އަސީދުއަށް މިހުރިހާ ކުދިން އެއްފަހަރާ އެއްތަނަކުން ފެނުމުން ސިފަވެގެން ހިތުގައި ބިންވަޅު ނެގެން ފެށީ އިސްކޫލު ދައުރުގެ ހަނދާންތަކެވެ. އެމަޖާ ޤުރޫޕެވެ. ހައްތާވެސް އެކުއުޅުނު ޚާއްޞަ އެކުވެރިންނެވެ. އަދަބީ ޖަމްއިއްޔާގެ މެމްބަރުންނެވެ. ބަހުސްތަކުގެ މިތުރުންނެވެ.
ޅެން މުބާރާތްތަކުގެ ޅެންވެރިންނެވެ. ހިންގާ ކޮމިޓީގެ މެމްބަރުންނެވެ. ހިތާހިތުން ބުނެވުނެވެ. މިތާނގައި އަދަބީ ޖަމްއިއްޔާގެ ޖަލްސާއެއް އޮތީ ބާވައެވެ؟ މިއަދަބީ ބަގީޗާގައި މަދީ ހަމައެންމެ މަލެއް އެކަންޏެވެ. އެއީ މިބަގީޗާގައި އެއްވަސްކުރުވި ރާނީއެއްފަދަ ފިނިފެންމަލެވެ. އަސީދުގެ ޅެންވެރިކަމުގެ މިތުރު އަނގަގަދަ ޒައީ އިސްވެ ވާހަކަދެއްކިއެވެ.
އަސީދު މިތަނަށް ތިޔަ ދުރުވީ ކީއްކުރަންތޯ؟ އަސީދު: ޒައީމެން އެންމެން އެކުގައި މިތަނަށް ތިޔަ ދުރުވީ ކީއްކުރައްވަން؟ އާޝިޤާއެވެ. އެންމެން އެއްތަނަކުން ބައްދަލުވަނީއެވެ. އަދަބީ ހަރަކާތް ފައްޓަންވީއެވެ. އެންމެންނަށް އެއްފަހަރާ ބަލާލެވުނެވެ. ފަރި ހިނގުމެއްގައި އައިސް އެނިކުންނަނީ އާޝިޤާއެވެ. ޒުވާން ކޮންމެ ފިރިހެން ހިތެއް އިޝްޤުގައި ޖައްސާފަދަ ރީތިކަމާއި ފުރިހަމަކަން އެކުލެވިފައިވާ އާޝިޤާއެވެ. އާޝިޤާއާއެކުހެން ހަމަ އެއުމުރުގެ ފަރަންޖީކުއްޖަކު އައެވެ.
އަސީދަށް ހީވީ ބިންގަނޑު ފައިދަށުން ދެމިގެން ދިޔަހެންނެވެ. އެނބުރި ދެވޭކަށްވެސް ނެތެވެ. އާޝިޤާއާއެކުގައި އެއަންނަ އަންހެންކުއްޖަކީ އަސީދުގެ އަތުގައި އެއޮތް ފޮޓޯގެ ވެރިޔާކަން ކަށަވަރެވެ. ނާޒްލީ މެޑިކަލް ކްލިނިކަށް ގެންނަ ހިތުގެ ޚާއްޞަ ޑޮކްޓަރެވެ. އަސީދުއަށް ކުރިއަށް ޖެހިލަން މަޖުބޫރުވެއްޖެއެވެ. ޑޮކްޓަރު މޭރީއަށް ހީވެލެއްވީ މިއީ ހައްތާވެސް ޑޮކްޓަރުގެ އިންތިޒާރުގައި ތިބި ހިތުގެ ބަލިމީހުން ކަމުގައެވެ.
