ރިޔާސީ އިންތިޚާބުގައި އަމިއްލަ ގޮތުން ވާދަކުރައްވާ އަހްމަދު ފާރިސް މައުމޫނަކީ އަމިއްލަ ފައިދާއަށް ޓަކައި ގައުމު ވިއްކާލާނެ މީހެއް ނޫންކަމަށާއި އޭނާއަކީ ދޮގު ހަދައި މަކަރު ހަދައި އޮޅުވައިލާނެ މީހެއް ނޫންކަމަށް ރައީސް މައުމޫން ވިދާޅުވެއްޖެއެވެ.
މިފަހަރުގެ ރިޔާސީ އިންތިޚާބަށް އަމިއްލަ ގޮތުން ކުރިމަތިލައްވާފައިވާ ފާރިޝް މައުމޫނާއި ގުޅޭގޮތުން އެމަނިކުފާނުގެ ބައްޕާފުޅު ރައީސް މައުމޫން ވިދާޅުވީ ފާރިޝް އަކީ އަމިއްލަ ފައިދާއަށް ޓަކައި ގައުމު ވިއްކާލާނެ މީހެއް ނޫންކަމަށާއި އޭނާއަކީ ދޮގު ހަދައި މަކަރު ހަދައި އޮޅުވައިލާނެ މީހެއް ނޫންކަމަށެވެ. އަދި ފާރިޝް އަކީ އަމިއްލަ މަންފާއަށް ޓަކައި ގައުމު ވިއްކައިލައްވާނެ ބޭފުޅެއް ނޫންކަމަށް އެ މަނިކުފާނު ވިދާޅުވިއެވެ.
ފާރިސްއަށް ތާއީދުކުރައްވާކަން ހާމަކުރެއްވުމުގެ ގޮތުން ރައީސް މައުމޫން އާންމުކުރެއްވި ވީޑިއޯ މެސެޖެއްގައި އެ މަނިކުފާނު ވިދާޅުވީ، ކުރިމަތިލައްވާ ހުރިހާ ކެންޑިޑޭޓުންނަށް ވެސް އެ މަނިކުފާނު އިހްތިރާމް ކުރައްވާކަމަށާއި އެއީ ގައުމަށް ވަފާތެރި ބޭފުޅުން ކަމުގައި ގަބޫލުފުޅުކުރައްވާކަމަށް ވެސް ރައީސް މައުމޫން ވިދާޅުވިއެވެ.
އެހެންނަމަވެސް އިންތިޚާބުގައި ވޯޓު ލެވޭނީ އެންމެ ބޭފުޅަކަށްކަން ފާހަގަކުރައްވައި ރައީސް މައުމޫން ވިދާޅުވީ، ފާރިސްއަށް ތާއީދުކުރައްވަން ނިންމެވީ އެއީ އެ މަނިކުފާނުގެ ’އުފަން ދަރިއަކަށްވީތީ‘ ނޫން ކަމަށާއި ފާރިސްއަށް ތާއީދުކުރައްވަން ނިންމެވީ، ފާރިސް، އެ މަނިކުފާނުގެ އުސޫލުތައް ގަބޫލުކުރައްވާތީ ކަމަށެވެ.
މީގެ އިތުރުން އެ މަނިކުފާނު ވިދާޅުވީ ފާރިސްއަށް ތާއީދުކުރައްވަނީ މީގެ ކުރިން އެ މަނިކުފާނު ކުރެއްވި ސިޔާސީ މަސައްކަތްޕުޅުތަކުގައި އެހީތެރިކަން ފޯރުކޮށްދެއްވީ ފާރިސްކަމަށް ވާތީކަމަށާއި އަދި އެއީ ރައީސެއްގެ މަގާމު އަދާކުރުމުގެ ގާބިލްކަން ހުރި ބޭފުޅެއްކަމަށް ވުމުން ކަމަށް ވެސް ރައީސް މައުމޫން ވިދާޅުވިއެވެ.
