ޝައިންގެ ވަފާތެރި މަވީމޭ- 06 ވަނަބައި
ފޯރިގަދަ ކުޅިވަރުތަކާއެކު އީދުވެސް ނިމިގެން ހިނގައްޖެއެވެ. އެއާއެކު މީހުންތައް ރަށުން ފުރަންފެށިއެވެ. އޭނާގެ އެންމެގާތް ދެއެކުވެރިންވެސް އެނބުރި މާލެ ހިނގައްޖެއެވެ. ނަމަވެސް އޭނާގެ ކިޔެވުން ނިމިފައިވާތީ އޭނާ ރަށުގައި މަޑުކުރިއެވެ.
ހަވީރުގެ ވަގުތެވެ. ގޭތެރޭގައި އޮވެ އޮވެ ފޫހިވެގެން ޝާނީ ބޭރަށް ނުކުތެވެ. މީގެ ދެތިން ދުވަސްކުރިން ހަލަބޮލިކޮށް އޮތް މަގުތައް މިހާރުވަނީ ފަޅުވެފައެވެ. ހާލަކުން ފަހަރަކު މީހަކު މަގެއްމަތިން ފެނުނު ނަމަވެސް ގިނަވަގުތު މަގުތައް އޮންނަނީ ހިމޭންކޮށެވެ. އެކުގައި ނުހަނު މަޖާކޮށްފައި އެކުވެރިން ދިއުމުން އޭނާގެ ހިތަށް ތަދުވާގޮތްވިއެވެ. އެންމެވެސް ރަށުގައި އުޅޭނެ ނަމައޭ އޭނާގެ ހިތަށްއެރިއެވެ.
އޭނާ ފުންޚިޔާލެއްގައި ހުރެގެން ވަކި މިސްރާބެއްނެތި ހިނގަމުން ދިޔައެވެ. ދޮންތަމެންގެ ގެޔަށްދާން ހިތަށްއަރާފައިވެސް އޭނާގެ ޚިޔާލު ބަދަލުވެގެން ތުނޑީކޮޅަށްދާން ނިންމިއެވެ. ގޮނޑުދޮށުގައި އިނދެގެން ފިނިވައި ޖައްސާލައި ރާޅުގެ ހިތްގައިމު އަޑުއަހާލުމުންވެސް ހިތުގެ އުދާސްކަން ފިލައިގެން ހިނގައިދާނެއޭ އޭނާގެ ހިތަށްއެރިއެވެ. ތުނޑީމަގުން ވަކި ހިސާބަކަށް ގޮސްފައި އޭނާގެ ޚިޔާލު ބަދަލުވީ އެމަގުން އަނެއްކާވެސް ޖިނާހްއާ ދިމާވެދާނެތީއެވެ.
ޖިނާހް ގޯނާއެއް ނުކުރި ނަމަވެސް ޖިނާހްއާއެކު އެކަނިވާން އޭނާ ޖެހިލުންވެއެވެ. އެހެންކަމުން އޭނާ މިސްރާބު ބަދަލުކޮށްލީ ރަށުގެ އުތުރުފަރާތު ގޮނޑުދޮށަށް ފޭބެން އޮންނަ މިރިހި މަގަށެވެ. އޭނާ އެމަގުން ގޮނޑުދޮށަށް ފޭބިއިރު، އެއްވެސް މީހަކު ފެންނާކަށް ނެތެވެ. ދުރު ދުރަށްދާންދެންވެސް ވަނީ ހަމަހިމޭންކަމެވެ. މިރިހިމަގާއި ތުނޑީމަގަކީ މާދުރުނޫން ދެމަގުކަމުން އޭނާއަށް އެތާނގައި ހުންނައިރު ތުނޑީކޮޅުގެ ހުދު ދޮންވެލިގަނޑު ރީތިކޮށް ފެނެއެވެ.
އެތާނގައި މީހަކު ހުރިނަމަވެސް އެމީހަކުވެސް ރީތިކޮށް ފެންނާނެއެވެ. ޝާނީ ވެލިގަނޑުމަތީގައި އިށީނދެ މޫދަށް ނަޒަރު ހުއްޓާލިއެވެ. އެއްވާމެއްގައި ކުދިކުދި ރާޅުތައް ގޮނޑުދޮށަށް ބީއްސާލާއިރު އެއިވޭ މިއުޒިކެއްފަދަ ހިތްގައިމުގެ އަޑުގެ ތެރެއަށް ހިތްދޫކޮށްލައިގެން އޭނާ އިނެވެ. އެހެން އިނދެފައި އޭނާ ކަނާތްފަރާތަށް ބަލާލި ވަގުތު ހޭޅިފަށުގައި ހެދިފައިވާ ތިރި މިދިލިގަހެއްގައި ދޮންވެ ފައްކާވެފައިވާ މަދުތައް ފެނުމާއެކު އޭނާއަށް އިންތަނުން ތެދުވެވުނެވެ.
