ވަފާތެރި މަވީމޭ 15 ވަނަބައި

ޝައިންގެ- ވަފާތެރި މަވީމޭ- 15 ވަނަބައި

“ ރީނާ…ރީނާ…ދޮރުހުޅުވަބަލަ!…“ ކުއްލިއަކަށް ރަޔާންގެ އަޑުއިވިފައި ރީނާ ސިހުނެވެ. ދެން ހަދަންވީގޮތެއް ނޭނގި އަތްފައި ފިނިވެއްޖެއެވެ. ރަޔާންމެން ބެލި ފިލްމު އެމީހުންވެސް ބެލިކަން އެނގިއްޖެނަމަ ރަޔާން އިންތިހާއަށް ރުޅިއަންނާނެކަން އޭނާއަށް އެނގެއެވެ. އަދި ޚުދު އޭނާވެސް ނުހަނު ލަދުގަންނާނެއެވެ. އަނގައިން ބަހެއްވެސް ނުބުނެ އެއިން ގޮތަށް ރީނާ އިނެވެ. ޝާނީއާއި ލީޒާވެސް ބިރުން ވިރި ވިރި ތިއްބެވެ. ދޮރުގައި ދެފަހަރަކު ޓަކި ޖަހާލުމަށްފަހު ޚަބަރެއް ނުވުމުން ރަޔާން އެނބުރި ދިޔައެވެ. ރީނާމެން ހޭލާއުޅޭ ކަމުގައި ޝައްކުވާތީ ފިލްމުގެ ބާކީބައިވެސް ނުބަލާ އެމީހުން ޓީވީ ނިއްވާލިއެވެ.

ބޭރުތެރޭގެ އަޑުމަޑުވުމުން ޝާނީއާއި އޭނާގެ އެކުވެރިން ސިއްރު ސިއްރުން ބޭރު ބަލާލިއިރު، ޖިނާހް ފިޔަވައި އެހެން އެކަކުވެސް ފެންނާކަށް ނެތެވެ. ހީވާގޮތުން އެމީހުން ކޮންމެވެސް ރޭވުމެއް ރާވައިގެން ބޭރަށް ދިޔައީއެވެ.

“ ޖިނާހް އެކަނި އިނީ….ދާންވީނު ބޭރަށް…“ ޝާނީއާ ދިމާ ބަލާލަމުން ރީނާ ބުނެލިއެވެ.

“ ހަމަ އަސްލުވެސް ޖިނާހް އާ ރައްޓެހިވެގެންތަ ތިއުޅެނީ؟…“ ލީޒާހުރީ އަދިވެސް ޔަޤީންނުވެފައެވެ.

“ ލީޒާއަކަށް ނުފެނޭތަ ދެންމެވެސް ޝާނީ ޖިނާހްއަށް ބަލާލިގޮތެއް….“ ރީނާ އަނެއްކާވެސް ދިމާކޮށްލިއެވެ.

“ ދެން ސާބަހޭ….މަށަށް އެނގޭ އޭރުވެސް ކަލޭމެން މަށަށް މަލާމަތް ކުރާނެކަން…“ ދެރަވެފައި ޝާނީ ބުނެލިއެވެ.

“ މަލާމާތޭ…ކޮންކަމަކާތަ މަލާމަތްކުރަންވީ….އަހަރެން ވަރަށް އުފާވެފަ މިހުރީ….ޖިނާހްއަކީ މިރަށުގަވެސް ނެތްހާ ރަނގަޅު ކުއްޖެއް….ތިދެމީހުން ވަރަށް ގުޅޭ….“ ރީނާ ހިތުގެ އަޑިން ޝާނީމެންގެ ގުޅުމަށް މަރުހަބާކިޔެވެ.

“ ތެދެއް….ޖިނާހްއަށްވުރެ ވަކި ސަޅި ބިޓެއް ނުލިބޭނެ….އަހަރެމެން މިތިބީ އަބަދުވެސް ޝާނީއާއެކު….މީހަކު ހީކޮށްފާނެ އެއްޗަކަށްވެސް ވިސްނާނެ ކަމެއް ނެތް…“ ލީޒާވެސް އޭނާގެ ވިސްނުން ހާމަކުރިއެވެ.

އެކުވެރިންގެ ޚިޔާލު އެނގުމުން ޝާނީ ނުހަނު އުފާވިއެވެ. އެހެންމީހުން އެގުޅުމާމެދު ކޮންމެ ގޮތަކަށް ދުށް ނަމަވެސް އޭނާއަށް އެންމެ ރަނގަޅެވެ. އެކުވެރިންނާއި އާއިލާގެ ރުހުން ލިބުމުން އޭނާއަށް އެނިމުނީއެވެ.

“ އެކަމަކު ތިކަމާ ވަރަށް ދެރަވާނެ މީހަކު ހުންނާނެ….މަ މިހިތަށްއަރަނީ އޭނައަށް ތި ޚަބަރު ލިބުނީމަ ވާނެގޮތެއް…“ ވިސްނަން އިނދެފައި ރީނާ ބުނެލިއެވެ.

