ރަމަޟާން މަހަކީ މުޅި އަހަރު ދުވަހުގެ ފާތަތަށް ފޮހެލައި ނަފުސު ތާހިރުކޮށްލަން ލިބޭ ރަނުގެ ފުރުސަތެކެވެ. މި މަހައް ފުރިހަމައަށް ތައްޔާރުވެ، މި މަހުގެ ބޭނުން ހެޔޮގޮތުގައި ހިފުމަށް އަޒުމް ކަނޑައަޅަން ޖެހެއެވެ.
ރަމަޟާން މަހަށް ތައްޔާރުވެވޭނީ ނަފްސުތައް ހެޔޮކަންތަކަށް ހާނުވައި ފާފަތަކުންނާއި މުންކަރާތްތަކުން ނަފްސު ދުރުހެލިކޮށްގެންނެވެ. އެހެން ކަމުން ރޯދަމަހުގެ ބަރަކާތްތެރިކަން ލިބުމަށްޓަކައި މާއްދީގޮތުންނާއި ރޫހާނީ ގޮތުން ވެސް ތައްޔާރުވާން ޖެހެއެވެ.
ރަމަޟާން މަހަކީ ހެޔޮކަމުން ފުރިގެންވާ މައްސަރަކަށްވާއިރު އެމަހުގެ ސަވާބު ފުރިހަމަ ކުރުމަށްޓަކައި ތައްޔާރީތަކެއް ވާން ޖެހެއެވެ. އެކަން ކުރަންޖެހެނީ އާޚިރަތުގެ ކާމިޔާބީ އާއި ބާއްޖަވެރިކަން ލިބިގަނެ، ނަރަކައިން މިންޖުވުމަށެވެ.
ބަރަކާތްތެރި ރަމަޟާން މަހަކީ ހެޔޮކަމުން ފުރިގެންވާ މަހެކެވެ. އަޅުގަނޑުމެންގެ އުޚުރަވީ ހަޔާތް ބާއްޖަވެރިކުރުމަށް ލިބިފައިވާ އަގުހުރި ދުވަސްތަކެވެ. ރަމަޟާން މަހަށް ހަނދުބަލާއިރު ސުވަރުގޭގެ ދޮރުކޮޅުތައް ހުޅުވި ނަރަކައިގެ ދޮރުތައް ބަންދު ކުރެވޭ ހުއްޓެވެ.
މީގެ އިތުރުން ރަމަޟާން މަހަކީ ޤުރުއާން ބާވައިލެއްވުނު މައްސަރުކަމަށްވުމާއެކު އެ މަހުގެ ހެޔޮކަން އެއްހާސްމައްސަރުގެ ހެޔޮކަމަށްވުރެ ބޮޑުވެގެންވެއެވެ. ރަސޫލާ (ސ) ގެ ހަދީސް ބަސްފުޅަށް އިޝާރަތް ކުރައްވާ ހުރިހާ މައްސަރުތަކުގެ ތެރެއިން އެންމެ ބަރަކާތްތެރި މައްސަރަކީ ރަމަޟާން މަހެވެ.
”ރަސޫލާ (ސ) ހަދީސް ކުރައްވާފައި ވަނީ މައްސަރުތަކުގެ ތެރެއިން އެންމެ މާތްވެގެންވާ ބަރަކާތްތެރި މަސް އަތުވެއްޖެއެވެ. ފަހެ، އެމަހަށް މަރުހަބާއެވެ.“
މައުލޫމާތު: ހުކުރު ޚުތުބާ
