މިފެންނަނީ ހުވަފެނެކޭ ހިތައި ޝާނީއަށް ދެތިން ފަހަރު އެސްފިޔަވެސް ޖަހާލެވުނެވެ. ނަމަވެސް ޖިނާހް އަދިވެސް އެބަހުއްޓެވެ. ޝާނީ ބަލަން ހުއްޓައި ޖިނާހް ދެކޮޅު ހޯދާ ބަލާލުމަށްފަހު ދުވެފައި އޭނާގެ ގާތަށް އައެވެ. އަދި ޝާނީއަށް ހަރަކާތެއްވެސް ކުރަން ނޭނގިހުއްޓައި އެއައި ގޮތަށް އައިސް އޭނާ އުރާލިއެވެ. އެއީ ހުވަފެނެއްނޫންކަން ޔަޤީންވުމުން ޝާނީއަށްވެސް ބޭއިޚްތިޔާރުގައި ޖިނާހްގެ ކަރުގައި އޮޅުލައިގެންފައި ރޯންފެށިއެވެ. އެވަގުތު ކުޑަ ހިނދުކޮޅަކަށް ނަމަވެސް އޭނާއަކީ ހަމްޒާގެ އަނބިމީހާކަންވެސް ހަނދާންނެތުނެވެ. ޖިނާހް އެގޮތުގައި ޝާނީ އުރައިގެން އިރުކޮޅަކު ހުރުމަށްފަހު ތިރިކޮށްލިއެވެ. އަދި އޭނާގެ މެޔާލައި ޝާނީ ބޮނޑިކޮށްލަމުން ޝާނީގެ ބުރަކަށީގައި ފިލުމާލައި ޝާނީ މަސަލަސްކުރަން މަސައްކަތްކުރިއެވެ. ޝާނީވެސް އޭނާގެ ދެއަތުން ޖިނާހްގެ އުނަގަނޑުގައި ވަށާލަމުން ކުރިޔަށްވުރެ ބޮޑަށް ރޯންފެށިއެވެ. އޭނާގެ ހިތުގައިވާ ހުރިހާ ޝަކުވާއެއް ކަރުނައިގެ ސިފައިގާ އެއްފަހަރާ ބޭރުކުރަން އުޅުނުފަދައެވެ.
ޖިނާހް ކުޑަކޮށް ޝާނީ ދުރުކޮށްލަމުން ޝާނީގެ ކަރުނަތައް ފުހެލަދިނެވެ. އަދި ލޯތްބާއެކު ނިތްކުރީގައި ބޮސްދިނެވެ. ދެންވެސް ޝާނީގެ ރުއިން ހުއްޓޭގޮތެއް ނުވިއެވެ. އޭނާވަނީ ނުހަނު ބޮޑަށް ހިތުގައި ޖެހިފައެވެ. ޝާނީ ރޯވަރުން ޖިނާހް ނުހަނު ކަންބޮޑުވެ، ދެރަވެސް ވިއެވެ. އޭނާ ނުފެނި އެހުރިހާ ދުވަސްވުމުން ޝާނީ މާބޮޑަށް ދެރަވީކަމުގައި އޭނާއަށް ގަބޫލުކުރެވުނެވެ. ޖިނާހް ކުޑަކޮށް ގުދުވެލަމުން ޝާނީމޫނުގައި ދެއަތުން ހިފަހައްޓާލިއެވެ. އަދި ޝާނީއާއި ހަތަރުކަޅި ހަމަކޮށްލަމުން ހުއްޓާލަމުން ޝާނީގެ ތުންފަތުގައި ބޮސްދިނުމަށް އުޅުނެވެ. ޝާނީއަށްވެސް ޖިނާހްގެ ހަރަކާތަށް އިޖާބަދިނުމުގެ ގޮތުން ލޯމަރާލެވުނީ ބޭއިޚްތިޔާރުގައެވެ. ހަމަ އެވަގުތު ގޭތެރެއިން ސަލްމާ ޝާނީގެ ނަމުން ގޮވާލުމާއެކު ސިހިފައި ޝާނީއަށް ޖިނާހްއާ ދުރަށް ޖެހެވުނެވެ. އޭނާއަށް ހަމަހޭވެރިކަންވެ، ކުރަން އުޅެވުނު ކަންތައް ހިތަށްއެރުމާއެކު ކަންބޮޑުވެފައި އަނގަމަތީ އަތްއަޅާލެވުނެވެ. އޭނާއަކީ މިހާރު ޖިނާހްގެ މީހެއް ނޫންކަމާއި ހަމްޒާގެ މިލްކެއްކަން ހަނދާންވުމާއެކު އޭނާ ކަންބޮޑުވެފައި ފަހަތަށް ޖެހުނެވެ. ކުއްލިއަކަށް ޝާނީއަށް ވީގޮތެއް ނޭނގި ކަންބޮޑުވެފައިހުރެ ޝާނީއާ ގާތަށް ފިޔަވަޅެއް އަޅާލި ވަގުތު، ކުއްލިއަކަށް ޝާނީ ދުވެފައި ގޭތެރެއަށް ވަނެވެ. ޖިނާހް ހައިރާންކަންމަތީ އިރުކޮޅަކު ބަލަންހުރެފައި ޝާނީގެ ފަހަތުން ގޭތެރެއަށް ވަނެވެ. ނަމަވެސް ޝާނީ ހަލުވިކަމާއެކު ދުވެގޮސް ގޯތީގެ ބިއްދޮށަށް ނުކުތެވެ.
