އަހަރެންގެ ނިދި ނަގާލާފައި ތިގޮތަށް އަރާމުކޮށް ނިދިދާނެހެން ހީވޭތަ؟…“ ޝާނީގެ މޫނަށް ބަލަންއިން ހަމްޒާ ހިތާ ހިތާ ކިޔާލިއެވެ.
ހަމްޒާ މަޑުމަޑުން ޝާނީއާ ދިމާއަށް ގުދުވިއެވެ. ޝާނީގެ މޫނުގައި އަތްލަން އުޅެފައިވެސް އޭނާގެ އަތް ދުރަށް ޖައްސާލާފައި ތެދުވިއެވެ. އަދި ޝާނީގެ ފައިލާކޮޅަށް ގޮސް މަޑުމަޑުން ޝާނީގެ ފައިގައި ހިފިއެވެ. ޝާނީއަކަށް ހިލަމެއްނުވެއެވެ. ހަމްޒާ އޭނާގެ އަތުގައި އޮތް ފޮތިފަށަކުން ޝާނީގެ ފައިގައި މަޅިއެއް ޖެހިއެވެ. އަދި މަޑުމަޑުން އެނދުގެ ފަޑީގައި ފޮތިގަނޑުގެ އަނެއްކޮޅު އައްސާލިއެވެ. ހަމަ އެގޮތަށް ޝާނީގެ އަނެއްފައިވެސް އެނދުގައި އައްސާލިއެވެ. ހަމްޒާ މަޑުމަޑުން ގޮސް ޝާނީގެ މަގަތުގައި އިށީނދެ ޝާނީގެ އަތުގައި ހިފާލިއެވެ. އެވަގުތު ޝާނީ ނިދީގައި އޮވެ އޭނާގެ އަތްދަމައިގަންނަމުން ފުރޮޅިލިއެވެ. ހަމްޒާ އަނެއްކާވެސް މަޑުމަޑުން ޝާނީގެ އަތުގައި ހިފައި ޝާނީގެ ދެއަތް އެއްކޮށް ޓޭޕްގަނޑަކުން ހައްޔަރުކުރަން މަސައްކަތްކުރިއެވެ. އެވަގުތު ޝާނީ ހޭލަން އުޅޭހެން ހީވުމުން ހަމްޒާއިނީ ތައްޔާރުވެގެންނެވެ. އޭނާހުރީ ދުރާލާ މިރެއަށް ތައްޔާރުވެގެންނެވެ. ޝާނީގެ މައިންބަފައިންނަށްވެސް އެނގުމަކާ ނުލައި އޭނާ އެގެއަށްވަދެ ފިލާހުރީ ދަނޑިވަޅަކަށް ބަލަ ބަލައެވެ.
ޝާނީ ލޯހުޅުވާލާފައި ހަމްޒާފެނި ސިހިފައި ހަޅޭއްލަވައިގަންނަން އުޅުމުން ހަމްޒާގެ އަތުގައި އޮތް ޓޭޕްފަށް ޝާނީގެ އަނގަމަތީގައި އެޅިއެވެ. ހަމްޒާގެ އަތްދަށުން ދެމިގަނެގެން އެނދުން ފުންމާލަށް ޝާނީ މަސައްކަތްކުރިއެވެ. ނަމަވެސް އޭނާގެ ދެފައި އެނދާއެކީ ހައްޔަރުކޮށްފައި އޮތުމުން ތެދުވެވޭގޮތެއް ނުވިއެވެ. ހަމްޒާ ޝާނީގެ ދެއަތް އެއްކޮށް ޓޭޕްއަޅާލުމަށްފަހު އެނދުގެ ބޯލާކޮޅުގައި ހައްޔަރުކޮށްލިއެވެ.
“ ދެން ނިކަން ހިތްވަރެއް ހުރިއްޔާ އަހަރެންގެ އަތްދަށުން ސަލާމަތްވެގެން ދޭބަލަ!…..“ ޝާނީއާ މޫނު ކައިރިކޮށްލަމުން ވައިއަޑުން ހަމްޒާ ބުނެލިއެވެ. އެވަގުތު ޝާނީގެ ލޯލިތައް ކޮޅަށްޖެހިގެން ދިޔައެވެ. އޭނާއަށް މިފެންނަނީ ހުވަފެނެއް ނޫންބާއޭވެސް ކިތަންމެ ފަހަރަކު ހިތަށްއެރިއެވެ. އެކަން ޔަޤީންކުރުމަށްޓަކައި ދެތިން ފަހަރު ލޯމަރާފައި ލޯހުޅުވުމުންވެސް މަންޒަރު ބަދަލެއްނުވިއެވެ. އޭނާއަށް މިއޮވެވުނީ ކިހާ ނުރައްކާތެރި ހާލަތެއްގައިކަން އެނގުމުން ބިރުންގޮސް އޭނާގެ ހަށިގަނޑު ރޫރޫއަޅައިގަތެވެ.
