ޝައިންގެ- ވަފާތެރި މަވީމޭ- 13 ވަނަބައި
އެންމެފަހުން އޭނާ ނިންމީ އެސިޓީގެ ޖަވާބުވެސް ލިޔުމަށެވެ. އެހެންކަމުން އޭނާވެސް ޖިނާހްދެކެ ލޯބިވާކަމަށް އެއްބަސްވެ ޖަވާބު ލިޔެލިއެވެ. އޭނާ އެތައް ފަހަރަކު އޭނާގެ ޖަވާބުވެސް ރަނގަޅުކުރިއެވެ. ހިތްހަމަ ޖެހޭވަރުވުމުން ސިޓީ ފަތްޖަހާލާފައި ބާލީސްދަށަށް ލަމުން ދެލޯމަރާލިއެވެ.
އަނެއްކޮޅުން ޖިނާހްގެ ލޮލަށް ނިދިނައިސްފައި އޮތީ ޝާނީ ދޭނެ ޖަވާބެއް ނޭނގޭތީއެވެ. ޝާނީ އޭނާއަށް ނޫނެކޭ ބުނެފިނަމަ އޭނާ ހަދާނީ ކިހިނެއް ހެއްޔެވެ؟ އޭނާ ކިހާ ލަދުގަންނާނެ ހެއްޔެވެ؟ ޝާނީއާ ކުރިމަތިލާކަށްވެސް ނުކެރޭނެއެވެ. ހަމައެފަދައިން ޝާނީ އޭނަދެކެ ލޯބިވެޔޭ ބުނެފިނަމަވެސް ކަންތައްކުރާނެ ގޮތެއްވެސް އޭނާއަކަށް ނޭނގެއެވެ. ޝާނީގެ އަތުގައި ހިފާފައި ޝުކުރު އަދާ ކުރާނީ ހެއްޔެވެ؟ ނޫނީ އުފަލުން ޝާނީ އުރާލާނީ ހެއްޔެވެ؟ ނޫނެކެވެ. އޭރުން ޝާނީ ރުޅިއަތުވެދާނެއެވެ. އެއިން އެއްވެސްކަމެއް ކުރާކަށް އޭނާއަކަށް ނުކެރޭނެއެވެ. އޭނާ ވިސްނާލިއެވެ.
އަދި ތެދުވެ އަތްބައްތި ދިއްލުމަށްފަހު، ކޮޓަރީގެ އެއްފަރާތެއްގައިވާ ލަކުޑި ފޮތްޓެއް ހުޅުވާލިއެވެ. އަދި އެއިން އޭނާ ބޭނުންވާ ސާމާނު ހިފައިގެން އައިސް މޭޒުދޮށުގައި އިށީނެވެ. މީގެ ދުވަސްކޮޅެއްކުރިން އޭނާ ހޮވި ނާބޮއްޔަކުން އެއްޗެއް ހަދަން އޭނާ ގަސްތުކުރިއެވެ. އޭނާ ފަންސުރުނަގައި ކުރަހާފޮތުގައި ތަފާތު ބައްޓަންތަކުގެ އެއްޗެހި ކުރަހަން ފެށިއެވެ. އޭނާއަށް އެންމެ ކަމުދިޔައީ ހިތުގެ ބައްޓަމެވެ. އެހެންކަމުން އޭނާ ހަދަން ގަސްތުކުރީ ހިތެކެވެ. ޖިނާހް ހިނިތުންވެލަމުން އޭނާގެ މަސައްކަތް ފެށިއެވެ.
ލޯމަރައިގެން އެތައްއިރަކު އޮތްއިރުވެސް ޝާނީއަކަށް ނިދޭގޮތެއް ނުވިއެވެ. ނިދިވަނީ މިރޭ އޭނާ ރުޅިބުނެފައެވެ. ކަރަންޓް ދިއުމުން ކޮޓަރިތެރެވެސް މިހާރުވަނީ އުދާސްވެފައެވެ. ފިނިކޮށްލަން ބޭރަށް ނުކުންނަން ހިތަށް އަރާފައިވެސް، ކަޅުފޮއެ ރެއެއްކަން އެނގޭތީ ނުކުންނާކަށްވެސް ނުކެރުނެވެ. އެންމެފަހުން އޭނާ ތެދުވެ އަތްބައްތި ދިއްލައިގެން އައިސް މޭޒު ކައިރީގައި އިށީނެވެ. އަދި މޭޒުމަތީގައި އޮތް ”އައްސޭރި“ ވާހަކަފޮތް ނަގައި ކިޔަންފެށިއެވެ. އެއީ ދެދުވަހެއް ކުރިން ސަލްމާގެ ކޮޓަރިން އޭނާއަށް ފެނުނު ވާހަކަ ފޮތެކެވެ. އޭނާ އާދޭސްކޮށްގެން ގެނައީއެވެ. ސަލްމާގެ ފަރާތުން އެނގުނުގޮތުގައި ޖިނާހްގެ މަންމަ އަތުގައި ވަރަށްގިނަ ތަރުޖަމާ ވާހަކަ ހުރެއެވެ. އެއީވެސް ސަލްމާ އޭނާގެ އަތުން ގެނައި ފޮތެކެވެ.