“ ހޫމް…މަވެސް ހަމަ ތިހެން މިހިތަށް އަރަނީ….އޭނައަށް ނޫނެކޭ ބުނެފަ، ހަމަ އެގެއަށް ދާން ތިއުޅެނީ…“ ލީޒާވެސް ބުންޏެވެ.

“ ދޮންތަ ބުނި އޭނަ ވަރަށް އަވަހަށް ރަށަށް އަންނަން އުޅޭ ވާހަކަ….އެކަމާ ބިރުން މަ މިހާރުވެސް މިހުރީ…“ ޝާނީވެސް ހުރީ ކަންބޮޑުވެފައެވެ.

“ އަޅާނުލާ….އޭނައަށް ރޭކާނުލަނީސް ކައިވެނިކުރީމަ ނިމުނީ…އޭރުން ހުރެދާނެއްނު ރުޅިގަދަވެފަ…“ ފޫހިގޮތަކަށް ރީނާ ބުނެލިއެވެ.

އެކުދިން އެގޮތުގައި ވާހަކަ ދައްކަން ތިއްބައި އަނެއްކާވެސް ބޭރުން ރަޔާންމެންގެ އަޑުއިވުމުން އެމީހުން ހިމޭންވިއެވެ. އަދި އިތުރަށް ވާހަކަ ނުދައްކާ އެތިބި ގޮތަށް ހިމޭންކަން މަތީ ތިއްބައި ތިންމީހުންނަށްވެސް ނިދުނީއެވެ.

*****

އެކުވެރިންނަށް ޝާނީއާއި ޖިނާހްގެ ގުޅުން އެނގުމުން އެދެމީހުން ބައްދަލުކޮށް އުޅެން ކުރިޔަށްވުރެ ފަސޭހަވިއެވެ. އެކުވެރިންގެ އެހީގައި އެހެންމީހުންނާއި ސިއްރުން ދުވާލުގެ ވަގުތުގައިވެސް އެމީހުން ބައްދަލުކުރަން ފެށިއެވެ. ޚިތާނު ކުރުމުގެ ކަންކަން ނިމުމުން، ރަޔާން އޭނާގެ އެކުވެރިންނާއެކު ދަތުރެއް ރޭވިއެވެ. ރީނާ އާދޭސްކުރުމުން ރީނާއާއި އޭނާގެ އެކުވެރިންވެސް ދަތުރުގައި ބައިވެރިކުރަން ނިންމިއެވެ. އެމީހުން ދިޔައީ ރަށާއި މާދުރުނޫން ހިސާބެއްގައިވާ ވަރަށް ރީތި ފަޅު ރަށަކަށެވެ. ރަށުގެ ގިނަ ޒުވާނުންތަކެއް ބައިވެރިކޮށްގެން ރޭވި ދަތުރުވީ ވަރަށްވެސް ފޯރިގަދަ ދަތުރަކަށެވެ. ޝާނީއާއި ޖިނާހްގެ ގުޅުންވެސް އިތުރަށް ބަދަހިވެ، އެގުޅުން މީހުންގެ ލޯމައްޗަށް ފާޅުވެގެންވެސް ދިޔައެވެ. ޖިނާހްގެ އެކުވެރިން އެކަމާ ނުހަނު އުފާކުރިއެވެ. ނަމަވެސް އެކަމަށް ހަސަދަވެރިވީ ބަޔަކުވެސް ތިއްބެވެ. ޝާނީއަށް ކަޅިއަޅައިގެން އުޅުނު ބައެއް ޒުވާނުން ތިބީ ޖިނާހްގެ ނަސީބާމެދު ނުރުހުންވެފައެވެ.

“ ބުނާތީ އެހިން…ހަމްޒާ ރައްޓެހިވާން އެހީމަ އެމަންޖެ އެއްބަސްނުވި ވާހަކަ…އެކަމު ބަލާބަލަ މިހާރު އެއުޅެނީ ތާކުހުރި މަންމަނު ގަނޑަކާ ރައްޓެހިވެގެން….ތާހިރެއްނު އަޅެ…“ ސަލީމް ކިޔާ ޒުވާނަކު އޭނާގެ ހިތުގައިވާ ރުޅިވެރިކަން އޭނާގެ ގާތް ރަހުމަތްތެރިއެއްގެ ކުރިމަތީގައި ހާމަކުރިއެވެ.

“ ކަލޭ ތިހާ ރުޅިއައިސް ތިހުރީ ކަލެޔަށްވެސް އާނބަސް ނުބުނީމަދޯ…“ ސަލީމްގެ އެކުވެރިޔާ ރިޔާޒް ދިމާކޮށްލިއެވެ.