މަދެއް ބިނދެލާހިތުން ދުވެފައި ގަސް ކައިރިއަށް އައިސް ހުއްޓުނިއިރު، އެންމެ ގޮފިގަނޑަކަށްވެސް އަތެއް ނުފޯރައެވެ. އޭނާ ހޭޅިފަށުން ދަނޑިކޮޅެއް ހޯދައިގެން އެއިންވެސް މަދެއް ބިނދެވޭތޯ އުޅުނެވެ. ނަމަވެސް އޭނާ ފުންމަ ފުންމާ ވަރުބަލިވީއިރުވެސް މަދެއް ބިނދެވޭގޮތެއް ނުވިއެވެ. އެންމެފަހުން އޭނާ ނިންމީ ގަހަށްއަރާށެވެ. ދޯޕައްޓާ އެއްފަރާތަކަށް އައްސާލުމަށްފަހު އޭނާ ގަހަށް އަރަން ތައްޔާރުވިއެވެ.
”މިފަހަރު މަދު ބިނދެފަ ހުއްޓާލާނީ…“ ޝާނީ ހިތްވަރާއެކު ބުނެލަމުން ގޮސް ގަސްބުޑަށް ހުއްޓި ފައިވާން ބަހައްޓާފައި ގަހަށް އަރަންފެށިއެވެ. މާބޮޑު ދަތިކަމެއްނެތި ގަހަށް އެރިއްޖެއެވެ. ދޮންވެފައިވާ މަދުތައްފެނި އޭނާ ކުޅުދިޔާވެއްޖެއެވެ. ގަހުގައި އިނދެގެން ފަހަރަކު މަދެއް ބިނދެލާފައި ކަމުން ބިއްމަށްޗަށް އޮށް އުކަމުން ދިޔައެވެ.
އެއްވެސް ޚިޔާލެއް ފިކުރެއްނެތި އެގޮތުގައި އޭނާ އިންދައި ހިލަމެއްވެސް ނުވެ އެމަގުން ގޮނޑުދޮށަށް ފޭބީ ޖިނާހްއެވެ. ރަށުގެ އިރުމަތީކޮޅަށް ދިއުމަށްޓަކައި ހިނގައިގަތް ޖިނާހްއަށް ހުއްޓެވުނީ އޭނާގެ ގައިގާ އެއްޗަކުން ޖެހުމުންނެވެ. އޭނާ ގުދުވެފައި ބަލާލިއިރު،ވެލިހޭކިފައި އޮތީ މަދުގަނޑު ކާލާފައި އޮތް އޮށެކެވެ. އެއީ ވާލެއްގެ ކަމެކޭ ހިތައި އަޅާނުލައި ހިނގައިގަތް ވަގުތު އަނެއްކާވެސް އެނބުރެމުން އައި އޮށެއް އޭނާގެ ފައިގައި ޖެހުނެވެ. އޭނާ މަޑުމަޑުން ގަހާއި ކައިރިވިއެވެ.
އެވަގުތު ތިރިއަށް ދެފައި އެލުވާލައިގެން ގޮފިގަނޑެއްގެ މަތީގައި ހަމަޖެހިލައިގެން އިން ޝާނީ އޭނާއަށް ފެނުނެވެ. މަތިބަލަމުން ފަހަރަކު މަދެއް ބިނދެފައި ކާލާއެވެ. މަދު ކާލާފައި ތިރި ބަލައިވެސް ނުލައި އޮށްހޫރާލައެވެ. ޖިނާހް ގަޔާވެގެން ޝާނީއަށް ބަލަން ހުރެފައި އޭނާގެ ކަރުގައި އަޅުވާފައިވާ ކެމެރާ އަމާޒުކޮށްލިއެވެ. ފޮޓޯނެގިއަޑާއެކު ސިހިފައި ޝާނީ ބަލާލިއިރު، ގަސްދޮށުގައި ހުރި ޖިނާހް ކެމެރާ ތިރިކޮށްލަނީއެވެ.
ޖިނާހް ފެނިފައި ތެޅިގަތް ވަގުތު އޭނާގެ ފައި ކައްސާލައިގެން ތިރިޔަށް އޭނާ އެލުނެވެ. އެމަންޒަރު ފެނިފައި ބޭއިޚްތިޔާރުގައި ޖިނާހްއަށް ދުއްވައިގަނެވުނެވެ. ނަމަވެސް ޝާނީ ބިއްމައްޗަށް ނުވެއްޓި ތިންފޫޓެއްހައި އުސްމިނުގައި އެލިފައި އޮތީއެވެ. ޝާނީ ދެލޯމަރައި ތަގުޅިކޮށްގެން އޮތީ ފުންމާލަންވެސް ނުކެރިފައެވެ. ޖިނާހްއަށް އެކަން ވިސްނިގެން އޭނާ ޝާނީއާއި ދިމާއަށް ގޮސް ހުއްޓުނެވެ. އަދި ޝާނީގެ ފައިގައި ކޮއްޓާލިއެވެ. އެއާއެކު އޭނާ ސިހިފައި ލޯހުޅުވާލިއެވެ.