ޝާނީ އޭނާ ފާހަގަ ކޮށްފައިވާ ސަފްހާ ހުޅުވާލުމަށްފަހު ކިޔަން ފެށިއެވެ. ރޫހީއާއި އަސްލަމްގެ މެދުގައި ކުޑައިރުއްސުރެ އުފެދުނު ސިއްރު ލޯބި ފުރާވަރަށް އައިއިރުވެސް އޮތީ ސިއްރެއްގެ ގޮތުގައެވެ. އާއިލާގެ ބޮޑެތިމީހުން އެމީހުން ބޭނުން ގޮތަކަށް އަސްލަމްގެ ކައިވެނި ރާވަމުން ދިޔައިރު، އެއިން ކަމެއް އަސްލަމްއަކަށް އަދި ރޫހީއަކަށްވެސް ރޭކާނުލައެވެ. ހަނދުވަރު ތޫނު ރޭތަކުގައި ގޭގެ އެންމެން ނިދުމުން އަސްލަމުއާއި ރޫހީ އެމީހުންގެ ލޯބީގެ ބަގީޗާގައި ކުލަކުލައިގެ ރީތި މާތައް ފޮޅުވަމުން ދިޔައެވެ. ރޫހީއާއި އަސްލަމްގެ ލޯބީގެ ހިތްގައިމު މަންޒަރުތައް ކިޔަމުން ގޮސް ކުއްލިއަކަށް އެދެމީހުންގެ ބަދަލުގައި ޝާނީއާއި ޖިނާހް އޭނާއަށް ސިފަކުރެވުނެވެ. އަސްލަމްއަކީ ޖިނާހްކަމުގައި އަދި ޝާނީއަކީ ރޫހީކަމުގައި ހީކުރެވުނެވެ.
ޝާނީ ގަޔާވެގެން ވާހަކަ ކިޔަމުން ގޮސް ރޫހީއާއި އަސްލަމުއަށް ވަކިވާން މަޖުބޫރުވީ ހިސާބުން އޭނާއަށް ރޮވެގެން ފެށިއެވެ. އަސްލަމްއަށް އެހެން ކުއްޖަކާ ކައިވެނިކުރަން މަޖުބޫރުވީއެވެ. ހަމައެފަދައިން ރޫހީއަށްވެސް ޖެހުނީ އޭނާގެ ހިތްނޭދޭ މީހެއްގެ އަނތްބަކަށް ވާށެވެ. އާއިލާގެ ހައްޤުގައި ރޫހީ ކައިވެނިކުރި ނަމަވެސް، އަސްލަމް ނޫން ފިރިހެނެއް އޭނާގެ ހަށިގަނޑުގައި ބީހޭކަށް އޭނާގެ ހިތެއް ނޭދުނެވެ. އެހެންކަމުން ޒަހަރު ބޮއެގެން އޭނާ މަރުވީއެވެ. އަސްލަމްއަކަށް އަދި ރޫހީއަކަށްވެސް އެމީހުންގެ އައްސޭރިއެއް ނުލިބުނެވެ. ވާހަކަ ނިމުމުން ޝާނީ ދެލޯފުހެލަމުން ވިސްނާލިއެވެ. ލޯބި ހާސިލް ކުރުމަކީ ހަމަ އެހާ އުނދަގޫކަމެއް ހެއްޔެވެ؟ ލޯބިވާ ދެމީހުން އެކަކު އަނެކަކަށް އާނބަސް ބުނުމުން ދުނިޔެ އެކަމާ ދެކޮޅު ހަދަން ޖެހޭ ހެއްޔެވެ؟ ލޯބިނުވާމީހުންނާ ކައިވެނިކުރަން މަޖުބޫރުކުވަން އެމީހުންނަށް އޮތީ ކޮން ހައްޤެއް ހެއްޔެވެ؟ ދަރިންނަށް ހެޔޮއެދޭ މައިންބަފައިން އެގޮތަށް މަޖުބޫރެއް ނުކުރާނެއެވެ. ހަމަގައިމުވެސް އޭނާގެ މައިންބަފައިން އޭނާއަކަށް އެހެނެއް ނުހަދާނެއެވެ. އޭނާދެކެ އެމީހުން ނުހަނު ލޯބިވެއެވެ. ޖިނާހްއާވެސް އެމީހުން ގަޔާވެއެވެ. އެހެންކަމުން އޭނާގެ ލޯތްބަށް ހުރަހެއްނެތެވެ.
އޭނާ ވިސްނަން އިންދައި އޭނާގެ ބައްޕަ ހޭލައިގެން ނުކުތް އަޑުއިވުނެވެ. އެއާއެކު ފަތިސްވާން ގާތްވީކަންވެސް އޭނާއަށް އެނގުނެވެ. އާދައިގެ މަތިން އޭނާގެ ބައްޕަ ގޮވުމުން އޭނާ އަވަސް އަވަހަށް މޫނުފުހެލައި ނިދާފައި ކަމަށް ހެދެމުން ނިދިއަޑަކުން ޖަވާބުދިނެވެ. ޝާނީގެ ބައްޕަ ދިއުމުން އޭނާ އަވަހަށް ދުވެފައި ކޮޓަރިން ނުކުތެވެ. ހަމަ އެހާ ބާރުމިނުގައި ގޮސް ގިފިއްޔަށް ވަނެވެ. ވުޟޫކޮށްގެން ދުވެފައި އަންނަނިކޮށް އޭނާގެ މަންމަގެ ގައިގާ ލައިނުގަތީ ކިރިޔާއެވެ.