“ ޝާނީ! ޝާނީ…ކިހިނެއްތަވީ؟“ ޝާނީގެ ފަހަތުން ދިޔަ ޖިނާހްއަށް ހުއްޓެވުނީ ސަލްމާގެ ގައިގާ އޮޅުލައިގެނެންހުރެ ޝާނީ ރޯމަންޒަރު ފެނުމުންނެވެ. ސަލްމާ ޝާނީއަށް ވީގޮތެއް އޮޅުން ފިލުވަން މަސައްކަތްކުރަމުން ދިޔައެވެ.
“ ކިހިނެއްތަވީ؟…ކީއްވެތަ ތިރޮނީ؟…“ ސަލްމާ ކަންބޮޑުވެފައި އަނެއްކާވެސް އެހިއެވެ. ޝާނީ އެއްވެސް ޖަވާބެއްނުދީ ރޮމުން ދިޔައެވެ. އޭނާ ހިތުގައި ޖެހިފައިހުރިވަރުން ވާހަކަ ދެއްކޭވަރެއް ނޫނެވެ. ސަލްމާ ނޫން އިތުރު މީހަކު ނެތުމުން ޖިނާހް މަޑުމަޑުން އެމީހުނާ ދިމާއަށް ހިނގައިގަތެވެ.
“ ޖިނާހް!…“ ޖިނާހް ފެނުމާއެކު ސަލްމާއަށް މަޑުމަޑުން ބުނެވުނެވެ. ޝާނީއަށް ވީގޮތްވެސް އޭނާއަށް ރޭކާލީ ދެނެވެ. ޖިނާހް ކައިރިއަށް އަންނަން ފެށުމުން ސަލްމާ އިޝާރާތުން ނައުމަށް އެދުނެވެ. ވަގުތުން ޖިނާހްގެ ފިޔަވަޅުތަކަށް ހުއްޓުމެއް އައެވެ. ސަލްމާ އޭނާ ޝާނީގެ ގާތަށް ދިއުން މަނާކުރީތީ އޭނާ ހައިރާންވެސް ވިއެވެ. ޖިނާހް ދުރުގައި ބަލަން ހުރުމުންވެސް ސަލްމާއަކަށް ކަމަކު ނުދިޔައެވެ. އޭނާ އެތަނުން ދިއުމަށް ސަލްމާ އެދުނެވެ. ޖިނާހް އެގޮތް ބޭނުންނުވެ ހުރެވެސް އޭނާ އެތަނުން ދިޔައެވެ. ދަތުރުގެ ވަރުބަލިކަމާއެކު ނުނިދާހުރުމުގެ ސަބަބުން އޭނާހުރީ ނުހަނު ބޮޑަށް ލޮޑުވެފައެވެ. އެހެންކަމުން އޭނާ ކޮޓަރިއަށް ދިޔައެވެ.
އެނދުގައި އޮވެގެން އޭނާ ވިސްނަމުން ދިޔައެވެ. ރޭގެ މެންދަމު ފަހުގެ ވަގުތެއްގައި އޭނާ ރަށަށް އައިކަން އެނގޭނީވެސް މަދު ބަޔަކަށެވެ. ޝާނީ އެހާ ހެނދުނާ އެގޭތެރެއިން ފެނުމުން އޭނާ ހައިރާންވިއެވެ. ޝާނީ އައީ އޭނާ އަންނަކަން އެނގިގެން ބާއެވެ. ނޫނީ އެއީ ޝާނީގެ އާދައަކީބާއެވެ. އޭނާގެ އިންތިޒާރުގައި ޝާނީ ހެނދުނާއި ހަވީރުވެސް އެގޭގައި ހޭދަކުރަނީބާއެވެ. އެފަދަ ދިގު އިންތިޒާރެއް ކުރުވަން ޝާނީއަށް ޖެއްސުނީތީ އޭނާ ދެރަވިއެވެ. ޝާނީ އެ ރޯ ރުއިމަކީ އެކަމުގެ އަސަރެވެ. އޭނާއާމެދު ޝާނީގެ ހިތުގައި އެތައް ޝަކުވާއެއް ވާކަން ކަށަވަރެވެ. ނޫންނަމަ ޝާނީ އެވަރަކަށް ނުރޯނެއެވެ. އޭނާ ނެތުމުން އެކަމުގެ ހިތާމަ ޝާނީކޮށްފައިވާކަން ޝާނީގެ ނިކަމެތިވެފައިވާ ހަށިގަނޑުންވެސް އޭނާއަށް ދޭހަވިއެވެ. އޭނާ ދިޔައިރު ދުޅަހެޔޮ ސިއްޚަތެއްގައިހުރި ކުއްޖާ މިހާރު ހުރީ ހިކި އަނަރޫފަ ވެފައެވެ. ޝާނީގެ ގައިގާ ބައްދާލި ވަގުތު އޭނާއަށް އެކަން ވަރަށް ރަނގަޅަށް އިހުސާސްވިއެވެ.
