“ ނަދާ އާއި ޔާންގެ ކައިވެނި އަންނަ މަހުގައި އޮތް ވާހަކަ ބައްޕަ ބުނި.“ ނިހާދު މިހެން ބުނުމުން ސަމާއަށް އިތުރަށް ރޮވުނެވެ.
”ސަމާ ރަނގަޅުވީމަ އަހަރެން ސަމާ ގެންދާނަން އެމީހުން ކައިރިޔަށް. އިހަށް ރެސްޓުކޮށްލާ.“ ނިހާދު ސަމާ އެދުމަތީގައި ބޭއްވުމަށްފަހު ކައިރީގައި އިށީނެވެ. ސަމާގެ ލޮލުން ވެއްޓުނު ކަރުނަތިކި ނިހާދު ފޮހެލުމުން ސަމާ ނިހާދުއަށް ބަލާލިއެވެ.
”ނިހާދު. އަހަންނަށް މާފްކުރޭ. އަހަރެން ހީކުރީ ނިހާދު!“
ނޫން ސަމާ! މާފަށް އެދެން ޖެހެނީ ސަމާ ނޫން. އަހަރެން. އަހަންނަށް މާފްކުރޭ. އެނަދާގެ ވާހަކަތައް އަޑުއަހާފަ އަހަރެން ސަމާއަށް ވަރަށް އަނިޔާ ކުރިން. އަހަރެން އެންމެ ލޯބިވާ މީހާއަށް އަނިޔާކުރިން. އަހަރެން ދުވަހަކުވެސް އަމިއްލަ ނަފްސަށް މާފެއް ނުކުރާނަން. އެމީހުންގެ މަކަރުވެރި ރޭވުން އަހަންނަށް އެގުނު ހިސާބުން އަހަރެން މަސައްކަތް ކުރީ އެމީހުންގެ ކިބައިން ސަމާ ސަލާމަތް ކުރަން. އަހަރެން ސަމާ ރޭޕް ނުކުރަން. އަހަންނަކީ އެހާ އަނިޔާވެރި މީހެއް ނޫން އަނބިމީހާ ރޭޕްކުރަން. އެކަމަކު އެނަދާ އަހަރެން ޖަލަށް ފޮނުވީ އަހަރެން ސަމާ ރޭޕްކުރީއޭ ކިޔާފަ.“
”އަހަރެން ރޭޕް. ތީ އަދި އަހަންނަށް ނޭގޭ ވާހަކައެއް. ނިހާދު ޖަލަށް ލީ އަހަރެން ރޭޕްކޮށްގެންތަ؟“ ސަމާ ހައިރާންވިއެވެ.
”އާ! ނަދާ ބުނީ ފުލުހުން ކައިރީ އަހަރެން އެރޭ ސަމާ ރޭޕް ކުރިއޭ. މޮޅުކަމަކީ ނަދާގެ ބުނުމަށް ޑޮކްޓަރުވެސް އެހެން ބުނީމަ. އެކަމަކު އަހަރެން ހެއްދެވި ފަރާތަށް އެގޭނެ އަހަރެން ސަމާއަށް އެފަދަ އަނިޔާއެއް ނުދޭކަން.“ ނިހާދު ސަމާގެ މޭގަ ބޯއަޅައިގެން އޮށޯތެވެ.
ސަމާ ނިހާދުގެ ބޮލުގައި ފިރުމާލުން ނިހާދު މަޑުމަޑުން ލޯމަރާލިއެވެ.
”ތޭންކްސް ނިހާދު. އަހަރެން ސަލާމަތްކޮށްދިނީތީ!“
”ޝް ޝް….ތީ އަދިވެސް އަހަރެންގެ އަންހެނުން. އަހަރެންގެ އަންހެނުން ދެކެ އަހަރެން ވަރަށް ލޯބިވޭ.“ ނިހާދު މިހެން ބުނުމުން ސަމާ ނިހާދުގެ ގައިގައި ބާރަށް ބައްދައިގަތެވެ.
ދުވަސްތައް ހަފްތާއަށް ބަދަލުވެގެން ދިޔައީ ހީވެސް ނުކުރާހާ އަވަހަށެވެ. ސަމާ އާއި ނިހާދުގެ ގުޅުން ދުވަހެއް ދުވަހެއް އިތުރުވަމުން ދިޔައެވެ. ނިހާދުގެ ބުރަ މަސައްކަތުން ސަމާގެ ހާލު މިހާރު ރަނގަޅެވެ. ބޭރަށް ނުކުމެ އުޅެން ޑޮކްޓަރު ހުއްދަވެސް ދީފިއެވެ.