“ ޝާނީ….ކޮން ދުވުމެއްތަ ތިދުވަނީ؟…ދުވާލެއް މެންދުރެއް ފަތިހެއްވެސް ނޯވޭދޯ….އަބަދު ލައިނުގަނެގެން އުޅޭނީ…“ ޝާނީގެ މަންމަ އަޑުލައިގަތުމުން ޝާނީ ސޮރީއޭ ބުނެފައި ކޮޓަރިއަށް ވަނެވެ. މުސައްލަ ހިފައިގެން އޭނާއަށް ނުކުމެވުނުހައި ބާރަކަށް އޭނާ ގެއިން ނުކުތެވެ. މިހާރުއްސުރެ އޭނާގެ ހިތްވަނީ އިންތިހާއަށް އަވަސްވެފައެވެ. އޭނާއަށް އަންހެނުންގެ މިސްކިތަށް އެރުނީ އިމާމު މީހާއާ ދާދި އެކުއެކީގައެވެ. ނަމާދުގައި ހުރިއިރުވެސް ނަމާދުގައި ކިޔޭ އެއްޗަކަށްވުރެ ބޮޑަށް އޭނާއަށް ޖިނާހްއާމެދު ވިސްނެއެވެ. އެހާލެއްގައި ނަމާދުކޮށް ނިމިގެން އޭނާ ގެޔަށް އައެވެ. އޭރު އަދި ފަހެއްޖެހީއެވެ. އޭނާ ކޮޓަރިއަށްވަދެ، މުސައްލަ އެނދުމައްޗަށް އެއްލާލާފައި ދުވެގޮސް، ފާރުގައި އަޅުވާފައިހުރި ކުޑަ ލޯގަނޑު ކުރިމައްޗަށް ހުއްޓުނެވެ. ފުޅިބައްތީގެ ފަނޑުއަލީގައި އޭނާގެ ދޮން މޫނު ފެންނަނީ އޮރެންޖް ކުލައިގައެވެ. އޭނާގެ ދިގު އިސްތަށިގަނޑު ނިއުޅާލުމަށްފަހު ރަނގަޅަށް ފުނާއަޅާލިއެވެ. އަދި އޭނާގެ ފިޔާތޮށި ކުލައިގެ ގަނޑުފުއްދަޅުން މޫނުގައި ފުއްޖަހާލުމަށްފަހު ލޮލުގައި އަނދުންވެސް އަޅާލިއެވެ. އެއަށްފަހު އޭނާގެ އަތުގައި ލޯޝަންލައި ހެދުމުގައި ކޯލާވައްޓަރުވެސް އުނގުޅިއެވެ. ގައިގާ ރަނގަޅަށް ވަސްހިފާވަރުވުމުން އޭނާ ހިތްހަމަ ޖެހުމުގެ ނޭވާއެއް ދޫކޮށްލުމަށްފަހު އަދިވެސް އެއްފަހަރު ލޯގަނޑުން މޫނު ބަލާލިއެވެ. އޭނާ ކޮޓަރިން ނުކުތްއިރު ފަސްގަޑި ވިހި ހިނގައިފިއެވެ.
ޝާނީ މަޑުމަޑުން ކޮޓަރިން ނުކުމެ ދެކޮޅު ހޯދާ ބަލާލިއެވެ. މަންމަ ފެންނާކަށް ނެތެވެ. ބައްޕަ އަދި މިސްކިތުން ނާންނަކަން އޭނާއަށް އެނގެއެވެ. ބައްޕަ އިންނާނީ އިރުއަރަންދެން މިސްކިތުގައި ޒިކުރު ކުރާށެވެ. އެހެންކަމުން އޭނާ ތަންވަޅު ބަލާފައި ގެއިން ނުކުތެވެ. މަގުތައް އޮތީ އަދިވެސް އަނދިރިކޮށެވެ. އޭނާ މަޑުމަޑުން ބޮޑުމަގަށް ނުކުތެވެ. އޭރު ފިރިހެނުންގެ މިސްކިތުން ފައިބައުގެން އަންނަ ދެތިން މުސްކުޅިން ދުރުން ހިނގާފައި އާދެއެވެ. އެމީހުންނަށް އޭނާ ނުފެންނާނެކަން އޭނާއަށް ޔަޤީންވެއެވެ. އޭނާ ހަލުވި ފިޔަވަޅުތަކެއްގައި ހިނގަމުން ދިޔައެވެ. ބައެއްފަހަރު މީހަކު ފަހަތުން އަތުވެދާނޭ ހިތައި ފަހަތްބަލާލެވެއެވެ. ނަމަވެސް އެއްވެސް މީހެއްގެ ހިލަމެއްނުވެއެވެ.
އަނދިރި ގޯޅިތަކުންނާއި މަގުތަކުން އަޅަމުން ގޮސް ތުނޑީމަގަށް ނުކުމެވިއްޖެއެވެ. ގޮނޑުދޮށާއި ދިމާލުން އުދަރެހުގެ އަލިކަން ފެންނަމުން ދިޔައެވެ. އޭނާ ބިރުންހުރެ ހިނގަމުން ދިޔައެވެ. އަވަށުން ނެއްޓުމުން ހޭޅިފަށުން ފަނިފަކުސާ ގޮވާއަޑު ގަދަވަމުން ހިތަށް ބިރުވެރިކަން އިތުރުކުރަމުން ދިޔައެވެ.