އޭނާވެސް ޝާނީއާ ނުލައި ހޭދަކުރީ ނުހަނު އެކަނިވެރި ދުވަސްތަކެކެވެ. މަންމަގެ ބަލިހާލުހުރި ގޮތުން، މަންމައަށް ޚިދުމަތްކޮށްދޭން ޖެހުމުން އޭނާއަށް ޝާނީއާމެދު ވިސްނާ ހިތާމަކުރަން މާގިނަ ވަގުތެއް ނުލިބެއެވެ. ނަމަވެސް އޭނާ އެންމެ ހިނދުކޮޅަކަށްވެސް ޝާނީގެމަތިން ހަނދާނެއް ނުނެތެވެ. ނިދަން އޮންނަ ވަގުތުތަކުގައި ޝާނީގެ ހަނދާންތައް އޭނާއަށް އުނދަގޫކުރެއެވެ. އޭނާ ދުވަސްތައް ގުނަމުން ދިޔައީ ޝާނީއާ ބައްދަލުވާނެ ދުވަހެއްގެ އިންތިޒާރުގައެވެ. ޝާނީ ހިތްހަމަޖެހޭ ވަރަށް ރޮވުމުން ހަމައަކަށް އެޅޭނެކަމަށް ބަލާފައި ޖިނާހް ހިތްހަމަ ޖައްސާލިއެވެ. ދެން އޭނާ ޝާނީއާ ބައްދަލުކުރާއިރު އެމޫނުން އޭނާއަށް އުފާވެރިކަން ފެންނާނެކަމުގައި ޔަޤީންކޮށްގެން އޮވެ އޭނާ ލޯމަރާލިއެވެ.
“ ދޮންތާ….އަހަރެން ކިހިނެއް އުޅޭނީ މިހެން….ކިހިނެއް އަހަރެން ޖިނާހްއާ ކުރިމަތިލާނީ؟ ހަޤީޤަތް އެނގުނީމާ އޭނަ އަހަރެންނަށް ނަފްރަތުކުރާނެ! ދުވަހަކުވެސް މާފެއްނުކުރާނެ! ޖިނާހްގެ ނަފްރަތަކަށް އަހަރެންނަށް ކެތެއްނުކުރެވޭނެ!….އަހަރެން މަރުވެދާނެ ދޮންތާ!…“ ޝާނީ ރޮއެރޮއެފައި ބުނަމުން ދިޔައެވެ.
“ ޝާނީ….ކެތްކުރަންވާނެ!…ކޮންމެގޮތެއްވިޔަސް ޖިނާހްއާ ކުރިމަތިލާން ޝާނީއަށް ޖެހޭނެ….މިދުވަސް އަންނާނެކަން ޝާނީއަށް އަބަދުވެސް އެނގޭނެ….ކެތްކުރޭ! ޖިނާހްއަށް ހަޤީޤަތް ހާމަވީމަ ދެރަވިނަމަވެސް އޭނާ ޝާނީއަށް މާފްކުރާނެ…އޭނައަށް އެނގޭނެ ޝާނީ ދުވަހަކުވެސް އޭނައަށް ބޭވަފާތެރިނުވާނެކަން….އަހަރެން ހަޤީޤަތް ހާމަކޮށްދޭނަން….ޝާނީ ބުނީމެއްނު ހުރިހާ އެއްޗެއް ފޮތުގަ ލިޔެފަ އޮންނާނޭ…..އެފޮތް ދިނީމަ އޭނައަށް ހުރިހާ ހަޤީޤަތެއް އެނގޭނެއްނު….ޖިނާހް ޝާނީއަށް މާފްކުރާނެކަން ޔަޤީން…“ ސަލްމާ ޝާނީއަށް ހިތްވަރުދިނެވެ.