“ އަހަރެންނާ ނީންނާނަމޭ ބުނެ، މަންމައާ ބައްޕަ ކުރިމަތީގަ މޮޅު ޑްރާމާއެއް ކުޅެގެން، ހިތުން ތިހުރީ ވަރަށް އުފަލުންދޯ….ހީކުރީތަ ހަމްޒާ ދެރަގަބޫލުކޮށްގެން އަންނަން ނުކެރިފަ ހުރީކަމަށް….ހީކުރީތަ މަށަށް ކަމެއްކުރަން ނުކެރިގެން މަޑުން ހުރީކަމަށް….މިރޭ ދައްކާލާނަން އެކަން…މަ މުޅި ރަށަށް ފަޟީހަތްކުރިކަމުގެ ބަދަލު މިރޭ ދޭނަން….“ ޝާނީގެ މޫނާއި މޫނު ޖެހޭހައި ކައިރިކޮށްލަމުން ހަމްޒާބުނެލި ބަސްތަކުން ބިރުގަތްވަރުން ޝާނީގެ ނޭވާ އަވަސްވެގެން ދިޔައެވެ. ހަމްޒާ އޭނާ ލައިގެންހުރި ޓީޝާޓް ބާލާ މަންޒަރުފެނުމުން ޝާނީއަށް ތެޅިގަނެވުނެވެ. އޭނާގެ ހަތަރެސްފައި ސަލާމަތްވޭތޯ ގަދަހަދަން ފެށިއެވެ. އޭނާ ތެޅިތެޅި ވަރުބަލިވީއިރުވެސް، އަތެއްވެސް، ފައެއްވެސް މޮހައެއް ނުލެވުނެވެ. އެންމެފަހުން އޭނާއަށް ގިސްލާ ރޮވުނެވެ. އަނގައިން ބަހެއް ނުބުނެވުނު ނަމަވެސް ލޮލުން ހަމްޒާއަށް އާދޭސްކުރަން ފެށިއެވެ.
ޝާނީގެ ލޮލުން އޮހޭ ކަރުނައަކަށް ހަމްޒާ ނުބަލައެވެ. ހަމްޒާ އޭނާ ގެނައި ސާމާނުގެ ތެރެއިން ކަތުރެއް ނަގައި ޝާނީގެ ހެދުން ކަފާލަން ދިމާކުރުމުން ޝާނީ ތެޅިގަތެވެ. ނޫނެކޭ ބުނެ ބޯހޫރާ އާދޭސްކުރަން ފެށިއެވެ. ޝާނީގެ އާދޭހަކަށް ފަރުވާލެއްނުދީ، ހަމްޒާ ޝާނީގެ ހެދުމުގެ ފަސްބައިގައި ކަތުރު ޖައްސައި ތަންކޮޅެއް ކަފާލުމަށްފަހު، ދެއަތުން ހިފައި ލަތްކެއްޖަހައި ހެދުން ހުރިގޮތަށް ވީދާލިއެވެ. އަދި ރޮއެ ރޮއެ އޮއްވައި އޭނާގެ ހެދުން ހަށިގަނޑާއި ވަކިކޮށްލިއެވެ. އެ ލޫޅާފަތި ޒުވާން ހަށިގަނޑު ކަޝްފުވެގެން ދިޔަ ވަގުތު ހަމްޒާގެ ހިތަށް ވީގޮތް ޚުދު އޭނާއަށްވެސް ނޭނގުނެވެ. އޭނާގެ ހަށިގަނޑުގައި މަޑު ތުރުތުރު އުފެދުނެވެ. ޝާނީގެ އިތްފަތްތެރިކަން ފޭރިގަންނާކަށް އޭނާ ބޭނުމެއްނޫނެވެ. އޭނާ ބޭނުންވަނީ ޝާނީ ބިރުގަންނުވާލާށެވެ. ނަމަވެސް އެހާ ހާމަކަން ބޮޑުގޮތަކަށް ޝާނީގެ ހަށިގަނޑު ފެނުމުން އޭނާގެ ނަފްސު އިޚްތިޔާރުން ބޭނުވެދާނެ ކަމުގެ ބިރުހީވިއެވެ.
