ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ރިޔާސީ ބަޔާން އިއްވަވާއިރު އަތްތިލަބަޑި ޖަހާނެ ގޮތް ރައީސް އޮފީހުގެ ކުރީގެ ތަރުޖަމާނު މަބްރޫކް އަޒީޒް ކިޔައިދީފައި ވާ ކަމަށް ރައްޔިތުން މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
ރައްޔިތުން މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) މިހެން ވިދާޅުވެފައިވަނީ ރައްޔިތުންގެ މަޖިލީހުގެ ޖަލްސާގައި އިއްޔެ ވާހަކަދައްކަވަމުންނެވެ. އަދި މީގެއިތުރުން ގާނޫނު އަސާސީގައި ބަޔާންކުރާ ގޮތަށް މަޖްލީސް ހިންގޭނެ ޖާގަ ސަރުކާރުން ނުދޭކަމަށް ވައްޑެވަނީ ވިދާޅުވެފައެވެ.
އިއްޔެގެ ޖަލްސާގައި ވާހަކަ ދައްކަވަމުން ވައްޑެ ވިދާޅުވީ އެމްޑީޕީގެ ޕާލަމަންޓްރީ ގްރޫޕްގެ ބައްދަލުވުންތައް ލައިވްކުރަން ވެސް އަންގައިފައިވާ ކަމަށާއި އަދި ދައްކަވަންވި ވާހަކަވެސް މަބްރޫކް ކިޔައިދޭކަމަށެވެ.
ސަރުކާރަށް ވަރަށް ބޮޑަށް ފާޑުވިދާޅުވަމުން ވައްޑެ ވިދާޅުވީ މަބްރޫކް މާތް މީހެއް ކަމަށް ދެއްކިގެން ތަންތަނަށް އަރާ ވާހަކަ ދައްކަވާއިރު އެމަނިކުފާނުގެ ވަނީ ގާނޫނީ ދައުލަތެއްގެ ގާނޫނީ ހައިސިއްޔަތު ވެސް ނަގާފައި ކަމަށެވެ.
އިއްޔެގެ ޖަލްސާގައި ވައްޑެ ވަނީ ސަރުކާރަށް ވަރަށް ބޮޑަށް ފާޑު ވިދާޅުވެ ވާހަކަ ދައްކަވާފައެވެ.
