ތިންގަޑި ބައި – 08

”މިހާރު އެއުޅެނީ މަލްދާ ލައްވާ ބުނުވަން ފިރިއެއް ގޮތަށް ބަލައިގަންނަމޯ. އޭރުން އޭނަ ބޭނުންވާ ކަންތައް ވާނެތާ. އަހަންނަށް ފެންނަނީ މިކަން އަވަސްކޮށްލަން. އެބަ ދަން އިޝާ ނަމާދަށްފަހު.“ ކަރީމް މިހެންބުނެ ފޯނު ބާއްވާފައި އެނބުރި ބަލާލިއިރު އާރިފާ ހުރީ އަޑުއަހައިގެންނެވެ.

”ކޮންކަމެއް އަވަސްކޮށްލަން.“އާރިފާ އަހާލިއެވެ.

”އާރިފާ! އާދެބަ. މިތާ އިށީނދެބަ، އަހަރެން މިސައްކާ ވާހަކަ ވަރަށް ރަނގަޅަށް އަޑުއަހާތި. އަހަންނަށް ހީވަނީ މިވާހަކަ އާރިފާ ކައިރީ ބުނާ ވަގުތު ޖެހިއްޖެހެން.“ ކަރީމް ބުނެލިއެވެ.

”ދެން ތިވަރަށް ހިތް ނުތަޅުވާ ބުނެލަބަ. އެއީ ކޮން އާނިފެއް. އޭނަ މިގޭގަ ކީއްކުރަނީ.“ އާރިފާގެ ހިތުގައި ވަރަށް ގިނަ ސުވާލު އުފެދުނެވެ.

ކަރީމް އާރިފާއަށް ހުރިހާ އެއްޗެއް ކިޔައިދިނެވެ. އަދި މަލްދާ ސަލާމަތް ކުރުމަށްޓަކައި މިފަހަރު ވަރަށް މަސައްކަތް ކުރަންޖެހޭ ކަމަށް ބުންޏެވެ. އާރިފާއަށް އިނދެވުނީ ރޮވިފައެވެ. ބުނާނެ އެއްޗެއް ނޭގުނެވެ.

”އާރިފާ ކައިރިން އަހަރެން އެދެނީ ވީހާވެސް ގިނައިން ގޭގައި ޤުރުއާން ޖަހާފަ ބަހައްޓަން އަދި މަލްދާ ގެއިން ބޭރަށް ދިޔަ ނުދީ މި ދެދުވަހު ހިފަހައްޓާލަން. އާނިފްއަށް މިހާރު ޝައްކުވެފަ އޮތީ އަހަރެމެންނަށް އޭނަގެ ހަޤީގަތް އެގޭކަން. އެހެންވީމަ އޭނަ ކޮންމެ ފަދަ ކަމެއްވެސް ކޮށްފާނެ. ދުވަސްކޮޅަކު އާރިފާ ނިދަންވީ ނުން އެމަންޖެ ކައިރީގައި. ނިދާއިރު ކޮޓަރީގައި ޤުރުއާން ޖަހާފައި ބަހައްޓާތި.“ ކަރީމް މިހެން ބުނުމުން އާރިފާ ކަރުނަ ފޮހެލަމުން ބޯ ޖަހާލިއެވެ.

އާރިފާ ނުކުތްއިރު މަލްދާ އިނީ ޓީވީ ބަލާށެވެ. އާރިފާ އައިސް އޭނަ ކައިރީގައި އިށީނެވެ. އަދި މަލްދާގެ ބޮލުގައި ފިރުމާލިއެވެ.

”ދަރިފުޅާ! މިރެއިން ފެށިގެން މަންމަ ދަރިފުޅު ކައިރީ ނިދާނަން އެންމެ ރަނގަޅުތަ؟“ އާރިފާ އަހާލިއެވެ.

މަންމަ މިހެން ބުނުމުން މަލްދާ އުފާވިއެވެ. އެއީ ކޮންމެ ރެޔަކު އޭނައަށް ވާގޮތެއް އޭނައަށްވެސް ނޭގޭތީއެވެ. ބިރުވެރި ކަންތައްގަނޑެއް ދިމާވާ ވާހަކަ ބުނަންވެސް އޭނަ ހުންނަނީ ނުކެރިފައެވެ. އެހެންކަމުން މަލްދާ ހީލާފައި އާއެކޭ ބުނެލިއެވެ.

ކުއްލިއަކަށް އާރިފާއަށް ފެނުނީ އާނިފް އައިސް ގެޔަށް ވަންތަނެވެ. އާރިފާ ބިރުގަތެވެ. އަވަހަށް ތެދުވެގެން ގޮސް ބަދިގޭގައި ކެއްކުމުގައި އުޅެގަތެވެ.