“ މަ ނޫޅެން….ހަމްޒާ އެކަމާ އުޅޭތީ މަ އަޅާނުލީ…ދެން ބަލަން ހުންނާތި، ހަމްޒާ ރަށަށް އަންނައިރު ވާގޮތް….އެ މަންމަނު ސޮރަށް ހޭއަރުވާލާނެ…“ ވިހަ ގޮތަކަށް ހީލަމުން ސަލީމު ބުނެލިއެވެ.

“ ސަލީމް…މަ ބުނަން ވާހަކައެއް….އެމީހަކަށް އެނގޭނީ އެމީހަކު ރަށްޓެހިވާނެ މީހެއް….ލޯބިވާނެ މީހެއް….ބުނެއެއްނު ލޯތްބަކީ ކަނު އެއްޗެކޭ….އޭގެ ހެކި މިފެންނަނީ….ކަލޭ ދެން އެކަމާ އަޅާނުލާ ހުރެބަލަ! “ ރިޔާޒް ސަލީމަށް ވިސްނައިދޭން އުޅުނެވެ.

“ އާނ ދެން ކަލޭ ތިއުޅެނީ ބޭނުން މީހާއާ ރައްޓެހިވެގެން….ކަލޭ ދެން ކޮންކަމަކާ ވިސްނަން ޖެހޭނީ…“ ނުރުހިފައި ސަލީމް ބުންޏެވެ. ރިޔާޒްގެ ފަރާތުން އެއްބާރުލުން ނުލިބުނު ނަމަވެސް، ޖިނާހްއާއި ޝާނީގެ ލޯބި ކާމިޔާބުވިޔަ ނުދޭން އޭނާއަށް ކުރެވުނުހައި ކަމެއް ކުރުމަށް ސަލީމް އަޒުމް ކަނޑައެޅިއެވެ. ޝާނީގެ އުމުރުން އެންމެ ބާރަ އަހަރުން ފެށިގެން އޭނާ އެއަންނަނީ ޝާނީއަށް ކަޅިއަޅަމުންނެވެ.

ސަލީމް އޭނާއަށް ވީ އެންމެ އަވަހަކަށް ހަމްޒާއަށް އެޚަބަރުދޭން ނިންމިއެވެ. އޭނާ ދެފަހަރެއްގެ މަތިން ހަމްޒާ އުޅޭ ގެޔަށް ގުޅައިގެންވެސް ދިމާވާ ގޮތެއް ނުވިއެވެ. އެހެންކަމުން އޭނާ ނިންމީ، މާލެގޮސް ހަމްޒާއާ ބައްދަލުކޮށް އެޚަބަރު ދޭށެވެ. އޭނައަށް ކަމެއް ނުކުރެވުނު ނަމަވެސް ހަމްޒާއަށް ކުރެވޭނެ ކިތަންމެ ކަމެއް ހުންނާނެކަން އޭނާއަށް އެނގެއެވެ.

*****

އުފާވެރިކަމާއެކު ދުވަސްތައް ވޭތުވަމުން ގޮސް ޗުއްޓީ ނިމި، އެކުވެރިންނާ ވަކިވާ ވަގުތު ޖެހިއްޖެއެވެ. ރީނާއާއި ލީޒާ ދާތީ ޝާނީހުރީ ދެރަވެފައެވެ.

“ ހާދަ ފޫހިވާނޭ ތިދެމީހުން ދިޔައީމަ…“ ދެރަވެލާފައި ޝާނީ ބުންޏެވެ.

“ ކޮން ފޫއްސެއްވާނީ….މިހާރު އެހުރީނު ފޫހި ފިލުވައިދޭނެ މީހެއް….“ ރީނާ ދިމާކޮށްލިއެވެ.

“ އާނ…މިހާރު ދެން އަހަރެމެން ދޯ ފޫހިވާންވީ….ހުސްކޮށް މިތިބީ އަހަރެމެން ވިއްޔަ…ބިޓެއް ނުލިބިފަ…“ ލީޒާވެސް އެއްބައިވިއެވެ.

ޝާނީ އިތުރަށް އެއްޗެއް ނުބުނެ ހިމޭންވީ އެމީހުންގެ ކުރިމަތީގައި އޭނާއަށް ކުރި ނުލިބޭނެކަން އެނގޭތީއެވެ.

