ޙުސެންދީދީގެ ގޭތެރެ ބޭރުފުށުން ފެންނަ ފެނުން ކިތަންމެހައި އުފާވެރިކަމުގައި ވިޔަސް އެތެރޭގައި އަނދަމުންދަނީ ހިތްދަތިކަމާއި ހިތާމައިގެ ގިނި ގަނޑެކެވެ. އަސިދުއާއި ނާޒްލީ ކައިވެނީގެ ގޮތުން ގުޅިފައި ވިޔަސް އެއްގެއެއްގައި އުޅުނަސް އެއްތާނގައި ނިދިޔަސް ދެމީހުން ހިއްސާކުރާ އުފަލެއް ނެތެވެ. އެއްނަޒަރަކުން ބެލޭ ކަމެއްނެތެވެ. ވާނީވެސް އެހެންނެވެ.
އަސީދުއާއި ނާޒްލީއަކީ ދެލޯބިވެރިންނެއް ނޫނެވެ. އެއީ ދެމަފިރިންނެވެ. ބައްޕަޔަކަށްޓަކައެވެ. މިދެމަފިރިންގެ ކައިވެންޏަށް މިވީ 3އަހަރު ދުވަހުގެ ތެރޭގައި ދަރިޔަކު ނުލިބުނީވެސް މިސަބަބާހުރެ ކަމަށް ވެދާނެއެވެ. ޙަޤީޤަތުގައިވެސް އަސީދު މިކައިވެންޏަށް ދަރިއަކު ބޭނުންނުވަނީއެވެ. އެހެނަސް ނާޒްލީ މިއަދު އެންމެ ބޭނުންވަނީ ދަރިއެކެވެ.
މިއީވެސް މިދެމަފިރިންގެ ދެމެދުގައި ކޮންމެ ރެއެއްގެވެސް މައްސަލައަކަށް ވެއްޖެއެވެ. ޙުސެންދީދީއާއި އަސީދުގެ ބައްޕަ އަޙްމަދުފުޅުގެވެސް މިހާރު ދުޢާއަކީ މިދެމަފިރިންނަށް ދަރިއަކު ދެއްވުމެވެ. އަސީދު ވިޔަފާރީގެ ކަންކަމުގައި ގިނަވަގުތު ބޭރުގައި އުޅެން ޖެހުމާއި އަދި ގިނަރޭރޭ ވަރަށް ލަސްކޮށްލާފަ ނިދަން އައުމަކީވެސް އަދި ނިދަން އައިސް ހެދުން ބަދަލުކޮށްލުމާއެކު އޮށޯވެ ނިދުމަކީވެސް މައްސަލައެކެވެ. އަދި ވިޔަފާރިގެ ކަންކަމުގައި ރާއްޖޭން ބޭރަށާއި ރާއްޖެތެރެއަށް ކުރާ ދަތުރުތަކުގައި ހޭދަކުރާ ދުވަސްތަކާ މެދުވެސް ނާޒްލީ ޝައްކުކުރެއެވެ.
ވާނީވެސް އެހެންނެވެ. ނާޒްލީ އަސީދު ދެކެ ކިތަންމެ ލޯބިވިޔަސް ނާޒްލީގެ ބައްޕަގެ ފައިސާވެރކަމުން ގަނެވުނީ ހަމައެކަނި އަސިދުގެ ކައިވެންޏެވެ. އަސީދުގެ ލޯތްބެއް ނުގަނެވުނެވެ. ވީމާ ނާޒްލީއަށް އަބަދުވެސް އިންނަން ޖެހެނީ ބޭރުފުށުން އަސީދުގެ އަންބެއްގެ ގޮތުގައެވެ. އަސީދުގެ ލޯބީގެ އެއްވެސް ފޮނި މީރެއް ޚާޞިލެއް ނުވެއެވެ. ކުރުގޮތަކަށް ބުނާނަމަ އިސްޓޭޖުމަތީގައި ކުޅެލާ ތަމްސީލެއްގެ ގޮތުގައެވެ.
އަސީދުއަކީ ހަމައެކަނި އާޝިޤާގެ ކުޑަރުމާލުގެ އެހީގައި އެދިފައިވާ އެދުމަށްޓަކައި ދިރުން ހުރި މީހެކެވެ. ދިރިހުރިހާ ދުވަހަކު ޙުސެންދީދީއަށް ޚިދުމަތްކޮށްދިނުމަށް އަދި ބައްޕަގެ އެދުމުގައި ކޮޅުފައިން ނުޖަހަން އަޒުމް ކަނޑައަޅައިގެން ހުރި މީހެކެވެ. އަސީދުގެ ލޯތްބެއް އާޝިޤާ ފިޔަވައި އިތުރު މީހަކަށް ނުދެވޭނެއެވެ. އަސީދުގެ ހިތާހިތުން އަބަދު ކިޔެމުންދަނީ،
”ހިތުން އަބަދު ކިޔެމުންދަނީ،
ހިތްވަނީ އާޝިޤާއަށް ވަޤުފްކޮށްފައޭ
އިންތިޒާރީގެ ދަޢުރެއް ގުނަން ދީފައޭ“
މިފަދަ ޢިބާރާތްތަކެކެވެ. ކޮންމެ ރެއެއްގެ ހުވަފެންތަކުގައި އާޝިޤާއާއެކު އުފާވެރި ވަޤުތުތައް ހޭދަކުރެއެވެ. ފޮނި ބައްދަލުވުންތަކާއި ޕިކުނިކު ދަތުރުތައް ކުރުމުގައި މަސްހުނިވެ އުޅެއެވެ. މާލޭގެ އިރުއުތުރު ފަރާތުގައިވާ ހެދިގޮނޑުދޮށުގައި ހަދާފައިވާ ގުންޒަރުތަކުގެ މަތީގައި އާޝިޤާގެ އުނގުގައި ބޯއަޅާލައިގެން އޮވެ އަރައިގެން އަންނަ ހަނދުގެ ފުރިހަމަކަމަށް ބަލައެވެ.