“ ޝާނީއަށް އޮތީ ދެގޮތް…އަހަރެންނާ އިންނަން އެއްބަސްވުން ނޫނީ މިގޮތަށް އަހަރެންގެ އަތުން ބަރުބާދުވުން….“ ތުރު ތުރު އަޅާ އަޑަކުން ހަމްޒާ ބުނެލިއެވެ. ޝާނީ ދެލޯމަރައި ތަގުޅިކޮށްގެން އޮވެ ރޮމުން ދިޔައެވެ. އޭނާގެ ހަށިގަނޑު ނިވާކުރެވޭތޯ، އަތަކަށް ފުރޮޅިލެވޭތޯވެސް މަސައްކަތްކުރިއެވެ. ނަމަވެސް އޭނާއަށް ހަމްޒާގެ ކިބައިން ސަލާމަތްވާން އެއްކަމެއްވެސް ނުކުރެވުނެވެ. ރޮއެ ރޮއެ އޮތުން ފިޔަވައި ކުރެވޭނެ ކަމެއްނެތެވެ. އޭނާގެ މަންމައާއި ބައްޕައަށް ގޮވިއެވެ. ސަލާމަތަށްއެދި އާދޭސްކުރިއެވެ. ނަމަވެސް، އޭނާގެ އަނގަމަތީ އަޅާފައިވާ ޓޭޕްފަށުގެ ސަބަބުން އަޑުބޭރުވާ ގޮތެއްނުވިއެވެ. ވެހެމުންދިޔަ ބޯވާރޭގެ ސަބަބުން އޭނާ ތެޅޭއަޑުވެސް ކޮޓަރިން ބޭރަށް އިވޭވަރެއް ނުވެއެވެ. އެންމެފަހުން އޭނާ ގޮތް ހުސްވިއެވެ. ހަމްޒާގެ އަތްދަށުވެ އޭނާގެ އިތްފަތްތެރިކަން ވެއްޔާއި މޮޑެވިދަނީ ކަމުގައި ޔަޤީންކުރެވުނެވެ.
“ ބުނޭ!….އަހަރެންނާ އިންނާނަންތަ؟…ނޫނީ މިރޭން މިރެޔަށް އަހަރެން ޝާނީގެ ބޭނުންކޮށްލާފަ ޝާނީ ދޫކޮށްލަންވީތަ؟…“ ޝާނީގެ ދެކޮލުގައި ހިފާ ހަމްޒާއާ ދިމާއަށް މޫނު އަނބުރާލަމުން ސުވާލުކޮށްލިއެވެ. ޝާނީ އޮތީ ދެލޯމަރައި ތަގުޅިކޮށްގެންނެވެ. ހަމްޒާގެ މޫނަށް ބަލާކަށްވެސް އޭނާ ބޭނުމެއްނުވެއެވެ. ރޮމުން ރޮމުން ގޮސް އޭނާ ކޮށިއަރާ ނޭވާ ހާސްވާގޮތްވުމުން، ހަމްޒާ އޭނާގެ އަނގަމަތީގައިވާ ޓޭޕްފަށް ނައްޓާލިއެވެ. އޭރު އޭނާއޮތީ ރޮއެ ރޮއެ ވަރުބަލިވެފައެވެ.
“ އެންމެ ފަހު ފަހަރަށް މިބުނަނީ….އަހަރެންނާ އިންނާނަންތަ؟…އަހަރެން މިސުވާލުދެން ތަކުރާރެއް ނުކުރާނަން…“ ހަމްޒާ އިންޒާރުދިނެވެ. ދެންވެސް ޝާނީއަށް ރުއިން ފިޔަވައި އިތުރުކަމެއް ނުކުރެވުނެވެ. ބާރުބާރަށް ހަޅޭއްލަވައިގަންނަން ބޭނުންވިއެވެ. ދުވަހަކުވެސް ނީންނާނަމޭވެސް ބުނަން ބޭނުންވިއެވެ. ނަމަވެސް، އޭނާގެ ކަރުތެރެއިން އަޑުބޭރުވާގޮތެއް ނުވިއެވެ. އޭނާގެ ހާމައަށް އޮތް ހަށިގަނޑުގައި ޖެހޭ ނުޖެހޭ ހިސާބަށް ގުދުވެގެން އޮތް ހަމްޒާގެ ހަށިގަނޑުގެ ހޫނުކަންވެސް އޭނާއަށް އިހުސާސްވަމުން ދިޔައެވެ. އޭނާ އާނއެކޭ ބުނާކަށް ބޭނުމެއްނޫނެވެ. ނަމަވެސް ނޫނެކޭ ބުނެފިނަމަ އޭނާ ހަމްޒާގެ ޝިކާރަކައަކަށް ވާނެއެވެ. ޚުދު ހަމްޒާވެސް ޝާނީގެ ހަށިގަނޑުގައި ބީހިނުލައި ކެތްކުރަމުންދަނީ ވަރަށް ހިތްވަރުންނެވެ. ރޭގެ ފިނިކަމާހުރެ، އޭނާގެ ހަށިގަނޑުވަނީ ހޫނަކަށް ބޭނުންވެފައެވެ.