ނިހާދު އާއި ސަމާ ތިބީ މެންދުރުގެ ކެއުމަށް އިންސާފުކުރަން ރެސްޓޯރެންޓުގައެވެ. ބަޔަކު ހެމުން އައިސް އެތެރެޔަށް ވަދެގެން ދިޔަތަން ސަމާ އިނީ ކަޅި ޖަހާނުލާ ބަލަހައްޓައިގެންނެވެ. ވަދެގެން ދިޔައީ ނަދާ އާއި ޔާންއެވެ. ޔާންގެ ހިނިތުންވުން ސަމާއަށް ހިތަށް އެތަކެއް ޒަޚަމްތަކެއް ދެމުން ދިޔައެވެ.
”ސަމާ! ކިހިނެއްވީ!“ ނިހާދު އެބުރި ބަލާލިއެވެ. ނަދާ އާއި ޔާން ފެނުމުން ނިހާދުގެ ގާތަށް ރުޅިއައެވެ.
”ހާދަ ލަދުކުޑަ ބަޔެކޭ ދޯ.“ ނިހާދު ބުނެލިއެވެ.
”އަހަރެން ބޭނުން އެމީހުންނަށް ހައްޤު އަދަބު ދޭން.“ ކަރުނަ ފޮހެލަމުން ސަމާ ބުނެލިއެވެ.
”ޔަޤީން!“ ނިހާދު އަހާލިއެވެ.
ސަމާ ބޯޖަހާލިއެވެ. އަދި އަޅާވެސްނުލާ ކަމުން ގެންދިޔައެވެ.
ނަދާ އާއި ނިހާދު ކައިވެނީގެ ޝޮޕިން ކުރުމަށްފަހު ގެޔަށް އައިސް ސޯފާގައި ޖައްސާލިތަނާ ގޭގެ ދޮރުގައި މީހަކު ޓަކި ޖަހާލިއެވެ.
”ދޭބަލަ ކާކުތޯ ބަލާލަން.“ ނަދާ މިހެން ބުނުމުން ޔާން ތެދުވެގެން ގޮސް ދޮރު ހުޅުވާލިއެވެ.
ހަމައެއާއެކު ޔާންގެ ހިނިތުންވުން ކުއްލިއަކަށް ގެއްލުނެވެ.
”ޔާން. ކާކުތަ؟“ ނަދާ ގޮވާލިއެވެ.
”ސ….ސަމާ! ޔާން މިހެން ބުނުމުން ނަދާ ދުވެފަ ތެދުވެގެން ދޮރު ކައިރިޔަށް އައެވެ.
ސަމާ ފެނުމުން ޔާން އުފާވެސް ވިއެވެ. ސަމާގެ ގައިގައި ބައްދައިގަންނަން ޔާން އުޅުމުން އެދެމެދަށް ވަނީ ނިހާދެވެ.
”ނިހާދު!“ ނަދާ ކުޅުދިރުވާލަމުން ކިޔާލިއެވެ.
”ހައި ނަދާ ކޮއްކޯ! ކިހިނެއްތަ؟“ ނިހާދު މިހެން ބުނަމުން އެތެރެޔަށް ވަދެގެން ދިޔައީ ސަމާވެސް ގޮވައިގެންނެވެ. ސަމާ އާއި ނިހާދު ގޮސް ސޯފާގައި އިށީނެވެ. ސަމާ ނަދާއާ ދިމާލަށް ކަޅިއަޅާލިއެވެ.
