އެހެނަސް ވަޤުތު ފާއިތުވެއްޖެއެވެ. މިއީ ހުސް ބޭކާރު ޚިޔާލެވެ. އަހަންނަކީ ކުށްވެރިއެއް ހެއްޔެވެ؟ ނުވަތަ ބޭވަފާތެރިއެއް ހެއްޔެވެ؟ އަމިއްލައަށް މަރުވާންވީ ހެއްޔެވެ؟ ވަފާތެރި ލޯބީގައި ކޮޅުފައިންޖަހާ ޚިޔާނާތްތެރިން ދުނިޔޭގައި ތިބުމުގެ ބޭނުމެއް އޮންނާނޭ ހެއްޔެވެ؟ އެހެނަސް އާޝިޤާގެ އެންމެ ފަހުގެ އެދުމަކީވެސް އޭނާއަށްޓަކައި ދިރިހުރުމެވެ. އަހަރެން ދިރިހުރުމުން މިހާރު އޭނާއަށް އޮތީ ކޮން އުފަލެއް ހެއްޔެވެ؟ އެހެންނޫނަސް އަމިއްލައަށް މަރުވުމަކީ ކުފުރު މަރެކެވެ. ބޮޑު ފާފައެކެވެ. ﷲއަށް ބިރުވެތިވާން ޖެހޭނެއެވެ.
ވިސްނާނުލާ މިފަދަ ފާފަތަކަށް އަރައިގަތުމަކީ ކޮށްގެން ވާނޭ ކަމެއްނޫނެވެ. ނަމަވެސް މިދިރިއުޅުން ވޭތުކުރާނީ ކިހިނެއް ހެއްޔެވެ؟ ހިތްނޭދޭ ކައިވެންޏެއްގައި ދެމިހުރެވޭނެ ހެއްޔެވެ؟ ދެމިހުރުމުގައި އޮތީ ކޮން އުފަލެއް ހެއްޔެވެ؟ އުފަލެއް އަރާމެއް ނެތް ދުނިޔެއެއްގައި ދިރިހުރުމާއި މަރުވުމުގެ…..؟ ޚިޔާލުތަކުގެ ސިލްސިލާ ފުޅާވަމުން ދިޔަދިޔަހެން މާޒީގެ ހިތްދަތި ހަނދާންތައް ސިކުނޑީގައި ރަސްކަންކުރަން ފަށައިފިއެވެ. އެންމެ ފުރަތަމަ ކިޔެވުމަށްޓަކައި މާލެ އާދެވުނު ގޮތެވެ.
ބައްޕަގެ ރަޙްމަތްތެރި ޙުސައިންދީދީގެ ދީލަތިކަމާއި ހެޔޮފުޅުކަމުން އޭނާގެ އެހީތެރިކަމުގެ ދަށުގައި މާލޭގައި ބަހައްޓައިގެން ކިޔަވައިދިން ހަނދާންތަކާއި މަންމަގެ ބަލިޙާލަށް ފަރުވާއެއް ކުރެވޭނޭ ފަދައެއް ނެތިގެން މަންމަ މިދުނިޔެއާއި ވަކިވި ހިތި ހަނދާންތަކެވެ. މަންމަގެ ބައްޔަށް ފަރުވާކުރުމަށްޓަކައި ގެ ވިއްކާލުމަށްފަހު އެވަރުންވެސް ނުވެގެން ބައްޕަ ދަރާފައިވާ ބޮޑެތި ދަރަނިތަކެވެ. ބައްޕަ މިއަދު އުޅެމުންދާ އެކަނިވެރި ދަތި ޙާލެވެ. ޙުސައިންދީދީގެ ހެޔޮފުޅުކަމުން އޭނާގެ ގޭގައި ބަހައްޓަވައިގެން ކިޔަވައިދެއްވުމަށްފަހު އޭނާ އެކުރެއްވި ބޮޑު ޚަރަދުގެ އަގަށް ހިއްޕަވަން ބޭނުންފުޅުވީ އޭނާގެ މިދަރިފުޅާ ކައިވެނިކުރުމެވެ.
އެއަށްފަހު އޭނާގެ މުއްސަނދި ވިޔަފާރީގައި ބައިވެރިވުމަށެވެ. ޙުސައންދީދީގެ ހަމައެކަނި ދަރިއަކީ ނާޒްލީ ކަމަށްވާތީ އެދަރިފުޅުގެ ކޮންމެ އެދުމަކީވެސް ޙުސައިންދީދީގެ ފުރާނައިން ޤުރުބާންވެވަޑައިގަންނަވާ ކަމެކެވެ. ޙުސައިންދީދީއަކީ މިނިވަން ވިޔަފާރިވެރިއެކެވެ. ލޯނުގެ ބިރުވެރިކަމެއް ނެތް ޞައްޙަ ވިޔަފާރިއެއް ކުރައްވާ ބޭކަލެކެވެ. ބާޒާރުމަތީގައި ދެފިހާރައަކާއި ޗާންދަނީމަގުގައި ފޮތިފިހާރައެއް ހުރެއެވެ.