“ އަދިވެސް ހާދަ އަނދިރިއޭ…..ފަސްގަޑިބައިގައޭ ބުނިއިރު މިހާ އަނދިރިވާނެކަން ނޭނގެނީބާ؟…“ ޝާނީ ހިތާ ހިތާ ކިޔަމުން ދިޔައެވެ. ހިތާހިތާ ޝަކުވާކުރަމުން ދަނިކޮށް މަގުގެ ކޮޅަށް ދެވިއްޖެއެވެ. ރާޅުގެ ހިތްގައިމު މިއުޒިކީ އަޑާއި އެކުވެގެން ކާޅާއި ކޮވެލީގެ އަޑުވެސް އިވެމުން ދިޔައެވެ. ލޮނުވަހާއެކު އަންނަ ފިނިރޯޅި ބީހިލުމުން އޭނާ ހީކަރުވައި ގަންނަގޮތްވިއެވެ. ޖެހިލުންވެހުރެ އޭނާ ގޮނޑުދޮށަށް ފޭބިއެވެ. ޖިނާހް ފެންނަންހުރިތޯ ދެކޮޅު ހޯދާ ބަލާލިއެވެ. ނަމަވެސް އެއްވެސް މީހެއްގެ ހިލަމެއްނެތެވެ.
“ މަށަށް ގަޑިކިޔާފަ ޖިނާހް ނާންނަނީތަ؟…“ ނުހުރުންވެފައި ޝާނީއަށް ބުނެވުނެވެ. އޭނާ އަނެއްކާވެސް އެއްގަމަށް އަރައި މަގުގެ ކޮޅުން މީހަކު އާދޭތޯ ބަލާލިއެވެ. ނަމަވެސް އެއްވެސް މީހެއްގެ ނިޝާނެއްވެސް ނުފެނުނެވެ. އޭނާ ވިސްނާލިއެވެ. ޖިނާހް އޭނާގެ އިންތިޒާރުގައި ފިލާ ހުރީ ކަންނޭނގެއެވެ. ކާނިގަހަށް އަރާވެސް އޮވެދާނެއެވެ. އެހެން ހިތައި އޭނާ މަޑުމަޑުން ކާނިގަހާއި ކައިރިވިއެވެ. އެވަގުތު ކާނިގަހުގެ ބިއްދޮށުން ޖިނާހް ނުކުތުމާއެކު ބިރުން އޭނާއަށް ދުއްވައި ނުގަނެވުނީވެސް ކިރިޔާއެވެ. އަނދިރިކަމުން ރަނގަޅަށް މޫނު ނޭނގުނު ނަމަވެސް އެއީ ޖިނާހްކަން އޭނާއަށް ޔަގީންވިއެވެ. ޖެހިލީ ރޯޅިއާއެކުވެގެން އައި ބެޓީނާބާޓީގެ ހިތްގައިމުވަހުން ޝާނީގެ މޫނަށް އުފާވެރިކަން ގެނުވިއެވެ.
ހަތަރުފޫޓެއްގައި ދުރުގައި ހުއްޓިލައިގެން ތިބިއިރު ދެމީހުންވެސް ތިބީ، ދެން ހަދަންވީ ކިހިނެއްކަމެއް ނޭނގިފައެވެ. ޝާނީ ލިޔެގެން ގެނައި ޖަވާބު އޭނާގެ އަތުގައި އޮތެވެ. ހަމައެގޮތަށް ޖިނާހްގެނައި ހަދިޔާވެސް އޭނާގެ ޖީބުގައި އޮތެވެ. ޝާނީ އައުމުން ޖިނާހް ބޭނުންވި ޖަވާބު ލިބިއްޖެއެވެ. ނަމަވެސް އޭނާއަށް އެންމެ ފިޔަވަޅެއްވެސް ޝާނީއާ ގާތަށް އަޅާކަށް ނުކެރުނެވެ. ހިމޭންކަމާއެކު ދެމީހުން ތިބި ނަމަވެސް ދެމީހުންގެ ހިތްވަނީ އަވަސްވެފައެވެ. ހިނދެއް ހިނދަކަށް އަތްފައި ފިނިވަމުން ދިޔައެވެ. ވަގުތުތައް ހިނގަމުން ދިޔަ ވަރަކަށް ދުނިޔެވެސް އަލިވަމުން ދިޔައެވެ. މިހާރު ރަނގަޅަށް ތަންތަން ފެންނަން ފަށައިފިއެވެ.
ދެމީހުން އެގޮތުގައި ތިބެ ވައްކަޅިން އެކަކު އަނެކަކަށް ބަލަމުން ދިޔައެވެ. ޖިނާހްވެސް އެހުރިތާނގައި ޝާނީގެ ހަރަކާތެއްގެ އިންތިޒާރުގައި ހުރި ކަހަލައެވެ. ޝާނީ އޭނާގެ އަތުގައި އޮތް ސިޓީ ދޭން ހިތަށްއަރާފައިވެސް ޖެހިލުންވަނީއެވެ. ޖިނާހް އެހުންނަނީ އޭނާގެ ޖަވާބެއްގެ އިންތިޒާރުގާ ކަންނޭނގެއެވެ. ހަމަ އެގޮތަށް ޖިނާހްވެސް އޭނާގެ ޖީބުގައި އޮތް ޝާނީގެ ހަދިޔާ ނެގިއެވެ. އެއަށް ބަލަހައްޓައިގެން ހުރީ ދޭންވީތޯ ނޫނީ ނުދޭންވީތޯ ހިތަށް އަރާ ހާލުގައެވެ.