*****

ހަލަބޮލި މަޖާ ދުވަސްތަކަކަށްފަހު އަނެއްކާވެސް ރަށުތެރެ ހިމޭން ވެއްޖެއެވެ. މަގުތައް ފަޅުވެއްޖެއެވެ. އެހެނަސް ޝާނީއާއި ޖިނާހްގެ ލޯބީގެ ގުލްޒާރުގެ އާރޯކަން ދުވަހެއް ދުވަހަކަށް ދިޔައީ އިތުރުވަމުންނެވެ. ދެމީހުންގެ ބައްދަލުވުންތައް އިތުރުވިއެވެ. ދެމީހުންގެ މެދުގައި ބަދަލުކުރެމުން ދިޔަ ނަޒަރުގެ މެސެޖްތަކުގެ ބަދަލުގައި ދެމީހުންގެ މެދުގައި ލިޔެގެން މެސެޖް ބަދަލު ކުރެވެން ފެށިއެވެ. ބައްދަލުވުންތަކުގައި ދެމީހުންގެ މެދުގައި ދެކެވޭ ވާހަކަތައް ލިޔާނެ ފޮތެއް ޝާނީ ގެންގުޅެން ފެށިއެވެ. ދެމީހުން އެކަކު އަނެކަކަށް ބުނަން ބޭނުންވާ މެސެޖްތައް ފޮތުގައި ލިޔަމުން ދިޔައެވެ. ފޮތް ނުގެނެވޭ ދުވަސް ދުވަހު ވެލިގަނޑުމަތީގައި ލިޔެއެވެ. ބައެއްފަހަރު ޖިނާހް އެފޮތުގައި ރީތި ކުރެހުންތަކުންވެސް މެސެޖްތައް ލިޔެހަދައެވެ. ޝާނީ ބުނާ ކޮންމެ އެއްޗެއް ކުރަހައިދީ ހަދައެވެ.

ދެމީހުންގެ ލޯބި އޭގެ ކުރިބޯށީގައި ވަނިކޮށް، ހަމްޒާ ރަށަށް އައެވެ. ހަމްޒާއަށް އެޚަބަރުވަނީ ސަލީމްގެ ފަރާތުން ލިބިފައެވެ. ނަމަވެސް އެކަމެއް ޖިނާހްއަކަށް އަދި ޝާނީއަކަށްވެސް ރޭކާނުލައެވެ. ހަމްޒާ އައުމުން ޝާނީ އެގެއަށް ދިއުން މަދުކުރިއެވެ. ކޮންމެހެން ދާން ޖެހިގެން ނޫނީ ނުދެއެވެ. ނަމަވެސް ހަމްޒާ ދިޔައީ ޝާނީއަށް ފާރަލަމުންނެވެ. އޭނާ ރަށަށްއައީ ހިތުގައި ވަރުގަދަ ރޭވުމެއް ރާވައިގެންނެވެ. ކޮންމެ ގޮތެއް ހަދާފައިވެސް އެރޭވުން އޭނާ ކާމިޔާބު ކުރާނެއެވެ.

އެއްދުވަހެއްގެ ހަވީރުގެ ވަގުތެވެ. ޝާނީ، އޭނާގެ މަންމަގެ އެދުމަކަށް ސަލްމާމެންގެ ގެޔަށް ދިޔައެވެ. ހަމްޒާ އުޅޭތީ އޭނާ އެގެއަށް ވަންނަނީ ވަރަށް ވިސްނައިގެން ފިލަފިލައިގެންނެވެ. އެގެއަށް ވަތްއިރު ނަސީބަކުން ހަމްޒާ ފެންނާކަށް ނެތެވެ. އޭނާ އެގެއަށް އައި ބޭނުން ފުދުމުން ގެއިން ނުކުތްއިރު، މޫސުން ގޯސްވެ އުޑުމަތިވަނީ ބަނަވެފައެވެ. ވައިގަދަވެ ވާރޭވެހުމުގެ އިންޒާރު ދޭންފެށިއެވެ. އޭނާ ހަލުވި ފިޔަވަޅު ތަކެއްގައި ގެޔާ ދިމާއަށް މިސްރާބުޖެހީ ބޯމަތިވަމުން އަންނަ ވިލާގަނޑުން ސަލާމަތްވެގެން އަވަހަށް ގެޔަށް ދެވޭތޯއެވެ. ނަމަވެސް ތަންކޮޅަކަށް ދެވުނުތަނާ ވާރޭވެހެން ފަށައިފިއެވެ. އޭނާ ދުއްވައިގަތީ ދެންވެސް ނުތެމި ގެޔާ ހަމައަށް ދެވޭތޯއެވެ. ނަމަވެސް، ވާރޭ ބޯކޮށްލުމުން ދެން ގެޔަށް ނުދެވޭނެކަން އޭނާއަށް ޔަޤީންވިއެވެ. އޭނާ އައިކޮޅަށް އެނބުރި ދުވެގޮސް ސަލްމާމެންގެ ގެޔަށްވަތްއިރު އޭނާގެ ހެދުމުން ބޮޑުބައެއްވަނީ ތެމިފައެވެ. އޭނާ ގޭތެރެއަށްވެސް ނުވަދެ، ގޯތިތެތޭގެ އެއްކޮޅުގައިވާ އުނދޯލިގެޔަށް މިސްރާބުޖެހީ ގޭތެރެއިން ހަމްޒާއާ ބައްދަލުވެދާނެތީއެވެ.

