ތެދުވިއެވެ. ޖިނާހްއާއި ޝާނީއަށް ވީގޮތުން ދިމާކޮށްފައި ރާއިދު އަނެއްކާވެސް ހޭންފެށިއެވެ. ރާއިދުގެ މިހަރަކާތުން ޖިނާހް އިތުރަށް ލަދުގަތުމުން އެކަން ފޮރުވަންވެގެން އޭނާ ރާއިދުގެ ފަހަތުން ދުއްވައިގަތެވެ. ޝާނީ މޫދުގައި އެމަންޒަރު ބަލަން ހެވިފައި ހުރިއިރު ސަލްމާއާއި ރަމްޝާއަށް މިއިން ކަމެއް ރޭކާނުލައެވެ. އެމީހުންތިބީ އެމީހުންގެ އަމިއްލަ ދުނިޔެއެއްގައެވެ.
ޖެހިގެން އައި ދުވަހުގެ ހެނދުނުގެ ވަގުތުވެ. އާދައިގެ މަތިން ޝާނީ ގޯތިތެރެ ކުނިކަހަމުން ދަނިކޮށް ބަނބުކެޔޮ ގަސްބުޑުގައި ބާއްވާފައި އޮތް ފަތުގެ ގޮށްޓެއް އޭނާއަށް ފެނުނެވެ. އެއީ ޖިނާހްގެ ކަމެއްކަން ޔަޤީންވާތީ އަވަސް އަވަހަށް އޭނާ ގޮށި ހުޅުވާލިއެވެ. އެއާއެކު އޭނާގެ ތުންފަތަށް އުފާވެރި ހިނިތުންވުމެއް ވެރިވީ އޭގައިވާ ބޮލި ފެނުމުންނެވެ. އެއީ އިއްޔެގައި ޖިނާހް އޭނާއަށް ނުދޭންވެގެން އުޅުނު ބޮއްޔެވެ. އޭގެ ރީތިކަމުން އެއަށް ބަލަން ހެވިފައި ޝާނީއަށް ހުރެވުނެވެ. އެހެން އިރުކޮޅަކު ހުރުމަށްފަހު އޭނާ އަނެއްކާވެސް ކުނިކަހަންފެށިއެވެ. ކުނިކަހާ އެއްކޮށްފައި ކުނިތައް ނަގަމުން ދަނިކޮށް އެއްކަލަ ގޮށިތެރެއިން ފަތްޖަހާފައިވާ ކަރުދާސްގަނޑެއް ވެއްޓުނެވެ. ޝާނީ ހައިރާންވެ ހުރެ ކަރުދާސްގަނޑު ނަގައި ހުޅުވާލިއިރު އެއީ ސިޓީއެކެވެ. އެއީ ޖިނާހްގެ ސިޓީއަކަށް ވާތީ ހިތް އަވަސްވެފައިހުރެ އޭނާ ސިޓީ ކިޔަންފެށިއެވެ.
“ ޝާނީއެވެ. މިހިތުގެ މައްޗަށް މިހާރު އަހަރެންގެ އެއްވެސް އިޚްތިޔާރެއް ނެތެވެ. މިގޮތަށް ޝާނީއަށް ސިޓީއެއް ލިޔަން ޖެހުނީތީ އަހަރެން ލަދުގަނެ ޝާނީގެ ކިބައިން މާފަށްވެސް އެދެމެވެ. ނަމަވެސް މިނޫންގޮތެއް ނެތީއެވެ. ޝާނީއެވެ. އަހަރެންނަށް ޝާނީދެކެ ލޯބިވެވިއްޖެއެވެ. އަދި ޝާނީވެސް އަހަރެން ދެކެ ލޯބިވާކަމުގައި އަހަރެންގެ މޮޔަހިތް ބުނަމުން ދެއެވެ. އަހަރެންނަށް މިހީވަނީ ރަނގަޅަށް ކަމުގައިވާނަމަ މިރޭ ފަތިހު ފަސްގަޑިބައިގާ ތުނޑީމަގުން އަހަރެންނާ ބައްދަލުކުރާށެވެ. ޝާނީ އަހަރެންނާ ބައްދަލުކުރަން ނައިސްފި ނަމަ އަހަރެންނަށް މި ހީވީ ކުށްހީއެއްކަމުގައި ގަބޫލުކޮށް ޝާނީއަށް އެއްވެސް އުނދަގުލެއް ނުކުރާނަމެވެ.“ ސިޓީ ކިޔާ ނިމުނުއިރު ޝާނީގެ ހިތުގެ ވިންދު ދެގުނައަށް އިތުރު ވެއްޖެއެވެ.
