އަލަތު ކައިވެނީގެ ޙަފްލާއަށް އާޝިޤާއަށްވެސް ދަޢުވަތު ފޮނުވީމެވެ. އަހަރެން ހީކުރީ އާޝިޤާވެސް މިޙަފްލާގައި އޭނާގެ ހިތާ ދެކޮޅަށް ނަމަވެސް ބައިވެރިވާނެކަމުގައެވެ. އަހަރެންގެ މިމަޖުބޫރު ޙާލަތުގެ ޙަޤީޤަތް އާޝިޤާއަށްވެސް އެނގޭނޭ ކަމުގައެވެ. މާޙައުލާއި ޙަފްލާ ކިތަންމެހާވެސް އުފާވެރިއެވެ. އެހެނަސް އަހަރެންގެ ހިތް އިންތިޒާރުކުރެވެނީ އެވެ. އެންމެ ފަރާތަކަށެވެ. ދުށުމަށް އެދެވެނީވެސް ބަލަން ބޭނުންވަނީވެސް ހަމަ އެންމެ މީހެކެވެ. އިންތިޒާރުގެ ވަގުތުތައް ފާއިތުވަމުންދެއެވެ. އަހަރެންގެ ބައްޕަގެ މަޖުބޫރަށް ކައިވެނިކުރިކަމުގައިވިޔަސް އަހަރެންގެ ހިތްވަނީ ތާޒާކަމާއެކު އަހަރެންގެ ޙަޤީޤީ ލޯބިވެރިޔާގެ އިންތިޒާރުގައި ކެތްމަދުވެފައެވެ.
ބާރަށް ދުއްވާފައި އައި ސައިކަލެއް ބުރަކިޖައްސާ މަޑުކޮށްލުމަށްފަހު ސައިކަލުގެ ފަހަތުގައި އިން ޒުވާނާ އަހަރެންގެ އަތަށް ދިއްކޮށްލީ ސިޓީ އުރައެކެވެ. އަހަރެން އެސިޓީއުރައިގައި ހިފުމަށްފަހު ސުވާލެއްވެސް ނުކުރެވިގެން އުޅެނިކޮށް އެ ސައިކަލު ވަރަށް ބާރަށް އައިކޮޅަށް ގޮސްފިއެވެ. ޕާޓީއަށް ހާޟިރުވަމުންދާ މެހެމާނުންނާ ހިތާދެކޮޅަށް ހިނިތުންވަމުން ސަލާމްކުރަމުން ދާއިރު އަހަރެންގެ އަލަތު އަނބިމީހާ ނާޒުލީ ޕަރީއެއް ފަދައިން ހިނިތުންވެ ހުރެ އުފަލުން ފޮޅެނީއެވެ.
ގަޑިޖެހުމާއެކު ޕާޓީ ފެށިއްޖެއެވެ. އަދިވެސް އާޝިޤާއެއް ނާދެއެވެ. އިންތިޒާރުވެސް ނިމުމަކަށް އަންނަނީއެވެ. ލޯވަރުބަލިވެއްޖެއެވެ. އަދިވެސް ނާދެއެވެ. ދެފައި ތުރުތުރުއަޅަން ފަށައިފިއެވެ. އަހަރެންގެ އަލަތު އަނބިމީހާ ނާޒުލީ އަހަންނާ ތަފާތު ސުވާލުތައް ކުރިއެވެ. އެހެންނަމަވެސް އަހަރެން އެސުވާލުތަކަށް ދިނީ ބީރު ކަންފަތެކެވެ. އަވަސްވެފައިވާ ހިތަކާއިގެން އަހަރެން އެސިޓީއުރަ ކަނޑާލީމެވެ. އެއީ ސިޓީއެއް ނޫނެވެ. ކުޑަރުމާލެކެވެ. ރީތި ރުމާލެކެވެ. ރުމާލުގައިވާ މަންޒަރަށް ނަޒަރު ހިންގާލީމެވެ.
ވަރަށް މަސްހުނިގޮތަކަށް ޖައްވުގެ ތެރޭގައި އުދުހެމުންދާ ރަތާއި ނޫކުލައިގެ ދެކޮކާލެވެ. އަދި ހަމަ މާކޯޅިއަކަށް ތިރިކޮށް ފޮނިބޯ ލޭކޮލާލެއްވެސްމެއެވެ. ރަނގަޅަށް ވިސްނާލިއިރު މިއީ ހަމަ އެކުޑަރުމާލެވެ. އެމަންޒަރެވެ. ކުޑަރުމާލުން މޫނު ފޮހެލީމެވެ. ހިތާހިތުން ބުނެލެވުނެވެ. މިއީ ހަމަ އެކުޑަރުމާލެވެ. އެމޫނެވެ. އެހެނަސް ފޮހެލެވުނީ އެއަތަކުން ނޫނެވެ. ނޭވާ އެތެރެއަށް ދަމާލީމެވެ.