ދެމީހުން އެހާލެއްގައި ތިއްބައި ގޮނޑުދޮށުން ބަޔަކު ހޭއަޑު ޝާނީއަށް އިވުނެއެވެ. އެއާއެކު ކަންބޮޑުވެފައި އޭނާއަށް ޖިނާހްއާ ދިމާ ބަލާލެވުނެވެ. ޝާނީއަށް ވީގޮތުން ކަމެއް ގޯސްވެއްޖެކަން އެނގުމުން މަޑުކޮށްލުމެއްވެސް ނެތި ކާނިގަހަށް އެރުމަށް ޖިނާހް އަވަސްވެގަތެވެ. ޝާނީވެސް ޖިނާހްގެ ފަހަތުން ދިޔައެވެ. ޝާނީ އައިސް ގަސް ކައިރިއަށް ހުއްޓުމުން ޖިނާހް ޝާނީގެ އުނަގަނޑުގައި ދެއަތުން ހިފައި މައްޗަށް އުފުލާލިއެވެ. ޝާނީވެސް ހަލުވިކަމާއެކު ގޮފިގަނޑެއްގައި ހިފައި ގަހަށްއެރިއެވެ. ދެމީހުން ގަހަށް އެރިތާ ގިނައިރުތަކެއްނުވެ ހާރިޝްއާއި އޭނާގެ އެކުވެރި ހަބީބު ހެމުން ވާހަކަ ދައްކަމުން އެދިމާއަށް އަންނާތީ ފެނުނެވެ. އަޑުފޯރާ ފަށަށް އައުމުން އެމީހުން ދައްކާ ވާހަކައިގެ އަޑު ޝާނީއަށް އިވުނެވެ.
“ ކަލޭ ދެން ތިހެން އުޅޭއިރު އަންހެނުންނަށް ހަމަ ރޭކާވެސް ނުލާތަ؟ ކޮންމެ ރެއަކު ވެލަޔާ ހިނގަން ދަނީއޭ ބުނެގޮސް ހިލޭ އަންހެނެއް ކައިރީގަ އޮވެފަ އަންނައިރު ހަމަ ނޭނގިހުރޭތަ؟…ގޮނޑުދޮށުގަ އުޅެފަ ދާ މީހުންގެ ގައިގާ ލޮނުވަސްވެސް ދުވާނެކަން އެނގޭނެ ދޯ“ ހަބީބު އަހާލިއެވެ.
“ އެހެންވެޔެއްނު ގޮނޑުދޮށުގަ ހިނގަނީ….ކޮންމެ ރެޔަކުވެސް ގޮނޑުދޮށަށް ފައިބާ ލޮނުވެލީގަ ހިނގާފަ ގެޔަށްދަނީ……އެމަންޖެ ގޮވައިގެންވެސް ބައެއްފަހަރު އަންނަން…..އެހެންވީމަ ނޭނގޭނެއްނު…އެހެންނޫނަސް ސަލްމާ ބޭނުން ހުރިހާކަމެއްވެސް މަ ކޮށްދެމޭ….ދެން އޭނާ ޝައްކުކުރަން އޮންނާނީވެސް ކޮންކަމެއް….“ ހިނިގަނޑެއް ޖަހާލަމުން ހާރިޝް ބުންޏެވެ.
“ ކަލޭ ނޫނޭ ބޯބޮޑު….ދެން އެކަމަކު ތިސަކަރާތް ނުޖަހާ ތިގެންގުޅޭ މަންޖެއާ އިންނަންވީނު…އޭރުން ތިހެން އުޅޭކަށް ނުޖެހޭނެއްނު…“ ހަބީބު ޚިޔާލުދިނެވެ.
“ ނޫނޭ…ދެއަންބަން އިންނާކަށް ބޭނުމެއްނޫން…އެވާނީ ބޮޑު ބޮލުގަ ރިހުމަކަށް…“ ހާރިޝް ބުނެލިއެވެ.
“ އެހެންވިއްޔާ ސަލްމާ ވަރިކޮށްފަ އިންނާނީ….“ ހަބީބު ބުނެލިއެވެ.
“ ނޫން…ތިކަމެއްނުވާނެ….ސަލްމާ ވަރިއެއް ނުކުރެވޭނެ….އެއީ ހަމަ ރަންގަނޑެއް….“ ފަޚުރުވެރިކަމާއެކު ހާރިޝް ބުނެލިއެވެ.
“ ތިކަމެއް ނޭނގެ…ރަންގަނޑު ގޭގަ ހުއްޓާވެސް ތިދުވަނީ ދުރަންގަނޑެއްގެ ފަހަތުން ވިއްޔަ…“ ހަބީބު ދިމާކޮށްލިއެވެ.
“ ބަލަ ހަބީބޫ…ދަތްހުރި ދުވަހުދޯ ކާށިކެވޭނީ….ސަލްމާއަކީ މަގޭ މަންމަ ނުލާހިކު ލޯބިވާމީހެއް….މަންމަ ކަހަލަ އަބަދު ތައްމަތީ އޮންނަ ބަލިމީހަކު ބެލޭނީ ސަލްމާ ކަހަލަ ހީވާގި މީހަކަށް….ތާކު ހުންނަހާ އަންހެނަކަށް އެކަމެއް ނުވާނެ….ސަލްމާގެ މަޤާމު އެހެން މީހަކަށް ނުދެވޭނެ….މަންމަ ދުނިޔޭގަ ނެތް ދުވަހަކުން ފަހަރެއްގެ އެހެން ގޮތަކަށް ވިސްނިދާނެ….“ ސީރިއަސްކަމާއެކު ހާރިޝް ބުނެލިއެވެ.