އަތްފައި ފިނިވެ ގަނޑުވާން ގާތްވެއްޖެއެވެ. ޝާނީހުރީ ޖިނާހްގެ ފަރާތުން ލޯބި ފާޅުކުރާނެ އިރެއްގެ އިންތިޒާރުގައެވެ. ނަމަވެސް މިހާ ފާޅުކަން ބޮޑުގޮތެއްގައި ޖިނާހް ލޯބިހުށަހަޅާ ފާނެކަމަކަށް ފަހަރެއްގައިވެސް އޭނާ ހީއެއް ނުކުރެއެވެ. އޭނާ ތަކުރާރުތައް އެތައް ފަހަރަކު އެސިޓީ ކިޔެވެ. އެއިން ކޮންމެ ފަހަރަކު އޭނާގެ ހިތަށް ބުނެދޭން ނޭނގޭފަދަ އުފާވެރިކަމެއް ވެރިވެއެވެ. އެކަނި ހުރެވެސް އޭނާއަށް ހެވެންފެށިއެވެ.
“ މިރޭ ފަތިހު ބައްދަލުކުރަންވީއޭ؟…ފަތިހު ކީއްވެ؟…ފަތިހު މީހުން މަދުވާނެތީ ކަންނޭނގެ…“ ޝާނީ އެކަނިހުރެ އަމިއްލަ ނަފްސާ މުޚާތަބުކުރަމުން ދިޔައެވެ.
ޝާނީ ސައިބޯން އިންއިރުވެސް ވިސްނެމުން ދިޔައީ އެކަމާއެވެ. ހެނދުނުގެ ނާސްތާއަށްފަހު މެންދުރުވާނެ އިރެއްގެ އިންތިޒާރު އޭނާ ކުރަންފެށިއެވެ. މިއަދު ވަގުތުތައްދާލެއްވެސް މާ ލަހީއޭ ހީވާންފެށިއެވެ. ގޭތެރޭގެ ކަންކަމުގައި މެންދުރުވާންދެން އުޅުމަށްފަހު، ފެންވަރައި ނަމާދުކޮށްގެން މާމަގެޔަށް ދިއުމަށްޓަކައި އޭނާ ނުކުތެވެ. ދޮންތަގެ ގެޔަށް ދާހިތްވިޔަސް މިއަދު އޭނާއަކަށް ދާކަށް ނުކެރޭނެއެވެ. އެހެންކަމުން އޭނާ މާމަގެ ހާލުބަލާލަން އެގެއަށްދާން ގަސްތުކުރީއެވެ. މާމަމެންގެ ގެއަށް ދިއުމަށްޓަކައި ގޯޅިއަޅާލި ވަގުތު ކުރިމަތިން އަރީފް ފެނުމާއެކު އޭނަގެ މޫޑު އޮފްވާގޮތްވިއެވެ. ނަމަވެސް އޭނާ އިސްޖަހައިގެން އަރީފް ފެންނަކަމަށްވެސް ނުހަދާ ދާން ފެށިއެވެ. އަރީފްއަށް ޝާނީ ފެނުމާއެކީ ގާތަށް އައެވެ.
“ އޭތް އޭތް….ހިތުން މަންޖެ ތިއުޅެނީ މަށަށް ފިލައިގެންދޯ….މަ ނޫޅެން މަންޖެ ފަހަތުން އުޅޭކަށެއްވެސް….މަށަށް އެނގޭ މަންޖަ ތިއުޅެނީ އެ މަންމަނު ސޮރާ ހިތާވެގެންކަން….“ ކުއްލިއަކަށް އަރީފް ބުނި އެއްޗަކުން ޝާނީއަށް ހުއްޓެވުނެވެ. އަރީފްއަށް އެހާ ފަސޭހައިން އެކަން އެނގުނީ ކިހިނެއްބާއެވެ. އެނޫން އެއްވެސް މީހަކު އެފަދަ އެއްޗެއް އޭނާއާ ދިމާއަކަށް ނުބުނެވެ.