”ދޮންތި!“
”ދޮންތި އޭ! ސަމާ ކިޔާފަ އަހަންނަށް ގޮވާ. ތީ ހާދަ ވިހަގަދަ ހަރުފައެކޭދޯ! އަހަރެންގެ ދިރިއުޅުން ބަރުބާދުކޮށްލާފަ ޔާން އާ އަހަންނާ ވެސް ދުރުކޮށްލީ. ތީ އަމިއްލަ އެދުމުން ފުރިގެންވާ އަންހެނެއް. އަހަންނަށް ދޮންތި ނުކިޔާތި. މިބެލްކަނިން އަހަރެން ވައްޓާލިއިރު މީ ދޮންތި ކަމެއް ނޭގޭތަ؟ އަހަރެން ރޭޕްކުރީއޭ ކިޔާ ޑޮކްޓަރާއި ގުޅިގެން ނިހާދު ފުލުހުންނާއި ހަވާލުކުރި އިރު މީ ނަދާގެ ޅިޔަންބެ ކަމެއް ހަދާންނެތީތަ؟. އޯކޭ. ނިހާދު ޖަލަށް ފޮނުވީ، އަހަރެން މަރާލަން އުޅުނީ އެކަމަކު އަހަންނަށް ނުވިސްނުނު އެއްޗެއް އެބައޮތް. ޔާން ނަދާގެ މަޅިގައި ޖެހުނީ ކީއްވެ. އަހަރެން ދެކެ ފުރާނަފަދައިން ލޯބިވި ޔާން އަހަރެން މަރާލަން އުޅުނީ.“ ސަމާ ޔާންއަށް ބަލަހައްޓައިގެން އިދެ ވާހަކަ ދެއްކިއެވެ.
”ސަމާ! އަހަންނަށް މާފްކުރޭ. އަހަރެން ސަމާ ދެކެ އަދިވެސް ލޯބިވޭ. އެކަމަކު ނިހާދު ސަމާ ރޭޕްކުރިކަން އަހަންނަށް އެގުނު ހިސާބުން މަޑުމަޑުން އަހަރެން ސަމާ މަތިން ފޫހިވާން ފެށި. ސަމާވެސް އަހަންނާ ދުރުވާން ފެށީމަ އެވަގުތު އަހަންނަށް ސަޕޯޓް ދިނީ ނަދާ. ދެން ނަދާ އެކަނިވި ދުވަހު ކިހިނެއް އަހަރެން ނަދާ ދޫކޮށްލާނީ. އަހަރެން ސަމާ މަރާލާކަށް ބޭނުމެއްނޫން. އެރޭ އަހަރެން ހުރީ ހަމަހޭގައެއް ނޫން. ފަހުން އަހަރެން ވަރަށް ދެރަވި. ސަމާ. އަހަންނަށް މާފްކުރޭ“ ޔާން އައިސް ސަމާގެ ކުރިމަތީގައި ދެކަކޫ ޖަހާއިދެ ރޮމުން ގެންދިޔައެވެ. އެހެން އިދެފައި ސަމާގެ އަތުގައި ޔާން ހިފަން އުޅުމުން ނިހާދު ޔާންގެ އަތް ފޮޅާލިއެވެ.
”ޚަބަރުދާރު! މަގޭ އަންހެނުންގެ ގައިގަ އަތްނުލާތި. އަތް ބުރިކޮށްލާނަން. އެރޭވެސް އަހަންނަށް ނާދެވުނު ނަމަ ތިދެމީހުންވެގެން އެފަކީރު މަރާލާނެ. އަދި ބުނަންތަ ރަނގަޅު ވާހަކައެއް. އަހަރެން ސަމާ ރޭޕް ނުކުރަން. އެއީ ތިހިރަ ނުލަފާ ނަދާ ފަތުރައިގެން އުޅޭ ދޮގު ވާހަކަތަކެއް. ކަލޭ ހާސިލް ކުރުމަށް ކަލޭގެ ބޮލަށް ޖެހި ޗިޕެއް. ފުރަތަމަ މަގޭ ބޮލަށް ޗިޕު ޖަހާފަ އަހަރެންގެ ހިތުގައި ސަމާއަށް ނަފްރަތު އުފެއްދީ ދެން ފުރުސަތުގެ ބޭނުންކޮށްގެން ޔާންގެ ހިތްވެސް އަތުލީ. ތީ ވަރަށް މޮޅު އެކްޓްރެސް އެއް.“ ނިހާދު ނަދާއަށް މަލާމާތްކޮށްލިއެވެ.
ޔާން އެބުރި ނަދާއަށް ބަލާލިއެވެ. ނަދާ ހޭންފެށިއެވެ.