”މަލްދާ! ހިނގާބަ ބޭރަށް ގޮސްލާފައި އަންނަން. ކީއްވެ މިހާރު އަބަދު ގޭގަ ތިއިންނަނީ. ބުންޏަސް ކޮފީއަކަށްވެސް ދަނީކީ ނޫން. ހިނގާބަ ތުނޑިއަށް ގޮސްލާފައި އަންނަން.“ އާނިފް މިހެން ބުނެ މަލްދާގެ އަތުގައި ހިފާލިއެވެ.

”ހުޝާމް، އަހަރެން މިއުޅެނީ ބަލިވެ، ބޭރަށް ދާހިތް ނުވާތީ ގެއިން ނުނުކުންނަނީ. ދެން އެހެން ފަހަރަކުން ދޯ!“ މަލްދާ ބުނެލިއެވެ.

”މަލްދާ މިހާރު ވަރަށް ބަދަލުވެއްޖެހެން އަހަންނަށް ހީވޭ.“ އާނިފް ބުނެލިއެވެ.

”ނޫން ހުޝާމް. އެހެން ހިތަށްވެސް ނާރުވާތި. އަހަރެން އެންމެ ފަހު ނޭވަޔާ ހަމަޔަށްވެސް ހުޝާމް ދެކެ ލޯބިވާނަން. އަހަރެމެން ދޭތެރެޔަށް އެއްވެސް މިހަކަށް ވަންނަން އަހަރެން ފުރުސަތު ނުދޭނަން. ނޭގިވެސް އަހަންނާއި ހުޝާމާ ދޭތެރެޔަށް ވަންނަ މީހަކު ޖެހޭނީ މިދުނިޔެ ދޫކޮށް ދާން. އަޑުއިވިއްޖެތަ؟“ މަލްދާ މިހެން ބުނުމުން އާނިފް ވަރަށް އުފާވިއެވެ.

މަލްދާގެ ލޯބި އޭނައަށް ހާސިލް ކުރެވިއްޖެ ކަމުގެ އިހުސާސްވިއެވެ.

”އަހާ، މަންމާ! ކީއްކޮށްލަނީ. ވަރަށް ބަޑުހައި ނެތްތަ ކާ އެއްޗެއް.“ އާނިފް އަހާލިއެވެ.

އާރިފާ އަޑުއިވޭ ކަމަށްވެސް ނަހަދާ ކައްކަން ހުރީއެވެ. އާނިފް ކޮޓަރިއަށް ވަންނަން ދިޔަތަނާ ކަރީމް ނުކުތްތަން ފެނުނެވެ. އޭނާ އައީ ފޯނުން ބަޤަރާ ސޫރަތް އަޑުއަހަމުންނެވެ. އަޑުހަރުކޮށް ޖަހާފައި ހުރުމުން މަލްދާވެސް އެކަމާ އުދަގޫވެގެން ބައްޕަ ކައިރީ އޭތި ނިއްވާލަން ބުންޏެވެ.

”ދަރިފުޅު އަޑުހަރުކޮށް ޓީވީ ބަލާއިރު ބައްޕަ ނުބުނަމެއްނު ދޯ އަޑު މަޑުކޮށްލަން ނޫނީ ޓީވީ ނިއްވާލަން. ބައްޕަ މި ސޫރަތް އަޑުއަހާލާފަ ނިއްވާލާނަން އިނގޭ ދަރިފުޅާ.“ ކަރީމް ބުނެލިއެވެ.

ކަރީމްގެ ވާހަކައިން އާނިފް ރުޅިގަދަވެފައި ގެއިން ނުކުމެގެން ދިޔައީއެވެ.

ކަރީމް އާއި އާރިފާ ހީލިއެވެ. މަލްދާއަށް އެމަންޒަރު ފެނުނެވެ. އެހެންނަމަވެސް އަޅާނުލިއެވެ.

ޖެހިގެން އައި ދުވަހުގެ ހެދުނު މަލްދާ ހުރީ ވަރަށް ހިތްހަމަޖެހިފައެވެ. އެތައް ދުވަސްތަކެއްފަހު އަރާމު ނިންޖަކުން ނިދުނީތީއެވެ. އިރުއަރަންދެން އާރިފާ ހުރީ މަލްދާގެ ކޮޓަރީގައި ޤުރުއާން ޖަހާފައެވެ.

”ދަރިފުޅާ. ރޭގަ ރަނގަޅަށް ނިދުނުތަ. އަނެއްކާ މަންމަ އުދަގޫ ނުކުރޭތަ؟“ ކަރީމް އަހާލިއެވެ. ބޭނުމަނީ މަލްދާއަށް އާނިފްގެ އުދަގޫފޯރިތޯ ބެލުމެވެ.

”ނޫން ބައްޕާ. ރޭގަ ހީވީ ދުވަހަކުވެސް ނުނިދޭހާ އަރާމުކޮށް ނިދުނުހެން.“ މަލްދާ މިހެން ބުނުމުން ކަރީމް ހިތްހަމަޖެހުނެވެ.