ޝާނީ ތިރި ބަލާލުމާއެކީ ގޮފިގަނޑުން އަތްދޫކޮށްލުމަށް ޖިނާހް އެދުނެވެ. އަދި ޝާނީ ވެއްޓުނަނުދީ ހިފާނެ ކަމުގެ ޔަޤީންކަން ދިނެވެ. ޝާނީ ބިރު އޮވެ، ދެލޯމަރާފައި އަތްދޫކޮށްލިއެވެ. ވަކިހިސާބަކަށް ވެއްޓިފައި ކުއްލިއަކަށް އޭނާ ހައްޔަރުވީ ބާރުގަދަ ދެއަތުގެ ތެރޭގައެވެ. ޖިނާހް އޭނާގެ ދެއަތުގެ ތެރޭގައި ޝާނީ ހައްޔަރުކޮށްލުމާއެކީ އޭނާގެ ނޭވާވެސް މޭގެ ތެރޭގައި ތާށިވިހެން ހީވިއެވެ.
ޖިނާހްގެ ހަށިގަނޑުގެ ހޫނުކަން އިހުސާސްކުރެވި ހިނދުކޮޅެއްގެ ތެރޭގައި ހިއްސުތައް ހަލަބޮލި ކުރުވައިފިއެވެ. ހިތުގެ ވިންދުވެސް އަވަސްވީވަރުން މޭފަޅާ ނުކުމެދާނެހެންވެސް ހީވިއެވެ. އޭނާގެ ޙަޔާތުގައިވެސް މިފަދަގޮތަކަށް ފިރިހެނަކާ ގައިގޯޅި ވެވުނު މިއީ ފުރަތަމަ ފަހަރެވެ. އިރުކޮޅެއްވާންދެން ޝާނީ ހިފަހައްޓައިގެން ހުރުމަށްފަހު ޖިނާހް މަޑުމަޑުން ޝާނީ ވެލިގަނޑުމަތީގައި ބެހެއްޓިއެވެ. އެއާއެކު ޝާނީ ލޯހުޅުވާލިއެވެ. ދާދިގާތުގައި އޭނާއަށް ބަލަންހުރި ޖިނާހް ފެނިފައި ގަތްލަދުން ހިނދުކޮޅަކުވެސް އެތާ މަޑުކުރަން ނުކެރިގެން އޭނާ އެއްގަމަށް އަރަން ދުއްވައިގަތެވެ.
އޭނާއަށް އާދެވުނީ ފައިވާނަށްވެސް ނާރާކަން ހަނދާންވީ ފަޔަށް ގާކޮޅެއްވަދެ ތަދުވުމުންނެވެ. އޭނާ ހުއްޓިލާފައި ފަހަތްބަލާލިއިރު، ޖިނާހް ހުރީ ވަކިހިސާބަކަށް އައިސް ހުއްޓި އޭނާއަށް ބަލާށެވެ. އޭނާ ކުރިޔަށްވުރެ ދުވުން ބާރުކޮށްލިއެވެ. ޖިނާހް ބަލަންހުއްޓައި އިސާހިތަކު ޝާނީ ގޮސް އޮބާލައިފިއެވެ. ހަލުވިވެސް ކުއްޖެކޭ ޖިނާހްގެ ހިތަށް އެރިއެވެ. އޭނާ އަނެއްކާވެސް ގޮސް ގަސްދޮށަށް ހުއްޓިލީ ވަގުތު ޝާނީގެ ފައިވާން ފެނުނެވެ. އޭނާ ހިނިތުންވެލަމުން އެފައިވާންވެސް ފޮޓޯނެގިއެވެ. ކުރީދުވަހު ދިޔައީ ދޯޕައްޓާ ބާއްވާފައެވެ. މިއަދު ފައިވާނެވެ. ޖިނާހް ދެފަރާތަކަށް ބޯހޫރާލަމުން ޝާނީގެ ފައިވާން އަތަށް ނަގައިގެން އެއްގަމަށް އެރިއެވެ.
މެންދަމުގެ ވަގުތެވެ. ނިދަން އޮތްއިރުވެސް ޝާނީއަށް ވިސްނެމުން ދިޔައީ ޖިނާހްއާމެދުގައެވެ. ކުޑައިރުވެސް އޭނާ ޖިނާހް ދެކެއެވެ. ޖިނާހްއަކީ އެހެންކުދިންނާ ތަފާތު ކުއްޖެއްކަން އެނގޭތީ އޭނާގެ ހިތުގައި އަބަދުވެސް ޖިނާހްއާމެދު ހަމްދަރުދީވެއެވެ. އެނޫން ނަޒަރަކުން އޭނާ ނުދެކެއެވެ. ނަމަވެސް މިފަހަރު ޖިނާހް ފެނުނު ފުރަތަމަ ފަހަރުވެސް އޭނާގެ ހިތުގައި ތަފާތު ގޮތަކަށް ވިންދު ޖަހަން ފެށިއެވެ.