އޭނާ އަސްކަނިދޮށުގައި މަޑުކޮށްލައިގެން ހުރިއިރު، ވަޔާއެކު އަންނަ ފެންތިކިތައް މޫނުގައި ޖެހުމުން ހީކަރުވާގޮތްވިއެވެ. އަސްކަނިދޮށުން ބުރަމުންދިޔަ ފެންތިކިތަކުން ސަލާމަތްވުމަށްޓަކައި އޭނާ އެތެރެއަށް ޖެހިލައި އުނދޯލީގައި އިށީނެވެ. އޭރު އުނދޯލީގެ ބިއްދޮށުގައި ހުރި ހަމްޒާގެ ނަޒަރުވަނީ ޝާނީއަށް ހުއްޓިފައެވެ.  ދުވެފައި އައިސް ޝާނީ ވަތްއިރުވެސް އޭނާހުރީ އެތާނގައެވެ. އުދޯލި ބިތްދޮށުގައިހުރި ރޯނެއްގައިވާ އޭނާގެ ޓީޝާޓެއް ބަލާ އައި ވަގުތު ވާރޭ އޮއްސާލުމުން އޭނާ މަޑުކޮށްލައިގެން ހުރީއެވެ. ބޯވާރޭގެ ތެރެއިން އައިސް ވަތްއިރު ޝާނީއަށް އޭނާ ނުފެނުނީއެވެ.

ތެމިފޯވެފައިވާ ތުނިހެދުމުން ޝާނީގެ ވަނާތައް ހާމަވަމުން ދިޔައެވެ. ޖެހެމުންދިޔަ ފިނިފިނި ވައިރޯޅީގެ ސަބަބުން، ހީކަރުވައިގަނެގެން ދެއަތް ގަޔާލައި ބޮނޑިކޮށްލައިގެން ޝާނީ އިންއިރު ހަމްޒާ ދަހިވެތި ނަޒަރަކުން ޝާނީއަށް ބަލަމުން ދިޔައެވެ. ވެހެމުންދިޔަ ވާރޭ ހިނދެއް ހިނދަކަށް ބޯކުރަމުން ދިޔައިރު ޖައްވުގެ ފުސްކަންވެސް ދިޔައީ އިތުރުވަމުންނެވެ. ކުރިމަތިން ފެންނަން އޮތް މާބަގީޗާގައިވާ މާތައްވެސް ފެންތިކިތަކުގެ ހަމަލާތަކަށް ކެތްނުވެގެން އުޅޭހެން ހީވެއެވެ. ވާރޭގެ ހިތްގައިމު އަޑުގެތެރެއަށް ހިތްދޫކޮށްލައިގެން ޝާނީ އިނީ ޖިނާހް އެތަނަށް އަންނާނެ ނަމައޭ ހިތަށްއަރާ ހާލުގައެވެ. ދެމީހުން އެކީގައި ވާރޭގައި ތެމިލާހިތް އޭނާ ވިއެވެ. ޝާނީ ޚިޔާލަށް ގެއްލިފައި އިންދައި މީހަކު އައިސް އޭނާއާއި ދާދިގާތުގައި ހުއްޓުނުހެން ހީވެގެން ސިހިފައި ބަލާލިއިރު އެއީ ހަމްޒާއެވެ. ކުއްލިއަކަށް ޝާނީއަށް އިންތަނުން ތެދުވެވުނެވެ. ޝާނީ އެތަނުން ދިއުމަށް ހިތަށް އެރި ނަމަވެސް، އޭނާއަށް ފިޔަވަޅެއްވެސް އަޅާނެ ފުރުސަތެއް ނުލިބުނެވެ. ކުއްލިއަކަށް ފުރަގަހުން ހަމްޒާ އޭނާގެ އުނަގަނޑުގައި އަތްއަޅުވާލަމުން ގާތަށް ދަމާލުމާއެކު ހަމްޒާގެ މޭގައި އޭނާ ތަތްވިއެވެ. އެވަގުތު ގަތްބިރުން އޭނާގެ ނޭވާވެސް މޭގެ ތެރޭގައި ތާށިވިއެވެ.

“ އަހަރެންނާ ފިލައިގެންތަ ތިއުޅެނީ؟…“ ހަމްޒާގެ ހޫނު ނޭވާ އެޅޭހިސާބަށް މޫނު ކައިރިކޮށްލަމުން ވައިއަޑުން ބުނެލިއެވެ. ޝާނީ ޖަވާބެއްވެސް ނުދީ އަވަސް އަވަހަށް ހަމްޒާގެ އަތްދަށުން ދެމިގަންނަން މަސައްކަތްކުރިއެވެ. ނަމަވެސް ހަމްޒާ އޭނާގެ ދެއަތުން ޝާނީގެ އުނަގަނޑުގައި ވަށާލަމުން ކުރިޔަށްވުރެވެސް ބޮޑަށް ގަޔާ ކައިރިކޮށްލިއެވެ. ބިރުންގޮސް ޝާނީއަށް ރޮވޭގޮތްވިއެވެ.

“ ދޫކޮށްލާ!…“ ތުރު ތުރުއަޅާ އަޑަކުން ޝާނީ ބުނެލިއެވެ.