“ ތިހެން ބުނީމައޭ މި ހަނދާންވީ….ކޮބާ މަންމަ މިހާރު ކިހިނެއް….އަޑުއެހިން އޮޕަރޭޝަން ކުރަން އުޅޭ ވާހަކަ….“ އެއްޗެއް ހަނދާންވެގެން އަހާލާފަދަ ގޮތަކަށް ހަބީބު އެހިއެވެ.
“ މިހާރު އަދި ބޭސްދެނީ….ތިންމަސް ވާންދެން ބޭސްކައިފަ ރަނގަޅު ނުވިއްޔާ އޮޕަރޭޝަން ކުރާނީ….އެކަން ނިމިގެން ބައްޕަ މިކޮޅަށް އައީމަ މަށަށް މާލެދެވޭނީވެސް“ ހާރިޝް އޮޅުން ފިލުވައިދިނެވެ.
“ ދެން ހާރިޝް މާލެ ދިއުމުގެ ކުރިން މަށަށްވެސް ރަންގަނޑެއް ހޯދަދޭންވީނު…މަވެސް ކުރިން އިން މަންޖެ ވަރިކުރެވުނީމަ ވައިކަޓާފަ މިހުންނަނީ…މަވެސް ބޭނުން ސަލްމާ ކަހަލަ ރަންގަނޑެއް“ ހަބީބު އެދުނެވެ.
“ ކަލޭ ހިތާވަނީ ކާކާ؟…އެޔެއް ބުނީމަދޯ އެނގޭނީ؟….“ ހާރިޝް އެހިއެވެ.
“ ޝާނީ….ސަލްމާގެ ކޮއްކޮ….“ ޖެހިލުންވެހުރެ ހަބީބު ބުންޏެވެ.
“ އޮހޮހޯ….ތިކަމެއްނުވާނެ….ކަލޭ ތިކަމާ އުޅޭނެކަމެއްނެތް….ތިކަން ހަނދާން ނައްތާލާ…“ އިންޒާރުގެ ރާގަކަށް ހާރިޝް ބުންޏެވެ.
“ އެއީ؟…އަނެއްކާ ކަލޭ އެމަންޖެއާވެސް ހިތާވީތަ؟…ދެރަންގަނޑު ހޯދަން؟…“ މަލާމާތުގެ ރާގަކަށް ހަބީބު ބުނެލިއެވެ.
“ އާނ….ދެރަންގަނޑު ހޯދަން މިއުޅެނީ….އެމަންޖެވެސް އަންނާނީ އަހަރެމެން ގެޔަށް…ކަލޭ ބަލަންވެސް ހުންނާތި!..މަގޭ ކޮއްކޮ އިންނަންހުރި މަންޖެ އެއީ…“ ވަރަށް ޔަޤީން ކަމާއެކު ހާރިޝް ބުނެލިއެވެ.
”…އެހެންވަނީ…ތިކަންވެސް ނުވީދޯ…“ މޮޅިވެރި ރާގަކަށް ހަބީބު ބުންޏެވެ.
“ އާނ…އެހެންކަމަކާ އުޅޭ…“ ހާރިޝް ހީލިއެވެ.
އެމީހުން ވާހަކައިގައި ތިބެގެން އެއްގަމަށް އަރައިގެން ދިޔައިރުވެސް ޝާނީ ވިސްނަމުން ދިޔައީ ހާރިޝްގެ ވާހަކައާ މެދުގައެވެ. ހާރިޝް ސަލްމާއާ އިނދެގެން އުޅެނީ އޭނާގެ މަންމަ ބެލުމަށްޓަކައި ހެއްޔެވެ؟ މަންމަ ނިޔާވެއްޖެނަމަ ސަލްމާ ދޫކޮށްލާނެ ހެއްޔެވެ؟ އަނެއްކޮޅުން، ހާރިޝް އެހާ ޔަޤީންކަމާއެކީ ޝާނީ އިންނާނީ ހާރިޝްގެ ކޮއްކޮއާއޭ އެބުނީ ކީއްވެބާއެވެ. ހާރިޝް އެ ދެއްކީ ހަމްޒާގެ ވާހަކަ ކަން ގައިމެވެ. ޖިނާހްގެ ވާހަކަ އޭނަ އެގޮތަކަށް ނުދައްކާނެއެވެ. ޝާނީ ވިސްނުމަށް ގެއްލިފައި އިންދައި ޖިނާހް އަތްލުމުން އޭނާ ސިހުނެވެ. އޭނާ ޖިނާހް ގާތުގައި މިއިން ބޭނުން ހަނދާންވުމުން ލަދުގަތެވެ. ވަގުތުން ހާރިޝްގެ މަތިންވެސް ހަނދާން ނެތިއްޖެއެވެ. ޝާނީ ލަދުން އިސްޖަހައިގެން އިނދެފައި އޭނާގެ އަތުގައި އޮތް ސިޓީ ޖިނާހްއަށް ދިއްކޮށްލިއެވެ. ޖިނާހް ކުޑަކޮށް ހައިރާންވެހުރެ ސިޓީގައި ހިފިއެވެ. ހިތްއަވަސްވެފައި ހުރެ ޖިނާހް ސިޓީ ކިޔާލިއެވެ.