ޖިނާހްއާ އޭނާ ދިމާވި މި މަދު ދުވަސްކޮޅުގެ ތެރޭގައިވެސް އޭނާއަށް ތަފާތު އިހުސާސެއް ކުރުވައިފިއެވެ. ސަބަބެއް ނޭނގުނު ނަމަވެސް ޖިނާހްއާ ހަތަރުކަޅި ހަމަކުރަން އޭނާއަށް އުނދަގޫވެއެވެ. އޭނާ ރަކިވެއެވެ. މިއަދު މިދިމާވި ކަމަކުން ކުރިޔަށްވުރެވެސް ބޮޑަށް ޖިނާހްދެކެ އޭނާ ލަދުގަންނާނެއެވެ. ނަމަވެސް އެމޫނު އޭނާ ދެކޭ ހިތްވެއެވެ. އެ ފުން ލޮލުގެ ތެރެއަށް ގެނބިގެންދާންވެސް ބޭނުންވެއެވެ. އޭނާ ފުރޮޅިލަމުން ބާލީހުގައި ބައްދާލިއެވެ. އެވަގުތު ޖިނާހްއާއި ގައިގޯޅިވެވުނު މަންޒަރު ހިތަށް ސިފަވިއެވެ. އެހަށިގަނޑުން ދުވި ފިރިހެންވަންތަ މީރުވަސް އަދިވެސް އޭނާގެ ހިނދުރީގައި ހަރުލާފައިވާ ފަދައެވެ.
އަނެއްކޮޅުން ޖިނާހްވެސް އޭނާގެ އެނދުގައި އޮވެގެން ޝާނީއާމެދު ފިކުރު ކުރަމުން ދިޔައެވެ. ލޯމަރައިގެން އޮއްވައިވެސް ޝާނީގެ ރީތިމޫނު އޭނާއަށް ސިފަވިއެވެ. އޭނާ ތެދުވެ މޭޒުކައިރީގައި އަތްބައްތި ދިއްލައިގެން އިނދެ ކުރަހަން ފެށިއެވެ. ކުރީ ދުވަހު ކާނިގަހުގައި އިނދެގެން ކުރަހަންފެށި ޝާނީގެ ތަސްވީރު އޭނާ ފުރިހަމަ ކޮށްލިއެވެ. އަދި މިއަދު މިދިލި ގަހުގައި އިން މަންޒަރުވެސް އޭނާ ކުރެހިއެވެ.
ފަންސޫރު ދެލިން ކުރަހާފައިވީ ނަމަވެސް ފެންނަ ކޮންމެމީހަކަށްވެސް އެއީ ޝާނީކަން އެނގޭހައި ފުރިހަމައެވެ. އޭނާ އެތައްއިރަކު އެކުރެހުމަށް ބަލަން އިނެވެ. ކުއްލިއަކަށް އެއްޗެއް ހަނދާންވެގެން އޭނާ ތެދުވިއެވެ. އަދި އޭނާގެ ފޮތިއަލަމާރި ހުޅުވާލުމަށްފަހު ޝާނީގެ ދޯޕައްޓާނެގިއެވެ. އެހިފައިގެން އައިސް އެނދުގައި އޮށޯވެ އޭގެ ވަސްބަލާލިއެވެ. އެންޝޯންޓާގެ މީރުވަސް ނޭފަތުގައި ޖެހުމާއެކު އޭނާގެ އަތުތެރޭގައި ޝާނީއޮތްފަދަ އިހުސާސެއް ކުރެވުނެވެ.
އޭނާއަށް ފުރަތަމަ ފަހަރަށް ޝާނީ ފެނުނީ އޭނާގެ މަންމާއެކު ރަށަށް ބަދަލުވި އަހަރުއެވެ. އެއީ މީގެ ހައަހަރު ކުރިންނެވެ. ކުއްލިގޮތަކަށް ބައްޕަ ނިޔާވުމާއި ގުޅިގެން އޭނާއަށް ރަށަށް ބަދަލުވާން މަޖުބޫރުވީއެވެ. އޭނާއަކީ ނުހަނު އުފަލުގައި ދިރިއުޅެމުންއައި އުފާވެރި ކުއްޖެކެވެ. އޭނާ އުފަންވީވެސް މާލޭގައެވެ. އުމުރުން ބާރަ އަހަރުވާންދެން އޭނާ އުޅުނީ އެއްވެސް ހިތާމައެއް ނުދެކިއެވެ. މަންމައާއި ބައްޕަގެހުރި ހަމައެކަނި ދަރިފުޅުކަމަށްވާތީ އެމީހުން އިންތިހާއަށް އޭނާދެކެ ލޯބިވެއެވެ. ޚާއްސަކޮށް އޭނާގެ ބައްޕަ ޖަމާލު ހުންނަނީ އޭނާ ބުނާހައި ކަމެއްކޮށްދޭން ތައްޔާރަށެވެ. ބައްޕަގެ އަމިއްލަ ގެދޮރު މާލޭގައި ނެތްނަމަވެސް، ބައްޕައަކީ މުދާވެރިއެކެވެ. ބައްޕަގެ އަމިއްލަ ދެފިހާރައާއި މަސްދޯންޏެއް އޮވެއެވެ. އެހެންކަމުން އޭނާ އުޅެމުން އައީ ތަނަވަސް ދިރިއުޅުމެކެވެ.