“ މާނޫންކަމަށް ހެދޭނެކަމެއްނެތް….މަށަށް ހުރިހާ އެއްޗެއްވެސް އެނގޭ…..ކޮންމެ ދުވަހަކު ދެދަޅައަށް ފުއްޖަހައިގެން އެސޮރު އުޅޭގެޔަށް ދާތީވެސް މަދެކެން….“ އަރީފް އަނެއްކާވެސް ބުނެލިއެވެ. ޝާނީ އެއްޗެއް ނުބުނެ ދާން ހިނގައިގަތެވެ.
“ އަޅެ މަންޖެއަށް ހަމަ މިރަށުންވެސް އެސޮރަށްވުރެ ކަމުދާ ސޮރަކު ނުފެނުނީތަ؟ ގައިމު އެގޭގަވެސް އުޅޭކަންނޭނގެ ފިރިހެނަކަށްވާކަހަލަ ކިޔަވައިގެން ހުރި މޮޅު ސޮރެއް….އެކަމަކު މަންޖެއަށް ކަމުދިޔައީ ތާކުހުރި މަންމަނު ގަނޑެއްދޯ….މަމީ ރަށުން ބޭރު މީހަކަށްވެފަ ހަމުގެކުލަ ތަންކޮޅެއް ކަޅުވީމަ ދޯ މަދެކެ ބިރުން ތިފިލަނީ….މަކަހަލަ މީހުން ތިއްބާ ނުކުޅެދޭ ސޮރަކާ ވިއްޔަ ތި ހިތާވީ…..މަ އަތުގަ ނެތް ކޯއްޗެއް އެސޮރު އަތުގަ އޮވެގެން ތިއުޅެނީ….ބުނެބަލަ!…“ ކުއްލިއަކަށް އަރީފް ޝާނީގެ އަތުގައި ހިފިއެވެ.
“ ދޫކުރޭ އަތުން….“ ލަތްކެއް ޖަހަމުން ޝާނީ ބުންޏެވެ. ނަމަވެސް އަރީފް ދޫކުރާކަށް ގަސްތެއް ނުކުރިއެވެ. ރުޅިގަދަވެގެން ޝާނީ އަރީފްގެ އަތުގައި ދަތްއެޅިއެޅީނުން ކަނޑާލިއެވެ. އަރީފްއަށް ވީތަދުން އަތުގައި އަތްއަޅާލެވުނެވެ.
“ ގޮތް ކުޑަ މުޑުދާރު އިންސާނާ….ކަލޭ ކަހަލަ ހާސްމީހުނަށް ވުރެވެސް ޖިނާހް ރަނގަޅުވާނެ….ޖިނާހްއަކީ ކަލޭ ކަހަލަ ގަމާރެއްނޫން….ގޮތްކުޑަ މީހެއްވެސް ނޫން….ހިތުން މާމޮޅުވެގެން ތިއުޅެނީ…ޖިނާހްއަށް ނޭނގޭ އެއްޗެއް ކަލެއަށް ކޯއްޗެއް އެނގެނީ….ޖިނާހް ނުކުޅެދޭތީ މަލާމަތްކުރާއިރު، ކަލޭ ކޮންގޮތަކުން ކުޅެދޭ މީހަކަށްވަނީ….ޖިނާހް ކުރާ އެއްކަމެއްވެސް އޭނަކުރާ ގާތަށްވެސް ކަލެއަކަށް ނުކުރެވޭނެ….ހަމައެކަނި ގޮތްކުޑަކަން އެކަނި ކަލެއަށް ލިބިފަހުރީ…ހަނދާންކުރާތި! މީގެފަހުން މަގޭ ގައިގަ އަތްލައިގެން ނުވާނެ“ ޝާނީ ރުޅިއައިސްގެ ތުރުތުރު އަޅައެވެ. ޝާނީ ރުޅިއައިސްފައި ހުރިވަރުން އަރީފްހުރީ ބިރުންނެވެ. މިނޫނީ ޝާނީ މިހާވަރަށް ރުޅިއައިސް ހުއްޓައި އޭނާ ނުދެކެއެވެ. މީގެކުރިން އޭނާ ކިތަންމެ ގޯނާއެއް ކުރިޔަސް އެއްޗެއް ބުނާކަށްވެސް ނުކެރެއެވެ. ޝާނީ އެތިވަރު ގޮވާފައި ދިއުމުންވެސް އަރީފް އެހުރިތާގައި ވިސްނަން ހުއްޓެވެ. ކުއްލިއަކަށް ޝާނީއަށް އެލިބުނު ޖޯޝަކުން އޭނާހުރީ ހައިރާންވެފައެވެ.