“ މަން..މަންމާ…“ އަޑު ކެނޑިކެނޑިގެން މަޑުމަޑުން ޝާނީއަށް ބުނެވުނެވެ.
“ މަންމައާ ބައްޕައަށް ގޮވިޔަސް މިރޭ ނާންނާނެކަން އެނގޭތަ؟…މާމަ ބަލިވެގެން މަންމައާ ބައްޕަވީ އެގެއަށް ގޮސް….އެއްވެސް މީހަކު މިގެޔަކު ނެތް…ކިތަންމެ ވަރަކަށް ރުޔަސް އެކަކަށްވެސް އަޑެއްނީވޭނެ…“ ހަމްޒާ ބުނެލި ޖުމްލައިން ޝާނީއަށް ބޭއިޚްތިޔާރުގައި ރުއިން ހުއްޓާލެވުނެވެ. ހައިރާންވެގެން ހަމްޒާގެ މޫނަށް ބަލާލެވުނީ ގަބޫލުކުރަން ދަތިވެފައެވެ. އޭނާ މިއޮތީ ގޭގައި އެކަނި ހެއްޔެވެ؟ މަންމަމެން އަދިވެސް ނާންނަނީ ހެއްޔެވެ؟ މާމަ މާބޮޑަށް ބަލިވެގެން އިރާކޮޅު އެގެއަށް މަންމަމެން ދިޔަކަން އޭނާއަށް އެނގެއެވެ. ސަހަރޯއެވެ. އޭނާގެ ދުވަސްދިޔައީއެވެ. މިއީ ބިރުވެރި ހުވަފެނަކަށް ވާނޭނަމަ ކޮންފަދަ ހެއްޔެވެ؟ ޝާނީއަށް އަނެއްކާވެސް ގިސްލާ ރޮވުނީ ގޮތްހުސްވުމުންނެވެ.
ޝާނީގެ ފަރާތުން އެދެވޭ ޖަވާބެއް ނުލިބުމުން އޭނާ އަދިވެސްބޮޑަށް ޝާނީ ބިރުގަންނުވާލަން ބޭނުންވިއެވެ. އެވަރުކޮށްގެންވެސް ޖަވާބެއް ނުދީފިނަމަ، ހަޤީޤަތުގަވެސް ޝާނީގެ ހަށިގަނޑުން އޭނާ އުފާހޯދާނެއެވެ. ކައިވެނި ނުކުރެވުނިއްޔާ ކައިވެނީގެ ބޭރުންވެސް، ޖިނާހްއަށްވުރެ ކުރިން އޭނާ އެކަން ކުރާނެއެވެ. ހަމްޒާ ގުދުވެ ޝާނީގެ ކަރުދޮށުގައި ތުންފަތް ޖައްސާލުމާއެކީ ޝާނީ ތެޅިގެންފައި ރޯންފެށިއެވެ.
“ ނޫން…ނޫން..ޕްލީޒް…ނޫން…ދޫ…ކުރޭ…ދޫކުރޭ…“ އާދޭސްކުރަމުން ގޮސް ޝާނީގެ އަޑު ހިނދިގެން ދިޔައެވެ.
“ ދޫކުރާނީ އަހަރެންނާ އިންނަން އެއްބަސްވީމަ….އިންނާނަންތަ؟…“ މޫނު ހިއްލާލާ ޝާނީގެ މޫނަށް ބަލާލަމުން ވައިއަޑުން ހަމްޒާ އެހިއެވެ. އެހެންގޮތެއް ނެތްކަން އެނގުމުން އާނއެކޭ ބުނުމުގެ ގޮތުން ޝާނީ ބޯހަލުވާލިއެވެ.
“ ނޭނގެ ތިބުނި އެއްޗެއް…އަނގައިން ޖަވާބުދީ! އަހަރެންނާ އިންނާނަންތަ؟…“ ހަރުކަށިކަމާއެކު ހަމްޒާ އެހިއެވެ.
“ ހޫމް…އިން…އިން އިންނާ..ނަން…“ ގިސްލުމުގެ ތެރެއިން ޝާނީ ޖަވާބުދިނެވެ.
