ކުރީގެ ރައީސް ޢަބްދުالله ޔާމީން ގެއަށް ބަދަލުކުރުމަށް އެހީތެރިވުމަށް، އީޔޫ ވަފްދުގެ އަރިހުން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އެދިވަޑައިގެންފިއެވެ.
އީޔޫއިން ހަމަޖެއްސި އޮބްސާވަރުންގެ ޓީމުގެ ކޯ-ޓީމުގެ ޗީފް އޮބްޒަރވަރގެ ގޮތުގައި ހަމަޖައްސަވާފައިވާ ޔޫރަޕިއަން ޕާލަމެންޓުގެ މެންބަރު، ނާޗޯ ސަންޗެޒް އަމޯރ، އަދި ޓީމު ރައްޔިތުންގެ މަޖިލީހަށް ވަޑައިގަތީ ރައީސް މަޖިލީހުގެ ރައީސް އަށް ކުރެއްވި އިހުތިރާމުގެ ޒިޔާރަތެއްގައެވެ. މި ޒިޔާރަތުގައި ރައީސް ނަޝީދު ވަނީ ޔާމީންގެ މައްސަލައިގައި މަޝްވަރާކޮށްފައެވެ.
ވ.އާރަށު މައްސަލައިގައި ރިޝްވަތާއި މަނީ ލޯންޑްރިންގެ ދައުވާ ސާބިތުވެ މިހާރު 11 އަހަރުގެ ޖަލު ހުކުމެއް ތަންފީޒުކުރަމުންދާ ކުރީގެ ރައީސް ޔާމީން ގެޔަށް ބަދަލުކޮށްދެއްވުމަށް އެހީތެރިކަން ފޯރުކޮށްދެއްވުމަށް ރައީސް ނަޝީދު ވަނީ މިވަފުދުގެ އަރިހުން އެދިފައެވެ. ރައީސް ނަޝީދު ވިދާޅުވާ ގޮތުގައި މިނިވަން އިންސާފުވެރި އިންތިހާބެއް ބޭއްވޭނީ އެމަނިކުފާނު ގެޔަށް ބަދަލުކޮށްގެންނެވެ.
ރައީސް ޔާމީން ޖަލުގައި ހުންނެވީ ޕީޕީއެމްގެ ލީޑަރޝިޕްގެ ބޭފުޅުންނަށް އެކަށީގެންވާ މަސައްކަތްތައް ނުކުރެވޭތީ ކަމަށް ނަޝީދު ވަނީ ތުހުމަތުކޮށްފައެވެ.
މީގެއިތުރުން ޕީޕީއެމުން ޑިމޮކްރެޓްސް އާއި ގުޅެން އެއްބަސްވާތާ ހަފްތާއެއް ތެރޭ ޔާމީން މިނިވަން ކޮށްދޭނެ ކަމަށް ވިދާޅުވެފައެވެ. އަދި އެކަމަށްޓަކައި ޚުދު އެމަނިކުފާނުވެސް މަގުމަތީ ހަރަކާތަށް ނިކުތުމަށް ހުންނެވި ކަމަށް ވިދާޅުވިއެވެ.