އޭނާއަކީ އުފަންވުމުގައި މަންމަނެއް ނޫނެވެ. އޭނާގެ ޙަޔާތަށް ހިތާމައިގެ ތޫފާނެއް އައީ އުމުރުން ބާރަ އަހަރުގައި އޭނާގެ އާއިލާއާއެކު ޗުއްޓީއެއް ހޭދަކޮށްލުމަށްޓަކައި އިންޑިއާއަށް ގޮސް އުޅުމުގެ ތެރޭގައެވެ. އެ ދަތުރުގެ އުފާވެރިކަން ހިތާމައަށް ބަދަލުވީ، ހައިވޭގައި އެމީހުން ދަތުރުކުރަމުން ދިޔަ ބަސް އެހެން އުޅަނދެއްގައި ޖެހި ހިނގި ހާދިސާގެ ސަބަބުންނެވެ. އެހާދިސާގައި އޭނާގެ ބައްޕަ ނިޔާވިއިރު، އޭނާގެ ބޮލަށް ލިބުނު ގެއްލުމެއްގެ ސަބަބުން އަޑުއިވުމުން މަހުރޫމުވިއެވެ.
މަންމައަށްވެސް އެކިވަރުގެ އަނިޔާތައްވީ ނަމަވެސް މާބޮޑު ގެއްލުމެއްނުލިބި ސަލާމަތްވިއެވެ. އެކަމުގެ ސަބަބުން އޭނާގެ މުޅި ދިރިއުޅުން ބަދަލުވިއެވެ. ބައްޕަގެ ވަކިވެދިއުމާއި އަޑުއިވިމުގެ ހިއްސު ގެއްލުމުން ނަފްސާނީގޮތުން އޭނާއަށް އަސަރުކުރިއެވެ. އެތައް ދުވަހެއް ވާންދެން ގަބުވެ ހިމޭންވެފައި އޭނާ ހުއްޓެވެ. މަންމަގެ ލޯތްބާއި އަޅާލުމުން، ދުވަސްތަކަކަށްފަހު އޭނާ ހަމައަކަށް އެޅުނެވެ. ނަމަވެސް ކިޔަވަން ސުކޫލަށް ދިޔަ ހިސާބުން އަނެއްކާވެސް ހިތްދަތިކަން އޭނާއަށް ކުރިމަތިވިއެވެ.
އޭނާއަށް އަޑުނީވުމުގެ ސަބަބުން މުދައްރިސުންނާއި އެކުވެރި ކުދިން ދައްކާ ވާހަކަ އޮޅުމެއް ނުފިލައެވެ. އޭނާ އެކަންކަމާމެދު ވިސްނި ވަރަކަށް ބޮލުގެ ރިހުން ގަދަވެ މީހާގެ ތަބީޢަތް ގޯސްވެއެވެ. އިޚްތިޔާރަކާއި ނުލައި މީހުން ދެކެ ރުޅިއާދެވެއެވެ. އޭނާ އެއްޗެއް ބުނަން ބޭނުންވެގެންވެސް ބުނެވެނީ އެހެން މީހުން ބިރުގަންނަހާ ބާރަށެވެ. އެހެންކަމުން ބައެއްކުދިންގެ މަލާމާތްވެސް އޭނާއަށް ލިބެންފެށިއެވެ. އެކަމުގެ ސަބަބުން އޭނާ ސުކޫލަށްދާން ފޫހިވިއެވެ. މަންމަ ގަދަކަމުން ސުކޫލަށް ފޮނުވިނަމަވެސް އޭނާ އިންނަނީ ހިމޭނުންނެވެ. އޭނާގެ އެންމެގާތް އެކުވެރިން އޭނާއަށް އެހީތެރިވެދިން ނަމަވެސް އޭނާ އެއްވެސް މީހެއްގެ އެހީތެރިކަމެއް ބޭނުމެއްނުވިއެވެ.