“ ހަމަ އަސްލުވެސް އިންނާނަންތަ؟…“ ޔަޤީންނުވެފައި ހަމްޒާއަށް އަހާލެވުނެވެ. ޝާނީ ދެވަނަ ފަހަރަށްވެސް އާނއެކޭ ބުނުމުން ހަމްޒާ އުފަލުން ޝާނީގެ ގައިގާ ބައްދާލިއެވެ. އެވަގުތު ޝާނީގެ ހަށިގަނޑު ހުރަކާނުލައި ބީހުމުން ހަމްޒާގެ ހިއްސުތައް ހަލަބޮލިވިއެވެ. ހަމްޒާގެ ހަށިގަނޑުގެ ބީހުން އިހުސާސްވުމާއެކީ ޝާނީގެ ނޭވާ މޭގެތެރޭގައި ތާށިވިހެން ހީވިއެވެ. ހަށިގަނޑުގައި ދުވެލި ފިނީގެ ރާޅެއްގެ ސަބަބުން މުޅިމީހާ ގަނޑުވިގެން ހީވިއެވެ. މިނޫނީ މިފަދަ ގޮތަކަށް ފިރިހެނަކު އޭނާގެ ހަށިގަނޑުގައި ހުރަހެއްނެތި ބީހިފައެއްނެތެވެ. ނަމަވެސް އެއީ ހަމްޒާއަށްވީތި، އޭނާއަށް ހީވީ އެތައް ސަތޭކަ ކަށިތަކެއް އެއްފަހަރާ އޭނާގެ ހަށިގަނޑަށް ހެރުނުހެންނެވެ.
“ މަކަރު ހަދާފަ އޮޅުވާލަން މަސައްކަތް ނުކުރާތި!…ކުރީ ފަހަރު ކުޅުނު ކަހަލަ ޑްރާމާއެއް ކުޅެން ހިތަށްވެސް ނާރުވާތި!….މަންމަމެން ގާތު މިވާހަކަ ބުނެފިނަމަ ނަތީޖާ ވަރަށް ހިތިވާނެ…ރަށު އެންމެން ގާތު ބުނާނަން، އަހަރެމެން ދެމީހުންގެ މެދުގަ ގުޅުމެއް ހިނގިއޭ…އާނއެކޭ ބުނެފަ ކައިވެންޏަށް އިންކާރުކޮށްފިނަމަ ބަދުނާމުވާނެކަން ހަނދާން ކުރާތި!…“ ޝާނީގެ ގައިގައި ބައްދައިގެން އެއޮތްގޮތަށް އޮވެ ހަމްޒާ ވާހަކަ ދެއްކިއެވެ. ޝާނީ އެއްވެސް ބަހެއްނުބުނެ ގިސްލަ ގިސްލާ އޮތެވެ. ޝާނީ ރޯވަރުން ހަމްޒާގެ ހިތަށް ކެތްނުވެގެން މަޑުމަޑުން ޝާނީގެ ގައިމަތިން ތެދުވިއެވެ. އަދި ޝާނީގެ ކަރުނަ ފުހެދެމުން ވާހަކަ ދެއްކިއެވެ.
“ ޝާނީ….ކީއްވެތަ އަހަރެންދެކެ ތިހާ ރުޅި އަންނަނީ…އަހަރެން ހާދަ ލޯބިވެޔޭ ޝާނީދެކެ…ދުވަހަކުވެސް ޝާނީއަށް ދެރަގޮތެއް ނުހަދާނަމޭ….ދެން ނުރޮއެ ހުއްޓާލަބަލަ!…ޕްލީޒް…އަހަރެން ޝާނީ ގެންގުޅޭނީ ރާނީއަކު ފަދައިން….ވަރަށް ލޯބިން…ގަބޫލު ކޮށްބަލަ!…“ ހަމްޒާ މަޑުމައިތިރިކަމާއެކު ވާހަކަދެއްކިއެވެ. އަދި ޝާނީގެ އަތާއި ފައިވެސް މޮހާލަދިނެވެ. އެއާއެކު ޝާނީ އޭނާގެ ބެޑްޝީޓުން ހަށިގަނޑު ނިވާކުރަމުން ހަމްޒާއަށް ފުރަގަސްދިނެވެ. ހަމްޒާގެ ނުބައިކަމުގެ އިންތިހާ މިރޭ ޝާނީއަށް ފެނިއްޖެއެވެ.
