ކައިވެންޏެއް ކުރީމެވެ. ނިކަން ލޯބިންނެވެ. ދެތަން ނުވާނޭކަމަށް ބުނަމުން ވަޢުދުތަކާއި އަހުދުތައްވެސް ވީމެވެ. ވަކިނުވާނޭކަމަށް ބުނަމުން އެކުގައި އުޅެން ހުވާތަކެއް ކުރީމެވެ. ހުވަފެންތަކެއްދުށީ ހާސިލްވުމަށް ހިތްއެދޭތީއެވެ. ބަލާލި ކޮންމެދިމާލަކުންވެސް ފެންނަނީ އުފަލާއި ހިތްހަމަޖެހުމެވެ. ލޯތްބާއި އޯގާތެރިކަމެވެ. ތެދުވެރިކަމާއި ވަފާތެރިކަމެވެ. ހީކުރީމެވެ. އަހަރެން ހާދަ ނަސީބުގަދައެވެ. ހުވަފެނުގައިވެސް ނުދެކޭފަދަ ހިތްހަމަޖެހޭ ލޯބިންފުރިގެންވާ ދިރިއުޅުމެކެވެ.
ނަމަވެސް ކަންތައްތައް ބަދަލުވީ މަދު ދުވަސްކޮޅެއްގެ ތެރޭގައެވެ. ފުރަތަމަ ބުނަންފެށީ ނުރުހުމުގެ ބަސްތަކެވެ. ދެން އިސްކުރަންފެށީ އަތެވެ. ބަލާލި މީހަކަށް ބޭރުފުށުން ނުފެންނާނެހެންނެވެ. ފުރަތަމަ މަޑުމަޑުންނެވެ. ދެންކުރިޔަށްވުރެ ބާރަށެވެ. ގޭ މީހުންނަށް ނޭނގޭގޮތައް ގޭ މީހުން ނޫޅޭގަޑީގައެވެ އެވެރުން އަދި ހިތްހަމަ ޖެހުމެއް ނުލިބުނެވެ. ބޭރުފުށުން ފެންނަގޮތައް ފާޅުގައިވެސް އަނިޔާކުރަން ފެށީއެވެ. ހިތްވަރުކުރީ ކިޔަމަންތެރިކަން އަދާކުރަމުންނެވެ. ކެތްތެރިކަން އިސްކުރި އިސްލާހުވާނޭކަމަށް އުއްމީދު ކުރެވުނީމައެވެ.
ހީކުރިގޮތާއި ޚިލާފަށް ކުރާ އަނިޔާވީ އިތުރެވެ. ކެތްކުރަން ކުރި މަސައްކަތްވީ ބޭކާރެވެ. އެކުޑަކުޑަ ކޮށި ތެރޭގައި ހާސްވާންފެށިއެވެ. އެކަމުން މިނިވަންވާން ބޭނުންވިއެވެ. ހިތްހަމަޖެހިގެން ދުނިޔެއަށް ނޭވާލާން ބޭނުންވިއެވެ. އެކޮށި ތެރޭގައި ހޭދަވި ކޮންމެ ވަގުތަކީ ދިރިހުންނާނެކަމުގެ އުއްމީދު ކުޑަވެގެންދިޔަ ވަގުތުތަކެކެވެ. އެކޮށިން މިނިވަންވާން ކުރި މަސައްކަތްވީ ހީކުރިވަރަށްވުރެ އުނދަގޫ ކަމަކަށެވެ. ނަމަވެސް ހިތްވަރު އެލުވައެއް ނުލަމެވެ.
އެތައް ދުވަހެއްވަންދެން ކުރި ބުރަ މަސައްކަތުން ނަސީބު އަތުގައި ހިފީ ކާންދީފައި ކޮށީގައި ތަޅުނުލާ ބޭރަށް ދިޔަދުވަހެއްގައެވެ. ވަގުތުގެ ބޭނުންކޮށް ކޮށިން ނިކުމެ އުދުއްސައިގަތީމެވެ. ދުރަށެވެ. ވަރަށް ދުރަށެވެ. ތިރިކުރީ ހިމާޔަތް ލިބޭނެކަމުގެ ފުރިހަމަ ޔަގީންކަން އޮތް ފަސްގަނޑަކަށެވެ.
އޭގެ އެތައް އަހަރެއްފަހުން މިއަދު އަނެއްކާވެސް އައިސް ކުރިމަތީގައި ތި ހުއްޓުނީ އަހަރެން އެނބުރިދާނެކަމަށް ހީކޮށްހެއްޔެވެ؟ އެހެންވިއްޔާ ތިޔަކުރެވެނީ ކުށްހީއެކެވެ. ބުނެލަން އޮތީ ސޮރީއެވެ. ދެން އެނބުރި ނުދާނަމެވެ. ދިރިއުޅުމަކީ ކޮބާކަން ދަސްވެއްޖެއެވެ. މީ އޭރު ހިފާ ހައްޔަރުކުރި ދޫންޏެއް ނޫނެވެ.
-ނިމުނީ-