ބައްޕަ ނިޔާވުމާއި ގުޅިގެން ވިޔަފާރީގެ ކަންކަން ބަލަހައްޓަން މަންމަ ޝަކީލާއަށް މަޖުބޫރުވިއެވެ. ނަމަވެސް މަންމައަކީ އެފަދަ ކަންކަމުގައި ތަޖުރިބާހުރި މީހެއްނޫންކަމުން ކަންކަން ބޮއްސުން ލައިގެން ދިޔައެވެ. ބައްޕަގެ ވިޔަފާރި ސަލާމަތް ކުރުމަށްޓަކައި މަންމަ އެހީއަކަށް އެދުނީ ބައްޕަގެ އެއްބަނޑު އެއްބަފާ ބޭބެ ޖަމީލުގެ ކިބައިންނެވެ. ޖަމީލަކީ ރަށުގައި ޖަމާލުގެ ފިހާރައެއް މިހާރުވެސް ހިންގަމުން އަންނަ މީހެކެވެ.
އެއިން ވާފައިދާއިން ޖަމާލު އެއްވެސް ބޭނުމެއްނުކުރެއެވެ. އެއީ ޖަމީލު ބޭނުންގޮތަކަށް ހޭދަކުރަން ދީފައިވާ މުދަލެކެވެ. އެހެންކަމުން ހަޤީޤަތުގައި ޖަމީލުގެ އަނބިދަރިންނަށް ކާންބޯންދީ ހެދެނީވެސް ޖަމާލުގެ ދީލަތިކަމުގެ ސަބަބުންނެވެ. ޖަމާލު އެންމެ ޒުވާން ދުވަސްވަރު ހޭދަކުރީ ބޯޓްދަތުރުކޮށް ރުފިޔާ އެއްކުރުމުގައެވެ. އެހެންކަމުން މިއަދު ފެންނަންހުރި ތަނަވަސްކަމަކީ ޖަމާލުގެ ބުރަ މަސައްކަތުގެ ނަތީޖާއެވެ.
ޖިނާހްގެ މަންމަ ޝަކީލާގެ އެދުމަށް ޖަމީލު މާލެއައެވެ. ނަމަވެސް އޭނާ މާލޭގައި މަޑުކުރާ ޚިޔާލެއް ނުކުރިއެވެ. އޭނާ ބޭނުންވީ ޖަމާލުގެ މުދާތައް ހިފައިގެން ރަށަށް ގޮސް ރަށުގެ ވިޔަފާރި ފުޅާކުރާށެވެ. ނަމަވެސް ޖަމީލުގެ ދޮށީދަރި ހާރިޝް ބޭނުންވީ މާލޭގައިހުރި ފިހާރަ މާލޭގައި ބަހައްޓައި މަސްދޯނިވެސް މާލޭގައި ބޭއްވުމަށެވެ. އަދި މާލޭގެ ފިހާރައާއި ދޯނީގެ ކަންކަން އޭނާ ބެލުމަށް އެއްބަސްވިއެވެ. ހާރިޝްއަކީ ފަންސަވީސް އަހަރުގެ ޒުވާނެކެވެ. ކުރިއެރުން އޮތީ މާލޭގައި މަސައްކަތެއް ކޮށްގެންކަން އޭނާ ދަނެއެވެ. ޖަމާލުގެ މުއްސަނދިކަމުގެ ފައިދާ ކިތަންމެ ރަނގަޅަކަށްވެސް ޖަމީލުއަކާ އޭނާގެ ދަރިންނަށް ކުރިއެވެ.
“ ބުނަން ޝަކީލާ…މަށަކަށް ކަލޭމެން ގޮވައިގެން މާލެއަކު ނޫޅެވޭނެ…މަގޭ އަނބިދަރިން ތިބީ ރަށުގަ….ރަށަށް ދިޔައީވިއްޔާ މަށަށް އަޅާލެވޭނީ….ޖަމާލު ނެތްދުނިޔޭގަ މާލޭގަ ކުށްޔަށް ހިފައިގެން ކިހިނެއް އުޅޭނީ…“ ޖަމީލު އޭނާ ބޭނުންވާގޮތް ހާމަކުރިއެވެ.
“ އެކަމަކު އަހަރެން ބޭނުން އަހަރެންގެ ދަރިފުޅަށް ކިޔަވައިދޭން….ރަށަށް ގޮސްގެން ކިހިނެއް އެކަން ކުރާނީ…އެހެންނޫނަސް ހާރިޝްވެސް މިކޮޅުގަ ހުންނައިރު އަހަރެމެންނަށްވެސް ތިބެވޭނެއްނު“ ޝަކީލާ ދެރަވެފައި ބުންޏެވެ.
“ ބަލަ އޭނަ ގޮވައިގެން ކަރަޔަށް ދިޔަޔަސް ކިހިނެއް އޭނަކިޔަވާނީ….ބީރަކަށް ކިޔެވޭނެ ގޮތެއް އޮންނާނެތަ؟…ރަށު މަދަރުސާގަވެސް ގުރޭޑް ހަތަކަށް ކިޔަވާ….ރަށަށް ގޮސް މަދަރުސާއަށް ލީމަވީނު….އެސޮރު ކިޔަވަން ބޭނުން ނޫނިއްޔާ މަށާއެކީ ވިޔަފާރީގެ ކަންކަމުގަ އަތްގާތްކޮށްދޭން ހުރެވޭނެއްނު…ހާރިޝްއަށް ބުރަކުރަން މިތާ ހުރުމުގެ ބޭނުމަކީކޮބާ؟“ ޖަމީލު ބުންޏެވެ.
