ކުރިޔަށް އޮތް ރިޔާސީ އިންތިޚާބުގައި ވާދަނުކުރެއްވުމަށް އެމްޑީޕީގެ ކުރީގެ ރައީސް ޑރ. މުހައްމަދު މުނައްވަރު ނިންމަވައިފިއެވެ.
ރިޔާސީ އިންތިހާބަށް ކުރިމަތިލާން ހުޅުވާލި މުއްދަތު ހަމަވާން މަދު ވަގުތުކޮޅަކަށް ވެފައި ވަނިކޮށް، އިންތިހާބުގައި ވާދަނުކުރެއްވުމަށް ނިންމިއިރު، އެކަން އޭނާ ހާމަކުރެއްވީ މިއަދު ކުރެއްވި ޓްވީޓެއްގައެވެ.
އޭނާ މިފަހަރުގެ އިންތިޚާބުގައި ވާދަކުރަން ނިންމަވާ އެކަން އިއުލާނު ކުރީ މިދިޔަ މާރިޗު މަހުގެ ފަސްވަނަ ދުވަހުގައެވެ.
އަމިއްލަ ގޮތުން ވާދަކުރެއްވުމަށް 1،500 މީހުންގެ ތާއީދު ސޮއި ހޯއްދެވުމުގެ މަސައްކަތް ވެސް މިދިޔަ މަހުން ފެށިގެން މުނައްވަރު ކުރައްވަމުން ގެންދެވިއިރު، މިއަދު ކުރެއްވި ޓްވީޓެއްގައި އޭނާ ވިދާޅުވީ ރިޔާސީ އިންތިހާބުގައި ވާދަ ނުކުރެއްވުމަށް ނިންމާފައިވާކަމަށެވެ.
މުނައްވަރާއި ހަވާލާދީ ރާއްޖޭގެ ބައެއް ނޫސްތަކުން ބުނެފައިވާ ގޮތުން މުނައްވަރު މިފަހަރުގެ ރިޔާސީ އިންތިޚާބުގައި ކުރިމަތި ނުލައްވަން ނިންމެވީ މިހާރު މި އޮތް ވަގުތުކޮޅުގެ ތެރޭގައި ރައްޔިތުންގެ ޖުމުލަ ތާއީދެއް ހޯއްދެވެން އޮތް ކަމަށް ގަބޫލު ނުކުރެއްވޭތީއެވެ.
އަދި މިފަހަރުގެ އިންތިޚާބުގައި ވާދަނުކުރަން ނިންމިނަމަވެސް އިތުރު ކެންޑިޑޭޓަކަށް ތާއީދުކުރެއްވުމަށް ނިންމާފައި ވާކަން މުނައްވަރު ހާމައެއް ނުކުރައްވައެވެ.