“ ޖިނާހް މާފު ކުރިޔަސް އަހަރެން ކިހިނެއް މިހެން އުޅޭނީ؟…ކިހިނެއް ޖިނާހްގެ ކުރިމަތީގަ އެހެންމީހެއްގެ ހައްޤަކަށްވެގެން އުޅޭނީ…..އަހަންނަކަށް ނުވާނެ ކެތެއް….ޖިނާހް ނާންނައިރު އަހަރެން ހީކުރިން، އަހަރެންނަށް ކެތްވެދާނޭ….ކެތްކުރާނަމޭ….އެކަމު އޭނަ ފެނުމާއެކު އަހަރެންގެ ކެތްތެރިކަން ކޮޅުންލައިފި….އޭނާ އަހަރެންގެ ގައިގާ ބައްދާލުމާއެކު ހުރިހާކަމެއް އަހަރެން ހަނދާން ނެތުނު….ހަމްޒާގެ އަނބިމީހާކަންވެސް ހަނދާން ނެތުނު…ޖިނާހްގެ މީހަކަށް ވެވެން ނެތްއިރު، ހަމްޒާއަށް ވަފާތެރި ވެވޭނެ ކަމުގެ ޔަޤީންކަމެއްވެސް އަހަރެންގެ ނެތް….ޖިނާހް އަހަރެންނާ ގާތްވެއްޖެނަމަ އަހަރެންނަށް ދުރަކު ނުހުރެވޭނެ….އަހަރެން ކިހިނެއް ހަދާނީ؟….އަހަރެން ފާފަވެރިވެދާނެ ދޮންތާ؟…އަހަރެން ކިހިނެއް ހަދާނީ؟…“ ގިސްލަ ގިސްލާފައި ޝާނީ ކުރަމުން ދިޔަ ޝަކުވާގެ އަޑުއިވިފައި ސަލްމާގެ ލޯވެސް ފެންކަޅިވިއެވެ. ނަމަވެސް ޝާނީގެ ކުރިމަތީގައި ރޯކަށް އޭނާ ބޭނުމެއްނޫނެވެ. މިއަދު ޝާނީއަށް ހިތްވަރުދޭންހުރި މީހަކީ އޭނާއެވެ.
“ ޝާނީ…ވަގުތަކީ ހުރިހާ ހިތާމައެއްގެވެސް ފަރުވާ….ކެތްތެރިވޭ! މިވަގުތުވެސް ފާއިތުވާނެ…ކެތްތެރިވާންވެސް ދަސްވާނެ….ޖިނާހްއަކީ މިހާރު ޝާނީއަށް ހިލޭމީހެއް….އެލޯތްބަކީވެސް ޝާނީއަށް ހަރާމް އެއްޗެއް….އެކަން އަބަދުވެސް ހަނދާނުގަ ބަހައްޓާ!…ހަމްޒާދެކެ ކިތަންމެ ނަފްރަތު ކުރިޔަސް، މިހާރު އެއީ ޝާނީގެ ހަލާލު ފިރިމީހާ….ޝާނީގެ މައްޗަށް ފުރިހަމަ ބާރާއި ހައްޤު އޭނާއަށް ލިބިގެންވޭ….ލޯބިނުވާ މީހަކާ އިނދެގެން އުޅުމަކީ ކިހާ ހިތްދަތިކަމެއްކަން ޚުދު އަހަރެންވެސް މިދަނީ ތަޖުރިބާކުރަމުން….އެކަމު އަހަރެންނަށް އެނގޭ ޝާނީގެ ހާލަތާ އަހަރެންގެ ހާލަތު ހާސްބައި ތަފާތުކަންވެސް….ޖިނާހްގާތު ބުނޭ ޝާނީއާ ދުރުގަ ހުންނާށޭ! ޝާނީގެ މަތިން ހަނދާން ނައްތާލާށޭ!…ޝާނީއަށް އިންތިޒާރު ނުކުރާށޭ!….އެއީ މިއަދު އޮތްގޮތަކީ…“ ކަންއޮތް ގޮތް ސަލްމާ ހާމަކުރިއެވެ.
“ ދުލުން ބުނެލާހާ ފަސޭހަކަމެއްނޫނޭ އެއީ….ކިހިނެއްތަ ތާއަބަދު ކުރިމަތީ ފެންނަން ހުންނަ މީހަކު ހަނދާން ނައްތާލަނީ؟..އެއީ ވާނެކަމެއްނޫން….އަހަރެންނަށް ދުވަހަކުވެސް ހަމްޒާދެކެ ލޯބި ނުވެވޭނެ….ހަމްޒާއާ އިނުމުގެ ކުރިން އަހަރެން މަރުވިނަމައޭ ހިތަށްއަރާ….އެހެންނަމަ މިއަދު މިހިތާމަ ކުރާކަށް ނުޖެހޭނެ….އަހަރެން ހީކުރިން ކޮންމެވެސް ގޮތަކުން މިކައިވެނި ހުއްޓުވޭނެކަމަށް….އަހަރެންނަށް އެހާ ހިތްވަރު ނުލިބުނަސް ދޮންތަ މިކައިވެނި ހުއްޓުވާނެކަމަށް އަހަރެން ވަރަށް އުއްމީދުކުރިން….އެކަމު…“ އެހިސާބަށް ބުނުމާއެކު ޝާނީގެ އަޑުބެދުނެވެ.