ޝަކީލާ ކިތަންމެ ދެރަވިނަމަވެސް އިތުރުގޮތެއް ނެތުމުން ރަށަށްދާން އެއްބަސްވިއެވެ. ފިރިމީހާ މަރުވި ދުވަހު އަޅާލާނެ އިތުރުމީހަކުވެސް ނެތެވެ. މައިންބަފައިންގެ ނުގަބޫލުގައި ކުރި ކައިވެންޏަކަށްވީތީ އެމީހުން އޭނާއާ ގުޅުން ކަނޑާލިތާ ކިތަންމެ ދުވަހެކެވެ. ޖަމާލުގެ މުއްސަނދިކަން ފެނުމުން އޭނާގެ އާއިލާގެ ބައެއްމީހުން އޭނާއާ ގުޅުން ބަދަހިކުރި ނަމަވެސް ޖަމާލު ނިވާހި ޚަބަރު ލިބުމުން ހާލުދެކިލަންވެސް ނާދެއެވެ. އޭނާގެ މައިންބަފައިންވެސް މިއަދު ދުނިޔެއަކު ނެތެވެ. ޖަމާލު ބައްޕަވެސް އެދުނީ އޭނާ ދަރިފުޅު ގޮވައިގެން ޖަމާލުގެ ރަށަށް ދިއުމަށެވެ. އެހެންކަމުން އޭނާއަށް އިތުރުގޮތެއް ނެތެވެ.
ޖަމީލު އޭނާއަށް މަސައްކަތަކާއި ނުލައި ލިބުނު މުދާތަކުގެ ސަބަބުން އުފަލުން ހުރެ ރަށަށް ދިޔައެވެ. މިއީ ހުވަފެނަކުންވެސް އޭނާ ނުދެކޭހައި މުއްސަނދިކަމެކެވެ. ރަށުގައިހުރި ފިހާރައިން ކައިގެން ބޮއެގެން އުޅެވުނު ނަމަވެސް އޭނާ ހިތްހަމަޖެހޭވަރުގެ މަންފާއެއް ނުލިބެއެވެ. މަންފާލިބެނީ ޖަމާލު މާލޭގައި ކުރާ ވިޔަފާރީއާއި މަސްދޯނިންނެވެ. މިހާރު އެހުރިހާ އެއްޗެއް އޭނާއަށް މިލްކުވީއެވެ. ހާރިޝްއަށް އެކަނި ވިޔަފާރީގެ ކަންކަމާއި ދޯނީގެ ކަންކަން ބަލަން އުނދަގޫވާނެތީ، ގްރޭޑް ދިހައެއް ނިމުމާއެކު،ޖަމީލުގެ ހަގު ފިރިހެންދަރި ހަމްޒާވެސް މާލެފޮނުވިއެވެ.
”ދަރިފުޅާ! ތިއައީ ޖަމާލުގެ މުދާކަން އަބަދުވެސް ހަނދާންކުރާތި!….ޖަމާލުގެ ޔަތީމު ދަރިއަށް ހެޔޮކޮށް ކަންތައްކުރާތި!“ ޖަމީލުގެ ބައްޕަގެ އެންމެފަހުގެ ވަސިއްޔަތަކީވެސް އެއީއެވެ. ބައްޕަ ދުނިޔޭގައި ޖިނާހްއަށާއި ޝަކީލާއަށް ޖަމީލު ރަނގަޅަށް ކަންތައްކުރި ނަމަވެސް ބައްޕަ ނިޔާވުމާއެކީގައި ޖަމީލު އެ ވަސިއްޔަތް ހަނދާން ނައްތާލިއެވެ.
އޭނާގެ މުއްސަނދިކަން ރަށާއި އަތޮޅަށްވެސް މަޝްހޫރުވުމާއެކު އޭނާއަށް އޭނާގެ ފެންވަރުވެސް އޮޅުނެވެ. ކުއްލިއަކަށް ލިބުނު މުއްސަނދިކަމުގެ ސަބަބުން ރަށުގައި އެންމެ ކަމުވޮށީގެންވާ މީހުންގެ ތެރޭގައި ޖަމީލުގެ އާއިލާވެއްޖެއެވެ. ކުރިން ދުވަހަކުވެސް ޖަމީލުއާ ގުޅުމެއް ބާއްވަން ބޭނުންނުވާ މީހާވެސް އޭނާއާއި ރަޙުމަތްތެރި ވެއްޖެއެވެ.