“ ދޫކުރާހިތެއް ނެތް….މުޅި އުމުރަށްވެސް މިހެން ހުންނަން ބޭނުމީ…“ ޝާނީއާއި މޫނު ކައިރިކޮށްލަމުން ހަމްޒާ ބުނެލިއެވެ. ޝާނީ ހަމްޒާގެ އަތް ނެއްޓޭތޯ މަސައްކަތްކުރަމުން ދިޔައިރު، އޭނާގެ ހިތް ބާރުބާރަށް ތެޅެމުން ދިޔައެވެ. ކޮންމެވެސް މީހަކު އެތަނަށް އައިސް އޭނާ ސަލާމަތް ކުރާނޭ ނަމައޭ ހިތަށްއެރިއެވެ. ހަމަ އެވަގުތު ނުހަނު ބާރަށް ދުވެފައި އައިސް ޖިނާހް ގޯތިތެރެއަށް ވަތް މަންޒަރު އޭނާއަށް ފެނުނެވެ. ނަމަވެސް ޖިނާހްއަކަށް އެމީހުނެއް ނުފެނެއެވެ. އޭނާ އެދިޔަގޮތަށް ގޭތެރެއަށް ވަދެގެން ދިޔައީއެވެ.

“ ޖިނާހް!“ އޭނާއަށް ބޭއިޚްތިޔާރުގައި ޖިނާހްއަށް ގޮވާލެވުނެވެ. ނަމަވެސް އެއަޑު ޖިނާހްއަށް ނީވޭނެކަންވެސް އޭނާއަށް ރޭކާލީ އިރުކޮޅެއްފަހުންނެވެ. ވަގުތުން އޭނާގެ ލޮލުން ކަރުނައައެވެ.

“ އެކަހަލަ މީހަކުދެކެތަ ލޯބިވެގެން ތިއުޅެނީ؟…ހާލެއްގަ ޖެހިގެން ގޮވިޔަސް އަޑުނީވޭ….ލޯބިން ގޮވާވެސް ނުލެވޭފަދަ ބީރު މަންމަނަކާތަ ހިތާވެގެން ތިއުޅެނީ؟…ތިހާ ލޯބި ކުއްޖަކާ ނުވެސްގުޅޭ އެކަހަލަ ނުކުޅެދޭ މީހަކު…ތި ލޯބި ކުއްޖާއާ ގުޅެނީ ހަމަ އަހަރެން….ތީ އަހަރެންގެ މީހެއް…“ ހަމްޒާ ކިތަންމެ މަޑުން ވާހަކަދެއްކި ނަމަވެސް އޭނާގެ ކޮންމެ ލަފްޒަކީވެސް ބިރުވެރި އިންޒާރެކެވެ. ހަމްޒާއަށް އެދެމީހުންގެ ގުޅުން އެނގިފައިވާކަން އެނގުމުން ޝާނީ އިތުރަށް ބިރުގަތެވެ.

“ ހެޔޮނުވާނެ އަހަރެން ދޫކޮށްލާ!…އާދޭސްކޮށް މިބުނީ އަހަރެން ދޫކޮށްލާ!…“ ޝާނީއަށް ރޮވެންފެށިއެވެ. ނަމަވެސް އޭނާގެ އާދޭހުގެ އަޑު ވާރޭގެ އަޑާއި އެކުވެގެން އޮބިގެން ދިޔައީއެވެ. ހަމްޒާ ގުދުވެފައި ޝާނީ ދެކޮޅު ހަދަހަދާ ހުއްޓައި ޝާނީގެ ކޯތާފަތުގައި ބޮސްދިނެވެ. ޝާނީ އޭނާގެ އޭނާގެ މޫނު ހަމްޒާއާ ދުރަށް ޖައްސާލިއެވެ. އަދި ހަމްޒާގެ އަތުގައި ވަރަށް ބާރަށް ވިކައިގަތެވެ. ހަމްޒާއަށް ތަދުވުމުން އޭނާ ރުޅިއައިސްގެސް، ޝާނީ އޭނާއާ ވީފަރާތަށް އަނބުރާލިއެވެ. އަދި ޝާނީގެ ދެއަތް ފުރަގަހަށް ގެންގޮސް ހިފަހައްޓާލަމުން، ޝާނީގެ ތުންފަތުގައި ގަދަކަމުން ބޮސްދިނެވެ. އެއްފަހަރުން ނުވެގެން އެތައްފަހަރަކު ތަކުރާރުކުރިއެވެ. ޝާނީއަށް ގިސްލާރޮވުނެވެ.