”އަހަންނަށް ހީވަނީ މިހާރު މިގޭ މީހުން އަހަރެން މަތިން ހަދާންވެސް ނެތުނީހެން.“ ގެޔަށް ވަދެގެން އައި އާނިފް ބުނެލިއެވެ.

”ނޫނޭ. އާނިފް…ހުޝާމެއްނު ފިލައިގެން ތިއުޅެނީ.“ މަލްދާ އާނިފްގެ ނަން ކިޔުމުން ކަރީމް ހައިރާންކަމާއެކު އޭނައަށް ބަލާލިއެވެ.

އާނިފްއަކަށް އެތަންކޮޅު އަޑު ނީވުނީ ކަންނޭގެއެވެ. އައިސް މަލްދާގެ ކައިރީގައި ހުރި ގޮނޑީގައި އިށީނެވެ.

”ބައްޕާ ކޮބާ މިހާރު އަހަރެމެންގެ ކައިވެނީގެ ކަންތައް ކިހިނެއް ވަނީ.“ އާނިފް އަހާލިއެވެ.

”ހާދަ ކެތްމަދުވެފައި.“ މަލްދާ ބުނެލިއެވެ.

”އަހަރެން މަޑުމިކޮށްލަނީ ބައްޕަގެ ރަހުމަތްތެރި އާދަނު އަންނަންދެން. އަހަރެން އޭނައަށްވެފައި އޮތް ވައުދެއް އެ މަންޖެގެ ކައިވެންޏަށް އޭނައަށް ދައުވަތް ދޭން. އެހެންވެ އޭނައަށް މިކޮޅަށް އާދެވޭގޮތް ވުމުން ކައިވެނި ހަމަޖައްސާނީ. ދަރިފުޅު ބުނީމެއްނު މިރަށަށް އައީ އޮފީސް ދަތުރަކު އޭ. އެކަންތައް ނުނިމޭތަ. ކޮން އޮފީހަކު އުޅެނީ.“ ކަރީމްގެ ސުވާލުތަކުން އާނިފް ބޯގޮވިއެވެ.

ދޭނެ ޖަވާބެއް ނޭގުނެވެ.

”މަލްދާ. އަހަރެން މިއައީ މިރޭ އަޅުވާ ފިލްމުގެ ދެ ޓިކެޓް ނަގައިގެން. މިރޭ ވާނެ ދާން ދޯ.“ އާނިފް ބުނެލިއެވެ.

”އަޅޭ. އަހަރެން މިރޭ ނަތާއެކީގައި ސެލޫނަށް ދާން އެޕޮއިންޓްމެންޓުވެސް ހައްދާފަ އިނީ. ދެން އެހެން ރެޔަކުން ދަމާދޯ.“ މަލްދާ މިހެން ބުނުމުން އާނިފް އެއްޗެކޭ ނުބުނެ ގޮސް ކޮޓަރިއަށް ވަދެ ތަޅުލިއެވެ.

”ދަރިފުޅާ. ކަމެއް ނެތިއްޔާ ހިނގާބަ ބައްޕަ އާއެކީ ފިހާރައަކަށް ގޮސްލާފަ އަންނަން.“ ކަރީމްގެ އެދުމަށް މަލްދާ އާބަސްބުނެލި އަވަސްކަމުން އާރިފާވެސް ހުރީ ހައިރާންވެފައެވެ.

ކާރަށް އެރުމުގެ ކުރިން ކަރީމް ކާރުގެ ވަށައިގެން ދެތިން ބުރު އަޅަމުން ކިޔަވާލިއެވެ.

ކާރަށް އެރިތަނާހެން މަލްދާއަށް ފޯނެއް އައެވެ.

”ކީކޭ ހުޝާމް.“

ކާރީމް ހުރީ ހާސްވެފައެވެ. ބައްޕައާ އެކީ ދާ ތަން އާނިފް ކައިރީ ބުނެފާނެތީއެވެ.

”ހުރިހާ ކަމެއް ޕްލޭނާ އެއްގޮތަށް ދަނީ. އޭނައަށް ވަސްވެސް ނުދުވާނެ. އަހަރެންނާއި ހުޝާމް ވަކިކޮށްލެވޭނޭ ހިތާ ވަރަށް އުފަލުން އޭނަ އެ ހުންނަނީ. އޭނައަށް ނޭގެނީ ކަންނޭގެ ޖިންނިއަކަށް ބާރު ލިބިގެންވަންޏާ އިންސާނުންނަށް އޭގެ ދެގުނަ ބުއްދި ދެއްވާފައިވާކަން.“ މަލްދާ މިހެންބުނެ ކަރީމްގެ މޫނަށް ބަލާލިއެވެ.

(ނުނިމޭ)