“ ޝާނީ…ނެތްކަމެއް ތަޤުދީރުގަ ވާކަށް ނުވެސް އޮންނާނެއޭ، އެއްކަމެއްވެސް ނުހިނގައޭ ތަދުބީރު ކުރެހި ޕްލޭނަކުން…ޅެންވެރިޔަކު ބުންޏަސް އެއީ ވަރަށް ބޮޑު ހަޤީޤަތެއް….ޝާނީއަކަށް ނޭނގޭނެ ތިކައިވެނި ހުއްޓުވަން އަހަރެންވެސް ކުރި މަސައްކަތެއް….އެކަމަށް އަހަރެންނަށް ދިމާވި ގޮންޖެހުންތަކެއް…..އެންމެ ފަހު ވަގުތު ހިތާހިތުން ދުޢާކުރިން ކައިވެނި ހުއްޓޭނެގޮތެއް ވޭތޯ….“ ހަމްޒާގެ ނުބައިކަން ހިތަށް އެރުމާއެކު ސަލްމާއަށް ދަތްކުނޑި ވިކާލެވުނެވެ. ނަމަވެސް ހަޤީޤަތް ހާމަނުކޮށް އޭނާ ކެތްކުރިއެވެ. ވެގެން ވިއްޔާ އުމުރަށްވެސް އޭނާ އެކަން ސިއްރުކުރާނެއެވެ.
“ އަހަރެންވެސް މަސައްކަތްކުރިން….ނޯޓެއް ލިޔެފަ ބައްޕައަށް ދޭށޭ ކިޔާފަ މަންމައަށްވެސް ދިނިން…އެކަމު މަންމައާ ބައްޕައަށް ހަޤީޤަތް އެނގުމުން އެމީހުން މިކައިވެނި ހުއްޓުވާކަށް ބޭނުމެއްނުވި….އިއްޒަތާ އަބުރަށްޓަކާ އަހަރެން ޤުރުބާންކުރީ…“ ލޯފުހެލަމުން ޝާނީ ބުންޏެވެ.
”ޝާނީއަށް ހަމަ ޔަޤީންތަ ބައްޕަ އެނޯޓް ކީކަން؟….ބައްޕައަށް ހަޤީޤަތް އެނގުނު ނަމަ ހުއްޓުވާނެކަން ޔަޤީން…އަހަރެން ގަބޫލެއް ނުކުރާނަން ތި ވާހަކައެއް…..މަންމަ ތިނޯޓް ބައްޕައަށް ނުދެނީކަމަށް ވާނީ…..“ ސަލްމާ އޭނާއަށް ހީވާގޮތް ހާމަކުރިއެވެ.
“ ވެދާނެ ތިހެންކަމަށްވެސް….އެކަމު މަންމަ ބުނި ބައްޕަވެސް ބުންޏޭ ކައިވެނި ނުކޮށްފިނަމަ ބަދުނާމުވާނީ އަހަރެންނޭ….އަންހެންކުއްޖެއްގެ އިއްޒަތާ އަބުރަށްވުރެ މުހިއްމު އެއްޗެއް ނޯންނާނޭ….މިއީ މަންމަ ބުނިގޮތް…“ ޝާނީ އޮޅުން ފިލުވައިދިނެވެ.
“ އެހެންވިޔަސް ހެޔޮ….އަހަރެންގެ ހިތްބުނަނީ ބައްޕައާ ހަމައަށް ތިނޯޓް ނުފޯރަނީއޭ….ނޫންނަމަ ހަމްޒާގެ ވިޔާނުދާކަން އެނގުނީމަ ބައްޕަ އެގޮތަށް މަޑަކުން ނުހުންނާނެ….ބައްޕައަކީ އަބަދުވެސް އިންސާފަށް ލޯބިކުރާ މީހެއް….ކުރިންވެސް ބުންޏެއްނު ޝާނީ ނުރުހޭ މީހަކާ ގަދަކަމުން ކައިވެނި ނުކުރުވާނަމޭ…“ ސަލްމާ އަނެއްކާވެސް ބުނެލިއެވެ.