”ވާއު! ވަޓްއަ ލަވް ސްޓޯރީ. ޔާންދެކެ ލޯބިވީ، ކައިވެނި ކުރީ ނިހާދު އާ. ކައިވެނީގެ ފަހުންވެސް ޔާންއާ އެކީ އުޅުނީ. ފިރިމީހާ ޖަލަށް ފޮނުވާފަވެސް ޔާން އާ އެކީ އުޅުނީ. މިހާރު އަނެއްކާ ފިރިމީހާ ދެކެ ލޯބިވީ. ވާއު. އާ! އަހަރެން ބޭނުންވީ ކަލޭ މަރާލަން. ވަރަށް ގިނަ ސަބަބާ ހުރެ އަހަރެން އަބަދުވެސް ކަލެޔަށް ނަފްރަތުކުރަން. މަންމަޔާ ބައްޕަވެސް އެންމެ ލޯބިވަނީ ކަލޭ ދެކެ. މާލެއިން ފްލެޓެއް ގަނެދިނީވެސް ކަލޭގެ ނަމުގަ. އަހަރެން މާލޭގަ ހުންނަން މަންމަމެން ބޭނުމެއް ނޫން. އަބަދުވެސް އިއްޒަތުގަ ކަލޭ އުޅެނީ. އަހަރެން ބޭނުންވީ ކަލޭގެ އުފާތައް ނިގުޅައިގަންނަން. އެކަމަކު އަނެއްކާވެސް ކަލެޔަށް މޮޅު ލިބުނީ.“ ނަދާ ސަމާއާ ވާހަކަދެއްކީ ހަޑީހުތުރު ބަހުންނެވެ.
ޔާން ހުރީ ބުނާނެ އެއްޗެއް ނޭގި ވާނުވާގައެވެ. ޔާން އައިސް ނަދާގެ އަތުގައި ހިފާ އޭނަޔާ ދިމާލަށް އަބުރާލިއެވެ.
”އަހަރެން ސަމާދެކެ އިންތިހާއަށް ލޯބިވާކަން އެގިއެގި ހުރެ އަހަރެން ލައްވާ ސަމާ މަރާލަން އުޅުނީ.“ ޔާން އަތް އިސްކުރަން އުޅެފައި ހުއްޓާލިއެވެ.
”ޔާން. އަހަރެން ޔާންދެކެ ވަރަށް ލޯބިވޭ. ޔާން ސަމާ ދެކެ ވީ ލޯބި ފެނިފައި އަހަރެންވެސް ބޭނުންވީ އެލޯބި ހޯދަން. އަހަންނަށް މާފްކުރޭ!“
”މާފްކުރާށޭ! ކިހިނެއް އަހަރެން މާފްކުރާނީ. ނަދާ އަހަރެން މަގުފުރައްދާލީ ނިހާދު ސަމާ ރޭޕްކުރީއޭ ކިޔާފަ. އެވެސް ދޮގު. ދެން ނުބުނާތި ނަދާގެ ބަޑުގައި އަހަރެންގެ ދަރިއެއް އެބައޮތޭ ކިޔާފަ އަހަންނާ ކައިވެނިކުރަން ހެދީވެސް ދޮގޭ.“ ޔާން ގޮސް ބެލްކަނީގައި ހުރެ ރޯން ފެށިއެވެ. ފަހަތުން ނަދާގޮސް ޔާންގެ ގައިގައި ބައްދައިގަތެވެ. މިމަންޒަރު ދެކެން ތިބި ނިހާދު އާއި ސަމާގެ އިޝާރާތަށް ފުލުހުން އެގެޔަށް ވަނެވެ.
”ޔާން. އަހަންނަށް މާފްކުރޭ. އަހަރެން ބަޑުބޮޑު ނޫން!“ ފުލުހުން އައިސް ނަދާގެ އަތުގައި ބިޑި އަޅުވާލި ވަގުތު ނަދާ މިހެން ބުނުމުން ޔާން ވީ ދެރައިން ދެކަކޫމައްޗަށް ވެއްޓުނެވެ. ފުލުހުން ޔާންގެ އަތުގައި ބިޑި އަޅުވައި ނަދާ އާއި ޔާން ގެންދިޔައީއެވެ. ނަދާ ނުކުންނަމުން ނިހާދަށް ކަޅިއަޅާލިއެވެ. ނިހާދު ނަދާއަށް ބާއި ކިޔާލީ ހިނިތުންވުމަކާއެކީގައެވެ.
(ނިމުނީ)