ދުވަނީ ހަމަ އެގަޑުބަޑެއްނެތް ޗާލީ ސެންޓުގެ މީރުވަހެވެ. ފުން ނޭވާއެއް ޖައްވުގެ ތެރެއަށް ދޫކޮށްލެވުނެވެ. ބޭއިޚްތިޔާރުގައި ލޮލުން ކަރުނަ އޮހިގަތެވެ. އަވަސް އަވަހަށް އަނެއްކާވެސް މޫނު ފޮހެލިއެވެ. އެތައް ރެއެއްގެ އެތައް ކަރުނަތަކެއް ހިއްކައިދީ މޫނު ސާފުކޮށްދީފައިވާ ޚިދުމަތްތެރި ލޯބިލޯބި ކުޑަރުމާލުންނެވެ. އެހެނަސް އެލޫޅާފަތި ދެއަތެއް މިރެއަކު ނެތެވެ. އޮތީ ހަމައެކަނި އެކުޑަރުމާލެވެ. ކުޑަރުމާލާއެކު އެއަތްވެސް ފޮނުވިނަމަ ކޮންފަދަ ހެއްޔެވެ؟ މޫނު ފޮހެލުމަށްފަހު އެކުޑަރުމާލަށް ދެވަނަ ފަހަރަށް ފުންކޮށް ނަޒަރު ހިންގާލެވުނެވެ. ރުމާލުގެ ތިރީގައި ރަތްކުލައިގެ ފަށުވި ރޮދިން ލިޔެފައި އޮތެވެ. ”އަހަރެންނަށްޓަކައި ދިރިހުންނާށެވެ
ޕާޓީއަށް ހާޟިރުވެލެއްވި މެހެމާނެއްގެ އެދިލެއްވުމަކަށް ޕާޓީގެ މާހައުލު ގުގުމާލީ ”އިޤުރާރު ކޮބާހޭ ވީ އެކި ރޭ އެކި ދަންވަރުގައި އެކި ހިޔަނުގައި އިޤުރާރު ކޮބާހޭ ވީ އެކިރޭ“ މިލަވައެވެ. އަހަންނަށް ދެއަތުން ބޮލުގައި ހިފަހައްޓާ ލެވުނެވެ. އަރިއަޅާލަން އުޅޭހެން ހީވުމުން ތަންކޮޅެއް ދުރުގައި ހުރި ގޮނޑިއެއްގައި އިށީނީމެވެ. ކުރި އަސަރެއްގެ ބޮޑުކަމުން އަނބުރައިނުގަތީ ކިރިޔާއެވެ. ޕާޓީގައި މަޖާނަގަނީއެވެ. އަހަރެންގެ ސިކުނޑީގައި ހައިޖާނެއް އުފައްދައިފިއެވެ. ތެދެކެވެ. އަހަރެން އެކިރޭރޭގެ އެކި ދަންވަރުގައި، އެކިހަނދުވަރުގައި، އެކި ހިޔަނީގައި ވީ އިޤުރާރުތަކާއި ވަޢުދުތައް ކޮބައިހެއްޔެވެ؟
ބަދަލެއް ނުވާނެކަމަށް ބުނެ ކުރި އަޙުދުތައް ކޮބާހެއްޔެވެ؟ އާޝިޤާގެ ގާތުގައި އަހަރެން ކަލާއާ ވަކިވާނެ ދުވަހަކީ ހަޔާތުގެ އެންމެ ފަހު ދުވަސްކަމުގައި ހަދާނަމޭ ބުނެ ކުރި ހުވާތައް ކޮބާހެއްޔެވެ؟ އަހަރެން ހެދި މިބޮޑު ގޯހަށްޓަކައި އުޑުގައިވާ ތަރިތައްވެސް ވަނީ ލަދުގެންފައި ކަހަލައެވެ. ޖައްވުގައި އުދުހޭ ދޫނިތައްވެސް އަހަރެންނާ މަލާމާތްކުރަމުން ނުރުހުންތެރިކަމާއެކު ދުރަށް ފިޔަމަޅާލާފައި ދާނެއެވެ. މުޅި ކާއިނާތުގައި ވާހައި ތަކެއްޗެއް އަހަރެންނަށް ލައުނަތް ދެނީއެވެ.
މީ ކޮންފަދަ އަޖާބެއް ހެއްޔެވެ؟ މިއީ ހުވަފެނެއް ހެއްޔެވެ؟ ނުވަތަ މަރުގެ އަލާމާތެއް ހެއްޔެވެ؟ އަހަރެން ލޯބިވަނީ އާޝިޤާ ދެކެއެވެ. އަދި ވަޢުދުތަކާއި ހުވާތައް ކުރީވެސް އާޝިޤާއާ ވަކިނުވުމަށެވެ. އެހަނދާން ނެތުނީކީ ވެސް ނޫނެވެ. އަދި މިއީ އޮޅުމެއްވެސް ނޫނެވެ. މިހުރީ ހަމަ ހޭގައެވެ. އެކަމަކު ކައިވެނި މިކުރެވުނީ އަހަރެންގެ ހިތުގައި އެއްވެސް މަޤާމެއް ދެވިފައިނުވާ ލޯބީގެ ރޮނގުން ނުދަންނަ ”ބީރައްޓެއްސަކާއެވެ“. މިހެން ވާން ޖެހުނު ސަބަބަކީ ކޮބާހެއްޔެވެ؟ ޒަމާން ބަދަލުވީ ހެއްޔެވެ؟ ދުނިޔެ ނުއަތު ބުރެއް އެޅީހެއްޔެވެ؟ ހުސް ސުވާލެވެ.
(ނުނިމޭ)