ޝާނީ ވިސްނާލިއެވެ. ތެދެކެވެ. ހަމްޒާކުރި ވިޔާނުދާ ކަންތައް އެނގުނުނަމަ ބައްޕަ ހަމްޒާދެކެ ރުޅިނައިސް ނުހުރީހެވެ. ހަމްޒާއާ ދިމާއަށް އެއްޗެއް ނުބުނެއެއްވެސް ނުހުންނާނެއެވެ. އޭނާގެ ކައިވެނީގެ ނިންމުމަކީ މަންމަގެ ނިންމުމެއް ކަމުގައި ޝާނީގެ ހިތްވެސް ބުނަން ފެށިއެވެ.
“ އެކަމު ދޮންތާ….މަންމަ ހަމަ އެގޯސްކޮށް ކަންތައް ކޮށްފާނެތަ؟….މަންމައަށް ހުރިހާކަމެއް އެނގިހުރެ ކީއްވެ އެގޮތަށް ކަންތައް ކުރަންވީ؟…އަހަރެން ލޯބިވަނީ ޖިނާހް ދެކެކަންވެސް ރަނގަޅަށް މަންމައަށް އެނގޭނެ….މިގެއަށް އައިސް ޖިނާހްގެ ކުރިމަތީ މިގޮތަށް އުޅެން ޖެހޭނެކަން ވެސް މަންމައަށް ރަނގަޅަށް އެނގޭނެ….ދެން ކީއްވެ މަންމައަށް ނުވިސްނެންވީ؟…މަންމަ އަހަރެންދެކެ ލޯބިވާނަމަ އެގޮތަށް ކަންތައް ނުކުރާނެ….އަހަރެން މަންމަޔާ ސުވާލުކުރާނަން….“ މަންމަ އޭނާއާމެދު އެހާ އިހާނެތިކޮށް ކަންތައް ކޮށްފާނެކަމަކަށް ޝާނީއަކަށް ގަބޫލެއް ނުކުރެވުނެވެ. ޝާނީ ކުރި އާދޭހައި ރުއި ރުއިން ފެނިފައިވެސް މަޔަކަށް އެފަދަ ނިންމުމެއް ނިންމާކަށް ނުކެރޭނެއެވެ.
“ ޝާނީ….މިހާރު ތި ސުވާލު ކުރުމުގެ ފައިދާއެއްވެސް ނެތް….ދެން ކަންތައްކުރަންވީ ގޮތަކާމެދު ވިސްނާ!….ޖިނާހްއާ ކުރިމަތިލާނެ ގޮތަކާމެދު ވިސްނާ!….“ ޝާނީގެ ކޮނޑުގައި އަތްބާއްވާލަމުން މަޑުމައިތިރިކަމާއެކު ސަލްމާ ބުންޏެވެ.
“ އަހަރެން ދުވަހަކުވެސް ހިތުން ރުހުމުން ހަމްޒާއާއެކު ނޫޅޭނަން….ދުވަހަކުވެސް ލޯތްބެއްނުވާނަން އޭނާދެކެއެއް….ދުވަހަކުވެސް މާފެއްވެސް ނުކުރާނަން…ޖިނާހް ނޫން މީހަކުދެކެ ދުވަހަކުވެސް ލޯތްބެއް ނުވެވޭނެ….އޭނަ އަހަރެންނާ ގަދަކަމުން ކައިވެނިކުރީތީވެސް ދުވަހަކުވެސް އޭނާއަށް އުފަލެއް ނުދޭނަން….އަހަރެންވެސް ބަލާލަން އަހަންނާއެކީ އޭނައަށް ކިހާ ދުވަހަކު ކެތްކުރެވޭތޯ…“ ރުޅިވެރިކަމާއެކު ޝާނީ ބުނެލިއެވެ.
“ ޝާނީ މޮޔަކަމެއް ނުކުރާތި! ހަމްޒާއާ ޖަދަލުކޮށްގެން ޝާނީއަށް ކުރިއެރުމެއް ނުލިބޭނެ….އެކަން ކުރިންވެސް ތަޖުރިބާކުރީމެއްނު! އޭނާ ބޭނުންގޮތެއް ޝާނީއަށް ހަދާނެ….ބޭނުންކަމެއް ކުރާނެ!….އޭނާ ބުނާގޮތް ނުހަދައިފިނަމަ އަނިޔާވެސް ކޮށްފާނެ….އެއީ ރަޙުމެއްހުރި މީހެއްނޫން…“ އަމިއްލަ ތަޖުރިބާއިން ސަލްމާ ވާހަކަ ދެއްކިއެވެ.
“ އަހަރެން ބިރެއްނުގަނޭ….އޭނައަށް ދުވަހަކުވެސް އަހަރެންގެ ފަރާތުން ލޯތްބެއް ނުލިބޭނެ….އޭނަ ގަދަކަމުން ބޭނުންކަމެއް ކުރެވިދާނެ….އަހަރެންގެ ޖިސްމު ހާސިލް ކުރެވިދާނެ، އެކަމު އަހަރެންގެ ހިތެއް ދުވަހަކުވެސް މިލްކެއް ނުކުރެވޭނެ….ލޯތްބެއް ދުވަހަކުވެސް ހާސިލެއް ނުކުރެވޭނެ….“ ގަދަ އަޒުމާއެކީ ޝާނީ ބުނެލިއެވެ.