“ ޝާނީއަށް ތިން ދުވަސް އަހަރެން ދޭނަން…..ތައްޔާރަށް ހުންނާތި!…ހީނުކުރާތި ދެވަނަ ފަހަރަށް އަހަރެން ކެހިދެވޭނެއޭ….އަހަރެންނަށް ކެހިދީފަ ޖިނާހްއާ ކައިވެނިކުރިޔަސް އުފަލުގަ ނޫޅެވޭނެކަން ހަނދާންކުރާތި!…ޖިނާހްއާ އިނދެގެން ދިޔަޔަސް އެދެވެނީ ހަމަ އަހަރެންގެ އުނގަށް….އޭނަގެ އަނތްބެއްގޮތުގަ ހުއްޓަސް އަހަރެން ބޭނުންގޮތެއް ހަދާނަން…ބޭނުން ކަމެއްކުރާނަން…އަދި ބުނަން އަހަރެން ދޫކޮށް އޭނައާ އިނަސް ކޮންމެވެސް ހާދިސާއެއްގަ އޭނަ މަރުވުންވެސް އެކަށީގެންވޭ….އޭރުން އިއްދަ ހަމަވީމަ، ހަމަ އަހަރެންގެ އަނތްބަކަށް ހަދާނަން…“ ހަމްޒާ އޭނާއަށް ދެއްކުނުހައި ވިޔާނުދާ ވާހަކައެއް ދައްކައިގެން ޝާނީގެ ހިތަށް ބިރުވެރިކަން ވެއްދިއެވެ. ޝާނީއަށް އެވާހަކަތައް ގަބޫލުވެސް ކުރެވުނެވެ.
ޖިނާހްއާ އިނދެގެންވެސް އޭނާއަށް އުފާވެރި ދިރިއުޅުމެއް ނުލިބޭނެކަން ޔަޤީންވިއެވެ. ޖިނާހްގެ އަނތްބެއްގެ ގޮތުގައި ހުރިނަމަވެސް އޭނާގެ އިތްފަތްތެރިކަން ސަލާމަތް ނުކުރެވޭނެއެވެ. ނުވިތާކަށް ޖިނާހްއަށް ދެރަގޮތެއް ހަދާކަށްވެސް ހަމްޒާ ފަހަކަށް ނުދާނެއެވެ.
“ އަހަރެން ބުނިއިރަކުން ޖިނާހް މާލެއިން އަންނާނީ….މިހާރު ޖިނާހްގެ މަންމަ ގޮވައިގެން އިންޑިއާއަށް ގޮސްވީ….އޮޕަރޭޝަންކުރަން….އެހެންވީމަ އޭނައަށް ޝާނީ ތިކުރާ އިންތިޒާރު ވަރަށްދިގު….އެކަމަކު އަހަރެންނަށް އެހާދިގު އިންތިޒާރެއް ކުރެވޭކަށް ނެތް….މާދަމާ ޝާނީ އަމިއްލައަށް އަހަރެންނާ އިންނަން ބޭނުންކަމުގަ މަންމަމެންގާތު ބުނޭ!…އެހެންނޫނީ ދެން ޖިނާހް އަނބުރާ މިރަކަށް ނާންނާނެ…އިންޑިއާ ކަހަލަ ބޮޑުތަނަކަށް ގެއްލޭމީހަކު ހޯދާކަށް ފަސޭހައެއްވެސް ނުވާނެ….އަދި އަމުދުން އެކަހަލަ މަންމަނަކު…“ ހަމްޒާގެ ކޮންމެ ލަފްޒެއް ވިހަތީރެއްފަދައިން ޝާނީގެ ހިތަށް ހެރެމުންދިޔައެވެ.
“ ޖިނާ…ޖިނާހްއަށް ދެރަ..ގޮތެއް ނުހަ…ނުހަދާތި! އަހަރެން..އަހަރެން… ހަމްޒާ…އާ އިން…އިނާނަން….“ އެންމެފަހުން ކެތްނުވެގެން ޝާނީއަށް ބުނެވުނެވެ.