އާޝިޤާއަށް ހީކުރެވުނީ އަސީދު އެހުރީ އާޝިޤާއަށްޓަކައި ހުސްހަށިބައިވެގެން މިހުރިހާ އެކުވެރިންނާ އެކު އެއުފާވެރި ޚަބަރު އިއުލާންކުރަން އައިސްހުރި ކަމުގައެވެ. އެންމެންނަށްވެސް ކުރެވުނީ ކުށްހީތަކެވެ. އެހެނަސް އުފާވެރި ހީތަކެވެ. އުއްމީދުތަކުން ފުރިފައިވާ ހީތަކެކެވެ. އެންމެން އުފަލުން ފޮޅެނީއެވެ. ޙަޤީޤަތް އެނގޭނީ ހަމައެކަނި އަސީދުއަށެވެ. އަސީދުގެ ހާސްކަމާ ފިކުރު ހައްތަހާ ދަނީ ބޮޑުވަމުންނެވެ. ދާނެ ތަނެއް ހަދާނެ ގޮތެއް ނޭނގޭފަދަ ގޮތެއްގައެވެ.
ޢީދަށް ކަތލަން ފެންދީފައި އިން ހާލެއް ފަދައިންނެވެ. ދެވޭނެ އިތުރު ތަނެއް ހަދާނެ ވަކިގޮތެއް ނުފެނުނެވެ. މިއެންމެންނަށް ކުރެވިގެން މިއުޅޭ ކުށްހީތައް އޮޅުންފިލުވައި ދޭނީ ކިހިނަކުން ހެއްޔެވެ؟ މިއީ ހަމަ އިއްތިފާޤެވެ. އެހެނަސް ގިތެޔޮއެޅި ގުޅިއަކުން ވަހެއް ނުކެނޑޭނެޔޭ ބުނާ ފަދައިން އަސީދުއަށް ވެސް ކުރަމުން ދަނީ މާޒީގެ ހަނދާންތަކާއި ގުޅިފައިވާ ފުން އަސަރުތަކެކެވެ. ހަށިގަނޑުގައި ދައުރުވަމުން ދަނީ ޒުވާންކަމުގެ ތާޒާ ލެޔެވެ. ހިތުގައި ވިންދު ޖަހަމުން ދަނީ އާޝިޤާގެ އަސަރުތަކެކެވެ.
ހިތް އެދެނީ މިއޮޅުންގަނޑު އިތުރަށް އޮޅުވާލުމަށެވެ. ހިތުގެ ދޫ ބުނާކަހަލައެވެ. ބަލަ އަސީދުއެވެ. ކަލޭގެ ހަށިގަނޑުގައި ތިޔަ ވިންދު ޖަހަނީ ޒުވާންކަމުގެ ލެޔެވެ. އެލޭގައިވާ ތާސީރު ގުޅިފައިވަނީ އާޝިޤާގެ އަސަރުތަކާއެވެ. އާޝިޤާ ހުރީ ހަމަ އަސީދަށް ޓަކައެވެ. މިއިއްތިފާގަކީވެސް މިކަމުގެ ހެއްކެކެވެ. ވަޤުތު ނަގާނުލާށެވެ. ފުރުޞަތުގެ ބޭނުން ހިފާށެވެ. ފަހަތަށް ނުޖެހޭށޭވެ. އިސްނަގާ ކުރިއަށް ފިޔަވަޅެއް އަޅާށެވެ. އާޝިޤާއާ ކުރިމަތިލުމުގެ ޤާބިލްކަން ލިބިގަންނާށެވެ.
އާޝިޤާއާ އިސްވެ ސަލާމްކުރާށެވެ. ޙާލު އަހުވާލު އޮޅުންފިލުވާށެވެ. ދެމީހުންގެ ދެމެދުގައިވާ ރޫޙީގުޅުން އާލާކުރާށެވެ. ވިސްނަންވީ ކޮންކަމަކާ ހެއްޔެވެ؟ އަދިވެސް އެއުފާތައް އިޔާދަކުރެވިދާނެއެވެ. ފިރިހެނަކަށް އެއް އަންބަށްވުރެ އިތުރަށް މާތްﷲވަނީ ހުއްދަކުރައްވާށެވެ. ޙުސެންދީދީގެ އެދުމަށްވެސް މިހާރުވަނީ އިޖާބަ ދެވިފައެވެ. ބައްޕަގެ ހުށައެޅުން ޤަބޫލުކުރުމުން ބައްޕަގެ ދަރަނިތަކާއި ކޮއްކޮމެންގެ ކިޔެވުންވެސް މިހާރު ނިމުމަކަށް އައީއެވެ.