މޫޑު ގޯސްވެފައި ހުރެގެން ޝާނީ މާމަގެޔަށް ވަތްނަމަވެސް މާމައާއި ކާފައާއި ވާހަކަދައްކާ ލުމުން އޭނާގެ ހިތަށް ހަމަޖެހުން ލިބުނެވެ. އޭނާ އެމީހުންނާއެކު އުފާވެރި ވަގުތުކޮޅެއް ހޭދަކޮށްލާފައި އެގެއިން ނުކުތް ވަގުތު ގޯތިތެރެއިން އަރީފްއާއި ބައްދަލުވިއެވެ. މިފަހަރު އޭނާއަށްވުރެ ކުރިން ނުފެންނަކަމަށް ހަދައި އިސްޖަހައިގެން ދިޔައީ އަރީފްއެވެ. އޭނާ ބަވާލުމުން ބިރުގަތީވެސް ކަންނޭނގެއޭ އޭނާގެ ހިތަށްއެރިއެވެ. ނަމަވެސް އޭނާއަށް އަދިވެސް ނޭނގުނު އެއްޗަކީ އަރީފްއަށް އެހާފަސޭހައިން އޭނާއާއި ޖިނާހްގެ މެދުގައި އުފެދިފައިވާ ލޯބި ދެނެގަނެވުނު ގޮތެކެވެ.
ވަގުތުތައް ފާއިތުވަމުން ގޮސް އާ ރެޔަކަށް ދުނިޔެ މަރުޙަބާ ކިޔައިފިއެވެ. އިޝާނަމާދަށްފަހު ކައިނިމިގެން ޝާނީ ކޮޓަރިއަށް ވަތްނަމަވެސް އޭނާގެ ލޮލަކަށް ނިންޖެއްނައެވެ. ނިދަން އޮށޯވެފައިވެސް ދެތިން ފަހަރު އޭނާ ޖިނާހްގެ ސިޓީ ކިޔެވެ.
“ ފަސްގަޑިބައި….“ އޭނާ އަނެއްކާވެސް ގަޑި ކިޔާލިއެވެ. މިހާރުން ފެށިގެންވެސް އޭނާގެ ހިތްވަނީ އަވަސްވެފައެވެ.
“ މިސިޓީގެ ޖަވާބު ލިޔެގެންތަ އަހަރެން ދާންވީ….ނޫނީ އަހަރެން ދިޔައީމަ ޖަވާބު ލިބުނީތަ؟….“ ޝާނީ ވިސްނަމުން ދިޔައެވެ. ހަދާނެ ގޮތަކާމެދު ވިސްނަމުން އޭނާ ދިޔައެވެ. އެންމެފަހުން އޭނާ ނިންމީ އެސިޓީގެ ޖަވާބުވެސް ލިޔުމަށެވެ. އެހެންކަމުން އޭނާވެސް ޖިނާހްދެކެ ލޯބިވާކަމަށް އެއްބަސްވެ ޖަވާބު ލިޔެލިއެވެ. އޭނާ އެތައް ފަހަރަކު އޭނާގެ ޖަވާބުވެސް ރަނގަޅުކުރިއެވެ. ހިތްހަމަ ޖެހޭވަރުވުމުން ސިޓީ ފަތްޖަހާލާފައި ބާލީސްދަށަށް ލަމުން ދެލޯމަރާލިއެވެ.
ނުނިމޭ- ވާހަކަ ކަމުދިޔަ ނަމަ fenvaru.mv ގެ އެފްބީ ޕޭޖަށް ލައިކެއް ދެއްވާ. އަދި ވާހަކަ ޝެއަރ ކޮށްލަދެއްވާ.