“ އަހަރެންވެސް ޖިނާހްދެކެ ވަރަށް ލޯބިވެއެވެ. “ ކުރު ނަމަވެސް ހިތަށް ފޮނިކަން ގެނުވި ބަސްކޮޅެކެވެ.
ސިޓީ ކިޔާލުމާއެކު ޖިނާހްގެ މޫނު އުޖާލާވެގެން ދިޔައެވެ. އޭނާގެ ތުންފަތަށް ވެރިވީ ލަދުރަކި ހިނިތުންވުމެކެވެ. ޝާނީ އިސްޖަހައިގެން އިންދައި ޖިނާހް އެއްޗެއް ދިއްކޮށްލިހެން ހީވެގެން އިސްއުފުލާ ބަލާލިއެވެ. އޭރު ޖިނާހްގެ އަތުގައި އޮތީ ހިތުގެ ބައްޓަމަށް އޮތް ފަށުފުލެކެވެ. އޭގައި ކަނޑާނަގާއިވާ އެސް އަކުރެއް އޮތެވެ. ޝާނީ އަތްދިއްކޮށްލުމުން ޖިނާހް އެ ފޫ ޝާނީގެ އަތަށް ލައިދިނެވެ. ޝާނީ ފުލަށް ރަނގަޅަށް ބަލާލިއެވެ. އެއީ ޖިނާހްގެ މަސައްކަތެއްކަން އޭނާއަށް ވަގުތުން އެނގުނެވެ. ޝާނީ އޭނާގެ ކަރުގައިވާ ރިހިފަށް ބާލާފައި ފޫލައްވާލުމަށްފަހު އަލުން އެޅިއެވެ. ޝާނީއަށް ފޫ ކަމުދިޔަކަން އެނގުމުން ޖިނާހް އުފާވިއެވެ. އަނެއްކާވެސް ދެމީހުންގެ މެދަށް ހަމަހިމޭންކަން ވެރިވިއެވެ.
ޖިނާހް މަޑުމަޑުން އޭނާގެ އަތް ގެންގޮސް ޝާނީގެ އަތުގައި ހިފާލިއެވެ. އެވަގުތު ކުޑަކޮށް ސިހިފައި ޝާނީ ބަލާލިއެވެ. ދެމީހުންގެ ހަތަރުކަޅި ހަމަވީ ވަގުތު ދެމީހުންގެ މޫނަށްވެސް ލަދުރަކި ހިނިތުންވުމެއް ވެރިވިއެވެ. ޖިނާހްގެ ލޮލަށް ބަލަން ނުކެރިގެން ޝާނީ އިސްޖަހާލިއެވެ. ޖިނާހް ހިނިތުންވެލަމުން އޭނާގެ ޖީބުން ނެގި އަނގޮޓިއެއް ޝާނީގެ ކަށި އިނގިލީފައި އަޅުވާލިއެވެ. އެއީވެސް ނާބޮލިން ހަދާފައިވާ އަނގޮޓިއެކެވެ. އޮފްއަރަމުން ދިޔަ އެއަނގޮޓީގައި ޝާނީ މަޑުމަޑުން ފިރުމާލިއެވެ. އޭނާގެ އިނގިއްޔަށް އެހާ ހެޔޮވަރަށް އަނގޮޓި ހަދަން ޖިނާހްއަށް އެނގުނީ ކިހިނެއްބާއޭ ޝާނީގެ ހިތަށްއެރިއެވެ. ޝާނީ ފުޅާ ހިނިތުންވުމަކާއެކު ޖިނާހްއަށް ބަލާލުމުން ޖިނާހްވެސް ހީލިއެވެ.
ލޮލާއި ލޮލުން ހިތުގެ މެސެޖްތައް ބަދަލުކުރަން ތިއްބައި އިރުއަރައިފިއެވެ. ޝާނީއަށް އެކަން ރޭކާ ލުމުން އޭނާ ގެޔަށްދާން އަވަސްވެގަތެވެ. އޭނާގެ މަންމަ ނުކުންނައިރު ގޭގައި އޭނާ ނެތްކަން އެނގިއްޖެނަމަ ވަރަށް ގޯސްވާނެއެވެ. ޝާނީ މަޑުކުރުވަން ޖިނާހްގެ ހިތް އެދުނު ނަމަވެސް ފުރަތަމަ ބައްދަލުވުމުން މީހަކަށް ޝައްކުވާ ފަދަ މަންޒަރެއް ފެންނާކަށް އޭނާ ބޭނުމެއް ނުވިއެވެ. އެހެންކަމުން ޝާނީ ދިއުމަށް އޭނާ އެއްބަސްވިއެވެ. ބައްދަލުވުން ނިންމާލާފައި ވަކިވީ ކޮންމެ ރެއަކުވެސް ފަތިސްނަމާދަށްފަހު ބައްދަލުކުރުމަށް ވަޢުދުވަމުންނެވެ. ޝާނީ އެއްގަމަށް އެރައިގެން ގޮސް އޮބާލާންދެން ބަލަން ހުރުމަށްފަހު ޖިނާހް ގޮނޑުދޮށަށް ފޭބިއެވެ. ޝާނީއާ އެއްމަގަކުން އެއްގަމަށް އަރަން ބޭނުން ނުވާތީ އޭނާ މިސްރާބުޖެހީ މިރިހި މަގަށެވެ.