މިދެލޯބިވެރިންނަށް ހަނދުވެސް ތަޢުރީފްކުރާ ކަހަލައެވެ. މާދުރުން ޖައްވުގެ ތެރެއިން ފެނިގެން އައިސް ހުޅުލެއަށް ތިރިކުރަމުންދާ މަތިންދާބޯޓުތަކުގެ މަންޒަރު ބަލައެވެ. އެހިތްގައިމު ކުޑަކުޑަ މޫދުގެ ރާޅުތައް ހިމޭންކަމާއެކު ދޮންވެލިގަނޑުގައި ބޮސްދެމުންދާ މަންޒަރު ބަލަމުން ދާއިރު އެފަދަ ބޮސްދިނުންތައް ހިއްސާކުރުމުގެ ފުރުޞަތާއި ކޮންމެވެސް ކޮންމެވެސް ދުވަހަކުން އެއްދާނެއްގައި އޮތުމުގެ ފުރުޞަތު ލިބޭނެކަމުގައި އާޝިޤާ ބުނެއެވެ. ނަމަވެސް ހޭލެވޭއިރު ގާތުގައި އޮންނަނީ އާޝިޤާއެއް ނޫނެވެ. ނާޒްލީއެވެ. އާޝިޤާގެ ހުވަފެނެއް ފެންނަ ކޮންމެ ރެއަކާއި ޖެހިގެން އަންނަ ދުވަހު ވަކީން ބޮޑަށް ނާޒްލިއާއި ދުރުހެލިވެ އުޅެއެވެ.
އާޝިޤާ އޭނާގެ ލޯބީގައި ނާކާމިޔާބު ވުމާ ގުޅިގެން ޢަޒުމް ކަނޑައެޅީ ޤައުމީ ޚިދުމަތުގައި ދެމިހުރުމަށެވެ. ޚާއްޞަކޮށް ދިވެހިބަސް ކުރިއެރުވުމަށް މަސައްކަތްކުރުމަށެވެ. މިގޮތުން ރާއްޖެތެރެ ތަރައްޤީކުރުމަށް ސަރުކާރުން ހިންގަވާ މަޝްރާޢުގެ ދަށުން ރަށުގެ ތަރައްޤީއާއި އަންހެނުންގެ ހޭލުންތެރިކަން އިތުރުކުރުމާ ބެހޭ 2 އަހަރުދުވަހުގެ ކޯހެއް އޮސްޓްރޭލިޔާގައި ފުރިހަމަކުރުމަށްފަހު އެނބުރި މާލެއަށް އަންނަ ދުވަހު އޭނާއަށް އިސްތިޤުބާލުކުރުމުގެ ގޮތުން ގިނަ އަދަދެއްގެ ރައްޓެހިންނާއި ރަޙްމަތްތެރިން ހުޅުލެއަށް ގޮސް ހުއްޓެވެ. ކިޔޫގައި ގިނައީ ސްކޫލް ދައުރުގެ އެކުވެރިންނެވެ. އެއް ކުލާހެއްގެ ކުދިންނާއި އަދަބީ ޖަމްއިއްޔާގެ ހަރަކާތްތަކުގައި ވާދަކުރުމުގައި އުޅުނު ކުދިންނެވެ.
މީގެތެރެއިން ގިނަ ކުދިންނަކީ އަންހެން ކުދިންނެވެ. ހުރިހާ ކުދިންގެ މޫނުމަތިންވެސް ފެންނަނީ އުފާވެރިކަމުގެ ކުލަވަރެވެ. މިފަދަ ކުދިބައެއްގެ މެދުގައި ހިނގާފައިވާ މަޖާ ވާހަކަތައް ދައްކަމުންދެއެވެ. ހުރިހާ ކުދިންގެ ނަޒަރު އެއް ދިމާއަށް ހުއްޓުވާލީ ބާރަށް ހިނގާފައި އަސީދު އަންނަތަން ފެނިފައެވެ.
ހުރިހާ ކުދިންގެ ހައިރާންކަން އިތުރުވިއެވެ. ކޮންމެ ކުއްޖަކުވެސް ސުވާލުގެ ނަޒަރަކުން އަސީދުއަށް ބަލަން ފެށިއެވެ. ބުނާނެ އެއްޗެއް ނޭނގި ބަސް ހުއްޓިފައިވާ ފަދައިންނެވެ. އަސީދު އާޝިޤާ އިސްތިޤްބާލްކުރަން އަންނާނެކަމަކަށް އެއްވެސް ކުއްޖަކަށް ހީއެއްނުވެއެވެ. އެހެންނަމަވެސް ކުރިމަތީގައި މިހުރީ އަސީދު ކަމާމެދަކު އެއްވެސް ކުއްޖަކު ޝައްކެއް ނުކުރެއެވެ. އަސީދުގެ ހިތުގައިވެސް އުފެދުނީ އެއްފަހަރާ އެތައް ސުވާލު ތަކެކެވެ.
(ނުނިމޭ.)