“ ވަރަށް ރަނގަޅު….ޝާނީއަށް ވަރަށް ވިސްނޭ…އަހަރެން ދެންދަނީ ހެކިވެރިން ފޮނުވަންވީމަ އަންގާލާ!…އެކަމު މާލަސް ނުކުރާތި! ތިޖާދުވީ ހަށިގަނޑު ފެނުނީމަ އިތުރަށް ކެތްކުރަން ވަރަށް އުނދަގޫވޭ…“ ޝާނީގެ ކަނދުރާގައި ތުންފަތް ޖައްސާލަމުން ހަމްޒާ ބުނެލިގޮތުން ޝާނީގެ ހިތް ބިރުން ރޫރޫ އަޅައިގަތެނެވެ. ނަމަވެސް އޭނާ ދަތްކުނޑިވިކައިގެން ކެތްތެރިކަމާއެކު އެއޮތްގޮތަށް އޮތެވެ. ހަމްޒާ އިރުކޮޅަކު ޝާނީއަށް ބަލަން ހުރުމަށްފަހު މަޑުމަޑުން ތެދުވިއެވެ. ޝާނީ އޭނާގެ ކައިވެންޏަށް އާނބަސް ބުނާނެކަމުގައި ޔަޤީންކޮށްގެން އޭނާ އެގެއިން ނުކުތެވެ.
ވެހެމުންދިޔަ ބޯ ވާރެތެރޭގައި ތެމި ފޯވެގެން އޭނާ ގެޔާ ދިމާއަށް މިސްރާބުޖެހިއިރުވެސް ހިތުގެ ތެޅުން މަޑެއްނުވެއެވެ. ޝާނީގެ ޒުވާންކަމުން ކަރުހިއްކުން ފިލުވަން އޭނާހުރީ ނުހަނު ބޭނުންވެފައެވެ. ނަމަވެސް، އޭނާ ޝާނީ ބޭނުންވަނީ ވަގުތީގޮތެއްގައެއް ނޫނެވެ. މުޅި އުމުރަށެވެ. ވީއިރު އޭނާ އަދިވެސް ކެތްކުރާނެއެވެ. ޝާނީގެ ކުރިމަތީގައި މިރޭ އޭނާވާނީ ނުހަނު ނުބައި ނުލަފާ މީހަކަށެވެ. އެހެންނަމަވެސް އޭނާގެ ފަރުވާލެއްނެތެވެ.
ހަމްޒާ ދިޔަތާ އެތައްއިރެއްވީއިރުވެސް ޝާނީއޮތީ އޮތްތަނުން ގުޑާލަންވެސް ނުކެރިފައެވެ. ހަމްޒާ ނުގޮސް ފިލާހުރެދާނޭ ހީވަނީއެވެ. އަނެއްކާވެސް އައިސް އޭނާގެ އިތްފަތްތެރިކަން ފޭރިގެންފާނެއޭ ހީވަނީއެވެ. ޝާނީ ބިރުން ސިހި ސިހި އޮއްވައި މަންމައާއި ބައްޕަ ގެޔަށް އައި އަޑު އިވިއްޖެއެވެ. އޭނާ ދުވެފައި ނުކުމެ ހަމްޒާގެ ނުބައިކަމުގެ ވާހަކަ ކިޔައިދޭން ހިތަށްއެރިއެވެ. ނަމަވެސް އޭނާއަށް އެވަރުގެ ހިތްވަރެއް ނުލިބުނެވެ. އޭނާއަށް ރުއިން ފިޔަވާ އިތުރުކަމެއް ނުކުރެވުނެވެ. މަންމަމެންނަށް އަޑުއިވިދާނެތީ އަނގަމަތީގައި އަތްއަޅަގައިގެން އޮވެ އޭނާ ރޮމުން ދިޔައެވެ. ހަމްޒާގެ ނުބައިކަންފެނި އޭނާގެ ހުރިހާ އުއްމީދެއް ފެނަށްވެގެން ހިނގައްޖެއެވެ. ޖިނާހްއާއެކުގައި އުޅުމަށް ދުށް ހުވަފެންތައް ވިއްސި ވިހާލިވެގެން ހިނގައްޖެއެވެ.
“ ޖިނާހްއާ ކައިވެނިކުރިޔަސް އެވަދެވެނީ ހަމަ އަހަރެންގެ އުނގަށް“ ހަމްޒާގެ އެ ވިހަ ލަފްޒް ޝާނީގެ ހުރިހާ އުފާތަކެއް ފޭރިގެންފިއެވެ. އޭނާ މާޔޫސްވެ، ނާއުއްމީދު ވެއްޖެއެވެ. އިންތިހާއަށް ބިރުގެންފިއެވެ. ހަމްޒާ މިރޭ އޭނާގެ އިތްފަތް ފޭރިނުގަނެ އެ ދިޔައީ ހަމްޒާއާ އިންނަން އޭނާ އާނބަސްބުނަން އެންމެ ފަހު ފުރުސަތު ދީފައެވެ. އޭނާ މިފަހަރު އިންކާރުކޮށްފި ނަމަ، އޭނާގެ އަމިއްލަ އަތުން އަމިއްލަ އިއްޒަތާއި އަބުރު ވެއްޔާއި މޮޑެލަން ޖެހޭނެއެވެ. ހަމްޒާ އޭނާގެ އިތްފަތް ފޭރިގަނެ ދުނިޔެއަށް ބަދުނާމް ކުރާނެއެވެ. އޭރުން އޭނާގެ އާއިލާ ބަދުނާމުވެ، މައިންބަފައިން ލަދުން މަރުވެދާނެއެވެ. ޖިނާހްވެސް އޭނާއަށް ނަފްރަތު ކުރާނެއެވެ. ފަތިސްވާންދެން ޝާނީ ކަރުނަ އޮހޮރަމުން ވިސްނާ ފިކުރުކުރިއެވެ.