“ ލޯތްބަކީ އެކަހަލަ މީހުންގެ ނަޒަރުގަ މާނައެއްހުރި އެއްޗެއްނޫން….އެމީހުން ބޭނުންވަނީ ލައްޒަތު އެކަނި…“ ހަމްޒާ ކުރިން ބުނެފައިވާ ބަހެއް ހަނދާންވެފަ ސަލްމާ ބުނެލިއެވެ.
“ ލޯތްބާ ނުލާ ތިބުނާ ލައްޒަތަކީވެސް އަގެއްހުރި އެއްޗެއްނޫން….އެކަން އެނގޭނީ ދުވަހަކުވެސް ލޯތްބެއް ތަޖުރިބާކުރި މީހަކަށް އެކަނި….“ ވަރަށް އެނގޭ މީހަކު ފަދައިން ޝާނީ ބުނެލުމުން ސަލްމާއަށް ބުނާނެ އެއްޗެއް ނޭނގުނެވެ. ޝާނީ އެބުނީ ކިހާބޮޑު ތެދެއްކަން ޚުދު އޭނާއަށް އެނގެއެވެ.
ހާތަލާއި ކެރިގެން ކުރިމަތި ލުމަށް ޝާނީ އަޒުމް ކަނޑައެޅިއެވެ. އޭނާގެ ނިކަމެތިކަމާއި މަޖުބޫރީގެ ފައިދާ ހަމްޒާ ނެގިޔަދޭކަށް އޭނާ ފުރުސަތެއް ނުދޭނެއެވެ. އޭނާ އެކަން ސާބިތުވެސް ކޮށްދޭނެވެ. ގޯތިތެރެކުނި ކަހާ ނިންމުމަށްފަހު ޝާނީ އޭނާގެ ގެޔަށްދިޔައެވެ. އަދި އޭނާގެ ކޮޓަރިއަށްވަދެ އޭނާ ބޭނުންވާ ފޮތް ހިފައިގެން ނުކުތެވެ. އޭނާ އެފޮތް ހިފައިގެން އައިސް ހަމްޒާއަށް ނުފެންނާހެން ފޮރުވިއެވެ. އަދި ރަނގަޅު ދަނޑިވަޅަކަށް އިންތިޒާރު ކުރަމުން ދިޔައެވެ. މެންދުރުވުމަކާއި ގާތްވެފައި ވަނިކޮށް ހަމްޒާ ހޭލައިގެން ކޮޓަރިން ނުކުތެވެ. އޭރު ޝާނީހުރީ ހަމްޒާއަށް ސައި ތައްޔާރުކޮށްފައެވެ. އާދައިގެމަތިން ހަމްޒާ ސައިބޮއެގެން ބޭރަށް ނުކުތް ވަގުތު ޝަކީލާ ފެނިފައި އޭނާ ސިހުނެވެ.
“ ކޮންއިރަކު ބޮޑުބެ ދައްތަ އައީ؟…ނުވެސް އެނގޭ އައިކަމެއް…ކޮބާ ޖިނާހް؟…“ ހަމްޒާ އަވަސް އަވަހަށް އެހިއެވެ. އޭނާ ބޭނުންވީ ޝާނީއާއި ޖިނާހް ދިމާވިތޯ ޔަޤީންކުރާށެވެ.
“ ރޭގަ މެންދަމު ތިނެއްވެސް ޖެހިފަހުން….އެހާ ލަސްވެފަހުރީމަ އެއްވެސް މީހަކަށް ނުގޮވީ….“ ޝަކީލާ އޮޅުން ފިލުވައިދިނެވެ.
“ އެހެންތަ؟….ކިހިނެއްތަ މިހާރު ބޮޑުބެދައްތަ؟….ޖިނާހް ކޮބާތަ؟…އޭނައެއް ނުދެކެން އަދި…“ ވަރަށް ގާތްގޮތަކަށް ހަމްޒާ ވާހަކަ ދެއްކުމުން ޝަކީލާ ހައިރާންވެސް ވިއެވެ.
“ ޖިނާހް އަދިވެސް ނިދާފަ އޮތީ….ރޭހަތަރުދަމު ހޭލާ އުޅުމުން ނުގޮވަން މިހުންނަނީ….“ ޝަކީލާ އޮޅުން ފިލުވައިދިނެވެ.
“ ބޮޑުބެދައްތަ ސައިބޯންވީނު….“ ސަލްމާއަށް ޝަކީލާ ފެނުމުން އެހިއެވެ.