“ ދެންވެސް ގަދަ ނުހަދާތި!….ކިތަންމެ ގަދަ ދެއްކިޔަސް އަހަރެން ބޭނުން ކަމެއް ކުރާނަން….ތީ އަހަރެންގެ މިލްކެއް…އެކަން ހަނދާން ނައްތާނުލާތި!…“ ރުޅިވެރިކަމާއެކު ހަމްޒާ ބުނެލިއެވެ. ޝާނީގެ ރުއިން ބާރުވާން ފެށުމުން ހަމްޒާ އޭނާ ދޫކޮށްލިއެވެ. އެއާއެކު ރުވާފައި ދޫކޮށްލި ތީރެއްފަދައިން ހަލުވިކަމާއެކު ޝާނީ ދުވެފައި އެގެއިން ނުކުތެވެ. ވާރޭގެ ތެރޭގައި ޝާނީ ދިޔަ މަންޒަރު ބަލަންހުރެފައި ދަތްކުނޑި ވިކާލަމުން ހަމްޒާ ގޭތެރެއަށް ވަނެވެ.

ތެމިފޯވެގެން ވޭރެތެރޭގައި ދުވަމުން އައި ޝާނީގެ ލޮލުން ހޯސްލާފައި ކަރުނަ އޮހެމުން ދިޔައެވެ. އޭނާގެ ބަލިކަށިކަމާއި ނިކަމެތިކަމުގެ ސަބަބުން މިއަދު އޭނާ އިންތިހާއަށް ދެރަވެ، އަމިއްލަ ނަފްސުދެކެ ރުޅިވެސް އައެވެ. ހަމްޒާއަށް އެހާފަސޭހައިން އޭނާގެ ހަށިގަނޑުގެ މައްޗަށް ބާރުފޯރުވުނީ ކީއްވެގެން ހެއްޔެވެ؟ ޖިނާހް އޭނާ ސަލާމަތްކުރަން ނައީ ކީއްވެގެން ހެއްޔެވެ؟ އެއްވެސް މީހަކަށް އޭނާ ރުއިއަޑު ނީވުނީ ކީއްވެގެން ހެއްޔެވެ؟ އިވޭނީވެސް ކޮންފަދައަކުން ހެއްޔެވެ؟ އުނދޯލިގެއާއި އެންމެގާތުގައި ހުންނަނީ ޖިނާހްގެ ކޮޓަރިއެވެ. އޭނާ ކިތަންމެ ވަރަށް ރުޔަސް ޖިނާހްއަށް އަޑުއިވޭނެ ހެއްޔެވެ؟

ތެމި ފޯވެގެން އައިސް ކޮޓަރިއަށް ވަތްގޮތަށް އެނދުމައްޗަށް ވެއްޓި އޮވެ، އެތައްއިރެއް ވަންދެން އޭނާ ރުޔެވެ. އަމިއްލަ ނަފްސާއި އެތައް ޝަކުވާއެއް ކުރިއެވެ. މިހާތަނަށް ޚުދު ޖިނާހްވެސް އޭނާގެ ހަށިގަނޑުން އުފަލެއް ހޯދާފައެއް ނުވެއެވެ. އޭނާ އެފަދަ ފުރުސަތެއް ޖިނާހްއަކަށްވެސް ނުދެއެވެ. ވީއިރު ހަމްޒާއަށް އެފުރުސަތު ލިބެންވީ ކީއްވެގެން ހެއްޔެވެ؟ ހަމްޒާގެ ކުރިމަތީގައި އޭނާ އެހާބަލިކަށިވީ ކީއްވެގެން ހެއްޔެވެ؟

ހަމްޒާގެ ނުބައިކަމުގެ ވާހަކަ ޖިނާހް ގާތުގައި ބުނަން އޭނަ ބޭނުންވިއެވެ. އޭރުން އެކަމަށް ހައްލެއް ލިބިދާނެއެވެ. ނަމަވެސް ޖިނާހްއަށް ކުރެވޭނެ ކަމެއް އޮންނާނެބާއޭ އޭނާގެ ހިތަށްއެރިއެވެ. ޖިނާހްއަކީ އެގޭގައި ނޯކަރެއްފަދަ މީހެކެވެ. އަމުދުން ހަމްޒާގެ ކުރިމަތީގައި އެއްވެސް އަގެއް ނެތް ނިކަމެއްޗެކެވެ. އެއްވެސް އާރެއް ބާރެއްނެތް މީހެކެވެ. އެގޭގައި ހިނގަނީ ހަމްޒާގެ ވެރިކަމެވެ. ހަމްޒާގެ މައިން ބަފައިންވެސް އޭނާއާ ދެކޮޅަށް ބަހެއް ނުބުނާނެއެވެ. ވީއިރު ޖިނާހްއަށް ކުރެވޭނީ ކީއްހެއްޔެވެ؟ އޭނާގެ ދޮންތަ ގާތުގައި ބުންޏަސް ދޮންތައަށްވެސް ކުރެވޭނެ ކަމެއް ނޯންނާނެކަން އޭނާއަށް އެނގެއެވެ. ދޮންތައަކީވެސް އޭނާ ފަދަ ބަލިކަށި ނިކަމެތި އަންހެނެކެވެ.

