ސަރުކާރާއި ދެކޮޅު ޕޯސްޓަތަކަށް ލައިކު ދިނުމާއި އެފަދަ ޕޯސްޓަތަކަށް ކޮމެންޓް ކުރުން ދިވެހި ފުލުހުނަށް މަނާކޮށްފިއެވެ.
ފުލުހުންގެ އުސޫލަކުން ސަރުކާރާއިދެކޮޅަށް ހިޔާލުފާޅު ކުރުމުގެ މިނިވަންކަން މަނާކޮށްފައިމިވަނީ، ސަރުކާރާއި ދެކޮޅަށް ޙިޔާލެއްފާލުކުރުމުން އެ މައްސަލަ ބަލަމުން އަންނަ ދަނޑިވަޅެއްގައެވެ.
މިމަހުގެ 15 ވަނަ ދުވަހު ފުލުހުންނަށް ފޮނުވާފައިވާ ”ދިވެހި ފުލުހުންގެ ޚިދުމަތުގެ މުވައްޒަފުން މީސްމީޑިއާ ބޭނުންކުރުމުގައި ގެންގުޅެންވާނެ ހަމަތަށް ބަޔާން ކުރާ އުސޫލް“ ގައި ބުނެފައިވަނީ ސިޔާސީ ޕާޓީތަކުންގެ ޕޯސްޓް ތަކަށް ލައިކް ދިނުމާއި، ވަކިމާނައެއް ދޭހަކޮށްދޭ އިމޯޖީ ބޭނުންކުރުން، ޝެއަރ ކުރުން، ކޮމެންޓްކުރުން އަދި ވަކި ޝިޔާރެއް ބޭނުންކުރުމަކީ މަނާ ކަމެއްކަމަށެވެ. މީގެ އިތުރުން ވަކި ކެންޑިޑޭޓަކަށް ތާއިދު ކުރުމާއި ތާއީދު ނުކުރާކަން ހާމަކުރުމަކީވެސް މަނާކަމެއްކަމަށެވެ.
ފެންވަރު އޮންލައިން އާ ވަހަކަ ދެއްކި ފުލުހުން ބުނީ މީގެ ކުރިންވެސް މީޑިއާ ބޭނުންކުރުމަށް ވަކި އުސޫލުތަކާއި ހަމަތަކެއް ހުރެއެވެ. އެހެންނަމަވެސް މިހާބޮޑަށް ހިޔާލުފާޅުކުރުމުގެ މިނިވަންކަން މީގެ ކުރިން ހަނިކޮށްފައިނުވާކަމަށެވެ.
”މީގެ ކުރިންވެސް ދޭތެރެއަކުން މިފަދަ ކަންކަންމަށް ސަމާލުކަން ދިނުމަށް ހަނދާންކޮށްދޭނެ. އެކަމަކު މިހާބޮޑަށް ކަންކަން މަނާކޮށް ފިއްތާފައެއްނުވޭ. ފުލުހުންނަށް އެމީހުންގެ އަމިއްލަ ހިޔާލު ފާޅުކުރުމުގެ މިނިވަންކަން ނުދޭކަމަށް ވަންޔާ ކީކުރަންބާ ވޯޓު ދޭންވީ.“
އަންނަ މަހުގެ 9 ވަނަ ދުވަހު ރިޔާސި އިންތިހާބު އޮންނަ އިރު، މި ފަހަރުގެ އިންތިހާބުގައި 8 ކެންޑިޑޭޓަކު ވާދަކުރެއެވެ. އަދި އެ ކެންޑިޑޭޓުންގެ ކެމްޕެއިން ފޯރިޔާއެކު ކުރިޔަށްދާއިރު، އިދިކޮޅު ހިޔާލުތައް ހުއްޓުވުމަށް ފުލުހުންނާއި ސިފައިން ބޭނުންކޮށްގެން ސަރުކާރުން ހިންގަމުންދާ އަމަލުތަކުގެ ސަބަބުން އާމުންގެ ފާޑުކިއުން އަންނަނީ މި ސަރުކާރަށް އަމާޒުވަމުންނެވެ.