“ ނޫނޭ….ޖިނާހް ހޭލީމަ ޖިނާހްއާ އެކީ ސައިބޯނީ….ޝާނީވެސް އެބައުޅެންދޯ؟….“ ކާގެ ތެރެއިން ނުކުތް ޝާނީ ފެނުމާއެކު ޝަކީލާ ބުންޏެވެ.
“ އާނ….ޝާނީ ދެން އުޅޭނީ މިގޭގައޭ…ބޮޑުބެ ދައްތައަކަށް ނޭނގޭތަ ޝާނީ އެއީ މިހާރު އަހަރެންގެ އަންހެނުންނޭ“ ދާދިގާތުގައިހުރި ހަމްޒާ ފޮނިވެލާފައި ބުނެލި ޖުމްލައިން ޝަކީލާގެ ބަސް ހުއްޓުނެވެ.
“ ތި ކޮންއިރަކު ވީކަމެއް؟“ ޔަޤީންނުވެފައި ޝަކީލާ އެހިއެވެ.
“ އަދި މާގިނަ ދުވަހެއްނުވޭ ދޯ ޝާނީ؟…“ ހަމްޒާ ޝާނީއަށް ދޯ ދިން ނަމަވެސް ޝާނީ ޖަވާބެއްވެސް ނުދީ ހިމޭންކަމާއެކު ހުއްޓެވެ. ޝާނީގެ މޫނުމަތިން އެވަގުތު ފެނުނު ފޫހިކަން ޝަކީލާއަށް ފާހަގަ ކުރެވުނެވެ.
“ ބޮޑުބެ ދައްތަ އައުމުގެކުރިން ބޮޑުކަމެއް ނިންމާލީދޯ….“ ޝަކީލާ ހީލަމުން އެހެންބުނި ނަމަވެސް އޭނަގެ ހިތުގައިވަނީ ޝަކުވާއެވެ.
“ އާނ….ނާންނަނީސް ކައިވެނިކުރީ ބޮޑުބެދައްތަމެން އަންނަންދެން މަޑުކޮށްފިނަމަ އެކަން ނުކުރެވިދާނެތީ… އެކަމު ބޮޑުބެދައްތަ ދެރަނުވޭ! ކައިވެނީގެ ހަފްލާ އަދި އޮތީއޭ….ބޮޑުބެދައްތަމެން އައީމަ ނޫނީ ހަފްލާ ނުބާއްވަން މިހުރީވެސް….“ ހަމްޒާ ހެވިފައި އިނދެ ބުނި ނަމަވެސް އެޖުމްލައިގައި ފޮރުވިފައިވާ މާނަ ޝާނީއާއި ސަލްމާއަށް ރަނގަޅަށް ދޭހަވިއެވެ. ހަމްޒާ ހަފްލާ ނުބާއްވާ އެހާ ލަސްކުރީ އެކަމުންވެސް ޖިނާހްއަށާއި ޝާނީއަށް އިތުރު އަނިޔާއެއް ދިނުމަށްކަން އެމީހުންނަށް ރަނގަޅަށް އެނގެއެވެ.
ޝަކީލާ އިތުރު އެއްޗެއް ނުބުނެ ހަމައެކަނި ހިނިތުން ވުމަކުން ފުއްދާލިއެވެ. ޝާނީ ކުއްލިއަކަށް ހަމްޒާއާ އިނުންވީ އޭނައަށް ގަބޫލުކުރަން ދަތި ޚަބަރަކަށެވެ. ޝާނީއާއި ޖިނާހް ކިތަންމެ ސިއްރުން އުޅުނު ނަމަވެސް އެދެކުދިންގެ ލޯބީގެ ގުޅުން ޝަކީލާއަށް ސިއްރުވެފައެއް ނެތެވެ. އެކި ދުވަސްމަތިން އެކި މަންޒަރުތައް އޭނާއަށްވެސް ވަނީ ފެނިފައެވެ. އަދި އެދެކުދިންގެ ގުޅުމަކީ އޭނާ ނުހަނު ރުހޭވެސް ގުޅުމެކެވެ. އޭނާ އިންތިޒާރު ކުރަމުން އައީ ޝާނީ އޭނާގެ ޅީދަރިއެއްގެ ގޮތުގައި އެގެއަށް އަންނާނެ ދުވަހަކަށެވެ. ނަމަވެސް ކަންތައް ވެގެން މިދިޔައީ އޭނާ ހީކުރިގޮތާއި މުޅީން ޚިޔާފަށެވެ. ޖިނާހް ދޫކޮށްލާފައި ޝާނީ ހަމްޒާއާ އިނދެފާނެ ކަމަކަށް ފަހަރެއްގައިވެސް އޭނާ ހީކޮށްފައެއް ނުވެއެވެ.
ނުނިމޭ