މީގެއިތުރަށް ކުޑަރެސްޓޯރެންޓެއްވެސް ހިންގަވައެވެ. ބައްޕަގެ ފަޤީރުކަމުން ކޮއްކޮ އަޒީމާއާއި ނަޒީމުއަށްވެސް ތަޢުލީމު ޚާޞިލްކުރުމުގެ މަގުވަނީ ބަންދުވެފައެވެ. ބައްޕަ ލަފާދެއްވި ގޮތުގައި މިކައިވެންޏަށްފަހު އެދެބޭންގެ ތަޢުލީމަށްވެސް ޙުސައިންދީދީ މަގުފަހިކޮށްދެއްވާނެއެވެ. އަދި ބައްޕަގެ މިބޮޑު ދަރަނިންވެސް މިންޖުކޮށްދެއްވާނެއެވެ. ބައްޕަގެ ޙަޔާތުގައި މިދިމާވެފައިވާ އަނދިރި ވަޅުގަނޑުން ސަލާމަތްވާނެއެވެ.
އަނެއްކޮޅުން ޙުސައިންދީދީގެ ދީލަތިކަމާއި ހެޔޮފުޅުކަމަކީވެސް ހިތުން ފިލުވާލައިގެން ވާނޭ ކަމެއްނޫނެވެ. ހުރިހާ ގޮތަކުންވެސް ކައިވެނިކުރުމަށް މަޖުބޫރެވެ. ލޯތްބަށްޓަކައެއްނޫނެވެ. ދަރާފައިވާ ދަރަންޏެއް އަދާކުރުމުގެ ގޮތުންނެވެ. ދެކޮއްކޮގެ ތަޢުލީމަށްޓަކައެވެ. ބައްޕަގެ ބަރުބާދުވެފައިވާ ދިރިއުޅުން އާބާދުކޮށްދީ އަލިކޮށް ދިނުމުގެ ގޮތުންނެވެ.
އަސީދުގެ ޚިޔާލުތަކުގެ ސިލްސިލާ އިތުރުވަމުން ދިޔަދިޔަހެން ހަނދާނުގެ ޞަފްޙާތައް އުކެމުންދެއެވެ. ސްކޫލް ދައުރުގެ ހަނދާންތަކެވެ. އަސީދަކީ ގުރޭޑް އަށަކުން ފެށިގެން އަދަބީ ޖަމްޢިއްޔާގައި ޙަރަކާތްތެރިވާ މެމްބަރެކެވެ. އަދަބީ ތަފާތު މުބާރާތްތަކުގެ ކުލަގަދަ ކާމިޔާބީތަކާއި މެޑެލްތައް ހޯދަމުންދިޔައިރު ޖަމްޢިއްޔާގެ އަންހެން ގޮފިން އަސީދުއާއި ވާދަކުރަމުން ދިޔަ އާޝިޤާގެ ހަނދާންތަކެވެ. އަދަބީ މުބާރަތްތަކުގެ ތެރެއިން ދެކުދިންގެ ލޯބީގެ މުބާރާތް ފެށުނު ގޮތެވެ. ބަހުޘްކުރުމާއި ވާހަކަ ލިޔުމުގެ މުބާރާތްތަކުގެ ތެރެއިންނެވެ.
ޅެން ހެދުމާއި ޅެން ޝަރަޙަކުރުމުގެ މުބާރާތްތަކުގެ ތެރެއިންނެވެ. ތެދުވެރި ލޯތްބެވެ. ޙަޤީޤީ ލޯތްބެވެ. މަޖުބޫރުކުރުމެއް ނެތިއެވެ. ދެކުދިންގެ އަމިއްލަ އިޚްތިޔާރުގައެވެ. ހެވާއި ނުބައި ވަކިކުރެވޭ ޙާލުގައެވެ. ކޮންމެ ރެއަކާ ދުވާލަކު މިލޯބި އެތައް ގުނައަކަށް އިތުރުވެ ތަރައްޤީވަމުން ދިޔައެވެ. އަދަބީ ކޮންމެ މުބާރާތެއް ނިމިގެން ދާއިރު އެލޯތްބަށް އެތައް ތާޒާކަމެއް ގެނެސްދެމުންނެވެ.