އޭނާގެ އިތްފަތްތެރިކަން ސަލާމަތްކުރުމަށްޓަކައި އޭނާގެ ކުރިމަތީގައި އޮތީ ދެގޮތެވެ. އެއްގޮތަކީ ހަމްޒާއާ އިނުމެވެ. އަނެއް ގޮތަކީ މަރުވުމެވެ. ނަމަވެސް އަމިއްލައަށް މަރުވުމަކީ އޭނާ ކުރާނެ ކަމެއް ނޫނެވެ. ފުރާނައަކީ އޭނާގެ ހައްޤެއް ނޫނެވެ. އަމިއްލައަށް މަރުވެގެން ނަރަކަށް ދިއުމަށްވުރެ، ދުނިޔެމަތީގައި ހަމްޒާފަދަ މީހެއްގެ އަޅުވެތިކަމުގައި އުޅުންވެސް މާރަނގަޅޭ އޭނާގެ ހިތަށްއެރިއެވެ. އުމުރަކީ ނުހަނު ކުރު އެއްޗެކެވެ. ކިތަންމެ އަވަހަކަށްވެސް މަރުވެދާނެއެވެ. މަރުވީމަ މިދުނިޔޭ ހިތްދަތިކަން ނިމުނީއެވެ. ނަމަވެސް އާޚިރަތަކީ ދާއިމީ އެއްޗެކެވެ. އާޚިރަތް ގެއްލުވާލާފައި ދުނިޔެ ހޯދާކަށް އޭނާ ބޭނުމެއްނޫނެވެ.
ޖިނާހްދެކެ ކިތަންމެ ލޯބިވީ ނަމަވެސް، އެލޯބީގެ ސަބަބުން ޖިނާހްއަށް ދެރައެއް ލިބޭކަށް އޭނާ ނޭދެއެވެ. ޖިނާހްގެ ކައިވެނިމަތީގައި ހުރެ ހަމްޒާގެ އަނތްބެއްގެ ރޯލް އަދާކުރުމަށްވުރެ، ޚުދު ހަމްޒާގެ އަނތްބަކަށް ވުން މާރަނގަޅެވެ. އޭރުން އޭނާގެ ހަށިގަނޑު ހަމްޒާ ބޭނުންކުރާނީ ހަލާލު ގޮތުގައެވެ. މުޅި އުމުރު ހަމްޒާގެ ބޭނުންތައް ފުއްދަން ގެންގުޅޭ ރަންޑިއަކަށްވުމަށްވުރެ، އަގެއްނެތަސް އަނތްބަކަށްވެގެން ހުރުން ހެޔޮކަންބޮޑެވެ. މުޅިރޭ ވިސްނުމަށްފަހު، ފަތިސްވުމުގެކުރިން އޭނާ ނިންމުމެއް ނިންމިއެވެ. އޭނާ ހަމްޒާއާ ކައިވެނިކުރާނީއެވެ. އޭނާ އެނދުން ތެދުވެ، އަލަމާރީގައި އޮތް އޭނާއާއި ޖިނާހް މެސެޖްލިޔާ ފޮތް ނެގިއެވެ. އަދި އޭނާއަށް ދިމާވި ހާލަތު ބަޔާންކޮށް ޖިނާހްއަށް ވަރަށްދިގު މެސެޖެއް ލިޔުނެވެ. ޖިނާހްދެކެ އިންތިހާއަށް ލޯބިވީނަމަވެސް ޖިނާހްގެ މީހަކަށް ވެވެން ނެތްކަން ހާމަކޮށް އޭނާ މާފަށް އެދުނެވެ. އޭނާ ލިޔަމުން ދިޔައިރު، އޭނާގެ ލޮލުން އޮހުރު ކަރުނައިގެ ސަބަބުން ލިޔުމުގެ ބައެއް އަކުރުތައް ފޭދިގެން ދިޔައެވެ.
ނުނިމޭ