ޝާނީ ދެން ހަމްޒާ ފެންނަ ހިސާބަށްވެސް ނުދިއުމަށް އަޒުމް ކަނޑައެޅިއެވެ. އެހެންކަމުން، އެގެއަށްދާން ޖެހޭ ކޮންމެ ފަހަރަކު ކޮންމެވެސް ބަހަނާއެއް އޭނާ ދައްކައެވެ. އޭނާ އެގޮތުގައި ދުވަސްކޮޅަކެއް ހޭދަކުރި ފަހުން، ހަމްޒާ އެގެއަށް އަންނަން ފެށިއެވެ. އެކަމުގެ ސަބަބުން ޚުދު އޭނާ އަމިއްލަ ގޭގައިވެސް ހުންނަން ބިރުގަންނަން ފެށިއެވެ. ހަމްޒާގެ ކޮންމެވެސް ގޯނާއެއް ލިބިދާނެ ކަމަށްޓަކައި އޭނާ ހުންނަނީ ސިހި ސިހިއެވެ. ހަމްޒާ އެގެއަށް އަތުވެއްޖެނަމަ ކޮޓަރިން ނުނުކުމެވޭތޯ އޭނާ ބަލައެވެ. ނަމަވެސް އޭނާގެ މަންމަ ކޮންމެވެސް ބަހަނާއެއްގައި އޭނާ ނެރެއެވެ. އޭނާގެ އަތުން ހަމްޒާއަށް ޖޫސްދީ ސައިދީ ހަދައެވެ. އެފަދަ ކޮންމެ ވަގުތެއްގައި އޭނާ އިންތިހާއަށް ރުޅިއާދެއެވެ. ހަމްޒާގެ މޫނުމަތިން ފެންނަ ފަތަހައިގެ ހިނިތުންވުމުގެ ސަބަބުން އޭނާގެ ހިތް އަނދައިގަނެވެ. މަންމަ ގޮވުމުން އަޑުނީވޭކަމަށް ހަދައިގެންވެސް ކިތަންމެ ފަހަރަކު އޭނާ އޮވެއެވެ. ބަނޑުގައި ނޫނީ ބޮލުގައި ރިއްސާކަމުގައި ބަހަނާވެސް ދައްކައެވެ. އަނެއްބައި ފަހަރު ސިއްރު ސިއްރުން ގެއިން ބޭރަށްވެސް ދެއެވެ. މިފަދަ އެތައް ގޮތަކުންވެސް ހަމްޒާގެ ކިބައިން ސަލާމަތްވުމަށް އޭނާ މަސައްކަތްކުރެއެވެ.

އަނެއްކޮޅުން ޖިނާހްއާއި ބައްދަލުވުމަކީވެސް މިހާރު ފަސޭހަކަމެއް ނޫނެވެ. މިހާރަކަށް އައިސް ޖިނާހް އުޅެނީ އަބަދުވެސް ކޮންމެވެސް ކަމެއްގައި އަވަދިނެތިއެވެ. ފިހާރައިގެ ކޮންމެވެސް ކަމެއްގައި ނޫނީ ގޭތެރޭގެ ކަމެއްގައެވެ. ފަތިހު ޖިނާހްއާއި ބައްދަލުކޮށްލާ ގޮތަށް  ދެން ލޮލަށްވެސް ނުފެންނަ ދުވަސް ދުވަސް ދެއެވެ. ޖިނާހްމެންގެ ގެޔަށް ޝާނީ ނުދާތީ އެކަމުގެ ޝަކުވާ ޖިނާހް ކުރުމުން ހަޤީޤަތް ކިޔައިދޭން ޝާނީ ބޭނުންވިއެވެ. ނަމަވެސް، އޭރުން ޖިނާހް ދެރަވާނެވަރު ހިތަށްއަރާފައި ކިޔައިދޭކަށް ނުކެރުނެވެ. އޭނާ ދެއްކި ބަހަނާއަކީ ހަމްޒާގެ ބައްޕަމެން އައުމުން ގޮސް އުޅެން ޖެހިލުންވަނީ ކަމުގައެވެ.

ދުވަސްތައް ފާއިތުވަމުން ދިޔަ ވަރަކަށް ޝާނީގެ ކަންބޮޑުވުން އިތުރުވަމުން ދިޔައެވެ. ހަމްޒާ އޭނާގެ ރޭވުންތައް ރާވަމުން އޭނާއަށް ޝާނީ ލިބޭނެ މަގުފަހި ކުރަމުން ދިޔައެވެ. ޝާނީގެ މައިން ބަފައިންގެ ރުހުން އޭނާ ހޯދިއެވެ. އެމީހުންގެ ކުރިމަތީގައި ނުހަނު ރަނގަޅުމީހެއްގެ ގޮތުގައި އުޅެމުން ދިޔައެވެ. އެމީހުންނަށް އެކިގޮތް ގޮތުން އެހީވަމުން ދިޔައެވެ. އަމިއްލައަށް ފެނިގެން ކަންކަން ކޮށްދެމުން ދިޔައެވެ.

ނުނިމޭ