ނާޒްލީއަކަށް ދަރިއަކުވެސް އަދި ލިބުނީއަކީ ނޫނެވެ. ޙުސެންދީދީގެ ވިޔަފާރިވެސް މިހާރު އެތައްގުނައަކަށް ތަރައްޤީކުރެވިއްޖެއެވެ. ދެން އޮތީ ވަރީގެ މައްސަލައެވެ. މިކަމާ ނުރުހުންވެ ނާޒްލީ ވަރިވެއްޖެނަމަ ދިވެހިރާއްޖޭގައި އިތުރުވަމުންދާ ވަރީގެ ލިސްޓަށް އަދަދެއް އިތުރުވީއެވެ. އެހެންނަމަވެސް ހިތެއް ކަތިލާފައި ހިތަކަށް ފޮނިކަމެއް ލިބުމަކީވެސް ވާނޭކަމެއް ނޫނެވެ. އާޝިޤާގެ ހިތް ކަތިލާފައި އަހަރެންގެ ހިތަށް އުފާ ޚާޞިލްކުރުމަކީވެސް ނާދިރުކަމެކެވެ. އެހެނަސް މިއަދު އާޝިޤާއާ އިސްވެ ސަލާންކުރުމަކީވެސް އަސީދުއަށް ކުޅަދާނަކަމެއް ނޫނެވެ.
އަސީދަކީ އާޝިޤާގެ ލޯބީގައި ކޮޅުފައިން ޖަހާފައި ނާޒްލީގެ ތަނަވަސްކަމުގެ އަވައިގައި ޖެހި އާޝިޤާއަށްޓަކައި ގެއްލިފައިވާ މީހެކެވެ. އެކަމަށްޓަކައި އަސީދު ލަދުވެތިވާން ޖެހެއެވެ. އެހެނަސް ލޯތްބަކި ލަދެއް ބިރެއް ގަންނަ އެއްޗެއް ނޫންކަމުން ހިތުގައި ހިނގާ ޖަޒުބާތުތައް އާދޭސްކުރަނީ އާޝިޤާއާ ގާތަށް ޖެހިލުމަށެވެ. އަދި ލަދަކާހުރެ ތަދެއް ނުފިލާނެކަމުގެ އިންޒާރުދެމުންނެވެ. އަސީދުގެ ޚިޔާލުތައް މިހިސާބަށް ދިޔައިރު އާޝިޤާއާ ޑޮކްޓަރު މޭރީ އެންމެންނާ ސަލާމްކުރަމުން ކުރިއަށް އާދެއެވެ.
އުފާވެރި ހިނިތުންވުމެއްގައި ހުރިއިރު އާޝިޤާ އަދި މާ ރީއްޗެވެ. ހީވަނީ ހަމަ ދެންމެ ފޮޅިފައިވާ ފިނިފެންމަލެއް ހެންނެވެ. އެހެނަސް އާޝިޤާގެ ހެދުމާއި އިސްތަށިގަނޑުގެ ވައްތަރަކަށް މާބޮޑު ބަދަލެއް ނާދެއެވެ. ކުއްލިއަކަށް އެނބުރިލާފައި ޝަރަފު އާޝިޤާއަށް އަސީދު ތަޢާރަފްކުރަން ފެށިއެވެ. ހީވާނީ އަސީދުއާއި އާޝިޤާއަކީ އެކަކު އަނެކަކު މީގެކުރިން ނުދަންނަ ދެމީހުންހެންނެވެ. އާޝިޤާއެވެ. މިހުންނެވީ އަހަރުމެންގެ އަދަބީ ޖަމްއިއްޔާގެ ރައީސް އަސީދެވެ. ހަމަ އާޝިޤާގެ އިސްތިޤުބާލުގައެވެ.