ރަށަށް ބަދަލުވުމާއެކު ޖިނާހްގެ ދިރިއުޅުން އެކޮޅު ކޮޅުން ޖެހުނެވެ. އޭނާގެ ބައްޕަ ދުނިޔޭގައިހުރިއިރު އޭނާއަށް ލިބުނު ކަހަލަ އެއްވެސް އުފަލެއް ހިތްހަމަޖެހުމެއް އޭނާއަކަށް ނުލިބުނެވެ. އޭނާގެ މަންމަ ފިޔަވައި އޭނާދެކެ ލޯބިވާނެ މީހަކުވެސް ނުވިއެވެ. އޭނާގެ ކާފަ ދުނިޔޭގައި ބޮޑުބޭބެ އޭނާއާއިމެދު ރަނގަޅަށް ކަންތައްކުރި ނަމަވެސް ކާފަ ނިޔާވުމާއިއެކީ ބޮޑުބޭބެ މުޅީން ބަދަލުވެއްޖެއެވެ.
އޭނާއާ ދިމާއަށް ކަމަކާނުލައިވެސް އަޑުލައި ހަދަންފެށިއެވެ. ބޮޑުބޭބެގެ ހަގުދަރި ހަމްޒާ ރަށަށް އަންނަ ކޮންމެ ފަހަރަކު އޭނާއަށް އެތައް ގޯނާއެއްކޮށް އަނިޔާވެސް ކުރެއެވެ. ހަމްޒާއަކީ އޭނާއަށްވުރެ ފަސް އަހަރު ބޮޑު މީހެއް ނަމަވެސް އޭނާއަށް ބޭބެއެއް ކަމުގެ އިހުސާސެއްވެސް ނުކުރެވެއެވެ. ރަށުގެ ކުޑަކުދިންނާއި ހަމްޒާގެ އުމުރުގެ ޒުވާނުން ލައްވައި އޭނާއަށް މަލާމާތްކޮށް ކޮންމެ ދުވަހަކުހެން އޭނާ ރޮއްވާލައެވެ.
އެހެންކަމުން އޭނާ އެއްގޮތަކަށްވެސް ބޭރަށް ނުނުކުމެ އުޅެންފެށިއެވެ. އަދި މީހަކު ވާހަކަދެއްކިޔަސް ވާހަކަ ނުދައްކާ ހުންނަން ފެށިއެވެ. އުފަންވުމުގައި މަންމަނަކަށް ނުވީނަމަވެސް ރަށުގެ އެންމެންގެ ނަޒަރުގައި މިހާރު އޭނާއަކީ މަންމަނެކެވެ. ޚުދު އޭނާވެސް ގަބޫލުކުރަނީ އެގޮތަށެވެ. އޭނާއަށް އެބައެއްގެ ހިމާޔަތާއި ލޯބި އެންމެބޮޑަށް ބޭނުންވި މީހުންގެ ފަރާތުން އޭނާއަށް ލިބުނީ ނަފްރަތާއި ފޫހިކަމެވެ.
މަލާމާތާއި ފުރައްސާރެއެވެ. އެކަންކަން ހުއްޓުވަން އޭނާގެ މަންމަ ކިތަންމެ ބޭނުންވި ނަމަވެސް، އެމަންމަވެސް ވަނީ އެމީހުންގެ ކުރިމަތީގައި މަޖުބޫރުވެފައެވެ. ނަތީޖާއެއްގެ ގޮތުން އޭނާ މީހުންނާ އެކަހެރިވާން ފެށިއެވެ. އެއްއުމުރުގެ ކުދިންނާވެސް ގުޅުމެއް ނުބާއްވައެވެ. އުމުރުން ތޭރައަހަރުވީއިރު ސުކޫލަށް ދިއުންވެސް ހުއްޓާލައިފިއެވެ. އޭގެފަހުން އޭނާ ގިނަ ވަގުތު ހޭދަކުރަނި ގޮނޑުދޮށުގައާއި ވަލުތެރޭގައެވެ.
މޫދަށް ގޮސް ފީނުމާއި މަސްހިފުމަކީ އޭނާ ނުހަނު ކުރާހިތްވާ ކަމެކެވެ. ދޮންމަދު މޫސުމުގައި މަދުބިންނަން ގަސްގަހަށް އަރައެވެ. ވަލުތެރޭގެ ހުރިހާ ސަރަހައްދެއްވެސް އޭނާއަށް ހިތުދަހެވެ. ކުއްޅަވަށްފަލުން ކުއްޅަވަށް ބިނުމާއި ދަނބުގަހުން ދަނބު ބިނުމާއި ނިކަ ގަސްގަހުން ނިކަބިނުމަކީ އެހެންކުދިންނަށް ނުހަނު އުދަގޫ ކަމަކަށް ވިޔަސް އޭނާއަށް ދާދި ފަސޭހަކަމެކެވެ.
ނުނިމޭ- ވާހަކަ ކަމުދިޔަ ނަމަ fenvaru.mv ގެ އެފްބީ ޕޭޖަށް ލައިކެއް ދެއްވާ. އަދި ވާހަކަ ޝެއަރ ކޮށްލަދެއްވާ.