ދުވަސްވީވީހެން ލޯބި ތަރައްޤީވަމުން އައިސް އެކަކު އަނެކަކަށް ވަކިނުވުމަށް ވަޢުދުވެވުނެވެ. ސްކޫލް ދައުރު ނިމުމާއެކު ކައިވެނީގެ ގޮތުން ގުޅުމަށް އެއްބަސްވެ އަޒުމް ކަނޑައެޅުނެވެ. ކައިވެންޏަށް ފަހު ދިރިއުޅުން ކުރިއަށް ގެންދާނެ ގޮތްތައް ރޭވުނެވެ. އާޝިޤާއަކީވެސް ރާއްޖެތެރޭގެ ކުއްޖަކަށް ވާތީ މާލޭގެ މިހަލަބޮލި ދިރިއުޅުން ދޫކޮށް ރާއްޖެތެރޭގެ ހިތްގައިމު މާޙައުލުގައި ދިރިއުޅޭނެ އުފާވެރި ގޮތްތަކެވެ. އާމްދަނީ ހޯދާނެ ވަޞީލަތްތަކެވެ. ލިބޭ އެއްޗަކުން ދެކޮޅު ޖައްސާނެ ގޮތެވެ. ދަރިން ހޯދާނެ އަދަދާއި އެދަރިން ތަރުބިއްޔަތުކުރާނެ ގޮތެވެ.
އަސީދު އާއި ނާޒްލީގެ ކައިވެންޏަށް ފަހު ހުސައިންދީދީގެ ގެއަށްވަނީ އާދިރުމެއް އައިސްފައެވެ. ހުސައިންދީދީގެ ވިޔަފާރިއަށް އަންނަމުންދާ ކުރިއެރުމާ މެދު ޙުސައިންދީދީ ހުންނަވަނީ ވަރަށް ހަމަޖެހިލައްވާފައެވެ. ޙުސައިންދީދީގެ ވިޔަފާރީގައި އާކުރިތަކެއް ފަޅަން ފަށައިފިއެވެ. މިގޮތުން ބުކްޝޮޕަކާއި ޓުއަރިސްޓް ރިސޯޓެއް އިތުރުވެއްޖެއެވެ. ބޭންކުތަކުގައިވާ ޙުސައިންދީދީގެ އެކައުންޓުތަކަށް ކޮންމެ ދުވަހަކު ޖަމާކުރެވެމުންދާ ފައިސާގެ އަދަދު ލައްކައިން ގުނެމުން ދިޔައެވެ.
ކުޑަދުވަސްކޮޅެއްގެ ތެރޭގައި ބަލިމީހުން ބަލާ ކުލިނިކަކާއި ބޭސްފިހާރައެއް ހުޅުވައިފިއެވެ. އަސީދުއާއި ނާޒްލީ ކައިވެނިކުރިތާ މިވީ ތިންއަހަރު ދުވަހުގެ ތެރޭގައި ޙުސައިންދީދީގެ ވިޔަފާރިއަށް މިއައި ބޮޑު ކުރިއެރުމަކީ އަސީދުގެ މިންނެތް މަސައްކަތުން ލިބުނު ކުރިއެރުންކަން ތެދުހިތުން ޙުސައިންދީދީ ޤަބޫލުކުރައްވައެވެ. މިކަމުގެ ހެއްކެއްގެ ގޮތުން މިހާރު އަސީދުގެ ބައްޕަގެ ބޮޑު ދަރަނިން މިންޖުކޮށްދެއްވައިފިއެވެ. އަދި އަސީދުގެ ދެކޮއްކޮ ޙުސައިންދީދީގެ ގޭގައި ބަހައްޓަވައިގެން ތަޢުލީމް ޚާޞިލްކޮށްދެއްވަމުން ގެންދަވައެވެ.
ޙުސެންދީދީގެ އަނބި އައިސާފާނު ނިޔާވިފަހުން މިވީ 15އަހަރުގެ ތެރޭގައި ޙުސެންދީދީ މިހާ އުފަލުން ހިތްހަމަޖެހިލައްވާފައި ހުންނަތަނެއް ނުފެނެއެވެ. އެހެން ނުވާންވީ ސަބަބެއްނެތެވެ. ހުރި ހަމައެކަނި ނާޒްލީގެ ކައިވެނި ނިމިގެން ދިޔައީވެސް ހަމަ އެދިލެއްވި ގޮތަށެވެ. ކުރީގައި ރޭގަނޑާއި ދުވާލު ޙުސެންދީދީގެ ސިކުނޑި ސުމަކަށް ދުއްވައިގެން ކުރެއްވި ބުރަ ވިޔަފާރީގައި މިހާރު ކުރައްވަން ޖެހިލައްވާ ކަމަކީ ހަމައެކަނި ޗެކުގައި ސޮއކުރެއްވުމެވެ. ޙުސެންދީދީގެ މިހާރުގެ ކަމަކީ ނަމާދުކޮށްގެން ތަސްބީހަ ގުނުމެވެ. އަދި އެކިއެކި މައިޒާންތަކުގައި ފަޚުރުވެރިވެ ވާހަކަދެއްކުމެވެ.
ނުނިމޭ