ހީވަނީ މިހާރުވެސް އަދަބީ މުބާރާތެއް އިއުލާންކުރަން ތައްޔާރުވެލައްވަނީ ހެންނެވެ. އަވަހަށް ސަލާމްކުރައްވާށެވެ. އަސީދުއެވެ. މިހުންނެވީ އަދަބީ ޖަމްއިއްޔާގެ އަންހެން ގޮފީގެ ރައީސާއެވެ. އަވަހަށް ބައްދަލުކުރައްވާ ސަލާމްކުރައްވާށެވެ. ޝަރަފްގެ މިތަޢާރަފާއެކު ހުރިހާ އެންމެން އެއްފަހަރާ ހޭން ފަށައިފިއެވެ. އާޝިޤާއާއި އަސީދުއަށްވެސް ބޭއިޚްތިޔާރުގައި ހީނގަނެވިއްޖެއެވެ. ހުޝިޔާރުކަމާއެކު ޝަރަފް ފުރުޞަތުގެ ބޭނުން ހިފައިފިއެވެ. އަސީދާއި އާޝިޤާގެ އަތްޖޯޑުކުރުވައިފިއެވެ.
އެވަގުތު ޝާނީޒް އިއްވާލަދިނީ މިރީތި ލަވައިގެ ތަންކޮޅެކެވެ. ”ދުރުދުރުގައިވި ހިތޭ މިގުޅޭނީ، ބިރުފިލުވުންނެ އުފާ ލިބެވޭނީ…“ އެތަކެއް އަހަރުތަކަކަށްފަހު އަސީދުއާއި އާޝިޤާގެ ހަތަރުކަޅި ބައްދަލުވި ވަޤުތު ދެމީހުންގެވެސް ލޮލުން ކޯތާފަތް މައްޗަށް ސާފު ލޯބީގެ ހިފެހެއްޓުމެއް ނެތް ކަރުނަތަކެއް ފައިބާގަތެވެ. އަސީދުގެ ފައިދަށުން ބިންގަނޑު ދެމިގެން ދިޔަކަހަލަ އިޙްޞާސްތަކެއް ވެރިވިއެވެ. މޫނުމަތިން ކޮކާ ބުރާލި ކަހަލައެވެ. ހިތުގެ ވިންދު މާއަވަސް ވެއްޖެއެވެ.
ކުރިމަތީގައި ހުރި އާޝިޤާ ފެންނަނީ ދެމީހުންގެ ސިފައިގައެވެ. ބޮލަށް ފާޑެއްގެ ގޮތެއް ވެފައި މުޅި ދުނިޔެ އެނބުރޭހެން ހީވާން ފަށައިފިއެވެ. އަސީދު އަރިއަޅާލައިފިއެވެ. އަސީދު ހިފެހެއްޓޭތޯ އާޝިޤާ އަވަސްވިއެވެ. އެހެނަސް އަސީދު ހިފެހެއްޓޭ ގޮތެއް ނުވިއެވެ. ޚަބަރު ހުސްވެގެން ތަޅުންގަނޑު މައްޗަށް ވެއްޓިއްޖެއެވެ. މާޙައުލުގެ އުފާވެރިކަން ހާސްކަމާ ހިތާމަވެރިކަމަށް ބަދަލުވެއްޖެއެވެ. ހަމަވަގުތުން ޑޮކްޓަރު މޭރީ ފަސްޓް އެއިޑް ދެއްވަން ފައްޓަވައިފިއެވެ. ނަމަވެސް ޑޮކްޓަރު މޭރީ ކުރެއްވި ބުރަ މަސައްކަތުގެ ނަތީޖާ ދެއްކީ ކަޅިފުށީކަލޭގެ ޖެހ ކޮކަޑީގެ ނަތީޖާ ފަދައިންނެވެ. ފުންނޭވާއެއް ލުމަށްފަހު ޑޮކްޓަރު އިރުޝާދުދެއްވީ އަވަހަށް ހަސްފަތާލަށް ގެންދިއުމަށެވެ.
(ނުނިމޭ.)