އެދުވަހަށްފަހު ޝާނީއާއި ޖިނާހްގެ ލޯބި ރަސްމީވެއްޖެއެވެ. ދުނިޔޭގެ ލޯތަކަށް ސިއްރުން އެމީހުންގެ ބައްދަލުވުންތައް ކުރިޔަށްދާން ފެށިއެވެ. ޖިނާހް އާ ބައްދަލުކުރަން ފަތިސް ގަޑީގައި ޝާނީދަނީ ދެދުވަހުން އެއްދުވަހުއެވެ. އަނެއް ދުވަހު ބައްދަލު ކުރަނީ ހަވީރު ޖިނާހްގެ ގެއިންނެވެ. ނޫނީ ކުދިލިނބޯ ވަލުންނެވެ. ނޫނީ މިރިހި މަގުންނެވެ. ޖިނާހް ޝާނީގެ ގާތަށް އަންނަ ކޮންމެ ފަހަރަކުވެސް އަންނަނީ ކޮންމެވެސް ކަހަލަ ހަދިޔާއެއް ހިފައިގެންނެވެ. ކޮންމެވެސް ކަހަލަ މަލެކެވެ. ނުވަތަ މޭވާއެކެވެ. ނުވަތަ އޭނާގެ އަތުން ހަދާފައި އޮންނަ ކޮންމެވެސް ކަހަލަ އެއްޗެކެވެ. ޝާނީގެ ބޮލުގައި ކޮންމެ ދުވަހަކުވެސް ފިނިފެން މަލެއް ޖަހާލަދެއެވެ. ފިނިފެންމަލެއް ނުފޮޅޭ ދުވަހަކު ސައިމަލެކެވެ. ނުވަތަ އިރުދޭމަލެކެވެ. ނޫނީ ގުލްސަންފާ މަލެކެވެ. އެއީ ހައްތަހާވެސް ޖިނާހްގެ ލޯބީގެ ނިޝާންތަކެވެ. ދެމީހުންގެ މެދުގައި ބަހުން މުއާމަލާ ނުކުރެވުނު ނަމަވެސް ދެމީހުންގެ އިޝާރާތް އެކަކު އަނެކަކަށް ފުދެއެވެ.
ލޯތްބަކީވެސް އަޖާއިބެއް ފަދަ އެއްޗެކެވެ. ލޯބިވާމީހާ ކުރިމަތީގައި ހުންނައިރު، ދުނިޔެވެސް ހަނދާންނެތެވެ. ވަށައިގެންވާ މީހުންވެސް ހަނދާން ނެތެވެ. ޝާނީއާއި ޖިނާހްއަށްވެސް ކިތަންމެ ފަހަރަކު އެހާލަތު އާދެއެވެ. ސަލްމާގެ ކުރިމަތީގައިވެސް އެމީހުންގެ ލޯބި ހާމަވަމުން ދިޔައެވެ. ދެމީހުންގެ މެދުގައި ބަދަލުކުރެވޭ ލަދުރަކި ހިނިތުންވުން ތަކާއި ސިއްރުވެރި ނަޒަރުތައް ސަލްމާގެ ލޮލުގައި އަޅައިގަންނާކަށް ގިނަދުވަހެއް ނުނެގިއެވެ. އެކަމުގެ ސަބަބުން ސަލްމާ އުފާވި ނަމަވެސް އޭނާގެ ހިތުގައި ބިރުވެރިކަމެއްވެސް ވެއެވެ. އެލޯބި އެހެންބަޔަކަށް ފެންނަ ދުވަހަކުން ކަންތައް ވެދާނެ ގޮތް އޭނާއަށް އަންދާޒާ ކުރެވެއެވެ.
“ ޝާނީ….ދޮންތަގެ ކުރިމަތީގަ ތިހެން އުޅުނަސް….އެހެން މީހެއްގެ ކުރިމަތީގަ ތިގޮތަށް ސަކަރާތްޖަހާ ނުހަދާތި!…މިވަރަށް ބުނީމަ ޝާނީއަށް ވިސްނެންވާނެ…“ ޝާނީ އެކަނި ހުއްޓައި ސަލްމާ ބުންޏެވެ.
“ ދޮންތާ…މަންމަމެންގާތު އަދި އެއްވެސް އެއްޗެއް ނުބުނައްޗޭ!…ޕްލީޒް…“ ޝާނީ އެދުނެވެ. ސަލްމާ އެގޮތަށް އެއްބަސްވިއެވެ.
އޭގެފަހުން ޝާނީއާއި ޖިނާހްވެސް އުޅެނީ ބަލައިގެންނެވެ. އެމީހުންގެ ލޯބި އެންމެނަށް ފޮރުވައިގެންނެވެ. ސަލްމާއަކީ އެމީހުންގެ ސިއްރުވެރިޔާއެވެ. ޝާނީއާއި ޖިނާހްގެ ލޯބި މުޅި ދުނިޔެއަށް އުމުރަށްވެސް އޭނާ ސިއްރުކުރަން ބޭނުމެވެ. އެދެކުދިންނަށް އެއްވެސް މީހެއްގެ އެސްފީނާ ޖެހޭކަށް އޭނާ ބޭނުމެއްނޫނެވެ. ނަމަވެސް އެއީ ކިހާ ނާދިރުކަމެއްކަން އޭނާއަށް އެނގެއެވެ.
ނުނިމޭ- ވާހަކަ ކަމުދިޔަ ނަމަ fenvaru.mv ގެ އެފްބީ ޕޭޖަށް ލައިކެއް ދެއްވާ. އަދި ވާހަކަ ޝެއަރ ކޮށްލަދެއްވާ.
